الجزء 1

_2

سحـــر سميـــر

فاطمـة قسم اللة

بقلم سحر سمير و فاطمة قسم الله

-٢-

*فلاش_باك*

_ قبل 8 سنوات و اربعة شهور كان ذاكرتي ما خانتني كنت حلاة الدنيا علي اي واحدة بتحسدني علي النعم الانا فيها،، بت دكتور جامعي معروف وام استاذة لغه انجليزيه ..اهلي مثقفين ومحترمين معروفين في المجتمع وسمعتهم انضف من التوب الابيض،، اصلنا من قرية واسرتنا ممتدة اعمام وعمات ب اولادهم بالرغم من الواصلين ليه امي ابوي بس هم اهل ريف من الدرجة الاولي متمسكين بعاداتهم وتقاليدهم الكانت بتخليني اتضايق كتير وبعتبرها عقد مااكتر..

اهلي ماقصروا معاي وربوني احسن تربيه وعلموني احسن تعليم كنت ذكية بالوراثه،،

كانوا فخورين بي بالذات امي محل ما تمشي سيرتي علي لسانها بالذات قدام اهلنا

بتي هتون ماشاءالله

بتي هتون عاد الزيها منو

ما بشكر روحي زي ما بقولو"شكار نفسو ابليس "

لكن كنت محبوبة من اي زول بنوته ذكية حلوة دمها خفيف ذوق راقية ...

وفي نفس الوقت محسودة من ناس كتار..

عندي اخت واخ اصغر مني..

في المدرسة كان كل اساتذتي بشكروني و يكرموني طالبه مثاليه كل سنه مجتهدة و متفوقة دايما،،

امي حبها لي كل يوم بكبر وفخرها بي بذيد حتى اختي الصغيره بدات تتعلق بي وتقلد حركاتي وابوي ما برفض لي طلب ومابقصر معاي هدايا هدوم اي شي نفسي فيه مجاب..

مرت الايام كبرت وبقيت مرا خلاص

امتحنت تالتة وجبت مجموع كبير 93 وماتتخيلو فرحة امي وابوي ,,سوو لي حفله كبيره عزمت صاحباتي كلهم والجيران ..

بس وقتها بدا الغرور يدخل فيني للاسف اتغيرت بشكل مخيف

واقفة قدام المرايا وبتكلم براي

عليك الله ال زيي منو زي ما قالت امي،،

انا احسن واحدة ربي خلقني كاملة مكملة لييه ما اشوف نفسي ليه لا ؟

ههئ منو بلحقني ..

اهتمامي زاد ب شكلي كل دقيقة بعاين في المرايا وكل فترة اصبغ شعري واعمل مكياج واحمر شفايف وشوية شوية لازم امشي الكوفير كمان..

يا هتون ملاحظة ليك في حاجات جديدة فيك ما عاجباني يابتي كل شي ملحوق واي حاجة في وقتها حلوة مستعجلة مالك من هسي انتي صغيرة والعمر قدامك.. مكبرة روحك لشنو..

كم مرة امي نصحتني براحة بس انا غروري كان ماليني وما كنت بسمع غير نفسي..

بدا الشيطان الدخل لي ف شكل صاحبات يوسوسو لي..

عليك الله معقول الجمال والحلاوة و الاناقه والرشاقة دي وما عندك حبيب يتغزل فيهم..

هدا نحن كلنا بنحب وبنقضي وقت اسمعي الكلام وامشي في طريقنا تكسبي العمر بتعاش مرة واحدة يابت،،

عايني هديل دي كل يوم طلعات وهدايا نفسياتها فل عديل تدخل الجامعة ب جاي بتطلع مع حبيبا ب جاي..

لقيت من جانب انه كلامهم كلو صح ، فعلا انا ما اتعودت ان تنقصني حاجة ، و فعلا بالضبط دي الحاجة الوحيدة الناقصاني !!

قلت ليهم : بنات انا زاتي نفسي اعيش قصة حب ويكون بحياتي راجل يحسسني بانوثتي..!

ردت لي هديل.. بس لقيتو يا هتون ، مهند صاحب امير حبيبي رايك شنو فيه؟

قلت ليها : لالالا م عايزة احب من الجامعة كلهم شفع ساي..

نطت رندا رايك شنو تدخلي قروبات الواتس فيس انستجرام ..

هنا انا فكرة رندا كبرت في راسي

بعد رجعته جري مسكت التلفون وخلاص طول اليوم فيها لدرجة ادمنتها كنت بقضي كل وقتي عليها اكلم شباب كتار عااااادي....😔

ضحك وونسة وهظار ما فكرت بالثقة ال ختوها فيني اهلي

مفتكرين اني اليوم كلو علي النت عشان اثقف نفسي بس للاسف استعملتو في قلة الادب..

من يجي نص الليل بدخل غرفتي افتح المسنجر اتكلم مع دا واضحك مع دا واتدلع مع داك وادخل في كلام فاضي مع واحد تاني..

بسمع كلام سمح وكنت مبسوووطة بيه ومفتكراها شطارة واني بت تفتيحة..

امي من ثقتها ماكانت بتشك لحظة فيني ..

بس كان قلبها حاسس ان في حاجة متغيرة فيني لكن ما كانت عارفه هي شنو وكم مرة بتجيني بتتكلم معاي

يا هتون انا واثقة فيك خلي بالك من نفسك الزمن بقي كعب..

وبدل ما احس بالمسئوليه بعد كلامها دا كنت بغرق في الطين زيادة..

مرت الايام وانا علي الحال دي ونتيجة السنة الاولي ظهرت كانت صدمه للكل واولهم انا اني نجحت بتقدير حسن بس يعني مرور والسلام..

جيت البيت دخلت طوالي..

طلعت اشرب موية سمعت ابوي بتكلم مع امي

انا اتصلت بالجامعة ونتيجتها ما عجبتني نهائي زي الزفت من واحدة جايبة كم وتسعين ، معقول تطلع ب نتيجة زي دي !!

كان معصب شديد ، يمكن دي اول مرة اشوف ابوي معصب و زعلان كدا ..'

قاليها : بتعمل شنو البت دي ما كل حاجة موفرنها ليها ناس ما لاقيين ربع ال هي فيه ، بيقرو بي ضوء الشمعه وجابو ممتاز..

اسمعي هنا انا هتون بقت ما عاجباني لا في لبسها لا صاحباتا المبارياهم والبجوها ديل لا وشها الكلو مجلبط مكياج ولا تصرفاتا انا خليت ليك الحبل لانك قادرة تديري بيتك كويس بس احسن تتكلمي معاها لاني كان اتدخلت ما بحصل خير.. وانتي عارفة اعماما ورايهم في قراية الجامعة وكل يوم اخوي الكبير بفتح لي عرس ولدو منها.. ترفع راسي ولا تعديها لي صياعة بدون فايدة اذا كان كدا معناها خلاص تعرس بس امكن تتعدل..

كلام ابري

كان بالنسبه لي زي صوت العنج ، عمري ما اتوقعتو ولا بالهظار ، الليلة وووب جريت دخلت جوه صارة وشي قعدت احاسب في نفسي طبعا ح تنجحي كيف وانتي اصلا ما بتفتحي كتاب الا يوم الامتحان..كل وقتك بقي مع الشباب دردشة.. اخرتها ح يعرسوك لواحد من قرية ومصيرك تترمي زيهم حدك المطبخ والنضافة والقرف دا الانجاز العايزة تقيفي فيه..

المهم~

جات الاجازة

اتعرفت علي واحد من النت

عجبني فيه ثقافتو قبل شكلو سحرني ب لباقتو وكلامو المعسول..

تررن جاتني مسج منو

هلا هتون امس ما كملنا كلامنا

عن تحرر البت وكيف الغرب عايشين وحياتهم بسيطة وعن حياتنا وتحكم الاهل فينا وكبتهم لينا وابسط الحقوق انهم حارمين بناتهم يصاحبو اولاد او يتأخرو بره البيت..

تقدري تقولي لي ان امك وابوك عارفين اننا بنتكلم؟

طبعا لا ديل كان يقتلوني انت مجنون،،مع انهم ساكنين المدينة ووضعهم كويس بس للأسف مخهم ريفي بحت..

~~

شايفة دا الكلام القاصدو ليك انك بتتكلمي معاي بالسر.

قدر يأثر علي بإسلوبو وخلاص عرف مفتاحي كويس.

اتعلقت بيه بجنون..