الجزء 62

_دي شنو يدك مالها ! يا هتون !!

*يابت روقي م تتخلعي ساي ، دي الحنانة بترسم لي في حنة..

_حنة !! يعني يا هتون انتي مبسوطة ؟ ما عارفه ليه حاسه ان في حاجة غلط ، و #ممدوح !!

*نهى ، ممدوح امرو انتهى ..

_طيب .. انا حأقفل ..و*قفلت

بعد نهى قفلت .. بتحكي -

جا موهوب داخل ، وهي قاعده في نص السرير .. قالت ليهو :

*عايزة امشي عند امي ، ما تغير هدومك عشان توصلني ..

_اسي ؟

*ايوة ..

_خليها لبعدين

*لا ما بخليها اذا ما عايز توديني خليك..

_نهى في شنو انتي ليك كم يوم متغيرة واسلوبك معاي ما مزبوط !!

*حتوديني ولالا !

-(جا مسكا) بتكلم معاك انا !!

وكانت اول مرة تعلي صوتها عليه .. شوف يا موهوب لو انت عامل فيها احمق ودمك حار و كلامك بطلع بسبب حماقتك و اني مفروض ما اركز في كلامك وقت غضبك و فهم زي دا لاااايا موهوب !! انا شايله في قلبي و ساكتة و متحمله كل شي ما بيشبهني ومافيهو راحتي فا دا ان دل بيدل على حبي ليك ، بس انا حقيقي وصلت مرحلة و للاسف ما قادرة اتراجع منها .. و على حسب علمي مفروض اني مطلقه صح ولا غلط ؟

*انتي مجنونه !! انا قلت كدا عشان اوقف هتون .. و بعدين قصدك شنو بـ انك متحمله و ...الخ ؟

_قصدي ان لا دي حياتي ولا دنيتي و لا متعودة اعيش حياة زي دي ، انا عايشه حياة اتفرضت علي عشان اهلي و عشانك و حبك كان دافع اني اتخطى كل عقبة بتواجهني لكن .. لكن حتى انت طلعت انسان حمقي و دمك فاير و تجدع الكلام و ما بيهمك كلامك دا واقعو لي بكون كيف ، و ماخد الحياة رجالة .. انا تعبت يا موهوب وحابة امشي ناس امي ،اقعد كم يوم ، عايز توديني اهلا وسهلا م عايز توديني خليك قبلك ....

ما كنت عارفه العملتو دا صح ولا غلط .. لبست اقرب توب لي وفتحت الباب و طلعته .. قبل اصل باب الشارع ،لقيت موهوب مهرول من جمبي و سبقني و ركب العربيه و فتح لي الباب ...

ركبت معاه لا كلمني لا كلمتو ، لمن وصلني ...

_ ممدوح !!!

-ماشي وين انت ! والشنطة دي شنو !

*مي ، في شنو ؟

_كيف في شنو وانت بتستف في شنطتك ؟

*مسافر مأموريه تلاته يوم وراجع ، عادي يعني ما اول مرة ..

_انت ناسي انك في اجازة ليك اسبوع !! ممدوح انا ما دايرة اضايقك ، بس كمان انت راجلنا و راجل بيتنا ما حينفع تمشي .. ممكن تطلع محل داير اليوم كلو بس وقت النوم تخت راسك معانا ، و يا اخوي انا حاسه بيك وحاسة بالجواك والحصل دا ما ساهل بس كمان م دايرة يأثر على حياتك !!!

(ممدوح عينو وقعت على فاتن واقفه طرف الباب)

*واقفه بعيد مالك !! تعالي خشي عديل واسمعي ، مش مشيتي ناديتي مي عشان تعرفي مالي ،، تعالي تعالي ابشرك ، هتووون وبح ،خلاص ارتااااحي خلتني و حتعرس كدا مبسوطة !!!

وشال شنطتو و طلع .. مممدوح يا ممدوح رد علي ..

*مي انا راجع اديني وقتي بس و انا بحمد ربنا امي اسي مافي بالجد م كنت ح اسلم وانا محتاج اكون براي لو سمحتي ....

_...طيب يا ممدوح ..!!!

خالتي نعمة انا تعبته والله .. حأقوم اغسل الحنة دي ما بتحمل القعده دي انا ..

_انتي جنيتي ! حنتك لسه ما نشفت يا هتون اصبري شويه عشان تشيل ،(طلعت خلخالين كبار اب جنيه دهب ) - حلو صح ؟؟

م رديت عليها وقمته..

قالت لي وووين ماشه ؟؟ قلت ليها ماشه اغسلها ما بستحمل والله خلاص كفايه اصلا مصيرها تتمسح ..

خبتت صدرها وقالت لي سجمي و تبقى باهته كدا قدام ضيوفي وناسي .. ودايراهم يقولو لي #مرة_ولدك ما زبطتيها وانا طول عمري بزبط العرايس من الالف للياء ، و هيهييييييي دا ياهو المثل زاتوووو " باب النجار مخلع" تعااااالي اقعدي !!

قلت ليها : قلتي شنو !!! مرة ولدك؟؟؟؟

في جانب نهى -

اللي وصلت بيتنا ..وكانت قاعده وسط امي و ابوي ماخدة من كل جانب حنان و رعاية خاصه ، و قامت من جمب امي ، و جات قعدت جمب رجول ابوي ، رفعت رجلينو بي يديها و قعدت و ختت رجولو فوق رجلينا و بقت تجكن (تعصر )ليهو بي هداوة و بدت كلامها ... و ديك ليها امي قاعده في السرير المقاصد ليهم ...

قالت ليهو : ابوي ، البيت من غير ضل بيبقى ؟

قاليها : ما حيبقى بيت ..

*البنا ، ممكن يبنى بيت من غير اساس وعمدان ؟

_لا ..

*طيب ،انت ضلنا البنتدارا فيهو .. و انت عمودنا وعمود بيتنا ، انت قدوتنا الحسنة اللي قمنا لقيناه قدامنا .. يا ابوي انا حامل بفضل ربنا و خلاص م معروف اولد متين و ما معروف اذا حأطلع عايشه ولا ميتة من الولادة دي !! بس*قاطعوها الاتنين

امي : دا كلام شنو يا نهي ..

ابوي : يا بت لاحول ولا قوةًة الا بالله ..

*دقيقه !! وحدة من بناتك حامل والتانيه حتتزوج بكرة ، دا مخليك حاسي بشنو ؟؟

_حاسي بالضعف والظلم ..

*حاشاك يا ابوي ، طول ما احنا عايشين قادرين نغير حياتنا قدرتنا .. يا ابوي اخد كلامي دا في عين الاعتبار انا بجد ما عارفه مصيري شنو ! بس كل البعرفو اذا ربنا بيسامح انت ليه ما قادر تسامح حاجة مرت عليها سنوات ؟ يا ابوي كلامي البقولو دا انت علمتني ليهو والليله انا بقولو عشان لمن كنا محتاجين ليك اديتنا ليهو كطاقه وقوة

و دعم ، والليله جا دوري يا ابوي ادعمك بيهو .. ما كفانا فراق ؟ ما حنيت ل صينية الغدا البتجمعنا انحنا الخمسه ؟؟؟

و دخل طرف #رابع في الكلامو قاطعهم بي صوت قوي وقاليها #مافي_فايدة يا نهى !!!

.... اها طقيتو موهوب و نهى عين

كدا ارتحتو 🐸🐸🐸

سحر سمير _فاطمة قسم الله