الجزء 84

-شهاب دنقر وخته يديه في راسو انت بتقول شنو يا عمي خالتي ميمونة اتعذبت كدا وفي الاخر ماتت بالطريقة دي..

*والله ياولدي نحن افتكرناها دي امك وهو ابوك لانها ما حصل جابت ل فوزية سيرة نهائي الله يرحمها..

هاك مدا ليه قطعة قماش ملفوفة هي خلت ليك الامانة دي ومن وقتها انا فتشت عليك وتاني مشاغل الحياة والدنيا شغلتنا لكن قلنا مصير الشي في يوم يظهر...

ما قدر امسك اعصابو وفي دمعات سالت منو..

*شهاب الله انت راجل في راجل ببكي استهدي بالله كدي..

انا في اللحظة دي جيت داخلة وشفت شهاب بالمنظر المؤلم دا ف اتلفت بالجمبة عشان ما اشوفو ابوي اشر لي اخت الشاي واطلع واقفل الباب معاي..

طلعت من سكات لكن ما قدرت اقاوم الحصل شنو؟ ف لبدته ورا الباب الما قفلتو ل اخر شي وبقيت بتسمع..

-عمي انا زول قمت يتيم في الدنيا دي لطشتني لما شبعته منها ..ما لقيت صدر حنين علي غير نعمة.. انا زمان بتزكر راجل خالتي دي كان جنو يضربني طوالي وبخوفني كان كلمت ميمونة حا يقتلني..

انا جربته الملطشة، كنت كتير بنوم جيعان وبردان لا لاقي صدر ام حنين، لا لاقي زول يطبطب علي زي الناس.. من وانا صغير بشوف الاهل بسوو شنو ل اولادهم في الاعياد والمناسبات و الايام العادية الا انا دايما كنت في الشارع حفيان ومبهدل ...

قشه دموعو وقال ل ابوي

انا بستأذن عندي شغل اتزكرتو هسي شكرا ليك يا عمي..

ابوي ما عرف يقول لي شنو غير

*شهاب نحن بقينا اهل بعد كدا وانت راجل بتي كان احتجت ل اي حاجة انا موجود وقبل تطلع ارح انا سايقك محل حا يريحك شديد...

حسيت بيهم طلعو ب باب الصالون التاني...

وانا جيت راجعة جوه اشوف امي ونهي...

....................

*فاتن ممكن اعرف وين كنتي الوقت دا كلو؟

-ياسلام ماشاءالله ياتو يوم بقيت مهتم تعرف انا بطلع وين وبتأخر لشنو ما من عوايدك يعني هه

*والله اسألي نفسك انك زمان نادرا تطلعي وكان طلعتي بالطريقة دي يا مع امي ولا كلمتيها انك حا تمشي وين..

شايف وملاحظ مستجدات جديدة...

-والله انا حرة اطلع وارجع زي ما انا حابة...

*لا ما حرة انتي نسيتي انك مرا متزوجة...

-يااااخي ضحكتني اول مرة تقولا يعني ياتو يوم الحنية والاهتمام دا..

وشغالة بتطلع في اكسسواراتها وتمسح في مكياجها وهي قاعدة في التوليت..

*فاتن اوووعك تستفزيني احسن تتكلمي عديل..

-واتكلم عديل لي غريبة يعني اصلا منك ولا خلاص قنعته لما هتون ادتك في راسك قلت اجي اطلع زهجتي في المسكينة الهبلة دي...

عاين ليها بضيق خير.. علي العموم انا كلمتك طلوع من البيت بدون اذن مني ماف تاني انتي فاهمة وعلي الله يا فاتن اعرف انك طلعتي من وراي... طلع ورزع الباب من وراه لما هي اتخلعت..

وجعها تهديدو ليها بالبساطة دي وقعدت تبكي مسكت التلفون وطلبت رقم مأمون..

جاري الاتصال...

*الووو مأمون انا محتاجة ليك شديد خلاص ما قادرة استحمل الانا فيه دا..

عايزة افضفض ليك ممكن...

.................

في الوقت دا الساعة ماشة علي عشرة بالليل ونعمة دايرة تجن بتتصل بيه وما برد ولا جا لحدي هسي الحصل شنو؟؟

وهتون داخلة طالعة لما امها نهرتا

*يابت ها عملتي لي وجع راس داخلة وطالعة زي ام العروس في شنو اهبدي شوية..

-اموت واعرف ابوي وشهاب قبيل طلعو وين وهسي من جو في الصالون بتودودو في شنو بس..

*اجي الشمار القتل الحمار قبيل شايفاك راخية اضانك مالك ما سمعتي!!!

-سمعت شنو شي سمعتو وشي ما سمعتو..

بعد شوية ابوي ناداني هتووون راجلك دا ماشي دايرك..

دخلت الصالون وطلعنا سوا علي الحوش..

*البسي عبايتك ارح عشان تستفي الشنط..

-لا انا ما ماشة هناك تاني!!

*هتون الله يرضي عليك ما وقتو انا ما فيني حيل مناقرة..

-عاين ياشهاب انت زاتك ما تفتكر اني خفيت عليك بس مجبورة والله مجبورة يا شهاب عشان الود متعلق بيك انت بالذات وبقول ليك بابا وشايفة حنيتك معاه كان ما كدا والله باب بيتنا دا ما تعتبو وكنت طلبت ورقتي من اخر كلامي معاكم...

*لا حول ولا قوة الا بالله حاضر طيب يلا خلينا نمش الوقت براه متأخر عشان ارجعك طالما ما حا تقعدي هناك..

دخلت لبست عبايتي وطرحتي وكلمت امي خليت معاها يزن وطلعنا مسافة الشارع وصلنا البيت شهاب فتح الباب ودخلنا..

البيت كان صاااني ولمبة المطبخ والحوش طافيات..

*الله نعمة ماف ولا شنو...

-لالا لانو ما مطبول ب طبلة

-مسكت اكرة باب البرندة فتح معاي..

عاينت لي وخفته لانو البيت مضلم وصااااني

دخلنا سوا اول فتح باب الغرفة الفاتحة في البرندة وولع اللمبة وانا فتحت كشاف التلفون ولفيت بالممر بتاع البرندة المودي للغرفة الورا قبل اصل سمعت صوت وقفت واتجمدت قبلي...

تاني يا نعمة رجعت بسرعة قبل شهاب يجي...

بس كان اسرع مني ولقيتو واقف وراي وعيونو شرار...

..........

نهي بتلولي في بتها وخلاص تعبت وما راضية تنوم ليها..

وكل مرة والتانية بتعاين ل تلفونها...

يزن نايم في السرير التاني...

فوزية جات داخلة ليها جيبيها

وارقدي انتي هسي بتنوم.. موهوب ما اتصل بيك تاني؟

*لالا يتصل عشان شنو ...ما اتصل ب ابوي؟

-محمد قال لي اتصل بيه قبيل وجاي بكرا دايرو في موضوع قال لكن ما وراه شنو..

*دايرو في موضوع زي شنو مثلا؟!!

-والله علمي علمك يابتي ياخبر بفلوس بكرا يبقي ببلاش..

*هتون دي اتأخرت مالا حا تبيت قبلا ولا شنو كدي اتصلي شوفيها..

نهي مسكت تلفونا و جاري الاتصال....

مرة واتنين عادتو ما بترد احتمال جايين علي البيت او عاملاه صامت..

.................

(جانب اتنين حلوووين)

كانو بتونسو من فترة في الواتس وما حاسين بالزمن..

-مازن بقتلك عارف ماشة علي 12 ونحن بنتكلم لي هسي ههههه

*اعمل شنو الونسة معاك حلوة ما بتخلص وموضوع ورا موضوع ما بحس بملل وانا معاك نهائي..

-وانا كمان بحب اتكلم معاك عارف شي انت شخصية مختلفة شديد ما زي معظم شباب الايام دي...

*احم احم اخجلتم تواضعنا

-وكمان انا شفت ليك كم موقف خلاني احبك...

فجأة نططت عيونا لما لقت روحها رسلت الرسالة دي وفيها كلمة احبك وطوالي ضغطت خيار حزف الجميع وحزفتا بسرعة...

هو كمان اتخلع من الرسالة الجاتو في اخر كلمة...

ماف زول رسل للتاني بعد مسافة رسل ليها

*مي ممكن اسألك سؤال؟

قرتا وما ردت لانها خجلت شديد وافتكرتو يقول عنها بت ما كويسة...

*الوووو ممكن تردي شايفك متصلة وبتقري كلامي!!

-ايوة اتفضل

*اخد نفس واتشجع كتب ليها انا حابي اعترف ليك وياريت اسمع منك الصراحة برضو...

كانت متوترة في نفس الوقت وبتفكر عايز اعترف واسألا من شنو... حست قلبها داير يطلع من محلو كان بدق ويديها بقو تلج تلج ومراقبة الشاشة قدامها منتظرة...

*مي

انا بحبك انتي بتحبيني؟

.........

*انتي لسه ما اتهديتي،، لسه ما خايفة من الموت الممكن يشيلك وانتي في الوضع المقرف دا...

هتون بتحاول تهدي وهو بكورك معصب

-شهاب اهدا بس ما كدا شهاب الله يرضي عليك كفاية خلاص الناس كلها سمعت واتفضحنا... وبتحاول تجر فيه عشان يطلعو يمشو..

جرا يدو من هتون بقوة ومشي علي نعمة ما كان واعي للبعمل فيه

*انتي لازم تموتي عشان ارتاح من وسخك البقي ملازمني حياتي كلها من يوم العملتيه مع عبدالرزاق راجل خالتي ميمونة انتي قايلاني انا ما شفتك لا كنت كل يوم بشوف عمايلك معاه جوه في الاوضة لما خالتي تطلع.. كنت بكون واقف ورا الباب واي شي سامعو وشايفو بس لحظي الكعب انو يوم انتبه لي وههدني حا يقتلني ويقتل خالتي كان كلمتها... لكن القدر كشفكم وهي عرفت براها... قبضتكم قبضت اختها بت امها وابوها بتخونا مع راجلا...

انتي يا نعمة لي كعبة كدا اي شي دايراه لي روحك ما شبعتي عليك الله ما زهجتي...

هتون بقت تبكي من السمعتو ومن الوجع الطلع من شهاب،، من العاشو والداسيه وكاتم في قلبو طول السنين دي وساكت من بره انسان بتكلم وبضحك ومن جوه دمار..

ما اتوقعت اكون عندو مشاعر او بتهز الا لما شافتو هسي قدامها وهو بلوم وببكي قدام نعمة...

ما قدرت تتحمل اكتر جات جرتو منها ونهرتو بصوت عالي..

اوعك توسخ يديك علي زول ما يستاهل خلاص الحصل حصل خلينا نمش ونبدا حياة جديدة نحن الاتنين تعبنا واتبهدلنا اكتر من اللازم.. السعادة دي يا شهاب قرار والله قرار وبي يدنا نخلي حياتنا حلوة ونعيش مبسوطين دايرين شنو اكتر من كدا عندنا يزن في وسطنا بملا علينا الدنيا...

كلام هتون اثر علي شهاب شديد وبقي بعاين ليها بإنهيار ملامحو اتحولت ل طفل داير ام تطبطب عليه بس وهو طوالي بيهدا...

من دون تحس جرتو عليها وهو مسكها بقوتو كلها حضنها بدون ولا كلمة....

طلعو بعد ما سرعة سرعة رمت اي هدوم ليها ولي شهاب ويزن في الشنطة...

جراها وطلعو علي البيت...

طول الشارع كانو ساكتيين وصلو قبل تنزل قال ليها..

*انا حا امشي انزل مع واحد صاحبي وبجي بكرا بدري بتلقيني في البيت...

-لا صاحب شنو بيتنا واسع تنزل تبيت معانا..

*هتون الله يرضي عليك ما تضغطي علي

-حاضر طيب انت كويس عاينت ليه في عيونو وختت يدها علي يدو وضغطت عليها قوي..

*ابتسم ليها انا كويس ما تخافي علي طول ما انتي جمبي انا ببقي كويس..

-نزل معاها شال الشنطة مسافة فتحت الباب جرتا منو قالت ليه تصبح علي خير حاولت تقرب عليه بعد الاحساس القبيل الحستو...

بس هو بعد فجأة

*وانتي من اهلو وكان متوتر...

دخلت وقفلت الباب جرت الشنطة ودخلت من سكات...

قعدت علي سريرها وفتحت تلفونا شافت مكالمات نهي..

فتحت الفيس وكتبت علي صفحتها :

قيل في معني الزواج ان تختار من يستحق الإطلاع علي عيوبك فيقبلها ثم يسترها عليك...

قامت طلعت عبايتها عشان تمش تشوف لو ديل صاحيين ولا نامو وتجيب يزن..

فجأة سمعت صوت رسالة المسنجر بتاعها

رسالة...