الفصل التاسع

طبعا " أنا ح أتابع مع كباشي للوالدة والبيت الولوف .. واشوف ذاتو الحصل بيوراي هناك شنو ..

لاني زي ماحكيت ليكم .. رجعت لي احداث ناس هاشم بي أثر رجعي .. يعني الليلة ياهو ده اليوم

القال فيهو سعد ماشي لي عمتو بكرة ..

اتصل كباشي على اختو نهى .. وه في الطريق للبيت ..

نهى لمن شافت رقمو قالت .. ياحليلو كباشي .. وفتحت الخط ..

قالت ليهو الو ياكباشي ..

قال ليها نهى كيف الحال ..

نهى: الحمد لله ياكباشي .. انت كيف صحتك .. وكيف هاشم اخوي ..؟

كباشي: كويس هاشم الحمد لله كلنا تمام .. مافي حاجة .. امي كيفها

نهى: امي تبكي الليل والنهار .. وقلبها محروق ونحن ماعارفين نعمل ليها شنو؟

قال ليها خلاص انا الليلة جاي ..

قالت ليهو .. عليك الله؟؟ ماتغش علي .. انا في المواصلات هسي بقوم ازغرد ..

قال ليها سيبي الهبالة يابت ..

المهم وصفت ليهو البيت الجديد .. وهو في الطريق

طبعا " نهى ماصدقت طوالي اتصلت علي امها .. وقالت ليها. امي اديني البشارة .. تدفعي كم؟ عندي

ليك خبر خطير ..

امها قالت لها خبر شنو يابت؟ احكي النسمعك ماتقطعي لي قلبي ..

قالت ليها كباشي اخوي جاي عليكم في البيت ..

امها قالت ليها بسسسسم الله. هسي ده خبر سمح ..؟ مايجينا ولادايرين وشو .. ههه جنس احباط

واحراج لي نهى ..

نهى قالت ليها عليك الله يا امي ما تدعي احساس ماحقك. ولدك جاييك قابليهو كويس .. مادام

جاي .. حاولي احتضيهو بي عطف الام.

قالت ليها امشي على جامعتك خليها المواعظ.

قالت ليها انا جاية راجعة هسي .. بس عندي شتات بشيلن وبجي قالبة ... انا مشتاقة لي اخوي ..

عايزة اموت واشوفو .. يلا باي يا امي.

وقفلت الخط ..

وضربت لي سعد .. قالت ليهو سعد انت وصلت الورشة؟ قال ليها ايوة. انا شغال .. قالت ليهو

سعد كباشي اخوي جاي.؟

قال ليها القال ليك منو؟ ..

قالت ليهو اتصل علي براهو قال في الشارع .. قال ليها مرحب بيهو كان ما شالو بيت الايجار. بنأجر

ليهو شقة مفروشة ..

قالت ليهو سعد عليك الله سيب التريقة .. هسي نحن في مشكلة.

قال ليها مشكلة شنو؟

قالت ليهو .. انت عارف امي قلبها محروق على اولادها. بس هسي شكلها مقوية راسها .. وماعايزة

تستقبل كباشي .. عليك الله خلي اي حاجة في يدك وامشي البيت حل القضية دي ..

قال ليها بالجد؟ قالت ليهو والله زي مابحكي ليك ..

سعد قفل الورشة سريع وجا البيت .. لقى كباشي لسع ماوصل ..

وقعد يتونس مع امو زي الماعارف حاجة ..

امو قالت ليهو .. ياسعد؟ كباشي قالو جاي في الشارع ..

قال ليها طيب تمام ربنا يجيب هاشم كمان .. صراحة انا اشتقت لاخواني ..

قالت ليهو بعد العملوه فيك كلو؟

قال ليها يا امي دي اقسام ومقادير ..

قالت ليهو بس انا الولد التليفة ده ما دايرة اشوفو كلو كلو .. شوفلو صرفة جاي ولا جاي مايعرض

علي في وشي ..

قال ليها يا امي الله يرضى عليك انتي علمتينا سلامة النية .. وبياض القلب .. انتي زولة قلبك زي قلب

العصفور مابعرف يشيل الحقد والكراهية ..

قالت ليهو ياسعد ياولدي في ام بتكره جناها؟ انا بس زعلانة في الظلم الظلموك ليهو .. وخلوك براك

في مهب الريح وحياتك كلها وقفت وانت حامي امك واختك ..

قال ليها معليش يا امي بس انتي ابسمي وقشي دموعك دي .. عشان مايتأثر لمن يشوفك بتبكي ..

في النهاية ده اخوي الصغير .. وانتي حبيبة قلبي يالوحيدة ..

شوية كدا وكباشي دق الباب .. مشى سعد فتح ليهو الباب .. وسلم عليهو بكل فرحة .. وابتسامة ..

وكباشي خجلان لامن ماقادر يعاين ليهو في وشو .. سعد مسكو من كتفو كدا وحضنوعليهو .. وقال

ليهو الراجل عمرو مابخيب .. انت اخوي انا .. وكباشي عيونو محمرات وما قادر يتكلم .. شوية كدا

وسالن منو دمعتين..

سعد مسكو قشاهن ليهو كدا .. وقال ليهو ماتتعاور .. هسي امي تشوفك بتبكي بتتالم .. خليك

عادي .. (سبحان الله)

ياسلام عليك يا ابو السعود .. ياسلام .. ياخي احييك انا والله ..

المهم ..

لمن كباشي دخل على امو .. يعني دي اول مرة يعدي من امو فترة بتاعة شهر وشوية ..

لمن شاف امو ما اتمالك روحو .. بس قام جاري عليها كدا ومسكها .. وبقول ليها انا أسف يا امي انا

اسف .. وهي تبكي وترصع فيهو في يدو كدا براحة .. وبتقول ليهو .. ليه مشيت مننا؟ ليه مشيت

مننا ؟؟ .. وفي النهاية حضنتو عليها كدا بحب الام المافيهو اي تزوير ولا نفاق ..

غايتو كان مشهد يبكي الحجر ..

والحمد لله قابلتو كويس بعد كلام نهى وسعد واتخلت عن العناد داك واتكلمت معاهو عادي .. كانه

ماعمل حاجة .. وطبعا" الحكاية دي عذبته عذاب شديد .. بقى يقول ليها ..

يا امي انا عايزك تعاقبيني بي حاجة .. ماتعملي لي كدا .. انا بالطريقة دي بكره روحي ..

يعني انتو عايزين تندموني؟ نهى وسعد وانتي بتتعاملو معاي كاني ماعملت حاجة مع اني انا سببت

ليكم ال ...

امو قالت ليهو يعني شنو؟ انت ماقلت داير حقي .. والزول البطلب حقو مافي زول بقول ليهو انت

غلطان .. الحق حق .. ولاشنو؟

قال ليها بس برضو انا علي حقوق ..

وهسي قروشي جيت شايلا معاي.. وعايز اديها سعد اخوي .. يتصرف فيها .. سعد جا داخل من بره

قال ليهو لالا .. انا اسف والله مابقدر اتصرف في قرش منها ..

اديها امك تمسكها ليك ..

لمن تتخرج انا ما تدخلني في القصة دي تاني.

لمن تتخرج بعد داك تجي تشيل قروشك تشتغل بيها ..

نحن اساسا مابنسفيد منها شي تاني .. البيت وطار مننا .. وساكنين ايجار ورضيانين بي ارادة ربنا ..

قال ليهو خير يا سعد انا بسلمهن الوالدة بس عندي شورة معاك لي قدام ..

المهم الموضوع عدا عادي .. وكباشي بقى قاعد في البيت ماكل وشارب وساكن من فضل ربنا .. ثم

مجهود سعد .. وحتى منعو يشيل من قروشو لي مصروفات الجامعة .. وقال ليهو انا شغال الحمد لله

بصرف عليك .. لمن تتخرج بعدين الله يسهل ..

المهم العايز اقول ياجماعة ..

انو كباشي ماحكى عن هاشم اي حاجة.. وهم ماسألوهو ماعارف ليه .. نهائي امو ماسألتو قالت ليهو

هاشم وين واخبارو شنو؟

ولا سعد سأله. ودي طبعا" حكاية غريبة .. لكن ياربي سرها شنو؟ ماعارف ..

المهم باكر الصباح سعد قال لي امو اها يا امي انا ماشي المشوار القلتو ليك.

طبعا مشوار الجرافة انو ماشي لي عمتو سلوى ويتعرف على البت.

ويحاول يعرف السبب البمنع البت تتزوج غيرو شنو؟

يعني هو حاسي انو المشوار ده ضروري ولابد منه. المهم نحن حنمشي معاهو الجرافة .. سعد طبعا

بعرف بيت عمتو في الجرافة .. اتصل علي عمتو سلوى وقاليها ياعمتي انا الليلة جاييكم زيارة ..

ورحبت بيهو .. وكان طبعا " هاشم قاعد معاهم في البيت اجنحته مكسرة .. وتفكيرو مشلول ..

يادوب طبعا جا امس الخميس. والليلة كانت الجمعة ..

اها ياجماعة الخير .. العمة سلوى نهائي ماجابت لي هاشم سيرة انو اخوك جاي ... لانو لو قالت

ليهو كدا .. انا متأكد انو ح يكب الزوغة ومايقابلو نهائي لكن ربنا كاتب ليهم يتلاقو ..

وصل ابو السعود البيت ودق الباب .. وقامت فتحت ليهو الباب ياسمين .. بصراحة ياجماعة ياسمين

جميلة مافيها اي كلام .. يعني مابتحصل سماهر العرجونة .. المدللة .. المشحونة بالانوثة .. لكن

برضها ماساهلة يعني ..

طيب .. سلم عليها عادي جدا بي كل احترام.. وتقدير .. وردت السلام بي كل جدية .. واصالة ..

وخشا طوالي بالباب الفرعي اللهو باب الحريم .. وسلم على عمتو سلام عميق .. وهي ذاتها سلمت

عليهو بطريقة حنينة ولطيفة كانها امه ما تقول عمته .. استقبلتو كويس شديد .. ومشى الصالون بتاع

الرجال

وهناك.. اتفاجأ بي اخوهو موجود مع ود عمتو .. سلم عليهم الاتنين .. وقعد زي الكانو مابعرف واحد

فيهم. قدامو فوق الطربيزة كان في جريدة. شال الجريدة وبقى يقلب فيها. ويقرا وماشغال بيهم

الاتنين شغلة. طبعا الوقت فات وقت الفطور .. وفعلا كانو منتظرينو بالفطور .مع انو الوقت اتأخر

يعني قريب الساعة 11 .. بعد الفطور فضلة خيركم .. سعد عمتو نادته براهو في غرفتها ..

وقالت ليهو طبعا" ياسعد انا كنت متوقعة انك تجي .. بعد تقرا وصية ابوك .. وانا ياسعد ياولدي وكت

اتمنيتك لي بتي. ابوك وعدني وعد الرجال. انو سعد حيكون لي ياسمين. وياسمين لي سعد .. انا

من اليوم داك والفرحة مالية على الدنيا .. ان شاء الله ياولدي ربنا يوفقكم ويرزقكم من رحمتو ..

قال ليها فعلا والله ياعمتي ابوي اخد مني الوعد والعهد .. وانا ماعندي اي طريقة اتعدى كلام ابوي.

ولا سنتمير. بس ان شاء الله تكون ياسمين ماعندها مانع ..

قالت ليهو مانع بتاع شنو؟ .. والله .. هي دايرة تجن عديل من الفرحة.

وكت عرفت خالها كاتب وصية لي سعد البتريدو انو يكون سيد بيتها .. هي لاقياك كمان؟؟ .. قول ان

شاء الله ربنا يتم على خير ويكفيكم شر العوارض ..