الجزء 24

من الذّي أغواك حتى ظننتني من دونك حُطام ؟

رفقاً بذاتك يا عدم ..

(في جانب امي وابوي)

ابوي بعد انطرد من كل بيت من بيوت ابو دومة

رغم ان في كل ارض كان ليهو نصيب ، زيو زي اعمامي واحد..

المهم : ابوي انجبر يخلي قرية الحميراب ، و شاف ليهو بيت على قدر الحال في قرية ابو حليمة ، اللي بيفصلنا منها شارع رئيسي ..

اجر و بقو قاعدين هو و امي و مازن اخوي ..

امي : محمد ....!

ابوي : امم

امي :حاسي بي احساسي انت ؟

ابوي: قصدك شنو ؟

امي : انحنا ظلمنا بناتنا يا محمد ، و خصوصاً نهى م كان ليها اي ذنب ، عادات مجتمع !!! ااااااخ اااخ من الدنيا ...

ابوي : انا ما عندي غير بنت واحدة و هي نهى ، و زواج نهى كان حل امثل و ع الاقل اقدر اقول اني ربيت وحدة !! و نهى كان ما اتزوجت موهوب ، ما كان لقت راجل يقبل بيها وهو عارف حقيقه اهلها ، و انا ما بضمن ان نهى م تغلط هي كمان ...

في النهايه هتون كانت مضرب مثل ، لكن شوفي وصلتنا لحد وين ؟؟؟؟

و بعدين موهوب انسان كويس و اخواني كمان كويسين وداكلامنا و عاداتنا من زمان البت لي ود عمها ، يمكن قعده الخرطوم غيرت فينا و اسي لمن حصل ، بقينا شايفنو كعب يا فوزية ...

انا كل فكرتي بس كانت ان نهى صغيرة و حابي انها تتعلم و م ربيناها على تحمل المسؤلية لكن مع الوقت بتتعلم و تتأقلم مع القرية ...

امي : محمد ... هتون يا محمد عليك الله يا محمد

ابوي : القرية دي قدر الصدفه م تخليني اعلي صوتي العملتو هتون فينا لا يمكن يتنسى ، و صمة عار في وش راجل بي شيبو ، اعقليها لي انتي يا فوزيه !!!

امي اكتفت بالبكاء ...

اما نهي -

كانت بتحاول تستوعب بس تصرف موهوب!!

وين حماقه اهل البلد و ركوب الراس !!

بتقول : بقيت واقفه في مكاني زاتو ، الا ان بعد الوقفه دي قررت تاني اني لازم اتصالح مع الوضع واتعايشو ، وكنت بقول كدا بصوت عالي عشان اقنع نفسي و اهيأها للحياة دي ...

وطوالي قمتا ، فتحت الدولاب القديم دا ، م كنت قاصده افتح نفس الضلفة القبيل موهوب فتحها بس لقيت يدي عليها و فعلاً فتحتها ، لقيت في وشي كيس القطن ... و ياداب انتبهت هو قبيل شال شنو دساهو و طلع !!!

اي مستغربه ، بس حاولت م اهتم ، وشلت لي غيار ، م قصرو جابو شنطتي فضوها لي وختو لي كم جلباب جمبهم ..

المهم طلعت بجامه لي طويله ، غيرتها ورقدت نمته ، و ما صحيت الا بي جوطة الشفع و زغروتة امي اللي كانت مميزة جداً بالنسبه لي !!

فتحو علي الباب هي ومرة عمي و بت عمل القبيل ، يسلموعلي و يبوسو فيني ، امي قالت لي ايوة كدا ي بتي ، يلا الحمدلله ...

و الواقفه جمبها مرة عمي التانيه ودي شكلها اطيب من حقت امس ..بقيت اخد وادي معاهم في الكلام عادي واضحك معاهم ..

(في جانب سكسكة)

شوف يا مؤمن انا يدي اترخت ، بقيت ماقادرة اواصل في الموضوع ، ودا الزول الوحيد الكلن بيساعدني ، وتاني بقوليك اي حاجة تحصل ليك انا ما مسؤله ، بس انا شايفه الحل الامثل انو نبعد من الخرطوم مدة و تسفرنا يا بيبي برا السودان دا خالص و نغير جو من القرف دا. !!

مومن : اسفرك انا !!!!دي كيف و من وين اجيب قروش انا ! و بعدين انتي ناسيه اهلي جو ؟؟

قالت ليهو : يا سلااااام ، مسافر كع مرتك فيها شنو دي و بعدين اموضوع القروش دا هين ي بيبي تقوم تعيد الكرة الزمان ديك بس (غمزت ليهو)

مومن : مرتي على الورق بس يا سكينه و ما تحلمي ان الفي راسك دا يلقى حقيقه فاهمة !!

سكينه : اممممم قلت كدا ي بيبي ، اوكي م حأضغظ عليك زيادة عن كدا ، لكن كدي عايزاك تشوف لي ، دا مش رقم ابوك زاتووووو ( و وجهت ليهو التلفون)

مؤمن : !!!!!!!!!!! قصدك شنو انتي !

سكينة : ابدا م قصدي حاجة ، حأمشي ليهو الشركة و اخت رجل على رجل و اخد معاهو عشرة ونسه في القدييييم والجديد ي روحي ، فيها حاجة دي ؟؟

مومن : اوووووعك ي سكينه ، وانتي عارفه ابوي لو عرف الموضوع الزمان داك ممكن يروح فيها ، انسي الموضوع دا و م كل شويه تلوي يدي بيهو !!

سكينة : خلاص يرووووحي يبقى مفروض تسمع كلام رووووحك مرتك حبيبتك عشان نوصل لمواصيل زي دي ي بيبي 😘 ..

نهى :

بتقول - طلعت برا الاوضه ، اتعرفت بي بت عمي ميادة (ميادة بت عمي عوض) ، بقت لي ونيس خصوصا انها في عمري قلت ليكم قبل كدا ..بقينا نسوي جبنتنا كل يوم الضهاري و نقعد ، و تحكي لي عن البلد ، و عن انها نفسها تتعلم القرايه والكتابه و انها م دخلت غير الخلوة و بعد كبرت عمي طلعها ..

في يوم في نفس القعده دي ...

جا موهوب داخل !!