الجزء 79
دخلتا غرفتي او بمعنى اصح #شردتا
الليله دي رجعتني لي كم سنة ورا !!
حسيت اني غبيه و نفس السكينه طعنتني تاني ! و استرجعت مواقفي معاها لقيت ممدوح صح !!
و تلفوني م سكت اتصالات من نعمة و من شهاب، مسكت التلفون قفلتو..
كفايه حُزن و ضيق و بكا كفايه ، كفاية 8 سنة حياتي راحت على ولاشي !! غيرت و رقدت !
(في جانب ممدوح)
*طوالي مبتسمة انتي ؟
_الدنيا دي فيها شنو !
*على قولتك .. داير منك طلب !
_اهااا
*قربي من هتون اكتر وخليكي قريبه منها الفترة دي ، في تطورات حصلت وحتكون محتاجاكم جمبها ..
_حاضر انا اصلا بحبها و م يحتاجك توصيني !! حتخش معاي البيت ؟
*ايوة الوقت اتاخر و عايز انوم !!
_يسلاااااام اخير حمدلله ههههه
(في جانب نعمة)
الباب بيخبط رزع خبيط بي قوة ...
اتخلعت و جرت توبها وجرت على الباب اللي كانت متربساهو بي قفل مصدي .. قالت منو : قاليها افتحي .. *فتحت ..
*شهاااااب !! مالك بتخبط كدا في شنو ؟؟
دخل بي عدم توازن و قعد في طرف اقرب سرير ليهو !!
*قلقت بي يا ولدي في شنو و هتون وينها ؟؟
_تجي معاي بي صفتها شنو ؟ انتي فاكرة ان العرس دا كان عرس ؟
*(خبتت صدرها) سجمي ! كيفن الكلام دا ؟؟
_انا بديت احس بالذنب تجاه هتون و في نفس الوقت قلبي مولع نار من الاسمو ممدوح داا ! و كان ما اخاف الكضب هتون بدت تشك في مرضي ! والليله شافتني في موقف ماتمام !!
*بقت تخبت في وشها وتلطم ، سجمي سجمي ! كيف الكلام دا يا شهاب !! عملتا شنو انت ؟!!
_عملتا زي ما بعمل طوالي يا نعمة بس البني ادم ما بنستر طول عمرو في الشينه .. جواااي هم انتي ليه ما فكرتي تسقطيني ؟ ليه ولدتيني ليه ؟
عشان امشي في طريق زي دا ! عشان اعيش وانا مرضان مرض ما معروف علاجو !! عشان احس اني ما زي باقي الرجال ، ولدتيني ليه ليه ليه ليييييييييييييييه (خبط يدو في الحيطة من الانفعال)
انتي عارفه ! لمن اصحابي اشوفهم داخلين الجامع ويخلو اي شي في يدهم غشان يحصلو الصلاة ، وانا بقيف قدام العتبه ما بقدر ادخل لاني بحس نفسي نجس وان المكان دا ما ربيتيني اكون موجود فيهو خمسه مرات في اليوم عشان كدا عمري م ح احس بالراحه طول ما انا مرضان وبعمل في القرف دا و ااذي اطفال م ليهم ذنب ، ذنبهم شنو يشيلو مسؤلية حيوان زي !!!!
(قام جرااا طلع من البيت )
_شهاااااب ....شهاااااب !!!!
(في جانب مي بعد رجعو البيت )
قاعده بتفكر و سألت نفسها سؤال ، هتون اتسجنت ليه ؟
و مسكت التلفون لقت رقم مازن ! سجلتو و دخلت تشوف عليهو واتساب ولالا ... و فعلا لقتو اون لاين ..
مازن نور ، بي رسالة في الواتساب !!
مكتوب فيها : " 👋🏼"
شاف الرساله عيونو لمعت و قعد في نص السرير و كان مبتسم و مبسوط شديد .. و قال بي حسو #مي !!
*رد ليها : يا هلاا😅
_ما جاني نوم صراحه ومخي شغاال تفكير و ما لقيت غيرك ممكن يفك حيرتي دي !
*خير !
_ممكن اعرف هتون بنت جميله كدا و من اسرة فيها اب دكتور و ام مدرسة ، كيف اتسجنت ؟
*غريبه ! اخوكي الضابط اللي طلعها و ما عارفه سبب القضيه والحصل معانا ؟
_ممدوح فاصل بين البيت و الشغل و عو بيشرف ان الشغل ليه خصوصيتو !
*طيب ح احكي ليكي (..........)
استمر الكلام اخد و عطا بين مازن و مي بي كل تفاصيلو اللي كانت جديدة بالنسبه ل مي و كافيه جداً انها ترسم ملامح الاندهاش على ملامح وشها الصغيرة والجميله !!
كان في جانب ممدوح -
اللي دخل الغرفه و كان تقيله عليهو انه ينوم في الغرفه اللي فيها #فاتن ، رغم انها كانت نايمة و ما حست على وجودو اصلا ...
" صباح الخير "
*امي !!!!! خير !!!
_(امي كانت مبتسمة شديد) و لا بسة توب عين كتكوت الابيض و الحنة في يديها (ما نقش حنة عادية )!! و الشنطة والشبشب كانت في كامل اناقتها و في يد فيها شنطة و اليد التانيه كانت #الجريدة !!
شفت الجريدة و عرفت ان في قصه حصلت و هي سبب تقاعد امي في البيت بعد اتسجنت و ما حبيت ااخرها بي كلامي و اكتفيت مؤقتاً بي وداعها !!
مشيت لقيت نهى نايمة و بتها صاحية ، عرفت ان في سهرة كانت حاصله ..
مشيت ديوان ابوي ما كان موجود رغم اني كنت محتاجة اتكلم معاهو ، بس قلته صبراً يبل الابرى .. فا بالتالي مشيت لبست و انا طالعه ، مسكن #مازن اللي كان عادي ممكن يطير من الفرح !!
قالي : م معقول ما لامي فيك عايزك في موضوع !
*امممممم مي ؟
_احم دا براهو لكن موضوع تاني ليهو فترةشاغل بالي ، و بسبب الحاصل دا الوقت م كان مناسب ! وانتي لابسه ماشه وين ؟
*عندي مشوار صغير و راجعه .. قول !
_مزاجك ما ياهو .. اذا ح ااخرك خلي لبعدين ؟
*لالا ارح اقعد سامعاك ...
_طلع تلفونو و وراني صورة وهو مبتسم شدي !!
*حلو شديد !! لكن ما فهمت ؟
_دايرو لمشروع و عارف انتي الحتدعميني و نتشارك فيهو ؟
*شنووووو !! المحل دا نجيبو من وين ؟
_معروض للبيع بأقساط على مرحلتين ، مساحتو مناسبه شديد وموقعو ممتاز ، و ح نخصصو للهدايا و تصميم كروت المناسبات والبوكسات ..الخ ، المحل م غالي لان صحبو
مزنوق في بيعتو و اضافه لذلك حنقدر نصمم االوانو وديكورو برانا ! هاا قولك ؟
*موااااااااااااااااافقه ياخ
_ياسلااااااااااام (خبط يدو في يدها ) و ضحكو ...
*يلا انا ماشه ...
طلعت الشارع .. و استلمت اقرب ركشه !!
(في جانب ممدوح)
فاتن صحت ! اتخلعت لمن لقت ممدوح نايم جمبها !! قالت معقول !!!
قامت و هي بتعاين فيهوو ، دخلت الحمام و جات داخله الغرفه وهي واقفه قدام الدولاب ، تلفونها رن ،جرت جري صمتتو قبل ممدوح يصحى .. بعد اتاكدت انه لسه نايم ..
قعدت في كرسي المرايه و كتبت رساله " صحيت متأخرة ، ما تنزل قبل ارسل ليك رساله اني اتحركته ،وصباح الخير "
ختت التلفون من يدها و قامت طلعت ليها طقم ..
لبستوو .. عملت مكياج صباحي كدا خفيف ، و لبست النضارة و تقريبا ما حست على نفسها وهي بترش الريحه ، ممدوح صحى بي ريحتها !!
عاين ليهاااا ..قاليها دا شنو ؟
اتربكت ، قالت ليهو صباح الخير ، ولا شي ..
قاليها : ماشة وين قشرة قدر دي ؟
قالت ليهو : طالعه مع البنات ... عن ازنك ...
م ركز معاها و رجع رقد !!
(في جانب نهى)
ماسكة منة و ترضع فيها ! و بتتزكر الحصل امبارح في السمايه ، و ردة فعلها !!
بس تركيزها كلو كان في موهوب ! بقت ما عارفه تزعل منو و لا من نفسها ، قالت :
رغم حبي ليهو الشديد ، الا اني كنت متأكدة حيجي يوم م معروف لكن حيسبب ندبة كبيرة جوانا ، وكنت عارفه ان الحب بيجمل الحاجات ، لدرجة ان عمري ما كنت مقتنعه بي زواجنا واختلاف افكارنا وحاجاتك اللي مستحيل تتنازل عنهت و كذالك حاجاتي !!
كنت بوهم نفسي ان الحب دافع لحاجات كميه .. و قررت تتصل عليهو ....
*الوو
_هلا
*كيفك موهوب ؟
_اهو عايشين نحمد الله
*اخدت قرارك ؟
_بالنسبه ؟
*زواجنا !!
_ايوة
*حتطلقني ؟
_رغبة امي
*ههههههههههههههه
_بيضحك شنو ؟
*انه قرار امك ، هل دا بيعني انك غير مسؤل عن تصرفاتك و عن حياتك الشخصيه ؟
شوف قبل ترد ، انا كمان دايرة الطلاق ، انسان ما قادر يدير امور حياتو الشخصيه حيبقى لي ضل وسند كيف ؟
_انا قصرت معاكي في شنو يا نهى ؟
*لا ابداً العفو حاشاك الشينة .. اسمع .. زي ما عرستني من ابوي .. ترسل لي ورقتي معاهو ...#قفلت ...