الجزء 82

ساعات زمن مشت وهتون ومازن جو داخلين يتضاحكو

امي:ضحكونا معاكم ياجوز اللوز

*امي انتي جيتي بتين؟

-نهي قالت لي اظنكم طلعتو بجاي جيت داخلة

*يزن وينو؟

-اكلتو وشربتو ونااااام

مازن دخل جوه وانا جيت قعدت جمب امي في برندة المطبخ كانت...

*امي كنت عايزة اطلب منك حاجة بس خجلانة منك..

-اجي يابتي دا كلام شنو مالك في شي؟

*لالا بس انا عايزة تدينيني مبلغ كدا وبرجعو ليك في اقرب وقت..

-هتون مالك انتو مزنوقين في دين ولا شنو؟

*لالا ياامي دين شنو

وحكت ليها بالمشروع العرضو عليها مازن..

بس دي كل القصة وانا صراحة ما دايرة اطلب من شهاب لانو مازن شريك معاي...

-والله يا هتون يابتي ما عارفة اقول ليك شنو انتي عارفة مشيتنا من هنا جات علينا بالخسارة وحالنا وقف ما زي زمان الا كان تنتظري علينا شوية كدي ابوك شال ورقو ومشي قدم في كم جامعة هسي وانا زاتي مشيت قدمت في المدارس الحوالينا دي.. وسكتت..

*امي دا كلام شنو انتي هسي مالك زعلتي كدا فجأة.. دا كلو بجي وبكرا ان شاء الله حالنا يرجع زي اول واكتر ما تشيلي هم بتتدبر وقبل نتم كلامنا

جانا صوت نهي..

-طيب بتقبلو شريك تالت ومعاه راس المال ولا افتح الله؟؟

اتلفته عاينت ليها مندهشة طبعا وقلت ليها

*ب راس مال جبتي من وين؟

كش كش هزت لي يديها

قمت علي حيلي ومشيت عليها

*نهي انتي جنيتي مستحيل طبعا اقبل بحاجة زي دي انك تبيعي دهبك...

-استغفر الله ياربي وفيها شنو طالما دا انسب حل لينا وبعدين ياستي ابقو رجعو لي يعني ما حا اديكم لي لله ساي كدا...

امي اتكلمت وقالت ليها كلام نهي ما فيه شي ما تعقدي الامور يا هتون احسن تكسبي الزمن..

*خير طالما اتفقتو علي بشيل منك جزو وانا بدبر الباقي ببيع دهبي كمان...

المهم بعد شد وجذب من بعض اتوصلنا ل اتفاق ومنها سقت مازن تاني ومشينا الصياغ صرفت الدهب ومشينا تمينا البيعة مع الراجل واول خطوة لينا بدت...

............................

في جانب قعدة عائلية صغيرة

*ممدوح مرتك وين؟

-طلعت مع صاحباتا يا امي

*صاحباتا دي جديدة والله.. عاين هنا انا الايامات دي شايفة طلعات فاتن كترت وانت ولا علي بالك؟؟!!

-مي:هههه بتضحك ومشغولة ب تلفونها وفي نفس الوقت بتتكلم غريبة يعني ياامي فاتن ياها فاتن طول عمرها كدا من يوم اتلمت علينا وهي بتطلع ما بتقعد في البيت.. بالعكس انا بستغرب لما القاها قاعدة..

*انتي اسكتي عارفة شنو؟؟ انتبه ل مرتك احسن وبطل البتعمل في دا وانا لما اقول الحاجة ما بقولا من فراغ ساي.. اي بتطلع كانت معاي ووقت تطلع براها بعرف وين ماشة وبي مواعيد.. بس هسي شايفاها طول اليوم مافي شيل التلفون دا وشوف مرتك وين..

-ما هو انتي ياامي مستحيل تخليني اقعد بسلام كدا حاضر حاضر شال تلفونو وطلع فوق...

جاري الاتصال....

مرة واتنين ماف رد

والله ماشاءالله اتطورتي وبقيتي ما بتردي...

فعلا كلام امي صاح ملاحظ ليك يا فاتن عندك امور جايباها جديدة...

كتب ليها رسالة:

وين ما كنتي تعالي راجعة البيت هسي دي..

وتم الارسال

....................

*اهاااا ديل شنو ديل افكار زي الناس ما عندكم اصلو شغلو مخكم دا معاي شوية علي الاقل ادوني اسم للمحل..

مازن كان مشغول بتلفونو ومرة يضحك ومرة يتبسم براه...

نهي:عندي فكرة اعملي صفحة في الفيس بوك الزمن دا الرواج بقي كلو الكتروني بس دا بسهل ليك في الاعلان شديد..

هتون:اي هو انا فعلا فكرت في دي وامس فتحت صفحتي بتاعة الفيس وحا اعمل لي قروب لكن هسي بقينا في الاسم..

نهي عاينت ل هتون ورفعت ليها حواجبا تجاه مازن يعني عايني اخوك مالو...

*طق ضربتو علي رجلو ماااازن خلي التلفون دا شوية وانتبه معانا ممكن..

-ابيت ياخ دايرين مني شنو..

نهي نهي يابت يانهي ما سامعة بتك دي بتبكي..

جاية يا امي

هتون:مازن جد انت في شنو؟

-شنو ماف اي شي وداير يمشي اتهرب منها..

*مازن اقيف هنا انا اليوم داك ما لحقت اتكلم معاك

انت بتحب مي؟

اتهبش للحظة وما اتوقع سؤل هتون المفاجئ دا..

*سكاتك اعتبر كلامي صاح يعني؟

-لا يا هتون هو ما حب حب بس ما بكذب اني معجب بيها وبديت اميل ليها...

*اممم يبقى حب يا مازن انت بتحب مي وظاهر هسي قدامي من لمعة عيونك دي ف ما تنكر...

-هتون صراحة كدا انا عاوز مي تكون لي ودخلت قلبي وجادي في الكلام دا داير اخطبا..

بقيت منططه عيوني بعاين ليه ما قادرة استوعب.. يعني لحدي معجب بيها دي اتقبلتها لكن هوب يرمي لي داير اخطبا خلعني... قلت ليه

*مازن انت جنيت مي دي اكبر منك.. انا ما اتخيلت ان مشاعرك ليها مشت في اتجاه تاني.. افتكرتك خاتيها في مقام زيي انا ونهي عشان بتشبهنا..

-اتلفت بي جمبة وفيها شنو لو اكبر مني اصلها ما مشكلة ياها السنتين ولا تلاتة سنوات دي..

*فيها ومجتمعنا ما بتقبل الحاجة دي هو فرق شهر واتنين ما بريحوك خلي اكتر من سنة كمان.. وبعدين انت عارف رايها في الموضوع دا؟ هي زاتا انا متأكدة ما حا توافق علي انها ترتبط بواحد اصغر

منها!!!

-وانتي الخلاك متأكدة من كلامك كدا شنو؟؟!!

*يعني قصدك شنو انت هي عارفة وقبلانة ب كدا؟؟

......................

-يا شهاب انا وضعك بقي ما عاجبني بالمرة وكل يوم ماشي اسوأ لفترة ما كنت كدا بس بصراحة يعني بعد عرست الاسمها هتون دي بقي اكعب...

*عايزاني اسوي شنو يعني بحبها بحبها..

-لا انت ما بتحبها وبقولا ليك مية مرة انت ما بتحب هتون لي ما عايز تفهم الحتة دي.. طاوعني لمرة بس يا شهاب.. لفتت راسو بي يدها وعاينت ليه خلي #نسمة دي مرة واحدة قصاد عينك هي وانسي هتون.. جربني لو لقيت روحك ما كسبان انساني وما بسألك..

بقي بعاين ليها ومتوتر..

في لحظة سكون

تلفونو فجأة ضرب لما نطو هم الاتنين

*الووو نعمة في شنو؟

شنو؟ كيف يعني؟

طيب حاضر حاضر جايي جايي..

-في شنو مالك؟

*بعدين بعدين بقول ليك هسي مستعجل ومشي بسرعة..

ركب عربيتو الله يلعنك يا صلاح اصلو ما داير تجيبا علي بر..

ومسك تلفونو بضرب ليه ماف رد...

من جانب (نعمة)

سجمي سجمي ان شاءالله شهاب يلحقو قبال يصل ل هتون البلاوي مالا بقت نازلة علي..

شالت تلفونا وبتتصل ب هتون مقفول...

احييي بس القاها من وين ولا وين

ترررن تررررن

هتون قايمة تفتح الباب مازن وقفا انا بفتح ماشة وين؟!!

بعد فترة كدا جا داخل ووشو متغير

*مازن دا منو ومالك ؟!!

-هتون تعالي ودخل نادا ابوه ومشو علي الصالون..

من جات داخلة عينا وقعت علي راجل قاعد..

من جواها

الزول دا شكلو ما غريب علي زي انا شفتو في مكان.. وبقت مركزة عيونا معاه... وقلبها مقبوض ما مطمنة ليه

بعد ضيفوه وقعدو..

ابوي: مرحب مرحب ولدي قال عندك عندنا امانة وجايي تشيلا خير يااخوي.!!

-عاين ل هتون اول وكان منزوي علي الكرسي وضامي يديه علي رجولو انا صلاح ابو يزن وجايي اسوق ولدي..

هتون : بخلعة شنو؟ صلاح صلاح انت ايوة ايوة اتزكرتك انت وختت يدها في خشمها ما قادرة تستوعب البحصل قداما..

ابوها ومازن قامو علي حيلهم هتون في شنو بتعرفي الزول دا من وين؟؟!!

ما نطقت ليهم ومشت بعصبية عليه جرتو من طرف جلابيتو..

انت الوصف ليك بيتنا منو؟

قوم اطلع بره ما اشوف وشك هنا...

(بإنفعال وعصبية)

جاها صوت ابوها هتون دا كلام شنو البتعملي فيه دا...

ابوي انت ما عارف حاجة ما تدخل..

صلاح دا العملو فيني ما شوية...

قاطعهم صوتو

انا داير ولدي بس انا ابوه وعايش زنبي شنو اتحرم من ولدي وقعد في الكرسي ببكي..

محمد: بنهرة هتون كفي ما عايز اسمع صوتك خلي عندك احترام للراجل ...

ابوي ما يغشك بدموع التماسيح دي،، دا واحد لا عندو زمة لا عندو اخلاق ولا عندو....

قاطعهم تررن ترررن ترررن جرس الباب بضرب ما وقف مازن بضيق طلع سرعة...

....

....