الفصل الثلاثون

خالتو انصاف ساقتني ودتني بيتها طبعا انا جسمي من اثاار الضرب وكدة اتجبرت تفرش لي بطانيهه ورقدتني على بطني طبعا ضهري موونتهي رسمي وبقت تشييل وترش فيني المويه وبعدها قلعت لي ملابسي وغطتني بي تووب كدة وشغاله تغول الفااتح الله يوريهو ليهو في دنيتو دي ياخي انا من البكى والوجع الفي جسمي م مستووووووعبهه شي ولا هي بتقول في شنوو اساسا حوالي الساعهه 6 كدة امي جات داخلهه البيت سألت اخواني قالت ليهم اختكم وين؟قالو ليها م عارفين نحنا زاتنا جينا لقيناها ماف امي قعدت تفتش علي وتسأل بنات الجيران شهد دي جاتكم بي هنا بغولو ليها لأ

خالتو انصاف لما سمعت امي بتتكلم جات نادتها قالت ليها سوسن تعالي قالت ليها انصاف كيف امسيتو؟قالت ليها الحمدلله تعالي كدة قالت ليها خير انشاءالله ي انصاف ومشت ليها قالت ليها تعالي شوفي الليله ولدك وعمو عملو في بتك شنوو جابتها دخلتها جوة الاوضهه المرقداني فيها قالت ليها شوووفي بتك امي قالت ليها وووووووووووب علي العمل فيها كدة منوو ومتين ولشنوو وجات قعدت جنبي وفتحتني ولما شافتني بالحاله الانا فيها قعدت تعييييط وتكورك

خالتو انصاف قالت ليها ولدك وعمو انشاءالله ربنا يقطعهم زي م قطعو لحم البت ابووي جا داخل عندي اخووي اسمو حمودي صغيروني اصغر واحد في البيت ابوي سألو قال ليهو امك واختك وين؟قال ليهو في بيت ناث حالتو انثاف قال ليهو امشي ناديهم جري قول ليهم ابوي جا حمودي جا جاري قال لي امي ابوي جا قال ليك تعالي البيت خالتو انصاف قالت ليهو امشي نادي ابوووك وتعال ابوي جا سلم عليهم سمع امي بتبكي جوة الاوضهه قال ليها خير انشاءالله؟قالت ليهو تعال ادخل ي عبدالله اخووي

دخل شافني رااقدة قال ليها مالها؟امي قالت ليهو الفاتح اخووك وولدك عبدالله شوف كسرو بتك كيف كتلو لي بتي عديل ابوي جا ماشي علي عايز يفتحني خالتو انصاف قالت ليهو م لابسهه شي م تفتحها ي عبدالله لكن جسمها دة م فيهو مكان سليم والله ابوي قال لي حمودي طيييير نادي لي اخوووك ابو القاسم سوورعهه ابوي طبعا من الزعل لمن قعد في الكرسي شويه كدة ابو القاسم جا داخل وسايق معاهو عمي الفاتح خالتو نصاف قالت ليهم رجلكم م تعتب بابي يلا اطلعو سوورعهه من بيتي ي عواليق ي مقطعين

عمي الفاتح قال ليها هااا المره البايرة والعاقر دي انتي بتطرديني انا من بيتك هو انا جاي بيتك من ريدتي ليهو قالت ليهو والله لو الرجال زيك كدة افضل لي اقعد بايرة كدة انت راجل محسوب مع الرجال يعني؟ولو الاولاد بطلعو عواليق ومقطعين زي الحيوان دة افضل اقعد عاااقر زي دة الله لا يديني راجل وولد زيكم كدة الله لاجاب باقيكم انتو الاتنين م لقيتو مكان تتراجلو فيهو جيتو اتراجلتو على بت الناس المسكينهه دي

ابوي قام قال لي ابو القاسم ضربته البت دي مالك؟ابو القاسم قال ليهو يابا انا والله قاعد في البيت اتصل علي عمي الفاتح قال لي اختك ديك ليها لافهه في الشارع وبتتكلم بالتلفون وطلعته لقيتها بتتكلم بالتلفون عشان كدة ضربتها ابوي قال ليهو انت مسؤل منها؟انت ابوها؟شايفني اندفنتهه في التراب؟وقعد يضرب فيهو قال ليهو البت دي طووول م انا حي كدة في الدنيا وضراعي اخضر م عندك عليها سلطهه عليها فاهم ولا لأ ي حيوان اسي القاعد تعملو هي دة انت الراجل قااعد تعملو؟عمي الفاتح قال ليهو مش غلطت يضربها ويقطع لحمها زاتو

ابووي قال ليهو الفاتح انا بتكلم مع ولدي م تتدخل اسي يوم متين انا اتدخلتهه بينك وبين اولادك؟انت اسي العملتو في بتي دة بترضاهو في بتك؟قال ليهو عبدالله انا اخوك قال ليهو لو الخوة على حساب اولادي من الليله لا اخوي ولا بعرفك كلمتك ياهو

خالتو انصاف قالت ليهو انت ي الفاتح قبل م تتكلم وتتساوط في بنات الناس امشي لم بتك الحاايمهه بي ملابس المدرسهه في اليحر والجناين وكل يووم قابضنها مع ولد في الجنينه حصل في زول كلمك؟حصل انا كلمتك انو بتك الكبيرة عندها تلفون داساهو منك وقاعد تجي تشحنو عندي هنا في البيت؟امشي ربي بناتك اوول بعداك تعال شوف بنات الناس واسي اطلع لي من بيتي وسووق معاك الحيوان دة والله ادينكم وادخلكم السجن بسبب العملتوهو في البت دة

اسي بوديها المستشفى وبطلع ليها اورنيك 8 وبشتكيكم اطلعو من بيتي سوورعهه ولحدي م البت دي تبقى كويسهه لو شوفته زول فيكم عتب عتبه بابي بكسر ليهو رجلينو امها لو دايرة تشوفها تجيها هنا وبسس اطلعو من بيتي يلا ي عواليق

في الجانب التاني كابتن وائل اتصل على هديل قال ليها هديل كيف تمام؟قالت ليهو تمام الحمدلله قال ليها اسمعيني انتي اليوم شهد دي اتتصلت عليك؟قالت ليهو لا والله من امس كنت بتكلم معاها لكن اليوم خالص ليه في شنوو؟قال ليها والله م عارف طيب عندك رقم صحبتها مزن؟قالت ليهو ايوة قال ليها رسلي لي ضروري عليك الله اسي قالت ليهو سمح لكن خوفتني مالك؟قال ليها يااا هديل عليك الله م تكتري قولته ليك انا زاتي م عارف قالت ليهو طيب روق، بعد م رسلتو ليهو اتصل على مزن قال ليها مزن كيغك تمام معاك وائل

مزن قالت ليهو هلا وائل كيفك؟قال ليها الحمدلله عايز اسألك من شهد اتصلت عليك في الساعات الاخيرة دي ولا لأ؟قالت ليهو خالص والله اليوم اتكلمتهه معاها الصباح بس ليه مالها؟قال ليها م عاارف والله كنت بتكلم معاها وفجأة سمعتهه صوت اخوها بتكلم معاها وفجأة سمعتهه صوت عيااط وصراخ وبعدها التلفون قفل رجعته فيهو لقيتو مقفول وانا من قبيل بحاول قالت ليهو والله م عاارفهه لكن اهلها صعبين شديد بالزات اخوها دة قال ليها لا ياخ معقوله صعبين كدة انا عندي احساس انو حاصله معاها مشكلهه

قالت ليهو والله متعصبين جدا لي درجهه انهم عايزين يعرسو ليها ود عمها قبل م تتم الجامعه قال ليها بخلعهه شنووو؟شهد عايزين يعرسو ليها وليه م كلمتني؟قالت ليهو يعني م كلمتك انو عايزين يعقدو ليها على ود عمها الشهر الجااي؟ قال ليها خالص ومتين الكلام دة؟احكي لي الحاصل شنوو؟مزن قعدت تحكي ليهو القصصه من اولها بعد م قفل من مزن اتصل على هديل على طوول قال ليها ي هدديل بتصل على جدي دة تلفونو مقغول اديني جدي عليك الله عايزو ضروري سوورعهه

هديل قالت ليهو يمكن شحنو مونتهي في شنوو مالك نفسك قايم كدة؟قال ليها بحكي ليك وبفهمك كل شي بعدين اسي اديني جدي استعجلي لي لو سمحتي مشت لي جدي قالت ليهو جدو هاك دة وائل عايز يتكلم معاك قال ليها جيبيهو الوو ي ولد كيفك؟قال ليهو تمام الحمدلله جدي اسمعني...

نتلاقى