الجزء 11

الله يلعنك انت

الله ياخدك الله ياخدك ياخ اااااه

ما تشوف يوم سمح في حياتك...

~~

دا ح يعوضني عن احساس اني اتدنست...؟

الابيض بقولو هو النقاء وانا فقدت فضيلتي ولا....؟

في حياتي بقيت بتهرب من اني ارد انك.....

ملعون ملعون

انا بلعن اليوم الشفتك فيه

ابو......... منو؟

(هههههه اتخيل دا كلووو حلم.... )

بس برضو ما بثق فيك تاني...

*جزئية معلقة*

.

.

*سيُخبرك* الطوفان وهو يجرفك..انت الذي ربّيت الكارثة، فإغرق ...

تعال امسكني يا اشرف!!!......

~~

*مسكني من يدي(كنت مستسلمة ما ينفع البكا علي اللبن المسكوب) ساقني ل مكتب مدير السجن ..

مع كل خطوة دقات قلبي بتزيد وفي بالي كلمة واحدة بردد فيها اقول لـ ابوي شنو..

اقول شنو اقول شنو

وطيت راسو شديد استاهل القتل انا...

طق طق طق طق(دق الباب)

ما تتخيلو احساسي وقتها كان كيف ، الله لا يخت عدو في لحظه زي دي ، كل الكنت حاساه وقتها اني عايزة اجري اموت تتخسف بي الارض بس ما اقابل وش ابوي قدامي..

خجلانة!!!

هه خجلانة؟؟

انا خنت الثقة الختوها فيني اهلي ،،والله اعلم حـ يحصل ليه شنو لما يشوفني كدا ملفوفة بملايا وف قسم الاداب مجرجرة قدامو..

*جا الصوت قوي*

_ادخل يا اشرف ..

دخلت يديني مكبلات كنت مدنقرة(ماعندي عين ارفع راسي كنت بهرب من نظرات ابوي ما دايرة اشوف انكسارو ، كنت فاكرة مجرد جروح و خدوش في وشي ممكن تدس ملامحي ، بس في الحقيقة العار ما بيندس ، حيفضل نقطة سودا في حياتي لو بعد الف سنة ) قابضة الملايا علي شديد كأني بداري بيها عاري..

ياالله ياالله...

الخزي، العار، الالم، المزلة والندم

سامحني يا ابوي بتك بدل تجيك ب هدوم التخرج وشايلة الشهادة في يدها.. جيتك بالعار..

_المتهمة سعادتك

*ابوي رفع راسو ، انتو متخيلين ملامح الانصدام الكانت مالية وشو من حالتي !! غطي وشو ب يدو و قبل منى و وهو مغطى وشو ، ما نطق ب حرف واحد ،، ابوي انا ما قال شي ما قال لي ولا اتكلم ..

كان نفسي اقول ابوي اواسيه بس عشان ما اشوف نظرة الخزلان ال في عيونو ما قدرت افتح خشمي ب ياتو وش بس.. بس كل الكنت محتاجاهو زول يسمعنى و يصدقني ... بس منظري كان كفيل بكل ردة فعل حصلت من اي زول حتى اقرب الاقربين لي ..

~~

نزل راسو..كدا..

***

ابوي وقع..

( صرخته بصوت عالي)

عزالدين جرا لحقو تكلو وقعدو..

اتخلعته ودايرة الحق ابوي..

بس اشرف جراني مسكني بقوة.. و قالي ممنوع

(ببكي وصوتي مبحوح ومنهارة) قلت ليهو عليك الله ، دا ابوي..

قالي لمن هو ابوكي ما فكرتي فيهو ليه قبل توصلي للمكان دا ، كمل ، و قالي انا قلت ممنوع المسجونة تلمس الزوار

فجاة عز الدين علىّ صوتو و قاليهووو اشررررف !!!!

قاليهو امرك و جراني ل ركن الغرفة وقال لي ما تتحركي..

~~

عيون ابوي صادفت عيوني..

منكسرة..

قالها كلمة انتهت مني

'' سوقوها من قدامي دي ما بتي ''

( جا صوت عزالدين)

_ اشرف طلع المتهمة..

جراني من يدي بقوة برا.. سمعت عزالدين بقول ليه

: انا بعتزر بس كان لازم تجي عشان نتأكد دي بتك الجانا فيها بلاغ انها مفقودة،،انا ما عارف اقول ليك شنو..

ابوي قاليهو. : ما تقول شي خلي القانون ياخد مجراه(صوتو مهزوز مكسور العبرة خانقاه) ما عايز اعرف اي تفاصيل عن الموضوع !!!!

قاليهو : معليش يادكتور كل بني ادم خطاء و....

*سمعت صوت ابوي انهار..ابوي بكي انا خليتو يبكي اول مرة في حياتي اسمع ابوي ببكي بحرقة..

_ما بتي انا ربيت بت تانية كان بضربو بيها المثل في اخلاقا وادبها واحتراما وتفوقا..اديتا الثقة والامان وفرت ليها كل حاجة بس يا خسارة ياخسارة(ضرب يد ب يد)

...

*ابوي طلع وكان عزالدين ساندو عاين لي بطريقة قتلتني ، انتو فاهمين يعني شنو ان راجل في قامة ابوي و مكان ابوي بي شيبو ، انه يتبهدل بسبب بنتو

في مكان زي دا. !!!!!!

لقيتو بيقول و يردد ، لا حول ولا قوة الا بالله ..

*بقيت بعاين ل ابوي ودموعي جارية حيلي ميت ما شايلني انا اكيد بحلم ما مستوعبة ل هسي الحاصل..

كنت عايزة اكورك لي ابوي ما تخليني وتمشي سامحني بس ما لي عين حتي انطق الكلمة دي..

اشرف رجعني الزنزانة وانا منهارة للاخر ، بقى خلاص ما فارق معاي حيحصل لي شنو ..

*وبدت حياة جديدة*

جابو الكلبشات ركبوها في يدي وطلعونا ركبونا العربية ب ورا..

وصلنا سجن النسوان حاجة كدا كبيرة ..

جو واحدات نزلونا ومشينا ورا الشرطية..

ماشة بسرعة والوراها بتكورك فيني امشي سريع يا متهمة وبتدفر فيني..

رجلي مقفلة ب الكلبش غالبني امشي كويس..

قعدت تكورك فينا

_اتحركو هنا ماف كسل يا مسجونة.. دا زمان عند اهلكم هناك الله لا جاب باقيكم تجو تعلونا نحن هنا ب قرفكم دا... يا.... ويا.....(الفاظ كعبة)

دخلونا غرفة اخدو بصمات يدي العشرة تغمس اصابعي في الحبر وتضغطهم علي الورقة.. بعدها صوروني من وشي وبالجوانب واخدو كل بياناتي..

بعد فكو الكلبشات لقيت رجلي اتجرحت ويدي اتورمو..

اخدونا تاني للتفتيش وفتشونا ب اسلوب قبيح فهمت انو دي طريقتهم كدا مع اي مسجونة..

بعدها ودونا

علي واحدة قالو ح تفحصني..

_انتي شكلك

بت ناس الجابك هنا شنو(الدكتورة بتتكلم معاي)

*اتفجرت بالبكي فجأة علي حالي كنت كيف وهسي بقيت كيف..سبحان المعز المذل..

_الغلط حسابو مر والعقوبة ح تطهرك اصبري بس

*الدكتورة كتر خيرا الوحيدة العاملتني بإسلوب كويس

طلعت وقعدت منتظرة وانا مكلبشة،،بعدها جات السجانة وجرتني من يدي جابتني مكان شبه فاضي صاااني يخوف

~~ مكتوب الحبس الانفرادي

*انتي حا تحبسيني انفرادي

_اي امشي بدون كلام يا متهمة

*الله يرضي عليك الله يوفقك انا ما سويت حاجة غلط الله يخلي ليك اولادك خليني مع الناس ما تختيني براي..

بس جرتني بالقوة

_اجي انتي يختي بلوتك بلوة جاية بجريمة زنا وح تتختي كدا لما القاضي يستجوبك.. دي كان انا امك كان ضبحتك بي سكين ومسحت الدم في وشك...

*دنقرت وشي ساكته ببكي

كررب فتحت الباب وكلبشتني من رجولي تاني ولزتني دخلتني

الغرفة حاجة كدا صغييرة فيها مرتبة علي الارض وسخانة ومعفنة..

فيها جردل صغير عليه غطا وقزازة موية..

*بس اسمعيني شوية

كرررب كررب قفلت الباب تاني...

_ اسمعي هنا نقة كتيرة وقلة ادب ما دايرة ليك وش تعترضي كمان هيييياااا..

الجردل للحاجة والموية ما تكمليها ماف للمسجونة الا قزازة واحدة في اليوم فاهمة..

ومشت...

قبل ما ارد حتي.....