الجزء 54

بعد قفلت من ممدوح ما جاني نوم و كنت حاسه بي بعدم راحه من اول ما اتصل علي و ما كانت عندي رغبة في الرد ..

فكرت كتير ، انا ما بقدر اتجاهل مرتو ، حتى ولو بينهم مشاكل انا ما بقدر اكون عبئ اضافي ليهو ، بالجد المشاكل اللي استوطنت حياتي ، كافيه جداً ، ما عندي طاقه ل انو ولا ل مرتو ، انا لسه بتمنى ابدا حياة نضيفه و هادية بالجد انا اكتفيت ...

ولازم ارجع للواقع .. و ابدأ مرحلة جديدة لي ، الحب ما كل حاجة ..

و نمت على قرار يمكن تكرهوني بي سببو !!!

(في قرية ابو حليمة_تحديداً بيت الدكتور محمد)

امي : محمد ...اكب ليك اللبن ؟

ابوي : ما داير ! (ماسك سبحتو في يدو و بيسبح) ..

امي : قلبك ما حن ؟

ابوي : (بي نهرة) فوووووزية ! حدك !

امي : لحد متين ؟ قلبك م قاليك تطمن عليهت و لا تعرف احوالها ؟ هتون كبرت يا محمد و كل ماليها ماشه تحلا و بقت في عمر كنا بنحلم نشوفها فيهو من يوم ولدتها ، محمد الدنيا دي ما دايمة ل زول و كان للناس انحنا ما اخدنا منهم حاجة هم بتكلمو ويسكتو في الفارغ و في المليان .. بتنا يا محمد كفايه عاقبناها بما فيه الكفايه يا محمد ارجوك كفايه ياخ ربنا بيرحم و يسامح و انت ما قادر تسامح موضوع حصل ليهو كم سنه !!!

ابوي : اسامحها !! نسيتي الطريقة الكلمتني بيها في المستشفى قدام الناس !!ولا ازكرك يا فوزية !بتقارن نفسها بي اخر الزمن !

امي : معاها حق ! ماف زول معصوم عن الغلط و الانسان قبل يبدا يحاسب انسان زيو ، يبدأ بنفسو ، م معنى كدا انا م مغلطاها ، لا مغلطاها و بعدين ما تفك الموضوع الاساسي ، البت لازم ترجع خلاص كفايه لحد متين حنفضل كدا!!

ابوي : لحد ما ربك ياخد امانته !!!!

امي : لا حول ولاقوة الا بالله العلي العظيم !!

بتحكي نهى -

موهوب : نهى خليني انوم شويه ..

نهى: تنوم وانا صاحية لكن !

_نومي انتي كمان شوفي الوقت اتاخر..

*ما جايني نوم قوم اقعد معاي (تجرجر فيهو من اضانو ) ..

_اخخخ يا ربي ، نهى والله نعسان و بكرة عندي شغل يلاا فالحة حبيبي تعالي ننوم سوا ..(جراها عليهو)

*ياخ براحة بطني طيب ..م نعسانه ياخ

_انتي الدرب الركبو ليك دا بصحصح بيك ولا شنو لو عارف كدا ماكان خليتهم يركبو ليكي ..

*واموت يعني !!!

_(جراها اكتر وضغط عليها في حضنو و فتح عيونو) ياخ بعد الشر ياخ مالك ياخ ما تقولي كلام زي دا يا نهى ، اووووف اها النوم وطار ، كدا مبسوطة؟

*سمح يلا انا نعسته ... ههههه

_(خنقا بيهزار ) ياخ اخنقك انا ولا اسوي فيك شنو بس وريني (ويجضم)هههه بحبك ، بحبك ،بحبك

(و قرب من اضانها وحضنا وبقى يردد ليها ) بحبك يا نهى #بحبك والله ....

(في جانب ممدوح و مي )

فاتن : ونسه حلوة من غيري ! (بتعاين ل مي ، يعني انا سمعت كلامك) !

ممدوح : مي يلا حبيبتي تصبحي على خير .

مي : وانت من اهل الخير ربي يسعد قلبك يا غالي (م اتهزت من وجود فاتن وانه سمعت كلامها)

فاتن: الظاهر كراعي حارة !!

ممدوح طلع و مي مشت فتحت سماعتا و وطت صوت الاغاني و بقت تغني معاها وبتفرش في سريراا ،، لمن فاتن براها طلعت !!

ممدوح مشى غرفة النوم حقتهم ، شال غيار و طلع

و فاتن واقفه ليهو .. م اتكلم معاها ...

مشى اخد حمامو و رجع ! لقا باب الغرفة مقفول .. فتح الباب ، فتح معاهو وقف #مصدوم

كورك بي صوت عالي قال : دا شنو القرف دا يا فاتن !!

جات جارية عليهو ، حاولت تحضنو و تقرب عليهو ،، لذاها و قبل وشو منها ، قاليها(بصوت عالي و آمر) #انستري !!

في صباح اليوم التاني_

قمته من الساعه 10:00 كدا لقيت يزن مافي جمبي

جريت مخلوعه و بنادي فيهو .. لمن طلعت الحوش لقيتو قاعد مع خالتو نعمة ! مشيت هبشتو لقيت حرارتو طبيعبه ..

نعمة : بقى كويس ما تتخلعي ساي ..

قلت ليها : حمدلله ، انا حأدخل الحمام

فالت لي : ما تتأخري عشان انا طالعه مشوار !

*حتتاخري ؟ ما بينفع تسوقي معاك يزن ؟

_عندك حاجة انتي ؟

*ااي عندي كم مشوار

_طيب بسوقو معاي ..

*طيب اخلص واجي اللبسو ليكي..

خلصتا حمامي ، طلعت شلت يزن لبستوو ، و بقو طالعين ، مشيت بعمل في كوباية شاي ، وخالتي نعمة مغطية لي صحن فيهو لقيمات .. قعدت شربتا ، و مسكتا البيت كنستو ونفضتو وغيرت الفرش من ستاير ل ملايات ل مشايات ، ولبست عبايتي و طلعت و طبلت الباب ..

مجرد ما طلعت حسيت بي حركة زول كأنه كان قريب من الباب و مجرد م حس بي جراا و الله اعلم !!

اتلفت م لقيت غير اثر رجلين كمية ..

م اهتميت .. و طلعت وقفت لي ركشه و قلت ليهو #سوق يثرب ..

عاينو انا سحر : الساعه حالياً 4:53 بعد صليت الفجر

في اللحظة دي انا حصلت لي حاجة باسطاني شديد

حمدلله ، ودعيت ربنا يسعد قلب كل وحدة فيكم بالحاجة البتتمناها ، اذا ممكن ارفعو الالبوم بالحاجة البتتمنيها و منتظراها تتحقق ❤️ فاا .. حبيت اكتبها هنا واشاركم عشان لمن اجي في يوم اقراها م انسي اليوم دا .. بحبكم ❤️

سحر سمير _فاطمة قسم الله

يتبع ..