الفصل السادس عشر

طبعا ياجماعة نهى ارتبكت ليها وماعرفت تقول شنو .. لمن عرفت انو سماهر خطوبتها ماتمت .. وطبعا

سعد كان بماطل وعايش على امل انو تحصل حاجة تقلب الموازين ..

اها نهى بقت تفكر ياربي انا هسي اقول ليها سعد خطب.. ولا ما اقول ليها؟ .. لو قلت ليها ..

خلاص كل الامل اتلاشى .. وحتمشي تشوف حياتها زي ماقالت .. ولو ماقلت ليها .. حتقعد منتظراهو

وهو يكون خاتي انها مخطوبة ..

في النهاية قالت انا اسكت وبس .. وامشي اتشاور مع هاشم واشوفو بقول لي شنو؟

نهى لاقت هاشم وقالت ليهو ياخي شوف حل للخبطة دي .. انا هسي اعمل شنو؟

قال ليها كلمي سعد .. قولي ليهو سماهر خطوبتها ماتمت .. ههه

قالت ليهو بري يايمة يقوم يطقني بي مصيبة ..

انا في راي نخلي الموضوع كدا .. والبسويها الله نقبل بيها.

طبعا هاشم ماحكى لي نهى انو هو متعلق بي ياسمين .. وياسمين متعلقة بيهو ..

لكن من كلامو ده .. وتصرفاتو كلها واهتمامو .. حست انو هو عندو مصلحة في انو سعد يتزوج

سماهر ..

سعد جا داخل والاتنين سكتو ..

قال ليهم في راجل جا بره .. قومي اعملي عصير يا نهى .. وختي شاي في النار ..

قالت ليهو ده منو كمان الجانا ده؟ .. قال ليها والله ماعارف المهم جا قال لي انا عايز بيت ناس سعد

فضل الله .. وقلت ليهو اتفضل ودخل لسه ماعرفتو ده منو؟

قالت ليهو ان شاء الله خير .. هاشم ذاتو مشى بي غادي يشوف الشمارون .وسعد انتظر وجاب

العصير وجا ..

وقعدو يدردشو مع الراجل.

قال ليهم انا محجوب. نسيب صالح الاشترى منكم البيت .. زوجتي مريم. حكت لي عنكم وعن

الموقف الوقفتو معاها ..

وجيت والله اشكركم ..

كان في خلاف بيني وبين مريم واتفصلنا.

واخوها صالح استفزاني بالكلام .. وقال بشتري ليها بيت ويعيشها احسن مني ..

وانا اتحمقتا وحلفتا تاني ما ارجع ليها.. وهسي عرفتا انو فعلا اشترى بيت .. واتكفل بيها .. لكن ما

معاها زول .. ولمن القروش تخلص منها .. مابتعرف تتصرف ..

واولادي ضايعين .. وانا كنت مفتكر امها او واحدة في اخواتها قاعدة معاها .. بس لمن اتصلت علي

اختكم اسمها نهى .. وحكت لي الصورة الحاصلة .. انا جيت وعايز الم اولادي بي امهم وارضى بي

قسمة ربنا.

وطبعا انا اتصلت على اخوها في السعودية وحكيت ليهو كل التفاصيل .. وجو اخوانها من ام دروم.

ورجعوها لي. والامور اتصلحت ..

وهسي نحن مسافرين بكرة ..

اها صالح وصاني ليكم وصية ..

وقال لي تمشي للناس ديل .. وتشكرهم .. وتقول ليهم صالح طالب منكم ترجعو تقعدو في البيت ..

لمن اجي انا .. بدون ايجار بدون اي حاجة ..

وانا جاي بعد شهر ..

وما محتاج للبيت هسي ..

طبعا ياسعد صالح عندو امكن اكتر من 12 عقار .. واساسا البيت ده ما محتاج ليهو هسي .. وكدا كدا

ح يقعد فاضي البيت ده ..

وهو طبعا " متأثر من فقدانكم للبيت .. عشان كدا وصاني ليكم ..

سعد قال ليهو مستحيل يا محجوب .. نحن مابنقبل ..

اولا نحن البيت خلاص نسيناهو .. لانو بقى من نصيب ناس غيرنا .. وماصح الزول يطمع في حق

اخوهو .. صالح نحن شلنا منو قروش قصاد البيت .. فالبيت بقى مابيتنا ..

تانيا نحن ماصدقنا انو امي نست الاحزان .. على البيت وعلى ابوي ..

ورجوعنا للبيت ح يجدد ليها الاحزان ..

فانت قول لي صالح الجماعة بشكروك.. وبقولو ليك جزاك الله خير على الشعور الطيب ..

قال ليهم والله ياجماعة صالح مبسوط منكم شديد .. وخصوصا من اختكم نهى .. القدرت ترجع المياة

الى مجاريها ..

وانا بس حبيت اوصل ليك صوت الشكر .. وهسي بس نحن عايزين نعبر عن الشكر.

قالو ليهو نحن ماعملنا حاجة غير الواجب ..

المهم رجع منهم وهو مستحي .. ومعجب بالناس ديل وبي اصالتهم وبي الاخلاق المتربيين عليها ..

ومحجوب رجع واتصل على صالح.. وحكى ليهو القصة دي .. قال ليهو يازول ما مشكلة خليهم على

راحتهم ..

قول ان شاء الله ربنا يتم لي الاكبر من دي البيت هين الكلام ستو ..

قال ليهو اها يعني نيتك الحكيتها لي امبارح باقي عليها .. قال ليهو بالعكس إصراري عليها زاد ..

بس ان شاء الله مايكون في حاجة في النص نحن ماجايبين ليها خبر ..

الحقيقة الخافية انو ..

طيلة الايام الفاتت في محادثات جارية بين صالح وبين محجوب وثلاثية مريم .. وبتكلمو في التلفون مع

صالح بالساعات عن نهى ..

وعن جمالا وعن اصالتها .. وانها انسب زولة لي صالح .. اخو مريم .. ومريم الشايفنها مسكينة دي ..

رفعت تقرير لي اخوها عن نهى خلتو مجنون ..

وهسي قصة البيت دي حنك ساي .. وشكلو ح يجي يتقدم ليها اول مايصل قولو ربنا يتم على خير ..

و ناس نهى واخوانها وامها ماعندهم خبر بالهدف ده.. ومامعروف البحصل شنو ..

وانا بعتبر دي واحدة من بركات الاخلاق الطيبة والمعاملة الحسنة .. عمرو عمل الخير مابقع واطه ..

ومرة قال ود اللبيب ..

اعمل خيرعلى سالف العصور وانساهو ..

فعل الخير بدوم لي سيدو يلفى اساهو ..

كل ما تحس عميرك كوم محن ماسّاهو ..

فعل الخير يجيك ويزيل شقاك وقساهو.

مرت الايام تقيلة ومملة و سعد خاطب بت عمتو .. وهي ما متواصلة معاهو ..

رسالها واتصالاتها مع هاشم .. وشغالة تعبر ليهو عن حبها وشوقها ..

وهو كل مرة يهيج فيها ويشاكلها .. ويقول ليها والله انا بقوم اطير من البلد دي وتاني

مابتشوفيني ..

يابت انتي خطبك سعد اخوي. يعني ح تكوني مراة اخوي .. بالعربي كدا يعني زي اختي .. بالعربي

كدا انت ونهى واحد ..

وهي ترد ليهو .. انا مالي شغل .. انا ماعايزة سعد .. انا مابحبو. انا بحبك انت ..

وهو بقى متضايق من الحكاية دي ..

وماعندو اي اخلاق ليها ..

يوم قام غير الشريحة وجدعها في الدولاب .. واشترى شريحة جديدة .. وهي بقت ماعارفة الشريحة

الجديدة ..

واتصلت على نهى توريها ليها .. نهى ورتها الشريحة الجديدة .. واتصلت تاني على هاشم ..

قالت ليهو لو غيرت حمسين شريحة انا مابخليك .. انا لو يومين ماسمعت صوتك بعيا ..

وطبعا" ياجماعة دي حكاية خطرة جدا جدا .. كونو سعد يكون متزوج ياسمين .. وياسمين عندها علاقة

مع اخوهو هاشم ..

دي حيحصل فيها دم عديل عندنا في السودان .. دي جريمة لاتغتفر .. وماعندها دوا غير الموت بين

الاشقاء .. ربنا يجيب العواقب سليمة ..

تااااني هاشم غير شريحتو ..

والمرة دي كلم نهى قال ليها لو ياسمين سألتك من رقمي .. ماتوريها ..

انا الزولة دي بكرها .. وزهجتا منها كل يوم بتبراني.. وتكرهني حياتي ..

وطبعا كلامو ده ماصح .. هو بحبها جدا بس لكن ضميرو ما مخليهو يواصل معاها علاقة .. لانها حتبقى

مراة اخوهو ..

قامت تاني اتصلت على نهى .. وقالت ليها اديني رقم هاشم الجديد ..

نهى قالت ليها والله هاشم ده شكلو ماعايزك تعرفي رقمو الجديد .. لانو هو قال لي ماتديها ليهو ..

انتي عارفة هاشم يا ياسمين لو كسرتا كلامو .. بلطشني لامن اكب الدم ..

بري يايمة الله لارماني في يدو الزي ضهر الطوة دي ..

هنا طبعا ياسمين احتارت .. وبقت ماعارفة طريق تصل بيهو لي هاشم ..

اتصلت على سعد .. واتونست معاهو بالكضب والنفاق ساي .. كدا وهو ذاتو متضايق منها. الاتصال

ده كان في الورشة .. وهاشم كان معاهو .. وبعاين ليهو بتكلم مع واحدة .. من هنا وبقول ليها ..

ايوة ايوة ..

الله يديك العافية .. تسلمي تسلمي ..

ان شاء الله .. ان شاء الله .. وهاشم عارف انو سعد لمن يكون متضايق من تلفون زول .. بس بشبكو

ليك ان شاء الله .. تسلم .. الله يبارك فيك ..

وهاشم شك انها دي ياسمين ..

طوالي سعد قال ليها .. يهودا هو ذاتو قاعد معاي اتفضلي اتكلمي معاهو .. هاشم جا شال منو

التلفون وقال الو ..

قالت ليهو هاشم انت ليه بتتهرب مني؟

والله انا بقوم بكلم الناس ديل اني انا بحبك.. واسبب ليك مشكلة ..

قال ليها خلاص كويس بتصل عليك بعدين ..

وبتكلم وبعاين لي سعد بيطرف عينو .. وسعد ملاحظ ..

هنا في اللحظة .. سعد قلبو اكلو .. وبقى الشيطان يوسوس ليهو ..

انوهاشم ده عندو علاقة مع خطيبتك ..

وانو ح ينتقم منك .. زي ماقالت عمتك .. وانو ح يخليك تتزوجها ويخونك معاها .. وانو ياسمين دي

احتمال سرها المخفي. انها اخلاقها ماكويسة ..

وممكن تخونك مع اخوك وتدمر الاسرة .. وووو

المهم قال لي هاشم انا ماشي البيت تعبت ياهاشم .. وفعلا تعب واتضايق بدون سبب .. بس مجرد

الافكار دي فورت دمو ..

وصل البيت .. ولسوء الحظ لقى دولاب هاشم مفتوح .. عاين كدا لقى الشريحة .. وعرفها دي شريحة

هاشم القديمة ..

شالها ركبها في تلفونو ..

والرسايل دي بقت تخش واحدة ورا التانية .. تيت تيت .. تيت تيت ..

وكلها من ياسمين ..

والليلة والليلة ..