الجزء 91

*ارفعها فوق هناك اي اي ايوة كدا...

الدبدوب الكبير دا ختو لي قدام هنا بس..

ياسلااام اخيرا المحل بدت تظهر ملامحو تفتكر حا ننجح يا مازن؟

-ننجح ونص وخمسة بس نشد حيلنا بالدعايات هي سر النجاح.. عايني انا حا امشي اجيب الطلبية التانية وبالمرة افتش بتاع توصيل...

*(مشغولة بتنضف) حاضر

-هتون ما تنسي تكلمي مي وما تنسي تعملي الصفحة..

*حاااضر ما ناسية خلاص اتخارج..

مازن طلع فات وهتون رتبت الفضل ونضفت المحل كويس.. وقعدت فتحت لابتوبها ودخلت صفحتها في الفيس...

اتزكرت اليوم داك جاتها رسالة ونست تفتحها...

دخلت الرسايل..

لقت مكتوب

السلام عليكم ورحمة الله

هتون.. حمدالله على السلامة كيفك انتِ وناس البيت والدنيا معاك...

اجي دا منو ظاهر زول بعرفني دخلت الصفحة الشخصية لقتا فاضية ماف صورة.. والصفحة فاضية ماف منشورات..

عاينت للإسم تاني مكتوب رجل استثنائي...

بري دا منو كمان اول مرة اسمع بيه بس ما يضر كدي ارد امكن بعرفو..

وعليكم السلام ورحمة الله

مرحب انت بتعرفني؟

ودخلت على اعدادات الاسم وغيرت اسم هتون ل ام يزن... وعملت الصفحة وكتبت الوصف ومسكت تلفونها قعدت تصور في الهدايا والكروت والحاجات وتنزل في الصفحة... كتبت رقم تلفون مازن مؤقتا لما يركبو خط للمحل..

الاسعار لسه ما حددوها وكتبوها في الدفتر بعد ترجع البيت يكون مازن عمل احصائية عشان يسجلو الاسعار...

كمان ختت في بالا تستفيد من امها البتعرف تشتغل بالكروشيه ممكن تسوي لينا فوط وتلبيسات مناديل وكدا تشكيلات حلوة وراقية بفتش في النت وبخليها تعملهم لينا...

جهزت القصاصات الورقية الملونة المطبوعة وبدت تلفها مرة مستطيل وتربطها بشريط هدايا ومرة تطبقها وتغلفها ب شريط.. وبتزين في برطمان مكتوب عليه السعادة،، واحد جمبو الحب،، وغيرو الي صديقتي،، و... الخ..

هتون كانت متفائلة ونشيطة وطموحة واخر انبساطه في الشغل دا والافكار لسه في راسها....

تررن تررن تررن ترررن سمعت اصوات رسايل مسكت تلفونها وفتحتها وبين رسالة ورسالة ما مصدقة البتقرا فيه دا...

مؤمن....

للحظة حست بضيق وتوتر ما عادي.. بقلبها الاتقبض برغم الفترة الطويلة دي كلها الا انو في لحظة بس بسبب اسم جاها احساس ان الحصل دا زي الكان امس...

ما حست ب روحها الا وهي بتكتب بكل طاقة ليها ويدها مع كل كلمة بترجف ما عارفة بتكتب في شنو من شدة الزعل غلط صاح المهم تكتب كلمة ورا كلمة

الله يلعنك انت

الله ياخدك الله ياخدك ياخ اااااه

ما تشوف يوم سمح في حياتك...

~~

دا ح يعوضني عن احساس اني اتدنست...؟

الابيض بقولو هو النقاء وانا فقدت فضيلتي ولا ماف داعي ازكرك بالعملتو لحقت تنسى وبالبساطة دي وبقوة عين مسمي روحك رجل استثنائي.. ولا استثنائي في شنو في الغش والخداع..

في حياتي بقيت بتهرب من اني ارد انك انك كنت زميل لي وصديق قريب وحبيب وكل شي.. بتهرب من نفسي اجيب السيرة دي بيني وبين روحي..

ملعون ملعون

انا بلعن اليوم الشفتك فيه

ابو اليوم العرفتك فيه منو؟

استغفر الله العظيم اليوم زاتو ما عندو زنب..

حست نفسها قايم بعد كل الكتابة دي ولسه قلبها ما اتفشي فيه...

جاتا رسالتو..

انا ما جايي ابرر ليك موقفي ولا جاي اقول ليك سامحيني بس طمعان تديني فرصة وتثقي فيني من جديد اعتبريه حلم مزعج وصحينا منو هسي انا اتغيرت شديد يا هتون اقسم بالله ما بقيت مؤمن الكنتي بتعرفي زمان انا هاسي جايييك اكفر غلطي واتقدم ليك بسنة الله ورسوله...

*هههههه اتخيل دا كلووو حلم....

بالبساطة دي انت جااااادي بتتكلم جاااادي

لو عملت السبعة وزمتا يا مؤمن

بس برضو ما بثق فيك تاني...

ولو سمحت اديتك اكتر من وقتك من فضلك اعمل لي بلوك زي ما كنت عامل لي الخلاك تتزكرني تاني شنو هسي ولا داير تتم البديتو زمان...

-اكيد لا بس انا سافرت وكونت نفسي وهسي جاييك بالباب عديل وغرضي شريف..

* البتخلا عن زول مرة بتخلا اتنين وتلاتة... نحن انتهينا من زمان من يوم العملتو واتخليت عني وعرضت حياتي للفضيحة انت عارف شنو عليك الله.. تقدر ترد لي كرامتي الاتبهدلت ولا الفضيحة ولا سيرتي البقت علي كل لسان.. ولا اثر الجلد ووجعو..ولا السنين الضاعت من عمري ولا مستقبلي ولاشنو، ولا شنو ولا شنو.. المنك ما تظهر قدامي تاني نهائي ولا قدام اهلي لانو ممكن يقطعوك ويرموك للكلاب لحم حي...

عاين ياود الناس انا ما عندي ليك شي وكفاية العملتو فيني ولو قلت اني بسامحك ولا بنسى العملتو فيني ابقى كضابة.. عشان كدا اختفي من قدامي اخير لي وليك...

وكلامي دا ولا شي من الغبن الجواي اتجاهك لاني كرهاناك وكرهانة سيرة اسمك...

- مؤمن كان مركز في الاسم الاتغير من هتون ل ام يزن وكل كلاما الكتبتو دا ما انتبه معاه

ممكن سؤال واوعدك اني تاني ما بظهر قدامك

انتِ اتزوجتي؟

*ايوة وعندي ولد اسمو يزن ف ياريت تخليني اكمل حياتي مع راجلي تاج راسي العرف يصوني ويعوضني.. انا بحبو ومبسوطة معاه.. وياريت تفارق دربي..

-ربنا يهنيك وبعتذر مرة تانية

اخدت نفس طويل وحست ب راحة شوية بالذات في الكلام الاخير حست انو اتصدم..

ان شاءالله تموت عشان تحس بالوجع وعدم الراحة شوية..

حزفت الرسايل بتاعتو وعملت ليه بلوك طوالي لانها ما كانت دايرة حاجة تزكرا بيه..

المهم قدرت تواجهو هسي بقوة ..

...............

مازن تلفونو ضرب لقاه مكتوب موهوب..

اتكلم معاه في التلفون مسافة كدا ...

*تمام جايي عليك محل قلته مسافة الشارع بس

ساعة زمن واتلاقو سلمو على بعض.. واقرب محل قعدو فيها..

*الحمدلله اني لاقيتك يا موهوب لاني كنت داير اتكلم معاك.. انت الوحيد الما اتوقعتك تعمل كدا لي يا موهوب تسوي في نهى العملتو دا؟!!! انت ما كلفت روحك تورينا من بدري عرفنا زينا وزي الناس.. مع ان اولى تكلما وتكلم ابوي بالخطوة الحا تعملا مش تبقي جبان وبعد تعقد تجي تقول يعني قصدك تختنا قدام الامر الواقع ولا شنو؟!!

-لالا ياخ يا مازن العفو دا كلام شنو بس ،،انا جايي من هناك عشان الاقيك واوضح ليك موقفي والعندي كلو انت احكم بس قبال تستعجل..

يامازن نهى لا احترمتني لا احترمت امي وابوي بعد رجعنا البيت امي تبكي من طلعنا منكم لما وصلنا دايرني اسوي شنو انا كنت متفاجئ وزعلان من نهى والعملتو شديد ما اتوقعتها تقول كدا... صاح انا غلطت لاني ما شاورتها في حاجة زي دي وهي بتها ولدتها وتعبت فيها.. لكن ما فكرت ان الموضوع ممكن يقلب كدا... انت عارف نحن عندنا عادي ...

*عارف يا موهوب ان نهى قلت الادب بزيادة بس الما اتوقعتو منك ردت فعلك المعاندة دي زي البتتشفى فيها ودي نهى يا موهوب ما اي زول تاني...

-مازن انا ندمان والله وسافي التراب الله يعلم والحصل دا كلو ما بي يدي.. عفو الام ورضاها بخليك تسوي اي حاجة لو حتى ضد سعادتك ومصلحتك تقدر تقول لي لو كنت في محلي وامك قالت ليك ما عافية منك لو ما عرسته فلانة بت فلان ح تسوي شنو يا مازن؟ وانت شايف امك تبكي ليل ونهار وتقول ليك مرتك ما احترمتني وهانتني قدامك وانت ما ولدي الجبتك وربيتك كان سكته ليها ...

مازن سكت وما عرف يقول ليه شنو..

يا مازن انا بين نارين اني بحب نهى والله بعادهم هي وبتي النوم طاير من عيوني وبين امي الما قادر اقنعا ومصرا علي رايا... انا عاوز استقر مع نهى وبتي واعيش حياتي مرتاح لا داير مرا تانية لا بفكر فيها وهسي دي نهى توافق ترجع لي اقسم بالله العظيم اعمل ليها العايزاه.. انا هسي جيت وهديل (طلع لي ظرف كبير) ديل قروش بقالة داير اشتريها الليلة دي واشتغل هنا...

*عداك العيب يا موهوب كدي اديني فرصة اتكلم معاها وان شاءالله بحاول اقنعها ليك.. والله بعد كلامك دا الا ابقى عديم اخلاق وداير افرق بينكم ساي..

-الله يطمنك يا مازن طول عمرك عقلك كبيير ومسؤل.. انا ما عايز اطلق نهى بس عمي وهي مصريين عليه..

* ابوي ما عارف بالقلتو لي دا ولو كنت وضحت ليه ما اظن يرحب ب خراب البيوت.. خلاص ارح على البيت طيب..

-لالا يازول عندي مواضيع كتيرة داير اتمها وكان لقيت فرصة بغشاكم واكلم عمي بالمرة..

اتفارقو في نفس المحل وكل زول مشي ل مصلحتو..

..................

*ياهو دا كلام مازن يا مي وهو مفتكر انك فهمتي غلط..

وما عشان اختو انا بشكرو ليك.. لا والله بس فعلا مازن يستاهل فرصة وهو ناحيتك كان جادي وعمرو ما انتبه لحتة فرق العمر دي ولا جاب لي سيرتا بالغلط...

ما تستعجلي وفكري براحتك براحة كدا واديه الجواب...

-كويس يا هتون اها الشغل ماشي كيف؟

*كويس بس فقدناك الليلة ياريتك كنتِ جيتي افضفض معاك حبة..

-ما تفقدو غالي مالك حاسة بصوتك ما ياهو في شي؟

*انا اتطلقت من شهاب يامي وجواي وجع بس ما عارفة احكي لي منو الانا حاساه ما دايرة اقول لناس البيت الفيهم مكفيهم..

-معليش كل شي بهون اصلا دا حال الدنيا ما بتدينا كل شي وبعدين انتِ الف واحد يتمناك يابت بكرا محلك دا براه يجيب ليك العرسان انا متأكدة هههه..

*ههههه بري خلاص تبته انا دايرة افضي لي شغلي وقرايتي تاني جربت حظي وخلاص...

-كووويس بكرا نشوف وتقولي مي قالت هيي يلا ما اشغلك برجع اتصل بيك بعدين بعد ترجعي اتطمن عليك..

*مي اقيفي ممدوح قاعد في البيت؟

-ايون في شي؟

*لالا خلاص مافي شي مع السلامة..

قفلت منها ورجعت اتصلت بيه..

بعد سلمت عليه طلبت انها تلاقيه عايزة تتكلم معاه في موضوع ضروري...

..................

شهاب صحي نشيط مع ان في شي مكسور ومضايقو بس حاول يتجاهلو

لقي نسمة مافي خاته ليه ورقة في التربيزة الجمبو

*صباحوو حبيبي انا طلعت الجوازات وعندي كم شغلة كدا امكن اتأخر جهزت ليك الشاي وفطاير في الفرن بتلقاها خلي بالك من نفسك.. بحبك..

-رسم ابتسامة علي وشو وقام اخد حمام وبسرعة لبس وشرب واكل وطلع ركب عربيتو...

مسافة الشارع على بيت نعمة ليه كم يوم ما جا عليها...

كررب كررب فتح الباب ودخل كالعادة البيت صااااني زي المهجور بدا ينادي

نعمة نعمة

لقي باب المطبخ والبرندة مطبولات ب طبل...

طلع وقفل باب الحوش ومشي دقه بيت جارتا..

*السلام عليكم يا خالتي

نعمة معاك؟

-اجي ياولدي نعمة سافرت البلد ليها كم يوم انت وهتون ما عارفين ولا شنو من يوم رحلتو ما جيتو في ششنو؟

حسه المرا حشرية اكتر من اللازم..

*لالا ماف شي شكرا ما قالت ياتو بلد..؟

-العمارة عبدالرحيم وعاينت لي بإستغراب وشك..

ما اداها فرصة ل سؤل تاني ومشي طوالي ركب عربيتو ومسك تلفونو جاري الاتصال....

الهاتف الذي طلبته مغلق...

مشيتي وين يا نعمة والبلد دي شنو الطلعتي بيها عمري ما بعرف عندك اهل في مكان..

اتصل ب صلاح...

*الووو انت وين دايرك... تمام جاي عليك..

..

..

مع #حبي 😉..

فاطمة قسم الله_ سحر سمير