الجزء 38

*طلعت كيف يعني بتين طلعت

موهوب اعمل حاجة(نهي بقت تتكلم بإنفعال)

_نهي كدي اصبري خليني افهم مش قلتو الليلة الزيارة وبعدها بتطلع حصل شنو تاني فجأة كدا نجي نلقاها طلعت..

*اوووف يا موهوب ح تكون مشت وين بس؟

_وين الضابط ممدوح؟

*طلع قبل شوية..

_طيب ماف زول تاني استفسر منو؟

*في الضابط.... امشي طويل كدا ولف علي يمينك اول مكتب بتلقاه..

_طيب شكرا

مسك يد نهي قوي وجراها مشو بسرعة

طق طق طق دقو الباب

*اتفضل

_السلام عليكم انا موهوب ود عم هتون ودي اختها..

*وعليكم السلام اهلا وسهلا اتفضلو..

_جينا اليوم زيارة وعلي حسب معرفتنا بتطلع بعدها ونتفاجأ انها طلعت..

*ايوة حصلت تطورات سريعة كدا بعد ما سكينة ومؤمن اتقبض عليهم وتاني ماف شي طلعت بأمر الضابط ممدوح الكان ماسك قضيتها..

_ايوااا حاليا ما لقيناه بس ممكن تديني رقمو اصل ليه او هو ح يجي بتين ممكن ننتظرو..

*سجل عندك 09.....

شكرناه وطلعنا مستعجلين موهوب مسك تلفونو وجاري الاتصال.....

_الوو ممدوح؟

*وعليكم السلام ايوة منو؟

_انا موهوب جينا زيارة لقينا هتون طلعت..

*طلعت اليوم بس انتو مافي ابوحليمة هي قالت ماشة هناك علي حسب معرفتي ؟؟

نهي بقت تعاين ل موهوب الملامح وشو اتغيرت وحست في شي ما ياهو...

بعد قفل موهوب في شنو قلقتني هتون مشت وين؟

_نهي نحن لازم نمشي الحلة ممدوح قال هتون قالت ليه ماشة ابوحليمة الله يستر الليلة..

من قال ليها كدا نهي بقت تبكي موهوب هاك هاك اتصل سريع ب امي كلمها...

طلعو العربية ولا كدي جيب تلفونك.. نهي شالت تلفون موهوب واتصلت..

اوووف اووف يا امي انتي ما بتشحني تلفونك ليي دايما قاطع..دي حالة شنو دي بس...استغفر الله العظيم..

*نهي اهدي كدي براحة اضربي ل ابوك وخلي اديك امك..

_همم ابوي من يوم الحصل كسر تلفونو وجدع الشريحة قال ما داير حد يتواصل معاه..

* ميادة ميادة بس

_ اضربي ليها سريع خليها تجري جري بيتكم لازم هتون ما تطلع تمشي..

*ردي ردي ياميادة...... ياخييي ماف رد

_ارجعي اتصلي تاني بتجدع تلفونا هي..

*زكرتني تلفوني مش بعد تطلع بسلمو ليها

_اي

*جاري الاتصال بس..... يا دا الحظ النحس مقفول..

........................

وصلني قال لي داك الجمبو عامود وبابو لبني هو..

شكرتو ونزلت منو..قلبي قال لي افتحي الورقة الاداك ليها ممدوح امكن تكون لي دافع قوي تشجعني اكتر وانا ماشة طلعتها من الظرف فتحتها مكتوب:

" سمع الله لمن به ألم" ضحكته اي والله ونعم بالله يلا بسم الله كدا ممكن وامشي قلبي مطمن.. وصلت واملي كبير ومتأكدة ان نهي قدرت تقنع ناس امي..

ياربي القي نهي قاعدة هنا الليلة...

الباب متاكه ساي كررب مديت راسي اول الحوش فااااضي والدنيا صااااانة زحيت ودخلته...

دخلته وعيوني ماشة تحدد فيه من اليمين للشمال عيني ليها هناك بتقطع في بصل قاعدة بتبكي منو ولا من احساسها اني جاية!!!..

في مظلة معروشة من فوق بحصير... فيها سراير بدون مراتب مفتوحة من قدام وجواها باب داخل ل جوه شكلو المطبخ...

امي انا جيت....

رفعت صوتي تاني شديد كان طالع بالجلالة امي امي انا بتك هتون جيت..

اتنفضت من مكانا ودموعا شايفاهم جاريات..

ما قدرت اثبت في مكاني صوت بكاي علا شديد جيت جارية عليها جاني صوتو بقوة..

عندك ولا خطوة ما عندنا بت تاني..

غلبني ارفع راسي اعاين ليه لسه متزكرة كسرة الضهر والزلة الختيتا فيه..كلمتو جات زي السيف...

*اب....

قطع كلامي وما عاين لي حتي...

قالا بصوت تحدي عالي شديد... ادخلي جوه وبي يدو اشر ليها قدامو... كررررب ربببب الباب قفل وانا واقفة في نص الحوش السموم والتراب والسخانة كلو ما هاميني...

جاتني قوة فجأة ما عارفة من وين جريت علي باب البرندة وطق طق طق طق اخبت ب يدي..

ماف زول فتح لي ولا زول ردا علي..

ما عرفت اعمل شنو قعدت ابكي بعد وقعت في الارض عبايتي اتملت كلها تراب..قمت نفضته نفسي وقررت اطلع ما عندي مكان هنا...

.....................

ها الوو الوو ميادة الووو عايني اجري بيتنا جري خليك هناك اختي هتون جاية علي ناس امي كان شفتيها بالحلو بالشين ما تتحرك منك شبر سامعاني يلا سريع..

وقفلت..

*موهوب انا خايفة شديد تفتكر تكون وصلت..

_لالا ما تخافي ما بتكون وصلت لسه...

*ان شاءالله يارب يارب انا خايفة عليها من ردت فعل ابوي لهسي..بعد ما اتكلمنا معاه ما اتوقعت ردت فعلو يرفض لسه..حتي امي مغلوب علي امرها وما قادرة تقيف قدامو ليي ما عارفة...

في الاخر دي بتها لي بتعمل كدا امي دي(ختت يدها في وشها وبتبكي)..

.....................

كلها ساعات زمن ووصلت الخرطوم من تاني طول الطريق بفكر امشي وين واخيرا حددت وجهتي ما عندي غيرا ايوة خالتي نعمة...

رقششة كوركت بصوت عالي.. لو سمحت ماشة الحلفايا شارع النخيل محطة عشرة...

اركبي...

بعد وصلنا اديتو حقو ونزلت بتزكر في وصفها بعد تصلي المحطة بتلقي ردمية حمرا امشي بيها طويل بتلقي دكان مكتوب عليه دكان #البرنس بس اسألي سيدو بوصف ليك البيت

بالدرب عديل..

فعلا مشيت ومشيت هداك عيني للأسم ظاهر جيت علي عديييل سلمت عليه وسألتو وصف لي كتر خيرو..

وصلت البيت وقفت وشلت حجر وطق طق طق دقيتو كم مرة بعد مسااافة حتي الباب فتح..

نعمة وقعت علي حضنها طوالي واتفقعت بالبكي معاها..

_حمدالله علي السلامة يا هتون ادخلي ادخلي من الهجيرة دي..

دخلتني اوضة وحكيت ليها كل الحصل معاي حتة حتة..

وااااا واااا واااا

*صوت الطفل الببكي دا شنو؟

_خلاص صحي شكلو جيعان ما دا ود بتي سوسن الماتت يا هتون ياني انا المسكتو بعدا عندو منو غيري.. ..

دخلت جابتو وجات قمت شلتو منها..

*واااي ماشاءالله حلاتي ياناس حلاتي انتي ننو قميلة والله ننو قميلة "بتلاعب في بي يدها وبتهز فيه"

واعسلي يا حبيبي صغنوني انتي والله حلوووة انت والله سكر انتي ..بقت تلاعب فيه وقعدت بيه مبسوطة تضحك ساي معاه..

وخالتو نعمة ما نزلت عينا من هتون...

من جواها بس ياها دي ما غيرا....

*اي يا خالتي

_ انا بمشي لجارتي اناديها كتر خيرا بترضعو ما قصرت والله وبجي هسي ما بتأخر عليك..

دايراك زاتي في موضوع كدي...

.................

بعد فترة وصلو الحلة ونهي كررب كرب بتدفر في الباب تنزل وما قادرة من الرجفة الفيها بالا مشغول مع هتون...

_نهي براحة براحة..

دخلنا بسرعة لقينا ميادة قاعدة بره رفعت لينا يديها بمعني ما عارفة شي..

دخلنا جوه..قبال نفتح خشمنا جا صوت ابوي..

*موهوب سوق مرتك وامشي بيتك..

كلمة واحدة طلعت منو شديدة من سكات جراني وانا بعاين ل امي وهي تبكي وانا ابكي...

عصرني عليه شديد وهمس لي معليش هسي ما وقتو يا نهي بترجع بعدين...

..

..