الفصل العاشر

سعد قال لي عمتو.. والله ان شاء الله ياعمتي .. الفيهو خير ربنا يسويهو .. والحكاية كلها اقسام..

لو ربنا قاسم لنا حياة مع بعض .. مافي حاجة بتقيف قدامنا .. ولاعوارض ولاغيره ..

قالت ليهو خلاص ياسعد ياولدي .. انت عارف البنات وطرطشتهم.. يمشي يلم فيها واحد يلف ليها

راسها .. انا عايزاك سريع سريع تجي تشبكها بي خطوبة .. ان شاء الله بعد اسبوع .. عشان تاني

ماتخليها تفرفر جاي ولاجاي .. وطبعا ماجابت ليهو اي سيرة علاقة بين ياسمين وبين هاشم او اتفاق

مسبق ..

قال ليها خير بس انا عندي شرط ياعمتي.. وهسي انا عايز اعرفو قبل ما ارجع البيت .. انا عايز

اسمع راي ياسمين وموافقتها ...

قالت ليهو ما مشكلة .. بس اديني فرصة نص ساعة اتكلم معاها .. وامهد ليها عشان ماتصدم من

الفرحة ..

انت هسي امشي الصالون اتونس مع اخوانك لامن اناديك ..

في الوكت ده كانت ياسمين سمعت طرف من الكلام .. وكانت جاية تصوط الموضوع بس خافت من

امها ..

طبعا يا جماعة حجة سلوي زوجها اتوفى قبل فترة ليس بالقصيرة .. في حادث قطارفي مصر يوم 20

فبراير 2002 .. في حادثة كانت شهيرة .. راح ضحيتها اكثر من 361 شخص .. كان من ضمن الضحايا

عبدالماجد والد ياسمين .. والوكت داك كان الاولاد ديل صغار .. وامهم قامت بي تربيتهم في دور الاب

والام .. وكان فضل الله والد سعد .. شبه عائل الاسرة مع بعض المصاريف البتصلهم من البلد من

والد سلوى نفسها .. المهم في الامر انو سلوى فارضة سطوة الاب مع دور الام .. كويس؟

طيب ..

. هنا لمن ياسمين جات قالت لي امها .. (ده شنو يا امي العملتيهو ده؟ .. انتي موش عارفاني.

حبيت هاشم ونحن متفقين على كل شي وانتي موافقة ؟)

امها قالت ليها اسكتي يابت.. مافي زول بعرف مصلحتك .. اكتر مني.

اولا هاشم نصيبو اختلسو منو الدجال .. والدجال طار مع القمرية ..

وهسي بقى اباطو والنجم (يعني ماعندو الحبه). عشان يمشي يشتغل من هنا وجديد .. انتي بتكوني

عنستي ..

بعدين هاشم ده زول مخو وسخان .. وقلبو اسود .. وفاسد .. وماعندو اي اهتمام بالاصول والناس ..

شفتي عليك الله كيف اجبر اخوهو على بيع البيت .. وجدع امو واخوانو جدعة الكلاب؟

علا سعد ماشاء الله عليهو .. زول مسؤول وعندو قروش وحقو في البيت ..

وبيأرث امو كمان .. كان ماتت قريب .. اصلها بقت عقاب عمر .. كان شفتيها بعد وفاة خالك .. تقولي

هسع بتموت ..

قالت ليها يا امي الله يخليك الكلام ده ما صح .. ماصح تجرحي هاشم قدر ده .. انا مستعدة انتظره

لمن ظروفو تتصلح ..

امها قالت ليها يابت اسكتي .. وهسع يجي سعد وتقولي ليهو انا موافقة فاهمة؟ .. ولو عملتي كدا

ولا كدا .. انا بنادي هاشم وبحكي ليهو سرك ..

قالت ليها خلاص خلاص .. مافي مشكلة موافقة .. لكن والله مابقدر اتخلى عن حبي لي هاشم ..

امها قالت ليها حبيهو في زول حاميك؟ بس عرس مافي ليك منو. وخطوبتك من سعد احتمال كبير

الاسبوع الجاي .. يلا امشي البسي ليك لبس كويس.. وانتظري ود خالك هسع بجي يتكلم معاك ..

قالت ليها يا امي والله انتي كدا بتدمريني .. وتدمري هاشم وسعد .. كلنا بتدمرينا بالتصرف ده .. يا

امي الله يخليك .. على الاقل اصبري شوية بس .. ماتستعجلي كدا .. انا زاتي عندي امتحانات ..

قالت ليها .. انا إلا اكورك لي هاشم ده واحكي ليهو .. انتي مابتفهمي كدا ساكت ..

ياسمين قالت ليها خلاص يا امي .. نادي سعد .. ماعندي مانع ..

موافقة موش ده طلبك؟ ..

وياسمين من جواها بقت تغلى من الغل والغم والضيق .. لانها فعلا حبت هاشم.. وعشقته بكل مالديها

من قوة.. عشان كان هو اول انسان يطرق على باب قلبها ..

اها فعلا قد كان سلوى كوركت ياسعد .. ياسعد .. تعال ياولدي .. جاها سريع .. قالت ليهو اها

ياهاديك ياسمين امشي اسألها .. شوفها موافقة ولا ما موافقة ..

سعد عاين لي ياسمين هناك قاعدة فوق طرف سرير منسوج بي بلاستيك .. وماسكة بي يديها الاتنين

على ماسورة السرير .. وبتهتز متوترة .. ومن جواها بتغلي ..

سعد جا قعد قدامها كدا .. وقال ليها ياسمين انتي رايك شنو في الموضوع ده؟

يعني لو عندك اي موانع.. او راي لازم تقوليهو هسي.. عشان نكون على بينة .. ياسمين اتلفتت كدا.

لقت امها واقفة في باب البرندة. غازة كوعها ومتكلة على الحيطة وبتسمع ..

يعني (انا مراقباااااااك) .. عشان ماتغيير في اقوالها الضاغطاها عليها. .. طوالي ياسمين قالت لي

سعد .. لالا ماعندي اي مانع .. وماعندي راي .. كويس موافقة ان شاء الله ..

سعد قال ليها خير ان شاء الله وقام مشى .. قال لي عمته. خلاص ياعمتي كدا مافي مشكلة .. انا ان

شاء الله الملم اطرافي وبديك تلفون قريب ..

سعد طلع من البيت مغموم ومحطم .. وكان عنده امل انو الناس ديل يكونو ماعايزنه .. او ياسمين

ترفض .. عشان يبقى في حل من العهد والوعد الوعدو لي ابوهو ..

لكن ده كلو ماحصل. ومشى طبعا اعصابو بايظة .. وبطنو طامة وماعندو اي نفس لاي حاجة. وحاسي

بالدنيا دي مسخانة عليهو .. وكل مرة يتذكر سماهر .. وقلبو يسوي فررررر .. ويشيل نفسو

ويختو .. ومرات يقول هسي انا لو ابيت امضي وصية ابوي دي .. امكن ربنا يسامحني !!..

تاني يقول مستحيل انا اكون عاق لابوي بعد مات ..

انا طول عمري بار بي ابوي .. ابقى عاق ليهو بعد مامات؟؟ .. مستحيل مستحيل .. وانا قلت لي

ابوي بنفذ وصيتك لو كان فيها موتي.. لكن والله دي حاجة اخير منها الموت .. كيف انا اقدر اخلي

سماهر؟؟ ..

وبالجد ياجماعة كان يئن انين .. تتقطع منه الروح ..

طيب لحظة ..

طبعا بعد ما سعد طلع من ناس عمتو .. هاشم سأل عمتو .. قال ليها المخلوق ده جا هنا لشنو؟

بقصد سعد اخوهو ..

قالت ليهو والله طبعا " جا ينفذ وضية ابوهو .. الكاتبها ليهو وانت قاريها قبل كدا ياهاشم.

قال ليها لكن ياعمتي انتي ما كلمتيهو؟؟ انو انا وياسمين متفقين على الزواج .. ؟؟ انتي ياعمتي

موش قلتي لي انا بتصرف؟؟ ..

قالت ليهو والله ياهاشم ياولدي .. كلمتو. لكن اخوك ماشايفك زول ذاتو ..

قال لي هاشم اخوي ده زول ما مسؤل. وضيعنا وضيع قروشو وحيضيع ياسمين .. وقال لي والله

انا لو اموت ما ح أخلي هاشم يتزوج ياسمين .. وقال والله تاني كان اسمعو جاب سيرة ياسمين على

خشمو .. الا اكتلو. لانه مابستحق نعالا ..

هاشم قال ليها .. عليك الله ياعمتي قال كدا؟ ..

قالت ليهو اي والله يهدي ياسمين حاضرة اٍسالها ..

(كمان بتحلف بالله) يعني سبحان الله بالله في ناس ممكن الواحد يحلف اليمين الغموس عشان يوقع

الفتنة بين الاشقاء بالطريقة دي ..

ده حقد جنسو برا.

طبعا وكت قالت ليهو يهدي ياسمين اسألها .. ياسمين ساكتة ساي .. وبي جواها بتقول .. ياسبحان

الله .. بالله شوف امي دي كيف خسيسة وملعونة .. اعوذ بالله منك يا امي .. الحمد لله .. غايتو انا

ماعندي ام ..

هاشم قال ليها والله ياعمتي انا الزول ده مابسيبو .. انا سكتا ليهو كتير .. يعني ليه بكرهني كدا؟

عشان انا طالبت بي حقي؟ انا كان زول كعب .. كان زوغت بي قروش كباشي .. وانا كنت في اشد

الحوجة ليها ..

انا مابخليهو سعد ده .. النشوف الارجل فينا منو؟

عمتو قالت ليهو .. اسمع ياهاشم .. انت عايز تدخلني في مشكلة تانية؟ انا ماصدقت صلحت علاقتي

مع امك .. والله تجيب سيرة الكلام ده فوق خشمك .. الا عمتك البتريدها دي تشرب صبغة وتموت ..

والله بنتحر ليكم واريحكم كلكم مني ..

قال ليها لالا خلاص ياعمتي انتي تسلمي .. انا سعد اخوي خليتو هسع. لكن بنتقم فيهو بي طريقتي

الخاصة .. من دون مايعرف انك وصلتي لي الكلام ..

كويس بس خليهو لي بنظمو نظام جد جد .. انا اصلي زهجان وقافلة معاي ..

طبعا ياجماعة .. في حاجة مهمة. لازم نلاحظ ليها اي زول يقول ليك اوعك تتكلم بالكلام القلتو ليك

ده .. زه زول من اخوان سلوى .. وزملائها في المهنة .. يعني لمن يضمن انك ما حتتكلم. بكون في

امان من انو ينكشف كذبه وفتنتة ..

عشان كدا اسلم حاجة الزول يعملا في الحتة دي .. مايسكت ..

طوالي يمشي يفت الموضوع .. ويعمل مواجهة عشان يعرف الكذب من الصح ..

لكن هاشم البغل ماعمل كدا عشان كدا بقى مليان حقد على اخوهو الطيب.

وحتما ده الشي العايزاهو سلوى .. قول يا ساتر من الجاي ..

دقيقة خلونا نتابع سعد بعد وصل البيت ..

وحكى لي امه كل الحصل وكل الكلام القالته ليهو عمتو .. وكيف رحبت بيهو .. واهتمت بيهو .. وانو

ياسمين موافقة ورضيانة ..

قال ليها لكن يا امي انا حاسي باني بموت في الدقيقة خمسين مرة .. يا امي .. سماهر انا مابقدر

اعيش من دونها ..

امه قالت ليهو ياولدي .. ابوك وكت وصاك على بت عمتك.. لانو حسا انو عمتك اتغيرت .. وخلت

غيرتها الزمان كلها .. وبقت كويسة .. وانا ذاتي لاحظت ليها .. في ايام مرض ابوك .. كيف بتتعامل

مع هاشم ومع نهى بي كل حنية ..

ابوك ياسعد عايز يربط الاسرتين بي بعض .. ياولدي سماهر ربنا يقسم ليها ابرك واخير .. انت بس نفذ

وصية ابوك انا متأكدة فيها البركة ..

انا من زمان متمنية تكون علاقتي بي عمتك حلوة ..

والعملتو لي زمان كلو انا عافية ليها. مادام اتغيرت ..

مافي زول في الدنيا مابغلط ياسعد ياولدي .. اجمل حاجة في الدنيا التصافي بعد التجافي .. ربنا

يجعلك دايما رابط بين المتقاطعين ..

بالله شوف طيبة المراة دي وبياضة نيتها وطيبة قلبها ..

حقيقة البشرية انواع ..