الجزء 23

سامي وايثار مشو يجيبو حلاوة يوزعوها على الكل و كل الناس كانت مبسوطة انه العمة فوزية بقت كويسه حسام شكر احمد صحبه و الناس الساعدت في نقل الدم احمد قال ليهو م بيناتنا ومشى حسام قال ليهم يلا ي جماعه ارجعو ماف فايدة من القعده سامي قال هو قاعد و ايثار كمان قالت كده حسام قال ليهم لا ارجعو اصلا كم يوم و نطلعها قالو ليهو لا عبد الرؤوف قال ليهم ي جماعه كلامه صح ارجعو وتعالو من بكرا حسام قال ليهو حتى انت ي خال ترجع عبد الرؤوف قال ليهو خلاص سامي يقعد معاك حسام قال ليهو طيب طيب يلا ي نور و البنوت اوصلكم عشان اجي راجع

طلعو وصل في الاول ناس ايثار ‏( للناس البتسأل وين ابوهم ابو ناس حسام مغترب ‏) بعدين نور مشت معاهو البيت عشان عندها حاجات عاوزاها قال ليها بي سرعه ي نور عشان ارجع قالت ليهو حسام انت كيفك اسي ابتسم لانها فهمته و حضنها عليه قال ليها لي اول مره اخاف ي نوري

اول مره احس انه انا ضعيف لو كان حصل ليها شي انا نور شدت عليهو وقالت ليهو لا الحمد لله هي احسن قال ليها فعلا

نور اخدت حاجاتها و مشت باتت مع ناس ايثار و طول فتره الاسبوع كان بتناوبه حسام و سامي في المبيت طبعا العمه فوزية فتحت بس ح يقعدوها للاطمئنان و اليوم الخلاص مطلعنها نور كانت في البيت معاها ايثار جهزو البيت و جهزو ليها غرفتها و بخروه كمان ونور دخلت على المطبخ جهزت الاصناف البتحبها العمه فوزية لحدي م جو راجعين هي كان خلاص انتهت قالت ليها حمد لله على سلامتك يمه الحمد لله البقيتي كويسه قالت ليها الله يسلمك يارب دخلو رقدوها ونور كانت عامله ليها شوربه ظريفه دافيه عشان تريحها شربتها ليها طبعا البيت اتملى جو ناس عبد الرؤوف و محمد و الحبوبه و خالات نور جو كمان والبيت ملان وناس حسام ح يبيتو لانه كان اليوم البعده عاملين ليها كرامه

من الصباح نور صحت عجنت عجين لقيمات كتير و حهزت الشاي وبدت ترمي في اللقيمات لحدي م خلصت الناس صحت

و بدء برنامج الشاي و بعد شربو حسام طلع عشان يجيب الخروف الكرامه كانت غداء نور من م جابو الخروف تعمل في ده و تسوي في ده م وقفت لحظه و كانو طالبين حلل من المخزن لمن مشت عشان تجيبها في يد جرتها