الجزء 94

كان في بيت ناس ممدوح _

بيشربو في شاي الصباح ، و بيتفرجو التلفزيون ..

ساميه : اتخيل يا ممدوح فاتن من يوم الحصل ما اتصلت ولا شفتها ولا حتى جات تشيل حاجتها ولا حتى زول من اهلها اتصل .. تكون ماكلمتهم ياربي ؟

ممدوح : والله يا امي انحنا علينا بالواجب والاصول ، زي ما عرستها من ابوها واخوانهاا ، يبقى الاصول امشي اقعد معاهم و افهمهم كل حاجة ولا رايك شنو ؟

مي : عاين طالما م اتصلت ولا ظهرت من اليوم داك يمكن ما كلمت اهلها بطلاقها واذا مشيت لاهلها و كلمتهم يمكن يتفاجؤوا منك عشان كدا احسن امي تتصل بأمها وتجي نبضها من خلال كلامها ..

ممدوح : ممكن برضو .. امي اسمعي ، امبارح ضرب لي دكتور محمد ياهو راجل فوزيه و ابو هتون ، الراجل دا طول عازمنا غداء وانا ما كلمتك عشان عارف رايك ، وياهو امبارح اكد علي نجي نتغدا عندهم الليله رايك شنو ؟

مي : (ابتسمت ابتسامة لحد اضنيها وانبسطت شديد)..

ساميه دنقرت راسها كدا واتاثرت قالت ليهو والله انا مالي عين يا ممدوح هتون دي مرمطتها قبل كدا و دا غير كمان العملتو ناديه اختي رحمة الله عليها والله ما بقدر .. قاليها يا امي الناس دي قلبها ابيض الفات منهم بكون فعلا فات م بشيلوا جواهم ونيتهم بيضاء و بيحبو الناس ..يلاااااا حتمشي ليهم و الساعه ٢ القاكم جاهزين ... يلااااا

انا قمته .. لقيت البيت رايق ، بس لمعته و بخرتا

و مشيت ل نهى عشان اغير ليها الملايات لقيتها مزبطة امورها .. مشيت شلته منة ..

جاني مازن ، قالي اسمعي في اتنين اتصلو بي قالو بجو المحل الساعه 12 والاتنين عايزين قفة فرح الانتِ كنتي منزلها صورتها ، وانا م حقدر امشي المحل الليله ماشي الحلاق و عندي حاجات داير اسويها ..

انا ونهى بصوات واحد : حلاااااق هااا ، نهى عملت فيها بتغني بقت تقول ، ميووووش ميوووش يا ابشرا ميوش ميوووش ، بقيت بضحك قلت ليها انا زاتي قلت كدااا ، خلاص قبل تمشي خلي كرت بأرقامهم في الجزامة برا .. حمر لينا و مشى ..

من غير سابق انذار ، نهى قالت لي : احساسك شنو ان ممدوح جاي متغدي معانا !

قلت ليها : ولا اي شي الحاجات الزمان ديك اتلاشت ي نهى وعن نفسي بقيت انسانه واعية اكتر و اهدافي اكتر من حب وارتباط كفايه علينا التمبوشه دي حبيبة خالتوووو الله من ريحتهاا ياخ ، متين تكبري انتي يا روحي و تطلعي معاي نتفسح ونسافر الدنيا كلها ونطقم و نخلي امك دي تقعد تقول بابا مش كدا ياخالتووووً....

قلت ليها : انا ماشه لـ أمي .. حسيت ان نهى م كانت مقتنعه بكلامي عن ممدوح بس سكتت لانو م خليت ليها مجال للكلام .. المهم عاينت لامي لقيتها مشغوله ، قلت احسن اطلع اسي عشان الحق ارجع .. لبسته سرعه ، يزن قالي : ماشة وين ماما ؟

ماشة المحل حبيبي ، تمشي معاي ؟

قالي لا ماشي احلق مع مازن .. قعدت اضحك قلت ليهو سمح ما تخلي يخففو ليك شديد ، قالي سمح ، شلت الكرت اللي فيهو ارقام الناس .. طلعته !!

قلت شنو يا شهاب ! هه هتون !!

شهاب : اسف يا نسمة اسف

قالت ليهو من الواضح انك م حتاخد خطوة لقدام و هتون حتفضل محور حياتك ، المهم م عارفه اقوليك شنو بس ربنا يصلح حالك والبحب انسان حيصبر عليهو .. قاليها حمدلله على نعمة وجودك على الاقل اقول اني طلعت بحاجة من الدنيا دي ...

وصلت المحل -

فتحتو و بقيت شغاله على طلب الزباين .. جاني واحد سلمتو و بقيت منتظرة التاني و الساعه بقت 1 عديل ما جاا .. قلت كدا زمن مافي ، قمت شلت شنطتي و طلعت ماسكة الطلبه في يدي ،، سمعت صوت بقولي : اسف على التأخير و صوت م غريب علي ابدااً ..

اتلفت عليهو ! لقيتو #مؤمن ! قلت ليهو مؤمن !! شكلو كان مختلف في شيب في دقنو مختلط ب اسود بس شعرو زي م هو كتير واسود ، كان لابس قميص جينز بلو و بنطلون اسود و هاڤ بوت ابيض و في شال مشكل على رقبتو ، حتى استايلو حسيت مايل للغربي اكتر يعني ما مؤمن الزمان دا !! قلت ليهو خير !

قالي : عندي قفة كنت حاجز !! ااي انصدمته من انه عرف محلنا كيف بس كمان م استغربتا لمن ربطت الاحداث لانو انا قبل ارد عليهو في المسنجر كنت بنزل اعلان عن محلنا ..

دخلتا و صدقوني م كان فارق معاي ابدا .. دخلتا و لمن لقيتو ف عتبة المحل داير يدخل ! قلته ليهو حدك لو سمحت ! دا مكان نضيف و محل اكل عيش !! شلتا البوكس و ناولتو ! شالو واداني القروش دخلتا جوا ختيتا جوا الدرج و طبلتها و جيت طالعه وهو لسه واقف .. طبلت المحل وبقيت ماشه و م اشتغلت بيهوو ، قالي انا جيت #اشوفك ، استقت ليكِ ، ما نسيتك يا هتون !!

عاينت ليهو و قلت ليهو يبقى دا احسن انتقام لي ، على الاقل م حتقدر تتهنى باقي عمرك و مسيت خليتو ....

والله ما هز تفكيري و لا اثر علي ابدااً .. ركبتا و مشيت البيت ، طبعاً الروايح دي مبالغه بالجد الاكل لمن يكون معمول بـ حب بتكون ريحتو و طعمو غيرررر .... طوالي دخلت اخدت لي دوش سريع و م كنت فاهمه سر الحماس اللي انا فيهو .. و طلعت على غرفتي .. شلت فستان من ملابس الزمان كنت بحبها قبل الدوامة دي ،

عملت شعري ويڤي ، لبست لانسز عسلية و عملت مكياج خفيف و اكسسوار انسيال و سلسل و خاتم دهبي.. عشان فستاني اصفر فاتح شديد اقرب للكافيه فيهو وردة حمراء بارزة في محل الجيب ..

لمن سمعت صوت ابوي بيسلم و يرحب هو و مازن عرفت انهم وصلو ...

(في ابو حليمة - ابو دومة)

موهوب كان جاي داخل هو و عمو .. و بيتكلم معاهو عن موضوع انتقالو للخرطوم حيكون فترة هناك و فترة في القرية .. بس كان صوت ميامن طاغي على هدوء البيت .. و لمن وصلو الحوش لقى ميامن ماسكة ميادة من شعرها ، و بهناك امو و مرة ابوه م قادرين يعملو حاجة ..

موهوب : ميامن ، دا شنووووو البتعملي فيهو دا !!

طوالي زحت من ميادة و قالت ليهو بنهظر مش كدا يا ميادة !! ههه

موهوب عاين لميادة : انتِ ساكته ليها ليه م قادرة تجيبي حقك حتتمسكني كدا لحد متين و انتِ يا امي ، اها راضيه كدا ! اهو دا اختيارك ! ميامن ولا نهى اللي م كانت غير بتسمعي منها غير حاضر و نعم !!

ميامن : ما تقارني بالجوبوعه الفاجرة ديك اوووع ..

امي : لمي نفسك ياخ قرفتينا في عيشتنا اسمع يا موهوب ، عندها ولي ، زي م جبناها منو ترجع اهاها دقيقه وحدة م تقعد في البيت دا ..

موهوب : ي سلااااااام عز الطلب بس كداااا ، انتِ طالق طالق طالق يا ميامن .. ممكن تجهزي عشان اوديكي اهلك !!!

ميامن : بقت تبكي و تترجى فيهو الناس تقول علي شنو دابا عروس رجعوها والله م حغلط عليهم تاني اعفي لي وخليني اقعد يا موهوب انا بحبك عليك الله ..

موهوب :(ب هرشه ) انجررررري قلت ليكي !!!

اما في جانب نعمة -

اللي كانت مصدومة ، بي منظر الشرطة

اللي كانت مالية ومحاصرة البيت من كل مكان .. و عرفت ان المرة دي مافيها راجعه ..

و ان الله يمهل ولا يهمل ..

للاخيرات❤️

سحر سمير _فاطمة قسم الله ...