الجزء 23

الساعه 2:10 بعد نص الليل، لمبة حمرة لامة الناموس ... نفس القعده بتاعت اول ليلة!

بي نفس التوب الاحمر المشغول بالدهبي ، بي نفس الاكسسوار و بي نفس كل حاجة مختوته فيها صورة و بتدل على انها عروس ... ليه اختارو اللون الاحمر بالذات للعروس ؟؟

قطع تركيزها صوت السرير الكان ناتج من حركة موهوب اثناء نومه .. اتقلب عليها وهي قاعده ..

عاينت ليهو نهى بي تعجب ، كأنها دايرة تسألو انت منو !!!! دخلت حياتي متين وكيف !!

طيب انا قبلت الظلم من ابوك لاني مضطرة ، لكن !! انت ، قبلت بي ليه ؟؟

و بقت تخبط في راسها عشان تفوق وان دا كابوس تصحى منو ،طبيعتنا كبشر من باب الهروب من الواقع بنتمنى همومنا لو كانت حلم ، بس صوت الغوايش و القيراطات المدورة الملمومة في صفوف و مشكلة ،، كل دي حاجات كانت كفيله انها تصحي موهوب من نومه العميق !!!

اتنفض من نومو و لقاها بتخبط و بتقول فوقي يا نهى دي ما حقيقه و بتبكي ..

قعد بسرعه و مسك يدينا قاليها بسم الله في شنو بسم الله نهى .. بقت تقوليهو فكني ... فكني ..

فكاها قاليها اذكري الله يا بت الناس ، و بعدين انتي ليه لحد اسي ما غيرتي !!!!!

(لابسة نفس التوب وحاجات يوم عرسها لانها طلعت معاه ل اهلهم الكبار يدوها البركة زي ما بقولو).

في اللحظة دي في حاجة لفتت نظر نهي ... و بقت بس بتعاين فيهو ، و م بترد عليهو ..

قاليها انتي اخدي راحتك انا بطلع على البيت التاني و بصلي الصبح و بجي ...

بيلبس في نعلاتو و بصلح في جلابيتو .. و بقى ماشي على الباب ... فتح الباب و هي بتعاين فيهو ....

فجأة قالت ليهو : #اقيف !!!!

اما انا -

بعد اتفاقي معاه بس ما زالت في حاجة محيراني فيه

بقيت مستغربه !! ومحبطة في نفس الوقت

قلت ليهو من غير ما اشعر #انت !! ( بي خيبة أمل)

م انتظرت لمن يرد علي ، و قلت ليهو ! صراحه ما قادرة افهم حاجة !! يعني لحد مساء امبارح كنت بتستجوب فيني !!؟

ابتسم ... و بقي يعاين فيني ، قالي بينا في اتفاق ولا نطيبتي يا هتون ! اااا بالمناسبه اسمك مميز جداً و اول مرة يلاقيني او يمكن اكون انا انسان غير متطلع ، بس يمكن هو اللي لفت انتباهي للقضيه ، و حابي جداً اعرف معنى الاسم دا شنو ؟؟

قلت ليهو : اسمي بيمثلني ، يمكن امي كانت ليها نظرة مستقبليه ، استغفرالله العظيم م قصدي تدخل في علم الغيب ، لكن معناهو القطرات المتتاليه البتنزل ورا بعض ، زي المطر و ال ...

قالي : كملي ...

قلت ليهو : و الدموع هه

سكت ... و بعدها اتكلم بهدوء ، و قالي احكي لي ..

اخدت نفس و قلت ليهو : انا ظالمة و مظلومة في آن واحد ...*قاطعني وكان سريع في الرد ، قالي لالالالا انا قصدي احكي لي عن حياتك قبل الوعكة دي ..مثلاً اكلة بتسعدك لو لقيتي امك طابخاها ليكي ؟ او لونك المفضل مثلاً ؟ اممممم دراستك كان نفسك تقري شنو و هل اذا قريتيهو ولالا ؟

انا بقيت واقفه فاتحه خشمي و بعاين فيهو !! دا شنو الزول الغريب دا !!!

يعني انحنا في زيارة في سجن وهو بيسالني عن حاجات زي دي ! و ليه اصلا ؟ الحاجات البيسال عنها دي انا ماف زول بعرفا يمكن غير اسرتي !! *قاطع تفكيري و قالي : سكتي يعني !!

قلت ليهو : انا .. كنت شبه نابغه في قرايتي ما فكيت المركز الاول دا لزول و لو جا علي امتحان وماقفلت الدرجة ممكن انوم محمومة ههه ، اتميزت من صغري بالحاجة دي ، لحد الثانوي وبعداك اتفارقنا انا والنجاح و الـ ... لمن حس بي ح ادخل في حتة حزينه ، لحقني بي سؤال : انا بحب الاكل شديد بس باكل وما بيظهر فيني وقعد يضحك ، قالي وريني اكلتك البتحبيها !!!

قلت ليهو : انا .... ممممممم باكل اي شي تقريبا و .....الخ

استمرت الزيارة دي بي طاقه ايجابيه ما عاديه ، لمن قاطعنا صوت بيقول >الزيارة انتهت