الجزء 83

*انا تعبته يا معزة خلاص بس اسوي شنو؟؟!! قولي لي

-بتمسح علي ضهرها وماسكة يدها معليش يا سكينة استحملي مجبورة انتي ما عندك حل علي الاقل لما تلقي شغل احسن..

*بتقش في دموعها.. علي قولك..

واحدة من البنات المعاهم في الغرفة اتقلبت عاينت ليهم

-في حل؟؟!!

سكينة رفعت عينا عاينت ليها

ردت ليها معزة عليك الله انتي بالذات اسكتي وخلي البت في حالا عارفة افكارك كلها زي وشك دا..

سكينة:معزة اقيفي خليها تتكلم مش امكن يكون حل لي..

معزة ب زعلة بطريقتك يا سكينة اي خطوة ما ياها محسوبة عليك وانتي وضعك ما متحمل ..انا العندي قلتو وما مستعدة اسمع العندها وقامت طلعت..

سكينة مشت قعدت جمبها قولي حلك سامعاك..

يابت انتي هبلة والله ما عارفة النعمة الانتي فيها شغالة في المطار والداخلين والطالعين مغتربين قدام عينك عليك الله غالبك تربطي ليك مع واحد ينشلك من الانتي فيه دا.. وبعدين ما ناقصك حاجة سمحة وجسمك سمح وما اظن انك خجولة كلام...

ضحكت والله انتي بتفهمي يابت صحي الما بعرفك بجهلك...

جربي بس ونيشي صاح المهم يكون مرطب ومقرش كبير، راجل مرا ما مهم.. المهم الmoney يابيبي فهمتيني...

..................

هتون من شافت الجا داخل جرت علي

الحقني

عاين ل صلاح بقوة عين شديدة وقال ليهم

-معليش علي الكركبة العملا ليكم الزول دا راجل خالتي وعيان مخو دا ما شديد يلا يلا يا صلاح..

طلع معاه من سكات ل بره وهتون لحقتهم

*شهاب شهاب ماشي وين؟

-بودي محل جا وجاي عليك عشان نطلع تنضفي البيت.

*بيت؟؟ بيت شنو؟؟

-انا رجعت للراجل بتاع بيت الاجار واجرت البيت منو خلاص ومضيت العقد ودفعت القروش..

وكررب فتح الباب وطلع قبل اديني اي تفاصيل تانية...

جيت داخلة جوه وحاسة اني بين نارين

دي اكيد نعمة اللزت صلاح عشان اقلع الولد بس لا يا نعمة بعدك لو خليتك تسوقيه وحا استخدم سلاح اقوي منك ولو الله كاتب ليك الادب بأدبك انا من الليلة..

ابوي جا طالع من الصالون

*هتون شهاب وين ما جا داخل تاني؟

-مشي يوصل #راجل_خالتو مع قولت الجملة دي انا سكته... صلاح راجل سوسن الاتوفت يبقي فعلا ابو يزن

قعدت في محلها...

ابوي: هتون بسم الله في شنو؟

*انا تعبت ياابوي كل يوم حاجة جديدة بتطلع قدامي راسي زاتي بقي لافي

-غريبة ممدوح ما جاب لينا سيرة الراجل دا قدامنا اليوم داك...

*امكن مفتكرني عارفة ياابوي عشان كدا.. انا بعرف صلاح لاقيتو يوم محكمتي الاتهموني فيها اني شغالة معاه وهو بالكذب اتبلا علي المرة الاولي لكن ما كنت عارفة الصلة البتجمعو بيهم...

وحكت ل ابوها الجذء دا بالتحديد...

-ابوها ضرب يد بيد لا حول ولا قوة الا بالله والود المسكين دا هسي زنبو شنو..

*يزن... انا هامة ليه شديد لكن خلاص شهاب اجر البيت القلت لي علي داك وبالكتير حا نرحل يومين كدا دا حلي الوحيد ياابوي عشان ابعدهم عن الاسمها نعمة دي ...

-علي بركة الله خير ما فعلتي يابتي..

وشهاب كان جا كلميني انا دايرو قبل يطلع تاني ما بلم فيه..

*ابوي انت دايرو لشنو مقروض فيه كدا؟؟!!

-عندو امانة عندنا لينا سنيين كتيرة

*ما خلاص انت لقيت امانة ميمونة هدي وهو كويس مع امو الحقيقية ما عندك شغلة بيه تاني انا شايفة احسن ما تقول لي اي حاجة...

-انتي بتقولي في شنو #ميمونة امك وعدتا وهي بتموت وادتا دهب وقروش ليوم الليلة قاعدة كانت باقية لينا هوس وهم طول السنين دي...

*ابوي انت الحصل شنو كان تاني بعد قلت الاسعاف جا ونقلوها مالا...

-اظنها اتشاكلت مع راجلا بعد الحصل وشهاب اتفقد وناس الفريق قالو ميمونة قلبت الدنيا وقعدتا.. وشكت في راجلا لانو ما بريدو والمشاكل قامت بدون قصد هو لزاها وقعت ضربت راسا ب حديدة السرير جاها نزيف مسافة وصلوها المستشفي مشينا انا وفوزية ل وهناك قالت ليها في قروش ودهب كدا كدا داساهم في المحل الفلاني ل ولدي شهاب بأمنك علي خلي محمد يفتشو وربو معاكم زي ولدكم ودي قروش لميتا ليه للزمن..

ما قعدت كتيير ماتت ..

(بس ما جابت ليها سيرة ان ال ولد ما ولدا)

*والطفل ال في بطنا؟ ومش هو ابوه كيف يرضي يبعدو عن امو؟؟!! لالا في شي مجهول ياابوي..

-دفنو معاها ما ولدوها.. امك دي قالت منظر ما بتنساه شافتو بطنا دي ترف ترف كدا وهي مطلعنها ميتة.. كل شي علمو عند الله ...

*جسمي لما كشه من القالو ابوي... طيب هي ما حكت ل امي حاجة وقت بتوصي فيها علي شهاب وكدا..

-والله يابتي الزمن طول شديد امك زاتا ما متزكرة كويس لكن اتخيل لي شكت ليها علي خالتو دي(امو نعمة) بس هسي الامور وضحت...

*بس ياابوي المحيرني الحصل شنو خلا ميمونة تسوق تربي شهاب وامو قاعدة وتاني نعمة تسوق شهاب بالدس وتشرد بيه.. وابو شهاب وين؟؟

- عبد الرازق من الحصل تاني اتسجن قالو ولا شفنا من يوما نحن رحلنا والله لا جابو في طريقنا يكون ميت يكون عايش ما معروف.. ضحك دي غلوتيه دي خلاص انسي الما لينا فيه دا واقفلي بابو اخير لينا وليك...

ابوي قام من هنا وخلاني

جواي اسئلة كتييرة محتاجة ل اجابة.. وماف زول غير شهاب بفش لي قلبي...

تلفونا ضرب دا شهاب شكلو في الباب...

*الووو طيب دقيقة...

جات فتحت الباب ودخل معاها..

-ابوي: الله جابك ياولدي انا عايزك في موضوع هتون سوي لينا شاي في المسافة دي ادخل الصالون وبجيك هسي..

عاين لي بعيونو زي البسألني في شنو الدايرني ابوك فيه..

قلبت ليه كتافي ومشيت علي جهة المطبخ...

..................

كررب الباب فتح

فاتن جات داخلة سلمت وطلعت بالسلم فوق علي شقتها طوالي...

ممدوح قام طلع وراها

*مي: هسي في داعي يا امي تملي علي مرتو انتي مش عارفه طريقتو كيف معاها الله يستر بس..

-خلي عشان تفتح عينا من تصرفاتا الجديدة دي

*امي انتي في شنو مالك فجأة قلبتي علي فاتن..

-حا يكون شنو يعني مافي اي حاجة كل الحاصل ما عاجباني طلعاتا البقت كتيرة دي...

(ام ممدوح عرفت حاجة ولا شنو؟! )

................

بعد شهاب نزلو في نهاية الشارع التاني من بيت ناس هتون وهددو لو شافو حايم بجاي ما حا يحصل لي خير..

صلاح ما ضيع وقتو نهائي خاصة بعد طلع خسران من كل الجهات وما استفاد شي من العملو...

ركب اقرب رقشة جابتو ل نعمة...

لقي الباب متاكا ساي دفرو ودخل...

نعمة كانت قاعدة بره في الراكوبة منتظرة شهاب وبتحاول تتصل بي تعرف حاجة...

من شافتو قامت علي حيلا

*انت الجابك هنا شنو ياراجل ما كفاية العملتو وبتهددني انك حا تمش ل هتون وتفضحني ليها كان ما زودت ليك القروش وقعدت هنا...

-هههههه ضحك بصوت عالي اقيفي هسي عشان ما تكوركي ساي انا جاييك في مصلحة عشان تعرفي قلبي عليك علي العموم شهاب بح انسيه اجر لي هتون بيت وبكرا تفتشي لي ما تلقي سمعتو وهو بقول ليها كدا...

ولدك زاتووو قرف منك اخرتا ما بتلقي غيري..

*انت ياراجل جنيت اطلع من هنا قوامك داير تجيب لي مصيبة كفاية البدا يطلع عننا كلام في الفريق..

-حا تلفي وتلفي يا نعمة غيري ما بتلقي وسوقك بدون هتون وشهاب بقيف كلمتك... البت طلعت اشطر منك وعرفت تجيب راسو..

جرتو من جلابيتو ل نهاية باب الحوش

اسمع هنا ما اشوفك تجي بجاي ما ناقصة مشاكل وبلاغ فيني... دفرتو وقفلت الباب...

...................

ايووووووي يووووووي يووووي

ميادة جات طالعة مخلوعة تشوف الزغاريد ال في بيتهم دي شنو

*امي مالك بتزغري في شنو؟

-خلاص الجماعة وافقو ما عندهم اي مانع باقي الرجال بس يتممو العقد..

*الجماعة منو انا ما فاهمة؟

-كنت في فريق ورا وكلمت ميامن وامها وخطبتها ل موهوب وقالت هي رايدا ومن يومها منتظراه...

ميادة ختت يدها في خشمها وبإنفعال

*يمة دا شنو العملتي دا كيف تسوي حاجة زي دي انتي بتتصرفي براك انتي من راسك؟؟!

اتلفتت علي صوت موهوب وقالت ليه

تعال احسم الفارغة البتعمل فيها امك دي من ورانا...

*امي ما عملت فارغة انا الطلبت منها تمش تعمل كدا وبالكتير يوم وبعرس...