الجزء 63

قاليها #مافي_فايدة نهى!!

اتلفتت ليهو ، ومشت حضنتو ، قالت ليهو #مازن !

عاينت ل ابوي و قاليها تاني ،مافي فايدة يا نهى ! لمن يكون القلب شايل من زول و شايلو ، هنا الغفران بيكون صعب !!

انا لمن بديت امشي المدرسة يا ابوي لحد اللحظة دي و انا في اولى ثانوي .. اصحابي مسميني و بقولو لي التعيس الحزين ، وشي مليان حزن ، لاني من ابتديت اوعى وانا لقيت الحزن قدامي، كنت لمن بصلي بدعي ربنا اشوف امي ولا ابوي مبتسمين ساي، صدقوني انا ما بعرف ملامحكم و هي مبتسمة عامله كيف ! ، انا اتربيت على الحزن يا نهى عشان كدا بقوليكي مافي فايدة ...

مرت سنين و السنين دي ما كانت كفيله تداوي جراح امي وابوي ، تفتكري تاني فضل شنو ؟

انا عن نفسي يا ابوي و يا امي كنت بتمنى القا هتون اختي قاعده في نصنا ، كل البملكو ليها مجرد زكريات ومرات بحسها حلم ، يمكن اكون في نظركم لسه مازن الصغير داك الما بيملك قرار ، لكن انا الليله يا ابوي راجل شايل اسمك ، و عشان كدا ما حا اقدر اخلي اختي بعيدة اكتر من كدا م معروف عايشه كيف !! فا من بكرة يا ابوي انا حأسافر الخرطوم هتون #محتاجة لي راجل يخت يدو في يد زوجها ، و اليد دي حتكون يدي #انا يا ابوي #كفايانا قهر وضيق ....

نهى قالت ما بنكر اندهشت بـ مازن اخوي ! هو متين كبر كدا !! بس كمان شوفو التناقض ، انا ما مستغربه لان مازن من يومو عاقل و ما انسى الموقف العملو مع المديرة يوم جات جابت الظرف ل امي يوم سفرنا و جيتنا للحميراب .. ااااخ يا دنيا ، ما نويتي تضحكي لينا شوية !!

تعالو عندي -

في حوشنا المتوسط .. كراسي بلاستيك حمرا و بيضا ، مرصوصة و موازية حيطان الحوش داير ما يدور .. ملاية حمراا معلقه في واحدة من الحيطان كواجهه للكراسي المرصوصة ..

حولين الملاية الحمرا كان في السلفان الملون والمقصوص بالمقص شراشيب .. حولين السلفان كان في سعفتين نخيل خلف خلاف كغلاف للملايه الحمرا .. في طرف السعف كانت الانابيب (البلالين) الملونة والاغلبية منها بالاحمر .. و صوت الشفع و بيتوسطهم يزن اللي كان كل تفكيرو كيف يمسك الامبوبة من غير ما تطير منه ...

في نص الكراسي كانت بيتوسطهم برش مربع كبير ماخد دور السجادة .. و الناس اللي كان كل همها تحضر مناسبة نعمة اللي كانت مشهورة في وسط تجهيز العرايس و المغنى و الرقيص و السهرات ..

و ابتدت صوت الزغاديت في زيادة ....ك مجاملة لـ نعمة ..

و المطبخ اللي كان مليان بالشابات اللي كانومهتمين بي توزيع قطع التورته و الحلاوة البلح بالنارجيل و قطعة برتكانة في صحانه البلاستيك ...

جاتني في الغرفه خالتو نعمة اللي م كنت قادرة اتصالح معاها نفسياً بسبب الشكوك اللي كانت جواي و م كنت عارفه اساسها شنو و ليه بقيت بفكر في حاجات ما ليها اي صِحة ! شايلة المخبر اللي كانت طالعه منو ريحة الجاولي و حبة البركة , و بقت تلفو حولي بي شكل دائرى و بقت تقول لي :

_بسم الله ماشاءالله ولاحول ولاقوة الا بالله ،ربنا يبعد عنك الحاسدين و الحاقدين و المترصدين ... و ايوووويووووي يووووي يووووي - قالت لبتاعت المكياج اها ما قربتي ؟

ردت ليها : انتهيت خلااص .. قالت لي يلا هتون الحوش برا اتملااا ، يلا اللبسي بعد دا ناس الدلوكة كمان وصلو .. اكتفيت ب ابتسامه ..طلعو وقفلو الباب ..

لبست فستان عشرة بلدي حق زمان داك الفيهو كشكشة بالركامة من تحت .. طولو لبعد الركبة بـ حتة ، لبست كعب دهبي .. و لبست الغوايش حقت شبكتي ، و كرسي جابر حق حالتو نعمة و حلق جنيهات كبير ، و ختيت زمام تركيب ، و خليت شعري مفكووك و خالتى نعمة خلت لي زي جدلة بس هي م جدلة ، لكن قطع دهبيه زي الطاقين بتظهر الشعر من قدام ، حدها بعد الاضنين بشويه .. و لفيت التوب الدهبي و بقيت قاعده و #طق اتزكرت يزن !!!

ما شفتو لي اكتر من تلاته ساعات ولا حتى لبستو ..

(كان في نفس المكان)

يزن .. ساكي الامبوبه .. في نص الناس الكتيرة و داخله و مارقه .. بقى جاري وراها لحد برااا الشارع .. لمن وصل ناصية البيت .. في يد #رفعتو وشالتو !!

جاتني خالتي نعمة و معاها مرتين ، عشان يطلعوني .. ما قدرت امسكً نفسي ، قلت ليها يزن وينو ؟ قالت لي م تخافي في نص الشفع قاعد يلعب !! ارتحته و ما ارتحته ..

المهم غطو لي وشي بالتوب و طلعوني .. و يك يا الزعاريت و يا الغنى و الدلوكة ، و كانو بغنو :

اخدر الليموني اناااا👏🏽

حنو و ارحموني انااا👏🏽

من جناين بارا انااا👏🏽

الدكاترة جات تتجارى اناا👏🏽

خداراً دي طاقيتو انا 👏🏽

و الروزا دي عربيتو انااا👏🏽

ايوووووووووي يووووي يويووووي ..

العندي انا ما بديه و بحر الشوق انا بعديه 👏🏽👏🏽نعدل شوقنا الما بنشاف من اللوم و ما بنخاف و من الحاسد الشناف و من الحاسد الشناف ويو ويو ويو ويووو. ...👏🏽👏🏽ايوووووي ..

و بعداك جا دوري في الرقيص .. و دور القطيعة والنميمة برضووو ...

كان في برا البيت -

*يي يزن !! انت شايلو ليه ؟؟؟ (جر منو يزن وقلعو منو ) ...

_انت ناسي

ان انا ابوه و من حقي اشيلو حتى لو بالقانون ..خصوصاً ان امه ميته !

*القانون ! انت اسي بتقدر تخش محكمة!! ناسي ماضيك انت ! لو ناسي قولي عشان ازكرك !!

شوف الولد دا تبعد عنه الا اذا كنت عايز تدمره و للمرة الالف انت خطر على يزن !

_انا خطر على يزن ولا انت يا.....

سحر سمير _فاطمة قسم الله