الجزء 16

ابوي و هو بيتكلم في التلفون ، م كان منتبه لوجود امي الواقفه بي تثاقل وتعب كمل طاقتا ..

بعد قفل ، انتبه ليها بتحاول تسند ، فا جرى عليها ومسكا قاليها :

*انتي القومك شنوووو يا فوزية الله يهديك (بيسند فيها) اقعدي اقعدي ... اها حاسه نفسك احسن ؟ فوزية ..... حاسة انك احسن ( و بيتحسس حرارة جسمها ) ... طيب اتكلمي عشان اعرف انك بخير !

_ انا وين والخير وين ! و حتة من روحي كسرت قلبي شقتو شق يا محمد ( و بتبكي)..

جات نهى جارية على صوت امها مخلوعه و بتقوليها : امي : انتي القومك شنو بسم الله انتي كويسه حاسه بحاجة نمشي المستشفى ؟؟؟

ابوي قاليها ، اقعدي يا نهي ...!!

قال لامي ، البكاء ما بيفيد ، و بما انك اتحسنتي شويه فا نواجه حياتنا يا فوزيه ، و عاين لـ نهى !!

كمل كلامو و قاليهم : انا قررت قرار ! و اللي هو رحولنا من الخرطوم ..

نهى : شنوووو !!!

امي : !!!! م علقت

ابوي : السمعتيهو يا نهى ، الخرطوم بقت ضيقه و قريتنا كمان للاسف بقت ضيقه ! يعني حتى اهلنا ما حيتقبلونا بعد العار الاتوسم علينا !

امي : و هتون يا محمد ؟

ابوي : (بـ كوراك وانفعال) انا ما عندي بنت اسمها هتون و ما داير اسمع سيرتها ابداااا فاهمين ولا لا ؟

امي : غطت وشها بي يدينا و بقت تبكي ..

ابوي : عاين ل نهى وقاليها : بكرة من الصباح حنتحرك ..... و مشى !!!

نهى بقت تتكلم و نست امها جمبها و بقت تقول بانفعال ، البيعمل فيهو ابوي دا ظلم ، ظلم كبير يعني معقول نرجع القرية و اخلي اختي وراي ، طيب ياخ دي بتو لحمو و دمو و غلطت يعني خلاص ما قادر يسامح كل همو السمعه و العار والناس و المجتمع ، حريقه تحرق الناس و المجتمع ال ما اخدنها منهم غير القهر و وجع القلب ......

امي : نهى !!!!! دا كلام شنو البتقولي فيهو دا ؟!!!

نهى : ااااااي يا امي دا كلامي ، يعني شنو غلطت ؟ ما هي بنتككم اذا انتو ما سامحتو الحيسامح منو ؟ الناس !! ( و هنا ابوي كان واقف بيسمع فيها) !!

الناس يا امي هي الحتسامحا ! ياما ناس بتغلط و تستمر في الغلط لولا ستر الله يا امي !

لو ما ستر ربنا ما كان في زول قدر يرفع راسو من الارض بس لمن زول ربنا يفضح امرو ، الكل بيتقلبو شيوخ و نميمة و قطيعة و قرف !!

يا امي اي غلط ليهو ضريبة كان ما الليله ، بتحصل بكرة ، كان ما بكرة بتحصل بعده !!!

و هتون دفعت الضريبه دي و الله اعلم حاصل معاها شنو حالياً بس انا و انتي و ابوي الجوا دا ، عارفين كويس ان هتون ما بخير يا امي ، و رغم ذلك ما كلفتو نفسكم تسمعوها ، طوالي رفعتو يدكم منها و اتخليتو عنها ، ........(جاها صوت ابوي)

ابوي : انا ما جوا يا نهى ! انا واقف بسمع في الدرس الاخلاقي العظيم الكنتي بتشرحيهو لينا !!!

نهى : يا ابوي اناااااا*قاطعا

ابوي : بسسسسسسس (رفع يدو ) ...! و طلع برا البيت ..

(في جانب قرية الحموراب- تحديداً منزل ابو دومة)

كان في حوار حاد جدا بين اخوان محمد الاتنين اللي اكبر منو ..

عوض : محمد اخوي دا وقتين ركب راس وقال الا يمشي يتم تعليمو ويجيب الشهادة ، انا دي وقفت قدام ابوي شان يحقق حلمو وشان ع الاقل يكوون في واحد من ولاد ابو دومة متعلم وعندو شهادة ويرفع راسنا قدام اهل الحموراب كلها .. لكن وقتين جاء دور بنياتو الاتنين نصحته تب وقلت ليهو ي ود امي البت للعرس ، البت للمطبخ ، البت مكانها بيت راجلها ، خبت صدرو وقال بنات محمد ابو دومة ح يكونو مثال للبنات ، بناتي حيكونو مضرب مثل ل بنات الحلة . وانا بناتي م زي غيرهم وح يرفعو راسي

رد ليهو الفاضل :

اسمع كلامي دا يا الفاضل يخوي ، محمد بعد مرمط سمعتنا وخلا خشومنا في التراب ح يرجع الحلة بس يمين بالله ان خليتو يعتب اي عتبة من بيوت ابو دومة القصة دي ممكن يبقي فيها دم ، وانت ذاتك لا أخوي ولا بعرفك ، كفاية م قادر ارفع راسي ف مجلس ، قدام الناس و .........(و كان للفاضل عمي وجهة نظر و قرار مصيري تاني بعد كلامو دا لعمي عوض ، و كلام عمي الفاضل ما بيتنوه بعد كلام جدي الله يرحمو )

(في جانب نهى)

بتبكي و تمسح دموعا و تشيل الملابس و تجدعا جوا الشنطة .. قعدت .. مسكت تلفون هتون تاني .. و دخلت على السجل و اختارت رنداااا لو بتتزكروها ، رندا صحبة هتون ... و جاري الاتصال

رندا : هتون !!!!

نهى : انا نهى يا رندا ، كيفك ؟

رندا : خير يا نهي !!

نهى : كنت عايزة اسالك من حاجة بما انك كنتي قريبه من هتون اختي ..

رندا. : ما تربطيني بالاسم دا لو سمحتى

نهي : اسمعي هنا يا رنداا ولا يا زفت وش الكديسه دا تركبيهو ل زول غيري ، ما علي انا فاهمه ولالا ، قرفكم و اموركم دي انتو الجرجتو بيها هتون اختي و وصلتوها للمرحلة دي ، فا ماتجي تعملي لي فيها الملاك الطاهر ، و انا اصلا م عندي ليكي طاقه هو سؤال واحد عايزة ليهو اجابة ...

رندااا : اتكلمي بي ادب يا نهى

نهى : سوال واحد يا رندا انا م دايرة معاكي كلام كتير ،، اسم الولد الكانت مرتبطه بيهو هتون ؟؟؟

رندااا : تقريبا اسمو مؤمن

نهى : مؤمن بس؟

؟ متأكدة ؟

رندااا : ايوااا دا الوحيد الكانت حاكية لينا عنو و بترسل لينا صورو ..

نهى :صوروووو !!!! اسمعي ، رسليهم لي يا رندا

رنداا : م عندي انا ، كان في قروبنا حق الشمارات و من وقت اللي حصل القروب اتفشكل ..

نهى : طيب اي صورة بتترسل بتنزل براها ف الاستديو عليك الله فتشيعا لي او شوفيها لي مع البنات يا رنداا ..

رنداا : اسفه .... كفاية الكلام السمعتيني ليهووو .. و *قفلت .....

ااااخ ياربي ....ااخ !