الجزء 33

انت عارف يا موهوب ، انا قدر ما فكرتا

ما كنت بلقى طريقه غير ممن خلال زوله وحدة و هي صاحبة هتون شديد كانت ، بس انا اتكلمت معاها بطريقه ما كويسه و قفلت فيني الخط ، رايك شنو ؟؟

قاليها : يا زولة نبقى عليها و كان ما ساعدتنا موصل للزول حرررم بمش لابوها و اقوليهو حصل كيت كيت كيت ..

نهي : ههههه والله يا موهوب ، اها طيب رايك شنو اسي ..

موهوب : راي يا ستي نقوم نمش على هتون ، اكلنا الحمدلله و شربتا شاينا ، نغير بس و نمش ، ولا انتي مرهقه ؟؟؟

نهى: لا طبعا مرهقه شنو ، يلا خلينا نجهز و نتوكل ..

موهوب :عديلة ...

( في جانب اهل مؤمن)

ابوه ، بيتكلم مع امه ..

قاليها : احساسي كان صح ، القروش ما لقيتا

ردت: عاين في النهايه دا ولدنا و طلع الاوهام الفي راسك دي و اتزكر محل ختيت قروشك ..

قاليها : و كأن ساهل علي افكر في حاجة زي دي يا ثريا ، لكن دي الحقيقه ، و للمرة التانيه ولا نسيتي!! نسيت قروش احمد صحبي الكان منسكني ليها الاختفا بي نفس الطريقه و تعبت قدر شنو عشان ارجعها ليهو و منظري قدامو ، على اخر الزمن الشرطة تدخل بيتي انا .. لكن اسمعي هنا انا حأفتح بلاغ و ما داير اسمع منك ولا كلمة ، عشان اذا ما قدرنا ، نربي احنا ، يربي السجن !!!

*في*نفس*البيت*كان* ..

*ي روحي انا بحبك وانت عارف كدا كويس

_لو بتحبيني ح تجي

*انا قلت ليك ح اجي بس حاليا في ظروف عندنا في البيت والله ، ابوي عندو قروش اتسرقت من خزنتو والبيت جايط ، خليها الاسبوع الجاي ..

_لو بتحبيني ح تجي و الليله دي ، محسساني اني ح اكلك ، طوالي بتجيني و بتقعدي معاي حصل عملت ليكي حاجة ؟

*طيب،حأشوف حجة اطلع بيها من البيت و اجي

_في انتظارك يا روح الروووح امووواح ..

*سلام ...

انا و موهوب كان وصلنا السجن ..

و موهوب كان بتكلم مع العساكر ، و انا منتظراهو في العربيه ...

لمن رجع ، و كان مستاء جدا ، قلت ليهو في شنو ؟

قالي اسي زيارة مافي ، الساعه 12 و هتون عندها جلسه ..

قالت ليهو ، طيب ممنوع نحضر الجلسه دي ؟

موهوب طوالي نزل و جرااا ، تاني جوا ، و كان بيتكلم معاهم بعد جرجرة وافقو ليهو ، جا موهوب و لف حسب ما العساكر كلموه للاتجاه التاني من السجن ، و دخلنا بي ممر ، بعد فتشونا كويس حتى سمحو لينا بالدخول ..

اما انا -

نزلوني من العربيه ، ياهو نفس المكان حق المرة الفاتت في نفس السجن بس اتجاه تاني ،(حابة اقًوليكم ، ان معاملة الضباط معاي اتغيرت ، شوية بقى فيها لين و معاملة حسنة)..

بقو ماسكني اتنين زي كل مرة و خاته في بالي ١٠٠# انها بلوة جديده ، ف ضحكت ، قالت وحدة من العساكر ، مالك ؟ قلت ليها اكيد ماشه لعقاب جديد م لي ذنب فيهو دي م حاجة بتضحك ههه .. ردت ب لاحول ولاقوة الا بالله ..

دخلت قاعه الاستجواب المصغرة ، بتتكون من تلاته رجال و كاتب ، وقفت فكو الكلبشات من رجولي ، و وقفته في حتة كدا ، و الغريبه ان كان في راجل واقف قصادي في نفس المحل الانا واقفه فيهو كأنه متهم ولا شنو ما عرفته ، و ممدوح كان ياداب جا داخل ، و الصدمة والخلعه الاكبر و راهو بالضبط كان داخل موهوب وهو ماسك يد نهى اختي ..

لمن شهقت و خايت يديني التقال في خشمي ، و اتحركتا من الفرحه ، و بقيت بقول يارب يارب و قلبي دا داير يطير من الفرحه ، معقوله !!!

اااااخ ياربي ... بقيت متابعاهم لمن قعدووو ، وبعلين فيهم !! و مبتسمة شديد و متفائلة !

لدرجة القاضي ولا اسمو شنو دا ما بعرف ، قالي المتهمة هتون محمد احمد ابو دومة ما رديت عليهو وانا بعاين في نهى ،(قدر سنو العيله دي حاجة عظيمة )

قاطع تفكيري ، صوت الراجل دا و هو بيضرب بي شاكوش خشب ولاشنو في المكتب القاعدين فيهو دا ، لمن عاينت ليهو كنت ضاحكة عديل ..

قالي : اسمك هتون محمد احمد ابو دومة ؟

قلت ليهو : ايوة و الضحكة و البهجة ماليه وشي ..

قالي : بتصحكي في شنو ؟

اشرت ليهو بي يدي على نهي ، قلت ليهو اختي .. وكررتها ليهو تلاته مرات ، ديك اختي ..اختي نهى و اختلط على بكا مع ضحك ... وختيت يديني في وشي ..

فرحتي كانت ظاهرة بطريقه غريبه لمن الراجل م قدر يرد علي ، وحسيتو اتاثر بجد ..

ممدوح اتلفت علي نهى و موهوب !!

شافهم بس و رجع اتكلم مع المحامي اللي كان من طرفو جابو من مكتب خاص و اكتشفت في ما بعد انه دافع ليهو من جيبو الخاص !!!

.....و بدأت الجلسه ....

نهي -

ما تبكي يا نهى في شنو ، خلاااص ، جاتنا من الله وقفتنا معاها دي ، الله اعلم كانت محتاجة لي وجودنا دا قدر شنو ، شوفي كرم ربنا علينا ماشين ل زيارة بقت في نصيبنا نحضر الجلسه دي ونكون معاها وبحاول نلاقيها بعد الزيارة ..

قالت ليهو : عارفة يا موهوب لكن شفتها فرحت كيف لمن بكت و بتقوليهو اختي يا الله ، بالجد يا موهوب الحصل دا ، ربانا فوق تربيه امي و ابوي لينا .. ااخ بس اااخ

خلاص طيب امسحي دموعك .. ونشوف البيحصل شنو يلا بدو ..

هتون محمد احمد ابو دومة ، جاهزة تحلفي قسم ؟

هتون : ايوة

مديت على المصحف ، و كانت نفس الاسئله بتتعاد لمن قالي ، عندك علاقه ب صلاح الشهير ب ابو صلحة ؟ قبل ما انا ارد ، لقيت الزول القبيل قلت ليكم كان واقف قصادي ، رد و قاليهو ما بتعرفني البت دي ولا انا بعرفا !!

سكتو (بصوت آمر )و قاليهو لمن يجي دورك اتكلم ..

قالي كملي : قلت ليهو لا ما بعرفو لا من قريب لازمن بعيد ... قالي طيب احكي الحصل ، قلت ليهو بي صوت ثابت ..

انا هتون محمد احمد ابو دومة بقر وبقسم ان ما بعرف صلاح ولا المرة السالتوني عنها ، ولا بسكر بالكحول او غيره ، كل الحصل انا كنت بحب واحد اسمو مؤمن ، مؤمن عبدالرحيم القُرشي ، اتعرفت بيهو عن طريق ال فيس بوك ، علاقتنا استمرت فترة من خلال النت و بعدها قررنا انو نتلاقى ..

و المكان الكنت بنتلاقى فيهو حسب كلامو هو ان دي شقة اهلو المسافرين ، ودي اكبر غلطك ارتكبتها ما عارفه وقتها كنت بفكر في شنو و بي ياتو عقل ، نسيت امي وابوي واهلي ، و ما مرة ولا مرتين اتلاقينا لا فترة بس طول الفترة دي م حصلت بينا اي حاجة و دا الخلاني اديهو الامان ، لحد م جا اليوم داك .. ااااايوة ...ايوة اتزكرت حاجة اا ، فترة ارتباطنا تنا و مومن كانت في وحدة اسمها سكينه و ......الخ

و ان مومن خت لي منوم وقدر بي ..... قلت كل الفي نفسي لاول مرة ، كل الكنت بتمناه انهم يسمعوني ..

موهوب(بأنفعال) الكلب ..الكلب الحيوان سامعه يا نهى غدر بيها والله اقطعو والله ما اخليهو الكلب (ونفسو قايم)

نهى : موهوب بالطريقه دي حيطلعونا من الجلسه وطي صوتك ..ياربي

موهوب: قومي ارح ي نهى غالبني القعاد

نهى : وين نمشي يا موهوب !!

موهوب: للبت صحبة هتون ماحستفع نقعد قومي

نهى : ما حينفع انا ما بعرف بيت رندا دي ، ما عندي غير رقمها المسجل في تلفون هتون ، وماف حل الا ندخل الزيارة لهتون و تورينا عنوان بيتا !!

موهوب: لا في حل ( و جر نهى من يدها و طلعو)

انا كنت شايفه موهوب و هو سايق نهى ! اكيد خجل من العملتو و حيمنع نهى من زيارتي ... سامحيني يا اختي سامحيني يا امي و سامحنى يا ابوي ، اااااخ

(في جانب اخت مؤمن)

*ااا .. ااا انت بتعمل في شنو يا احمد !!

و وقاعد كدا مالك بالشورت اللبس ملابسك ، وبعدين انا لازم امشي اتاخرتا قلت لابوي نص ساعه و برجع اسي لينا ساعه ... و قامت

_تمشي وين وتخليني ! هههه لا انتي الليله حتقعدي معاي ،، وجراها عليهو !!

انت بتعمل في شنو يا احمد فكني ...فكني .. عليك الله خليني امشي ، زح يدك مني زح يدك لالا احمد انا مريم حبيبتك يا احمد لا عليك الله ما تضيع حبنا وتضيعني يا احمد .. فكني ، احمد لا

و صرخت صرخة وحدة ...وبعدها ما عادت الصرخه تفيد بشي *حيث*لا*ينفع*الندم*

"ان نوائب الدنيا تدور ، و كل ساق سيسقى من ما سقى"

(عند نهى و موهوب في العربيه)

موهوب : صفر تزعتين ......... اتصل على رندا من رقمو ..

موهوب : السلام عليكم

رندا: وعليكم السلام

موهوب : استاذة رندا معاي ؟

رندا: ايوة منو ؟

موهوب : معاكي متوكل محجوب من the gift

صفحتنا على الفيس بوك ، و انا مندوب و عندك معاي امانه ، ممكن العنوان لو سمحتي ؟

رنداا (فرحت ، دا اكيد حبيبي جايب لي قفه فرح)

نهى : (نهى مبحلقة في موهوب)

رنداا : لا عاين انت ما حينفع تجيبا لي البيت لكن بلاقيك عن شارع بيتنا بس اديني تلفون وانا بطلع ليك ، اكتب عندك العنوان .......١٢ الامتداد عند صيدلية اوكسجين ..

موهوب : تمام نص ساعه بالضبط يا استاذة ..*قفل

نهى: ووووووووب علي منك ههههه انا لمن ما عرفتك اها الخطة شنو ؟؟

موهوب :(دور العربيه) خطتنا الامتداد -وصفي لي هي بعيدة من هنا ؟

نهى : لالا يلا .. كمل ع الشارع الرئيسي دا طوالي

(في قروب شلة رنداا صحبات هتون)

رنداا: واااااااي تعالو تعالو ما يفوتكم ههههههه

عبير : بسم الله

آية : احكي

توتة : (ملصق)

رندااا : هههه جاياني قفة فرح من امير

عبير : بختك نحنا لينا الله

رنداا:لانك عويرة قلت ليكي ترتبطي ب مهند

آيه : خليكم من دا عندي ليكم شمار

توته : وبعدين معاكم ياخ م تجيبو لي نفسيات برانا متشاكلين و مكرشه على واحد تاني اااح

آيه: ياخ اصبرو ، تتزكرو مؤمن ؟ مومن هتون !!

رندااا : مالو (ب اهتمام)

آية : كان ضايفني في الفيس و الايام دي شايفاه رجع ينزل صورو و كلام وحالات

رنداا: اسمعي رسلي لي رابط صفحتو نشوف

توته: م عندكم موضوع انتو ما عارفه عاجبكم في شنو

آية : دقيقه

الرسلو ليكي ...

رنداا: اسمعي رسليهو لي اسي بجي ، المندوب دا اتصل شكلو وصل ، بعد اجي بصور ليكم ههههه

آية : مغارز ي كلبه كدي نشوف ..

نهي بتقول :

وصلنا شارع ١٢ الامتداد ، و وقفنا زي ما قالت رندااا

و موهوب رن عليهاا ، و انتظر برا العربيه و انا جوا و بعاين فيهو ، لمن ندا جات مارقه من بيت ناصيه ، والطرحه في اكتافاها مجدوعه و مشيتا كانها بترقص

، جات وقفت وبترن ..

موهوب مشى عليها قاليها مافي داعي ترني ، انا (و رفع ليها يدو بمعنى ايوة انا اللي كلمتك )

رندااا !!!!!!

و بعدها نزلت من العربيه !!