الجزء 36

جيبوه...

مؤمن مؤمن انتو سايقنو وين؟؟

امو ماسكاه واختو ماسكاه بقوة وبحاولو يجروه

والسكاليب والبكي والصراخ..

المستشفي كلها طلعت تتفرج حتي العيان والعندو عملية بي الدكاترة والممرضين..

وهو بين صدمة وصدمة ما قادر يستوعب الحاصل.. جارنو قدامهم وهو ساكت...

سمع صرخة اختو اتلفت عليها شاف امو قعدت في الارض وبتلطم علي روحها والناس حواليها بعاينو وبضربو يد بيد وبستغفرو وقتها بس حسه انو كسرة عين الاهل حارة حاااارة شديد لما تشوفهم بالمنظر دا...

.............

خالفة كراع علي كراع ما خلاص بقيت الكل في الكل انا وبعملو لي حساب بالذات بعد اخر شكلة لي..اي واحدة بتقرب علي ح تتدقا دق العيش في الفندق،،

عارفين كدا مسبقا...

السجن مع انو كان تطهير لي من العملتو بس كمان علمني كتير ما علمني الصالح بقدر الطالح..

مع قعدتي دي كنت بتفرج علي حاجة كانت باسطاني شديد كان قعدت عمري كلو ما اظني اشوف احلا من كدا..

وكتر خير #سعاد قصتي ليها مع #سكينة خلتا توريها نجوم الليل واخدت لي حقي وزيادة..

_عيدي عيدي انتي ما حصل نضفتي ولا شنو..

*لا انا شهادة عربية..

ب كلمتها دي الواقفات كلهم فكو الضحكة بصوت عالي واولهم انا..

_شهادة عربية دي عند امك هناك(رد السجانة ليها)

قال شهادة عربية قال...

سكينة باركة علي ركبتها وشغالة تمسح وكل شوية تمسك ضهرا..والسجانة نازلة فيها نهزرة وكواريك..

قمت من محلي وجيت ماشة ب جمبها وكروو دفرت الجردل كشحتو ليها..

الساعة جدعت بشكير المسح وقامت علي..

_احسن ليك تختيني يا هتون وزي ما كشحتي تمسحي انتي..

*ضحكته ها انا الليلة اووف يا حلوة كتر خيرك جيتي في وقتك نرتاح شوية يلا يلا شوفي شغلك..

وجاية علي تضربني وحالتي كفكفت يدي مستعدة كان ما صوت الشرطية جا نهرتنا..

عايزنك ف مكتب المديرة يلا قدامي..

_وانتي بمشي وبجي ما القي اي وسخة ولا ح تعيديه وقدامك شغل كتير واي وسخ في الزنزانات دي كلها تمشي تطلعي،، اشوف قلة ادبك دي ل وين..

والانفرادي الليلة محمدك...

*عاينت ليها بطرف عيني وهمسته براحة ..تستاهلي

مع كلمتي ليها دي جنت علي الاخر شكلها وبدت تكورك..

لا يعني لا هتون الكشحتو تمسحو..

ب كوراك

انتي شكلك راسك قوي ومحتاجة تربية كان ما نسيتك لبن امك..

ونادت علي كم شرطية تانية..

خلي الجردل والبشكير واقيفي..

مشت عليها وكلبشتها من يديها ورجولها وجرتها للانفرادي..

المسجونات بقن يضحكن عليها وانا ما فوته الفرصة دي..

دخلوني علي مكتب المديرة..

_المديرة: اها مستعدة..

*علي شنو؟

_بكرا اخر يوم وح تطلعي حمدالله علي السلامة..

مع اني كنت عارفة من المرة الفاتت بعد الحكم وبرائتي من شبكة الدعارة والخمر وكلام ممدوح لي بس كنت منتظرة اللحظة دي يجوني ويقولو لي خلاص افراج..

ما عرفت اضحك ولا ابكي اكورك اصرخ اقع في حضنها ولا ابوس رجليها..

بس وشي كان بوضح كل حاجة وقتها....

..............

_دا كلام شنو يا نهي البتقولي فيه دا بس وبعدين دا ما وقتو هسي،، ما وقتو نهائي..

*لا وقتو يا موهوب وكان ما اتكلمنا هسي ووضحنا كل شي ما ح نتكلم تاني

_عايزة تقولي شنو يا نهي سامعك

*ب صوت ثابت شديد وبتعيدا لي تاني

زي ما لت ليك انت لازم تعقد علي بت شيخ الحلة الكنت عايزها..

وقف وبقي بعاين لي

_نهي الله كم؟

لا اله الا الله لو فتحتي الموضوع دا تاني ما بحصل خير انتي فاهمة..

*لا ح افتحو وانا مصرة علي كلامي القلتو دا..

_خير يا نهي مش انتي عايزة كدا جدا طلباتك اوامر تاني في شي؟

بكلامو دا نهي اتصدمت افتكرتو ما حا يوافقها ما ردت عليه بس قعدت تبكي وبسرعة دخلت جوه وخلت لي المكان...

..........

رجعته وانا بضحك وبتبسم براي الضحكة للضروس كييف واخير بعد طول انتظار وصبر اخيرا حريتي ح اطلع..

من دخلته كوركت ليهم..

قووولو لي مبروووووك انا افراااااج يلا سخنو الجردل..

ايوووووي يوووووي يوووووي واحدة عزتني ب زغرودة طويلة والصفقة حضرانة..

ربطته الطرحة سريع وبدينا حفلة الطلوع...

..............

(خالتو نعمة)

من جات بيت اختها الاتوفت(سوسن) النسوان ما وقفن منها كل واحدة جات تعمل الواجب..

الواجب بس؟

ابدا هو في حاجة بتتدسا الايام دي..

كل واحدة بتدخل عليها بتحكي ليها الحصل..

الحصل شنو؟

تتزكرو الليلة الاتقبض فيها صلاح وسكينة في بيت؟

ما صلاح هو راجل سوسن الماتت اخت خالتو نعمة ..

دا الخلا نعمة تتوتر لما هتون زكرت الاسم قدامها..

والمرا هي خالتو نعمة..

( بس للأسف لي يا هتون ما ركزتي كويس وعملتي ب كلام ممدوح الطلبو منك)..

................

_نهي انتي زعلتي مني؟

*بتقش في دموعها لا ابدا وانا ازعل لشنو وكدا كدا اصلا الراجل محللات ليه اربعة وانا زي ما شايفة كان ابوك ولا اعمامك ماشاءالله عامرين بالنسوان..في الاخر الولد شبه ابوه..

_ضحك شديد وقبل يتكلم

*كل زول بهمو وانت بتضحك

_بضحك علي برائتك يا نهي..قعد جمبها ولفتها علي ومسك يديها عايني لي في عيوني واسمعيني..

*رفعت راسها بتعاين ليه بخجل ودنقرت

تاني...

_ضحك وضغط يديها شديد شوفي انا صاح لما ابوي ختاني قدام الامر الواقع اني اعرس واحدة ما حصل شفتها تاني ال هو انتي هههه حتي ابوي قال بعد اعرسك اول حتي اعرس الدايرا... زعلت وامكن في شي ما عارفاه حصل بينا نقاش واتشاكلت شكلة ل رب السماء معاه ومع اعمامي وحتي خليت البيت ومشيت قعدته عند ابوي شيخ الحلة..

*شنو ما هسي مشيت وجيت ل كلامي قالتا ليه ب صرة كدا..

_ممكن تسمعيني للاخر بس؟

*طيب

_في الديوان اكيد ما زيكم نحن انتي ما بتعرفي عادات الريف صعبين شديد برضو.. وبعدين انا ما عايز اعرس اتنين واحدة احيا واموت معاها كفاية شايف المشاكل كل يوم في حوش جدي بين نسوانهم وولدي وولدا وعملت ليها وما عملتي...

المهم مع زعلتي ديك وقتها لقيت المساندة والتحاريش من ديل ومليت الراس وقالو لي خلاص ماعندك شغل بيهم نعقد ليك بس علي بتنا وتقعد معانا..

*طيب وانت غيرت رايك لشنو تاني؟

_قلة ادبها!!!

*شنو كيف كيف دا م سبب؟

_ لا سبب انا ممكن اتقاضي عن كل شي الا عرضي ما بحب زول يهيني فيه.. وهي اتجرأت علينا اليوم الله عالم بكرا مع كل نقاش او مشكلة تجيب سيرتكم بالقبيح..

*ليي الحصل شنو؟

_كلام كدا ما ظريف جا منها عن عمي(ابو نهي ا) وانتو وهتون..

*قالت شنو؟

_ما تشغلي نفسك بيه دا كلام حصل وانتهي وانا خليتا تعرف قيمتا في اللحظة..

نهي ممكن طلب؟

*ايوة

_خلينا ننسي الفات ونركز في الجاي ايوة عرسنا جا بدون رغبتنا وكان غريب شديد بس لخير..وانا اكتشفت فيك جوهرة جواك زولة طيبة حنينة برغم الحاجز وانك بتعملي روحك قوية لكن عاجباني استقلاليتك وعقليتك الواعية رغم انك صغيرة..

*حيلك حيلك ههه خلعتني وبعدين القدري ب اولادهم عندكم علي قول ابوك..

قعدنا نضحك

_اها قلتي شنو نقلب الصفحة ونبتدي حياتنا ومع الايام الحب بجي طالما بقينا متقبلين بعض..

*بخجل موافقة...

بس في حاجة اخيرة....

...........

ما نمته نهائي من الفرح وبعد الساعات اليوم يخلص..

صليت الصبح حاضر ومن اصبحت #سعاد جابت سكينة تنضف الحمامات كلها..

الضهر جا وخلتا تشيل اكياس الزبالة كلها كمان اللهم لا شماته بس تستاهل..

لحدي هسي لا حس لا خبر ماف زول جاني بديت اقلق الصراحة الحاصل شنو؟؟

فجأة واحدات من الشرطيات ديل جرو لما #سعاد نادتهم بطريقة غريبة كانت بتكورك..

نحن كلنا في شنو؟الحصل شنو؟

دخلونا وقفلو البيبان..

بقينا منتظرين ومنتظرين نعرف الحصل..

اخيرا سعاد ظهرت علينا..

*في شنو ومش انا الليلة مفروض اطلع لحدي هسي ماف زول جا علي؟

_اي ما انا جيت اسوقك طلعتني ونحن ماشيين قالت لي:

سكينة انتحرت!!!

*نطيت واتخلعته وقعدة في الارض فجأة وقمت تاني وقفت قبلي وختيت يدي علي نصي والتانية في خشمي شنو؟...

.