الفصل الأول

مدخل..

دفنوها هناك ي عمتي، امشي أمرقيها، دفنوها يمة شوفيها بتكورك كيف ارح نطلعها، فاطمة بتنادي كايسهه البمرقها من هناك واي ي عمتي عليك الله كلمي ابوي الشيخ يعفيها، كلميهم يخلوها يمة هي قالت لي تاني م بتعمل كدة عليك الله يمة كلمي يابا الشيخ هو بسمع كلامك عمتي فاطمه، فاطمة بتموت كدة ي عمتي ...

سلافه!!

، طلعوها عليك الله خلوها..

ي بت سلافه اصحي..

عمتي فاطمة، قتلوها ي عمتي

ي بت ها افتحي عيونك ديل..

كلمي ابوي الشيخ يمة خليهم يعفوها عليك الله

سلافهه ي بت فتحي كدة ها، ي بت، بتكلم معاك انا،

سلافه، سلافهه سامعاني؟

ها في شنو ي امي ؟"سلافه بتفتح عيونها وهي مفزوعه"

قولي بسم الله ي بتي كدة، قولي بسم الله

م تبكي عليك الله ي بتي خلاص كفايهه استغفري ي بتي استغفري

م قادرة اشيلها من بالي ي عمتي قتلوها قتلوها ..

انا مش قلت ليك قبل تنومي صلي واقري ليك قرءان ي بتي؟

قومي كدة، قومي اقلعي ملابسك دي واللبسي ليك ملابس ناشفه دي مليتها ليك مويهه، قومي الله يرضى عليك، قومي صلي ليك ركعتين كدة الله يرضى عليك ي بتي

حاضر قايمهه يمة...

اخ ي بتي اخ من الدخلت فيك وحلفت كان تمرق لَگِنْ نسوي شنو عاد حال الدنيا ..

❖

مدخل 2=

اسلافهه بدور اقولك شي..

قولي ي التايهه اختي!

بنيتك دي قدامها شويهه وتبقى بت طبعا، ً اها امبارح بانقا كلم ابوه شان يكلم ابونا الشيخ يحجزها ليهو واظن هسي الحاج بكون قعد مع ابونا الشيخ وفاتحو في الموضوع قلت النكلمك ..

بتي انا بتحجزوها؟بري بتي م بديها دايراها تقرأ حاشاها العرس بدون قراية..

التايه: ها شن نفعها القرايهه؟! الفي عمرها واكبر منها كلهن بقن نسوان وعرسن عرس الهنا والسرور وجابن وليدات شن فايدتها القرايه كدة قولي لي غير ضياع زمن وتخلي الواحدة تكبر لمن تعقر وتقطع..

التاية ؟؟؟

التايه: النبي م صِح كلامي ي حاجه حليمي امرقي النصيحهه؟ شن فايدة عرسك وانتِ كبيرة؟ الواحدة تقعد تقول تقول بدور القراية بدور القرايه وتقعد تباري دربها بعدين لما يفيض بيها والقطر يفوتها تقابض في رجال النسوان الاصغر منها ويعرسوهم بدون رضى وليانهم كمان..

سلافه: التاية قولي كلامك بالدغري اخير من اللف والدوران، انا يختي كلامك البتقوليه في الحله كلو واصلني بالحرف الواحد لكن مفوتاهو ليك بمزاجي ..

يختي العرس دة قسمة ونصيب اصلو م بالعمر، تاني شي ابو بتي العرسو مني لغايهه م دخل التراب واجعكم وبتطاعنوني بيهو دة اختارني عشان هو زاتو كان كايس للمتعلمه عشان فتر من الجهل القام لقى نفسو فيهو دة، الحمدلله م شفت منو الا كل خير، احترام لقيتو منو، تقدير لقيتو منو، شايلني فوق راسو وعاملني ملكة قدام القبيله كلها لا يوم اساءني قدام زول، ولا يوم جدعني بي نعال قدام زول، ولا يوم ضربني بي عكاز قدام زول، ولا يوم اتكلم معي بطريقه م سمحهه قدام زول، لأنو عارفني م برضى على نفسي حاجه زي دي، دة الفرق في المعامله بين المتعلمة والما متعلمة فهمتي؟

غير كدة البتعملوهو في بناتكم هنا دة اسمو جريمة م عرس، ماف واحدة بعرسوها عمرها 8 سنه او حتى بحجزوها، بنات هن ولا صرفه صندوق؟ دة جهل منكم كان انتو بترضوهو على بناتكم انا لا، بتي دي بموت فيها براي م تقولو ابوها ماف معناها خلاص م عندها البقيف في راسها

التايه: اجي يختي مالك هسي انا قلت شنو قمتي فيني كدة؟

قلتي ي التايه وعارفه نفسك قلتِ شنو م محتاجه اعيد ليك القولتيهو

في وقت لاحق..

سلافه: بتي وين يمة م شايفاها،

سارة، ي بت سارة بقت تنده علّۓ بتها

سارة طلعت مع جدها الخلا اسلافة ردت عليها "حاجه حليمه عمتها وفي مقام امها "

طلعت متين يمة؟ ليهه م كلمتني؟

حاجه حليمه: عاد بتك م بتعرفيها؟ اي شي قابضهه فيهو وبتدور تسويهو مع الناس،

والله محنتني يمة البت دي، محنتني عديل كدة

ه خليها عاد تدور الشغل والحارة الله يحفظها من عيون الناس بسظ، لبستيها الحجاب والكمون الأديتو ليك؟

اي لبستها يمة لبستها!!

كويس كان كدي م تخافي عليها شي بجيها مافي

الحافظ •اللّہ̣̥ يمة بس م اخاف كيف يمة شوفي جنس الدايرين يحجزوها من هسي ديل؟

اها عاد تسوي شنو ي بتي؟ البت قايمة جسمها كويس وماشه تكبر وانت عارفه براك العادات م عندنا بنيه بتتم 10 سنه من غير حجز وكان جسمها كويس كمان بتتعرس عديل، عارفه البنات هنا بخطفوهن خطف

الا بتي يمة، الا بتي دي ابوها كان حي زاتو م برضى بحاجه زي دي خلي يشوفو غيرها الله م كتر الا البنات في الحله دي

مدخل تاني..

يابا جيبو انا بشيلو،

خليهو م بتقدريهو تقيل

لالا م تقيل خليهو حتى شوف اها بشيلو في ضهري كدة..

حاجه حليمه: اها شكلهم جو من الخلا كدي قومي عليهم...

سارة؟ دة شنو الشايلاهو دة ي بت الشوال دة بقطع قلبك احي انا منك بتموتي وبتريحيني

كلمتها والله ي بتي بتك ام راس قوي دي م بتسمع الكلام

عارفه قوة راسها يابا الشيخ عارفهه جنها تعمل حاجات اكبر منها الله غالب عاد

ه قربت تبقى مرا بعد كدة خلاص

لا ي ابوي بتي لسه صغيرة 8 سنه ي دوب مرة شنوو..

البت جسم م عمر ي بتي ها وبتنا الحمدلله زي م بقولو قايمه عضمها عريض

حاجه حليمه: قول هو الله احد اراجل قصيتها خلاص البت دي تجيها منكم ولا من ناس الحله؟

هسع انا قلته شنوو امرهه ها قومي كدة جهزيلنا الأكل

خليهو يمه انا بجهزو، سارة امشي قدامي عشان تستحمي وتغيري

❖

التايهه مرت الحاج كانت هنا قبل شويه نضمت نضمي عكر لي سلافه مزاجها، اظن الحاج جاي يحجز منك سارة كان جااك اوعى تديهو كلمه واوعى تنضم في الموضوع دة اراجل الله يرضى عليك كويس؟

الفوره في شنو؟

هس بس م تنضم فيهو واسكت على كدة البت امها م دايرة تديها.

❖

يمة كيف قيلتي عساك عافيه..

عافيه ي بتي انتِ كيفك؟

الحمدلله

سارة، سارة، يمة سارة وين؟

كانت بتلعب مع بنيات التايه في ضل الشجرة هسع، جيتي متين من المدرسه انتي هسي؟ م سمعت جيتك

مع بنات التايه؟ حي انا البت دي دايرة تقطع قلبي زيادة، كلمتها م تطلع من المدرسه تنتظرني م بتسمع كلامي وهسي عندي اجتماع مع الموجهين اعمل شنو انا دي بس في الدنيا دي كدة امشي اشوفها،

تعالي ارتاحي ي بتي بتجي هسي انا زاتي غفلتني وطلعت!!

لا خلي امشي اشوفها

سارة، سارة وينك، ي بت سارة، امونه شفتي سارة وين؟

اي ي استاذة سلافه شايله جركاناتها معاها بنات من الفريق ماشات على البير اظنهن،

البير؟؟

لقيتيها؟

لا يمة قالو شايله جركاناتها مع بنات الفريق مشو على البير

ه والله البت دي غايتو عمايلها تحير اها شوفي جنس البتعمل فيهو دة تجي م̷ِْن المدرسه تمشي تنقل مويه وزول داير مويه ماف

لحظه م هم واقفين..

استاذة سلافه، استاذة سلافه..

اي ي النذير

استاذ عصام قال ليك الموجهين جو تعالي سريع

اخ هسي انا اسوي شنو ولا شنو خلاص امشي قول ليهو جايه..

ي بتي امشي مدرستك انا بمشي عليها بشوفها وبجيبها معاي م تخافي عليها، امشي

لا يمة خليني..

قلته ليك امشي انا بمشي عليها خلاص الناس منتظرنك م تتأخري امشي

طيب تمام م تخليها تطلع عليك الله يمة لمن اجي الليله ادقها دقه اكسر رجولها دي

خلاص امشي هسي

طيب تمام..

بعد مرور ساعهه..

استاذة سلافهه، اجري ي استاذة اجري

اصوات صراخ جايه م̷ِْن برة المكتب اثناء م سلافه في اجتماعها مع الموجهين..

وقفت مهجومه وفجأة دخل طالب المكتب وهو بلهث

قالت ليهو بي هجمه في شنو؟

قالو سارة وقعت جوة البير "صوت الطالب وهو م بين مسموع وم مسموع بسبب عدم قدرتو علّۓ النفس"

سارة بتي؟...

قالو ودوها المركز الصحي

بعد مرور 15 دقيقه..

ساره، ساره وين يمه؟ماتت

بتبكو مالكم؟ ساره ماتت؟ بتي ماتت؟يمة ردي علي بتي ماتت؟ زحو كدة خلوني ادخل،

م بخلوك

دي بتي كيف م بخلوني زحو كدة قلته ليكم، سارة، بتي ماتت؟بتي مالها ي دكتور،

سارة فتحي عيونك، فتحي عيونك بتكلم معاك، سارة، سارة، سارة..."سلافه بتصرخ"

سامر، سامر ي ولد، سامر ي ولد، ي ولد...

ايوة..."اتنفض م̷ِْن السرير وهو بشهق"

ي ولدي بسم الله مالك خلعتني معاك جسمك دة شوفو نازل مويه زي المطرة كيف مالك في شنو؟

"سامر في حاله م̷ِْن الهلع"

سامر بتكلم معاك انا مالك ي ولدي انت كويس؟

م م ماف شي ي امي، صباح الخير،

صباح النور ي حبيب امك انت قول لي مالك ملاحظه ليك لسسه بتتخلع في نومك انت كويس ي ولدي؟

كويس ي امي كويس والله

خلاص قوم كدة اشرب الشاي جهزتو ليك الساعه هسي ماشه لي 10

طيب حاضر ..

يحضر ليك الخير ويرضى عليك دنيا واخرة، ياسمين بتغسل لو عندك ملابس وسخانه طلعها خليها تغسلها ليك معاها،

طيب تمام.

خلاص كدي انا اقوم على الشاي دة لغايه م تجهز يلا..

❖

برة الغرفه..

ياسمين سامر اخوك دة سألتو قال عندو ملابس وسخانه غسليها ليهو معاك،

حاضر ي امي.

اشيي؟؟؟ هسسي لما قلته ليك احمد عندو قطعتين بنطلون وفنيله مش قلتي م بتقدري تغسليهم عشان عندك كورس اونلاين مهم م بتقدري تفوتي مواعيدو وعندك برضو شغل عايزة تخلصيهو م عندك زمن لزيادة قطعه واحدة حتى ولا عشان دة سامر يختي بقت حاضر طوالي

تماضر؟!

ايوة ي عمتي

انتِ راجلك صحى ولا لسسه نايم؟

نايم ي عمتي لسسه

خلاص تعالي جهزي ليهو الشاي وخلي النضمي.

ياسمين: امي وين ملابس سامر؟

في غرفتي لما اودي ليهو الشاي بجيبها ليك

لا خليها انا بمشي بجيبها منو.

❖

في غرفه سامر.

ياسمين بتدق الباب مرة ومرتين و 3 لما رد عليها ..

سامر، سامر انت نايم؟!

مشى وين دة شكلو طلع، كدة اشوف ملابسو الوسخانه دي خاتيها وين

"ياسمين بتقلب غرفه سامر م لاقيه فيها ملابس عايزة غسيل"

خلاص معناها خاتيهم في الدولاب، غايتو عليهو جنس همجيه في زول بخت ملابسو الوسخانه في الدولاب دة شنو دة،

ياسمين فتحت الدولاب وبعدين كملت ب..

برضو في الدولاب مافي، دة قميص واحد وشكلو نضيف،

شالت القميص واتلفتت يمين وشمال وطلعت على باب الغرفه م لقت زول قفلت الباب على خفيف ورجعت مسكت القميص و بقت حاضناه وبتشم في ريحتو وهي مغمضهه عيونها،

بعد فترة م طويله فجأة تسمع بصوت عالي بقول ليها:

ياسمين؟؟؟

كانت م بين واعيه وم واعيهه فتحت عيونها بخلعه وهي بتتلفت وبتقول بصوت بتمتم..

ت ت ت تماضر؟

تماضر كانت شايله صينيه الشاي وبتعاين لياسمين وهي مخلوعه وعلى وشها علامات استفهام مخلوطه بي إندهاش،

قالت ليها "دة شنو البتعملي فيهو دة ي بت انتي مجنونه؟؟ قبل م تخلص كلامها

فجأة ياسمين قالت..

س س سامر؟

تماضر اتلفتت مخلوعه فإذا بعيونها تقع على سامر وهو طالع من الحمام الداخلي وهو م لابس غير شورط وخاتي البشكير في رقبتو وبعاين ليهم مهجوم..

تماضر اتجهمت، اما ياسمين بقت واقفه زي المسمار المصلوب على الأرض تعابير وشها كانت في حاله م بتتفسر لا قادرة ترفع عينها منو ولا قادرة تبدي اي ردة فعل،

وسامر برضو كان في حاله إستغراب من وجودهم في الغرفه والطريقه البعاينو ليهو بيها هم ال 2

قال ليهم بإستغراب خير مالكم؟ صلح البشكير وغطى بيهو نفسو هو زاتو بقى في حاله خجل من الشكل الكان فيهو،

ياسمين في حاله صمت، اما تماطر قالت ليهو بصوت متقطع "عمتي قالت اوصل ليك الشاي وياسمين جات عشان تشيل منك الملابس العايزة غسيل، وقرصت ياسمين في يدها،

ياسمين بعد مسافه هزت ليهو راسها وهي متوترة

قال ليها اها صح هي م كتيرة بس لو غسيلك كتير خليها بوديها الغسال

فجأة ياسمين قالت ليهو بصوت عالي"لا خليها بغسلها اصلاً ملابسي م كتيرة وم وراي شي"

تماضر بتعاين ل ياسمين وهي مخلوعه ومستغربه في نفس الوقت م̷ِْن تناقض ياسمين..

مدخل تاني..

خلاص ي امي م تزعلي انا همشي مع ابوي

الما بزعلني شنو ي بتي؟ولد م مسؤول انا من امس منبهاهو انو مواعيد ابوهو في المستشفى الساعه 10 ضروري يجي يمشي معاهم هسي لغايه اللحظه قافل تلفونو وم معروف ليه اتجاه اسوي شنو انا في ولادة زي دي؟

امي عليك الله خلاص قلته ليك انا بمشي مع ابوي الموضوع انتهى م تكبريهو

لالا ي بتي م تمشي معي، انتِ عندك جامعه ومحاضرات م تفوتيها مع زحمه المواصلات دي بمشي برايي وبجي راجع،

ي ابوي ي حبيبي انا اصلاً اليوم م عندي محاضرات، عندي لاب بس وببدأ الساعه 12

لالا حتي لو الساعه 12 مع زحمه المواصلات دي م بتحصلي لو قلتِ توصليني وتاني تجي راجعه معي حتى ترجعي جامعتك

حسبي الله ونعم الوكيل فيك ي مهند

امي خلاص قلنا م تتحسبني عليهو؟!

م امي ولا شي خليني ادعي عليهو ابرد قلبي دة منو ومن قلة ادبو البسوي فيها دي

اصلاً ي امي مافي شي ضاريهو ومخليهو طايش كدة غير دعواتك عليهو دي ياخي

اسكتي ي شهد اسكتي وم تدافعي ليهو قدامي نهائي م تدافعي ليهو نهائي

م تهرشي البت ي مرة ذنبها شنو هي؟

بتدافع ليهو ي الصادق بتدافع ليهو انت كمان التاني م شايف؟

قلته ليها بنبره حادة هي ي امي دي شنو انت كمان التاني البتقوليها ليّۓ ابوي دي؟ ممنوع منعاً باتاً تهرشي ابوي لا قدامي ولا وراي فهمتي؟

ابوي: ه اها سامعه بتك محامي دفاع للبيت كلو م مهند بس

قلته ليهو عاين ي ابوي انت كمان انا حأمشي معاك تعمل الغسيل واطلع اركبك المواصلات وامشي انا على الجامعه وومنوع منعاً باتاً تعترض على كلامي دة فهمت؟

يلا انا ماشه اجهز اكوي ليك الجلابيه ولا اجهز ليك اللبسه الإشتراكيه؟

البتشوفيهو مناسب داك بس

حاضر يعسسل انت تأمر

ه الله يكملك بعقلك ي بت ابوها

الصادق نحن لازم نخت حد للولد دة ي الصادق، المسكينه دي اي شي بقت تعملو براها وانا العجل التعبت فيهو ومربياهو الدكان م بمشيهو لي

خلاص تمام لما يجي انا بتكلم معاهو

كلامك شن فايدتو وانت بتتكلم معاهو براحه ي الصادق عليك النبي اهرشو ولا اي حاجه لازم يبقى مسؤول انت براك شايف الحال النحن فيهو دة م بسر

بعد مرور 15 دقيقه..

خلاص ي امي نحن طالعين، ابوي جهزت ليك المويه ياها،

خلاص كويس ي بتي

بعد م وصلنا الباب امي بقت تنادي علي

شهد،

ايوة ي امي طبعاً كالعادة ي ابوي مرتك م بحلى ليها الكلام الا ونحن جمب الباب،

تعالي كدة،

ابيت ابيت ابيت م جايه نحن طالعين مع السلامه امح

م شلتي قروش للجامعه ي بت،

عندي باقي امبارح م كملتهم بوصلوني يلا باي

ي بت تعالي شيلي زيادة قروش الشارع م مضمون اسمعي الكلام، شهد، شهد، شهد ي بت...

ونحن في الشارع..

كان تسمعي كلام امك وتشيلي ليك قروش

شبكت يدي مع يدين ابوي وانا بقول ليه "ي ابوي اصلاً انا عندي باقي امس م كملتهم ولو شلتهم اكيد حأكملهم في حاجات تافهه ساي عارفه نفسي دنيه شديد ف شنو افضل م اشيلهم

قال ليّۓ م معروفه ظروف الشارع ي بتي شيلي للأحتياط

طيب دقيقه، دخلت يدي في جيبو طلعت لي عشرين قلته ليهو بتتجازف بي دي،

ضحك وقال لي العشرين دي مواصلات م بتركبك،

فجأة سمعنا صوت بقول:

حاج الصادق، اتلفتنا لقيناه عمو اسماعيل

ابوي قال ليهو او اسماعيل كيفك ياخي ومشينا سلمنا عليه، قال لي بت ابوها ازيك

قلت ليهو اهلين عمو تمام الحمدلله وانت؟

قال لي تمام الحمدلله على وين من الصباح كدة الليله؟

ابوي قال ليه والله ماشي على الغسيل كدة ودي قالت الا تمشي معي ومن هناك تمشي الجامعه قوة الراس تخليها لمنو ه

عمو اسماعيل قال ليه الله يرضى عليها ياخ الله يرضى عليها خلاص استنو دقيقة انا زاتي طالع مشوار كدة مع صخر ولدي بنوصلكم مكان المواصلات

ابوي قال ليهو لا لا ياخ م تتعبو نفسكم اقرب ركشه بتوصلنا الله يديك العافيه

عمو اسماعيل: ي زول حرم م بتركب ركشه معقوله ي حاج اسماعيل ياخ الحاله واحدة ونحن ناس جيران واخوان واهل وشارعنا واحد ولا م كدة ي شهد ي بتي؟

هزيت ليه راسي وابتسمت

جره الكرسي وقال لي ابوي اقعد لغايه م نطلع

صخر، ي صخر، عمو اسماعيل دخل على بيتو و"بقى ينادي"

بعد مسافه بابهم الكبير فتح وجات عربيه مظلله طالعه،

ابوي قال لي هسسي اخوك لو سمع الكلام ودخل العسكريه كان زي الزمن دة سايق عربيه زي صحبو دة لكن تقولي شنو ي بتي

قلته ليهو هو عسكري ولد عمو اسماعيل دة؟

قال لي ضابط في الجيش

قلته ليهو اها

فجأة عمو اسماعيل جا طالع وهو بنادي وبقول تعالو اقفلو الباب دة، ونادى علينا: حاج الصادق تعال ياخي

مشينا عليهم، فجأة باب العربيه فتح وطلع منها كائن لابس لبس الضباط ومكبس نظارتو، طلع نظارتو وجا سلم على ابوي كيفك ي عمي ان شاءالله بخير ياخي؟

قال ليهو تمام الحمدلله وانت ي ولدي كيفك وكيف الشغل معاك؟

قال ليهو الحمدلله تمام الا الجري الشديد بس ي عمي مخلينا مقصرين في حقكم والله

ابوي قال ليهو لا ياخي عافين ليك ي ولدي والله الدنيا كلها بقت جري ومشاغل،

بعدها قال لي شهد كيفك ان شاءالله طيبه؟

قلته ليهو اهلين تمام الحمدلله وانت؟

قال لي تمام والله الجامعه والقرايه كيف؟

قلته ليهو الحمدلله ماشي الحال

انتو حتقضوها سلام كدة اركبو ارح نكمل في الشارع سمح

عمو اسماعيل فجأة قال لينا كدة، ركبنا واتحركنا وبدت الونسه والمواضيع السياسيه والاجتماعيه وفلان مع فلان...الخ

شهد فضل ليك كم سنه من تخلصي؟

فجأة جاني الصوت دة من قدام وكان صوت صخر

اترددت في الرد بعدين قلته ليه بصوت خافض سنتين ان شاءالله،

قال لي ايوا لالا تمام بالتوفيق ان شاءالله،

قلته ليه ان شاءالله،

عمو اسماعيل فجأة قال ليهو خلاص نزلني هنا،

صخر وقف،

ابوي قال ليهو ونحن كمان ننزل معاك عشان النواصلات من هنا قريبه

صهر فجأة قال ليهو: لا ي عمي ياخي معقوله والله م بتنزلو الا تصلو مكان ماشين

ابوي قال ليهو لا والله ي ولدي نحن طريقنا م في طريقك نزلنا هنا بس

عمو اسماعيل: ي حاج الصادق ياخي خلي الحساسيات دي ياخي، صخر ي ولد هم ماشين المستشفى عمك دة ماشي يعمل جلسه الغسيل وصلهم معاك

ابوي قال ليهو لا والله ي اسماعي..

صخر: الموضوع دة منتهي وانا حلفته ي عمي م تناقش يلا ي ابوي اقفل الباب كويس

اتحركنا وابوي وصخر بيتكلمو لغايه م وصلنا المستشفى،

ابوي: شكراً ليك ي ولدي الله يديك العافيه ويرضى عليك دنيا واخرة

قلته ليه شكراً ليك

نزلنا فجأة هو نزل ورانا،

ابوي قال ليهو وين وين ي زول؟

صخر قال ليهو لو حاسبني ولدك م بتسألني السؤال دة تعال ي ابوي، مشينا على المستشفى دخلونا انا وابوي هو وقفوه طلع ليهم البطاقه،

❖

بتعب نفسياً لما اجي مع ابوي الغسيل، واحياناً في اطفال بكونو بغسلو ليهم واصوات البكى حقهم بتحفر في قلبي وبتوريني قدر شنو ابوي دة بعاني بس م ببين كدة،

قبل م يدخل قال لي امشي بعد كدة جامعتك، قلته ليهو لا حأستناك تطلع مش دة اتفاقي معاك قبل نطلع من البيت؟

قال لي ي بتي؟

قلته ليهه ابوي الله يرضى عليك يلا انا مستنياك

حضنتو واصلاً انا متعودة احضنو في كل مكان باسني في راسي مسافة وقال لي يلا،

بعد م دخل اتلفته لقيت صخر واقف بعاين لينا،

قال لي بغسل كم مرة؟

قلته ليه 3 مرات في الاسبوع،

قال لي طيب تعالي نشرب شاي على بال م يطلع لسسه حياخد وقت،

قلته ليه انت م محتاج تأجل شغلك يعني ممكن تمشي بالجد م قصرت

قال لي تعالي نشرب الشاي بدون نقاش وهعتبر نفسي م سمعت منك شي،

قلته ليه تمام طلعنا قعدنا جمب ست شاي كدة طلب لينا شاي وجاب بسكويت وبقينا ناخد وندي في الكلام لغايه م جا زمن ابوي رجعنا المستشفى،

ونحن طالعين ابوي قال ليهو تسلم ي ولدي كتر خيرك خلاص امشي علي شغلك،

ابوي كان واضح عليهو تعبان شديد ومرهق لأنو بعد كل جلسه بحصل ليه كدة بس كان برتاح حتى يجي بالمواصلات،

صخر قال ليهو عمي انا حأرجعك البيت اول حتى ..

قاطعناهو الاتنين مع بعض وقلنا ليهو لا والله بصوت واحد

قال لينا ي جماعه صلو على النبي

ابوي قال ليهو انا حلفتهه

صخر قال ليهو طيب ي عمي عشان حلفته حليفتك دي دقيقه، خلانا واقفين مشى لبتاع عربيه خاتي فوق علامه "تاكسي"

جابو وجا، قال لي ابوي اركب ي عمي

ابوي قال ليهو ي ولدي ..

صخر قال ليهو انت حلفت وانا حلفت يلا اركب فتح ليهو الباب

ابوي عاين لي وانا عاينت ليهو،

صخر فجأة قال ليهو م تخاف عليها انا بوصلها لغايه باب الجامعه م بفوتها شي

قلعته عيوني قلت ليهو لا انا..

قال لي بدون نقاش وقال ليّۓ ابوي يلا ي عمي اركب، ابوي ركب وصخر اتكلم مع بتاع العربيه وطلع قروش اداها ليهو، بعدها فتح لي باب العربيه القدام وقال لي مشينا وانا واقفه متصمغه في مكاني م حصل مرة ركبته عربيه مع زول براي وغريب، حتى ولو كنت بعرفو م حصل ابدا، ضرباتً قلبي زايدة ومتوترة بس ركبت، قفل الباب واتحركنا،

بقى يتونس معي وانا بالجلاله حتى اطلع كلمه لغايه م وصلنا على الحال دة...

نزلت وقفلته باب العربيه نزل القزاز وهو لابس نظارتو قال لي يلا، قلته ليه شكراً

فجأة اسمع صوت بنات وراي بقولو"عاد تمام الما عندها ضابط م تقابض

دخلته في ضفوري لأنو سمعهم شكلو بس قفل القزاز...

بعد دخلته البنات كانو وراي قالت ليهم عاينو ليها صحي حظ القبايح في السما لايح

بعد مرور 5 شهور...

اي ي الصادق، اها بقيت كيف؟ لو م كويس تعال راجع البيت ي راجل الشغل يطير مافي شغل ببقى بدون مروة، تعال وخلي الشغل الليله، م كويس قلته كلامك دة قبيل عليك الله اسمع الكلام..

احي الرصيد قطع كمان،

جيت م̷ِْن الجامعه وفجأة سمعت امي بتتكلم مع ابوي في التلفون

امي ابوي مالو؟

قالت ليّۓ جيتي متين انتي؟

ابوي مالو سألتك؟

كويس قال تعبان شويه بس وانا قلته ليهو تعال ارتاح خلي الشغل الليله لكن براك عارفه قوة راس ابوك فايتك بالصبر، عندك رصيد ارجع ليهو؟

خلاص ي ابوي منتهي انا جايه عليك هسي وبالمرة اظبط معاك الفطاير الغالطتني فيهم، امي م كلمتني ولا شي انا سمعتها بالصدفه بس

كيف يعني تعبان شويه م̷ِْن الصباح ي امي ومشى الشغل وخليتيهو عادي ؟، احي ي ابوي احي

ي بتي قلته ليك تعبان شويه بس وبراك عارفه ابوك

حتى ولو ي امي انتِ عافه مريض الكلى دة م بستحمل اقل شي م كان تخليهو يمشي الشغل يطير،

ي بتي

دقيقه اتصل عليهو تاني،

الوو؟ اي ي ابوي انت لييه م بتسمع الكلام ي ابوي؟ امي م كلمتني ولا شي سمعتها وهي بتتكلم معاك، هسسي انا جايه عليك، لا ي ابوي جايه مش الشغل دة انا بساعدك فيهو حتى لو بقيت كويس نخلص ونرجع البيت مع بعض يلا،

قال ليك شنوو؟

قال بقى كويس لكن انا ماشه عليهو ي امي ابوي دة لو م كويس بقول كويس انا عارفاه،

خلاص سمح ارتاحي شويه هسي جيتي من الجامعه، لالا ماشه انا بس اغير ملابسي دي واصلي المغرب وامشي عليهو،

طلعت من البيت والزمن متأخر وم لقيت مواصلات بسهوله وبتصل على ابوي تلفونو م بدخل معي، بعد وصلت

شارع النيل برج الاتصالات الساعه 8:30 Pm

اتفاجأ بمكان ابوي مكسسر والحاجات مرميه في الأرض وناس بتجي ماشه وبتتفرج ودخلت في حاله هستيريه وانا جاريه بقيت اسأل بصوت عالي في شنو وابوي وين؟

كل فطاير ابوي والكاتشب والمايونيز والمخلل والكشك بتاعه الصغير كلهم مرمين في الارض وانا بتلفت

فجأة جاني واحد من الشغالين في المحل الجمبو والناس بتتفرج علي قال لي جا بتاع عربيه م بعرف اظنو ساطل ولا مالو دخل فيهو ومشى،

قلته ليهو بهلع شنو؟ كيف يعني دخل فيهو ابوي وين هسي؟ ابوي كويس؟ قال لي روقي ابوك كويس ودوهو مستشفى... شويه رضوخ بس اظن، قلته ليهو رضوخ كيف يعني؟بقيت اقول ليهو بحاله م مفهومه ابوي بغسل كلى، ابوي عندو فشل كلوي كيف تدخل فيهو عربيه وهو اصلاً كان م كويس بقيت ماشه وم شايفه قدامي م عارفه قطعت الزلط كيف وركبته شنو لغايه م وصلته المستشفى، اتصلته عليه قبل م اصل اتكلمته معاه ابوي، ابوي وين انت كويس وانا ببكي،

صوتو كان تعبان، قال لي كويس ي بتي انا كويس انت وين؟

قلته ليهو انت الوين هسي جايه عليك انا، قال لي طالع من المستشفى، قلته ليهو لا م تطلع جايه عليك انا،

لما وصلتو وشوفت حالتو ملابسو فيها دم ورابطين ليه يدو بالشاش بقيت ابكي على حسي الطويل، كل الناس كانت بتتفرج على بكاي وهو ماسكني وبقول لي انا كويس ي بتي عايني ها، بقول ليهو لا ي ابوي م كويس كويس كيف وملابسك كلها دم كدة،

قال لي قزاز الكشك بس جرحني في يدي لكن انا كويس واقف بطولي عايني لي وانا لسه ببكي،

فجأة سمعت اصوات بتقول لي ابوك كويس م جاتو عوجه الدم دة عشان قزاز الكشك طار فيهو وجرحو لكن هو الحمدلله سليم والحمدلله جات على كدة بس، بعد مسافه رفعت راسي لقيتهم 3 واحد راجل كبير و 2 شباب،

قلته ليهم اي واحد فيكم ضرب ابوي؟

بقو يعاينو لبعض

ابوي قال لي ولا واحد فيهم، الدخل في الكشك م وقف اصلا، ً

قلت ليهو كيف يعني م وقف؟ ؟؟

الراجل قال لي ديل العواليق الأهلهم بدوهم العربات ساي ديل ورخصهم زاتها مشترنها اشترى ي بتي روح البني ادم عندهم ولا شي عندهم تأميناتهم وواسطاتهم

السايقه العربيه كانت بت م ولد انا جريت وراها بالموتر م لحقتها لكن شلت رقم العربيه "واحد من الاولاد قال الكلام دة "

قلته ليهم طيب ارح القسم،

قسم شنو ي بتي يعني كان مشينا القسم حنسوي شنوو؟ حيجيبوه من وين؟

قلته ليه ابوي دة حقك الزوله دي فوق م انها ضربتك وسببت ليك اذى جسيم ومشت عُاَدّيَيّ، الشرطه بتعرف تجيبها،

ي بتي شرطه شنوو البتعرف تجيبها

الراجل قال ليهو اسمع كلام بتك ي حاج البلاغ بحفظ ليك حقكك، الزوله دي مستهترة شديد

لالا ي جماعه خلاص الحصل حصل انا اصلاً تعبان من الرضوخ الفي جسمي دي ارح البيت عشان ارتاح شويه،

قلقت على ابوي لانو اصلاً قبل الحادث كان متوعك شويه واتجبرت اسمع كلامو واسوقو وامشي البيت بس كانت في نار بتغلي جواي من الزعل والضيق، ليهه يسكت، ليهه يمشي الموضوع عاادي بدون بلاغ، ليهه ليهه بس يعني ابوي دة لو كان حصلت ليهو حاجه؟ وشكل حاجات ابوي وهي مكسرة ومرميه في الارض بالطريقه ديك وكلام الراجل وهو بقول العملت كدة وقفت الشارع كلو وهي م وقف وبتاع الموتر وهو بقول جريت وراها وحاولت اوقفها بس هي كانت بتتسابق معي عديل وم اتهزت فيها شعرة وم وقفت و...الخ

كل الكلام دة كان في راسي وانا خلقه كدة زوله دمي حار وم برضى الحقارة في الغريب حتى م بالكم ابوي

اليوم التاني الصباح صحيت الصباح بدري جهزت الشاي وغسلت العدة وقلت لي امي انتي جهزي الفطور لي ابوي انا بفتح مكان الخضارر..

طبعاً ابوي اصلاً جزار بمشي بضبح في السلخانات وكدة كان لَگِن لظروف مرضو وكدةْ خلاها وفتح ليهو مكان خضار قدام البيت ببيع فيهو خضار وعندو جزارة لحمه صغيرة قدام بابنا عشان هو عيان وم بتحمل وامي بتساعدو في الشغل اضافه للكشك بتاعو بتاع الاقاشي في شارع النيل مرة مرة لما يضوق طعم العافيه بمشي بشتغل فيهو.

قلته لي امي بما انو اليوم مافي لحمه انا بفتح وببيع للناس وانتِ خليك مع ابوي،

قالت لي عارفه ابوك م برضى حاجه زي دي ولا برضى وقفتك في الشارع قدام مكان الخدار بشاكل، وبعدين م عندك جامعه اليوم؟

قلته ليها هسي لْۆ كان مهند برضى ولا لٱ، بس اليعتبرني مهند، +لالا م شغاله جامعه، انتِ خليك مع ابوي عشان يمكن يحتاج حاجه وانت براك عارفه انو م بطلب مني اعمل حاجه زيك وكدة،

قالت لي كويس

طلعت فتحته المكان ورصيت الخضار زين وبقيت ببيع للبجي بشتري وفي نفس الوقت مراقبه الشارع،

فجأة شفت باب ناس عمو اسماعيل بفتح،

صخر طالع صلحته طرحتي وعبايتي وهم قصادنا طبعا، نزلً قفل الباب حق الشارع، شافني رفع لي يدو

طوالي قمت مشيت عليه قلته ليه كيفك؟

رد علي بإستغراب قال لي تمام الحمدلله وانتِ؟

قلته ليهو الحمدلله وانا مشبكة صوابعي في بعض وبضغط فيهم بقى يعاين لي هو ضابط يعني اكيد فاهم اني م طبيعيه

قال لي انتِ كويسه؟

هزيت ليهو راسي

قال لي خير ان شاءالله في شنو؟

اتلفت يمين وشمال قلته ليهو عايزاك تساعدني في حاجه ممكن؟

قال لي اتفضلي ي شهد من غير ممكن دي

بقيت اتلفت،

قال لي قولي في شنو

قلته ليهو امس اثناء م ابوي شغال في الكشك بتاعو في شارع النيل جات واحدة سايقه عربيه دخلت فيهو بالعربيه

قال لي ي ساتر متين الكلام دة وهسسي عمي كيف ان شاءالله م جاتو عوجه

دموعي جات جاريه قلته ليهو هو بقول انو كويس بس م كويس لما وصلتو في المستشفى كانت ملابسو فيها دم بس قال انو دة قزاز الكشك جرحو، ورفض يعمل بلاغ عشان قال ماف فايدة لأنو الضربتو اساساً م وقفت، وامس بالليل ابوي م نام والله العظيم ي صخر الليل كلو بتنهد وامي بتعمل ليه في المكمدات وجسمو وارم قال دي رضوخ عاديه بتروح بالمكمدات عادي، م حأقدر اقنعو يفتح بلاغ ولا بي اي شي لأني سمعتو قال لي امي م تتكلمي في موضوع الحادث دة قضاء وقدر وانتهى م تجيبو سيرتو قدام شهد، عايز يمشي الموضوع عادي وم نايم للصباح انا خايفه عليهو شديد تكون حاصله ليهو حاجه زي م انت عارف ابوي بعمل غسيل وم بستحمل اي شي

قال لي طيب ي شهد روقي كدة براحه وقولي لي وين كان الحادث بالضبط عشان نشوف اذا في كاميرات مراقبه في الموقع نستعين بيها ونجيب الزوله دي، اما عمي م تخافي عليهو دي اجراءات قانونيه حتتعمل،

اما عمي هسي انا بمشي عليهو بقنعو و بسوقو بوديهو المستشفى اعمل ليهو فحوصات عامه اي خدش حصل ليهو بسبب الحادث بتتحمل مسؤليتو هي ان شاءالله بنجيبها بنجيبها

قلته ليهو بس ابوي م حيمشي معاك ولا حيسمع الكلام انا م سمع كلامي، قال لي خليهو علي انا بقنعو انتِ م تبكي وم تشيلي هم تعالي معي،

مشيت وراه على بيتنا قلته ليهو وبرضو في واحد بتاع موتر كان مع ابوي في المستشفى قال لحقها بس م قدر يوقفها لكن شال رقم العربيه

قال لي طيب معناها دي م عايزة اتنين تلاته لوحه العربيه دي ناس المرور بجيبوها وين الزول دة شلتي رقمو؟ قلته ليهو اي واداني رقم العربيه زاتها،

قال لي كم؟

فتحته تلفوني وقلته ليهو دة، شال تلفوني وبقى يعاين فيه مسافه قال لي دقيقه، طال تلفونو واتصال مكالمه:

ي ايمن كيفك ان شاءالله تمام، صباح النور ياخي، اسمعني عايزك في مصلحه ضروري هسي، حبيبي عارفك م بتقصر عندي عربيه دخلت ليها في محل والسايقة العربيه كانت بت وم وقفت، والزول العملت فيهو كدة دة قريبي وفي مقام ابوي عديل م عندي زمن للإجراءات وجرجرتها عايزك هسي تجيب لي الزوله دي، برسل ليك رقم لوحه العربيه في الواتسب، تمام يلا سلام.

قال لي ساعات بتكون قدامنا م تخافي زي م قلت ليك هسي كدة ارح على عمي دة،

دخلنا على ابوي، وبعد نقاشات طويله عريضه ومحاولات إقناع وافق يمشي المستشفى، وفعلاً مشينا وعملنا الفحوصات طلعت في مضاعفات حاصله والرضوخ مورمة الجسم شديد، قالو لينا م ينفع نخرجو الا بعد 72 ساعه، هنا خلاص هبطتهه شديد بقيت اقول للدكتور ابوي مالو حاصله ليهو حاجه؟ ليه تخرجوه الا بعد 72 ساعه هو م كويس صح؟

قال لي لا بس عشان حسب التقارير ابوك مريض فشل كلوي حنخليه تحت المراقبه 72 ساعه تجنباً لي اي مضاعفات خصوصاً اننا شايفين في ورم في الجسم عايزين نتأكد انو الورم دة بسبب الحادث م بسبب الكلى فهمتي؟

طيب ممكن اشوفو؟

ايوة ممكن اتفضلي،

دخلته عليه وهو راقد بعاين لي، قلته ليهو شايف دة عدم سمعان الكلام ي ابوي لو بتسمع كلامي م بحصل ليك كدة، هسي لو حصلت ليك حاجه؟

قال لي وهو مبتسم هو في زول عندو بت راسها قوي زيك كدة بتجيهو عوجه؟

قولته ليهو ربع البرود البتتعامل بيهو دة بس ي ابوي •اللّہ̣̥ يديني ربعو بس، فجأة سمعنا صوت بقول: سلام عليكم

اتلفت لقيتو صخر ومهند اخوي

ابوي قال ليهم اهلاً ي اولادي،

صخر قال ليهو بقيت كيف ي عمي ان شاءالله احسن؟

ابوي قال ليهو الحمدلله،

مهند قال لينا وين امي؟

قلته ليهو مشت تصلي

قلته ليهم اتفضلو حأمشي اجيب مويه، صخر قال لي لا م يحتاج، طلعت برة لحقني قال لي شهد

قلته ليهو ايوة،

قال لي البلاغ اتفتح وجابو سيد العربيه بس طلع شاب م بت

قلته ليهو كيف يعني؟اكيد سيد الموتر م حيكذب في حاجه زي دي،

قال لي يمكن لحق زول غلط او لخبط في العربات،

بقيت اعاين ليهو بكسرة نفس

قال لي انتِ مش عندك رقمو؟

قلته ليهو اي،

قال لي اديني ليهو انا بتفاهم معاهو،

بالفعل اديتو الرقم وطلع مشى،

لما رجعت الغرفه ابوي قال لي م لقو حاجه صح؟

سكت، مهند قال ليهو العربيه طلع سايقها ولد م بت والولد قال م عندو اي علاقه بالحادث ولا اليوم داك شاف شارع النيل بي عينو بتاع الموتر اتوهمن فيكم ساي، واصلا حاجات زي دي بتحصل عادي

قولته ليه عادي؟ يعني عربيه تضرب زول وتمشي عادي؟ يعني لو ابوي دة حصل ليهو شي عادي ولا الكشك التعب واتدين قروش عشان يعملو اتكسر بالطريقه دي عادي العادي شنو قول لي ي مهند لا احساس لا ضمير؟

بقى يعاين لي قال لي انتِ هاميك الكشك عشان دافعه فيهو؟

ابوي قال ليهو مهند "بنهرة كدة"

قلته ليهو م حأتناقش معاك لأنو النقاش معاك عقيم

قال لي م داير معاك قلة ادب بقوم هسي بلطشك في المكان دة

قلته ليهو جداً قوم يلا

قام عايز يضربني ابوي قام على حيلو وهو برجف قال ليهو ي ولد ولزاهو قال ليهو يلا اطلع برة،

امي كان حيلو كلو برجف امي جات داخله قالت لينا بسم الله في شنو، مهند مسكتو من يدو اتفك منها بكل قوتو ولزاها ومشى امي الا مسكت في السرير كانت حتقع،

مسكت ابوي رقدتو وجبته ليهو مويه وهو لسسه جسمو كلو برجف، قال لي طلعوني من المكان دة رجعوني البيت، م تقعدوني في مستشفى

قلته ليهو معليش ي ابوي انا غلطانه، م مفروض اتناقش معاه في مكان زي دة،

قال لي غلطانين نحن الولدنا وم عرفنا نربي لبسيني جزمتي دي رجعوني البيت شن فايدة الحياة وفيها ولادة زي دي ولد م عندو اي فايدة جاي زيادة عدد في الدنيا دي، قلته ليهو م تقول كدة ي ابوي خلاص م بتكلم معاه تاني عليك الله خلاص م تزعل ي ابوي انت م سامع الدكتور قال لازم تتم 72 ساعه في المستشفى

قال لي ي بت قلته ليك رجعوني البيت الموت دة واحد واليوم كان تم الواحد بموت حادث ولا غيرو، عيشه زي دي زاتها اخير منها الموت، يومي غسيل، يومي مستشفى، الجسم دة اتهلك خلاص زاتو

الكلام دة خلاني اعرف قدر شنو ابوي تعبان من الغسيل وكاتم جواهو وهسي اتفشش بموضوع نقاشي انا ومهند

قعدته ليه جمب رجولو وبكيت قلته ليهو عليك الله ي ابوي اسمع كلام الدكتور قال 3 ايام بس عليك الله عليك الله وبقيت ابكي،

❖

اليوم التاني الصباح اتصل علي صخر، قال لي انا جاي المستشفى ومعي والدتك، منها اشوف عمي ومنها اسوقك معي القسم، قلته ليهو في شنو؟

قال لي لما اجي بحكي ليك،

فضلته قاعدة على اعصابي لغايه م جو، سلم على ابوي وانا طلعته معاه قلته ليه الحاصل شنو؟

قال لي بتاع الموتر فعلاً كلامو صح السايقة بت، بتاع العربيه جرجرناه وبعد تعب اعترف انو اليوم داك كان مؤجرها لي بت وهو خاف يعترف بالحقيقية في البدايه،

قلته ليه طيب اداكم معلومات عنها او اي حاجه؟

قال لي هسي ضربو لي قالو هي موجودة في القسم لسسه م مشيت عليهم تمشي معي؟

قلته ليه طيب يلا

بعد م اتحركنا جاتو مكالمه رد وقال:

ايوة ي مهند وصلته؟ خلاص تمام م بعيدين منك نص ساعه بس،

قلته ليهو مهند جاي؟

قال لي اي كلمتو قبل م نطلع من البيت، قلته ليهو ليه هو م كان في البيت؟

قال لي لا حسب كلام امك م بايت في البيت،

قلت بصوت خافت يعني مخلي امي تبيت براها في البيت ..

قال لي نعم؟

قلت ليه لا م قلت شي،

وصلنا القسم اول م نزلنا ماف زول م سلم عليهو لغايه م دخلنا لقينا مهند منتظر سلم علينا وقال لي انتِ الجابك شنو خليتي امي وابوي براهم؟

م رديت عليه،

صخر قال لينا كدة خليكم هنا بجي عليكم هسي،

بعد مسافه جا طالع قال لي استجوبوها واي شي بس منتظرين اهلها يجو،

قلته ليهو يجو لشنو؟ حيضمنوها وكدة يعني؟

سكت مسافه بعدها قال لي كدة بس نشوف البحصل شنو،

بعد نص ساعه صخر طلع من غرفه وطلع وراهو ولد وبت بتبكي والولد المعاها بتكلم معاها بغضب وهي بتقول ليه "والله العظيم كانت غلطه مني بس وانا خفته م عرفته اعمل شنو اقيف ولا اجري في اللحظه ديك وم لقيت نفسي غير وانا جاريه والله العظيم دة كل الحصل، وبتبكى بصوت عالي وماسكه في الولد وهو غضبان،

صخر جا علينا وقال لينا دي هي ودة اخوها،

وقفته عايزة امشي عليها، صخر قال لي شهد م تمشي نحن ننتظر عمي يطلع من المستشفى الأول حتى، هسي البلاغ فاتح والزوله دي اعترفت وقالت هي م وقفت عشان خافت بس حسب كلامها واظن هم قالو مستعدين لي اي تسويه ماديه

مهند على طول وقف وقال ليهو هم قالو كدة؟

صخر عاين ليهو وانا برضو

عاينته ليهو بغيظ وقرف وقلته لي صخر هي لو عايزة تسويه وديه كانت وقفت، تسويه شنو؟ دقيقة، اتخطيتهم ومشيت على البت واخوها قلته ليها انتِ بتبكي عشان جرجروك وجابوك القسم ما بالك بالضربتيهو وخليتي دمو جاري وكسرتي حاجاتو ومشيتي؟ خوف شنو البخليك تستبيحي روح بني ادم عادي كدة بدون تأنيب ضمير؟ بتسوقي ليه اساساً لما م عندك علاقه بالسواقه؟ وبعد دة كلو فاتحه نفسك وعايزة تسويه بكل بساطه كدة إنتِ والمعاك وقحين على فكرة،

الولد اتلفت علي وقال لي معليش ومعاك حق ي بت الناس وهي غلطانه من هسي لي بكرة غلطانه شديد والعملتو دة اتجاوز حدود المعقول حتى بس برضو معليش الغلط في كل شي وارد وكل شي بتحل بالهداوة

قلته ليه ي استاذ، الغلط وارد وكل شي بتحل بالهداوة دي تقولها لما اختك تضرب ليها حمار او غنمايه في طريقها وتعتقلها منظمة حقوق الحيوان، اما دي دخلت ليها في محل بني ادم وسببت ليهو ضرر جسيم غير الضرر العندو واتخطتو بكل بساطه وم رف ليها جفن علشان تقيف وم راجعت نفسها ولا اعترفت الا بعد م قبضوها يعني لو م بتاع الموتر شال رقم لوحه العربيه ولو م بتاع العربيه اعترف انها مأجراها وقبضوها وجرجروها م كانت اعترفت اختك ولا ضميرها انبها، يعني روح البني ادم الضربتها دي ولا شي تموت ولا تفطس انت مستوعب دة كلو وجاي تقول تسويهه انت مجنون ولا دي وقاحهه منك؟

؟؟

صخر ومهند جو وقفو مهند قال لي شهد "بصوت حاد"

قلته ليهو ابوي مرمي في المستشفى جسمو كلو مورم والدكتور خاتيه تحت المراقبه 73 ساعه واصلاً هو زول مريض كلى يعني اقل شي ممكن يأثر عليه، هل لو حصلت ليهو حاجه بتقدرو تتحملو مسؤليتها ولا ساي؟

مهند جراني من يدي وقال لي احسن تقفلي عشان نقدر نتفاهم مع الناس ديل ولا اللطشك كف؟ قلته ليهو نتفاهم؟ يعني انت جاي هنا علشان تتفاهم؟؟

"خليها ي باشا معقوله ياخي تمد يدك على بت خليك من انها اختك زاتها عيب يااخي عيب الكلام دة ي حبوب +انا متفهم موقفها وصراحه معاها حق انا زاتي لو في مكانها م بقدر اضمن التصرف الممكن اقدر اتصرفو قدام زوله عملت عمله زي دي ف شنو م عليها عتب او لوم ردة فعلها طبيعيه جدا، ً وصراحه اكتر اختي غلطت يعني دي م فيها نقاش...

فجأة اخو البت اتدخل و

قبل م يكمل كلامو تلفونو ضرب، رد وقال ..

الو!! اي وصلته ولا لسسه، يعني ماف طريقه تصل، اي معاها هسي ايي انا زاتي قلت كدة ماف داعي للجرجرة، بعدها مشى بعيد مننا اتكلم مسافه وجا راجع وهو بتكلم وبقول طيب تمام بشوفهم وبديك تلفون، تمام

لسه م وصل قال ليك هو وين؟ اختو سألتو السؤال دهه وهي بتبكي

الولد عاين ليها ورجع كمل كلامو وقال:

ونحن معاكم في اي شي لو عايزين تحركو البلاغ وتوصلو المحكمه وتتحاكم والقانون ياخد مجراه او عايزين نحلها ودياً نحن مستعدين نتكفل بي اي خسارة سببتها ليكم واتحمل كل تكاليف المستشفى والله ودي ابسط حاجه ممكن نعملها واسفين جداً للحصل دة

صخر قال ليهو القصة م قصة قروش وتكاليف انت فهمت غلط ي ولدنا، تصرف اختك في حد زاتو غلط شديد وممكن كان الزول دة يموت عديل لو م عندو باقي عمر وهي اتخطتو وكملت طريقها على طول انا بقول افضل القانون ياخد مجراه في الحاله دي، قال كلامو دة وعاين لي

الولد عاين ليّۓ اختو وقال ليهو دة رأي انا برضو ي سعادتك انو القانون ياخد مجراه ودة الأفضل للطرفين برضو

ملهم كيف بتقول دة الافضل ي ملهم، دة م الافضل، ملهم انتو عارفين بابا واحمد لو عرفو حيكسرو رقبتي ي مُلهم

البت فجأة بقت تبكي وتتكلم مع اخوها بصورة هستيريه وخوف كدة ورجفان

اخوها قال ليها دامك عارفه كدة البخليك تتصرفي كدة شنو قولي لي مليون مرة حذرتك ي يسرا م بتسمعي الكلام انتِ يعملو ليك شنو؟

،

اخر مرة، والله بسمع الكلام اخر مرة عليك الله ياخي شوفو حل قبل م الموضوع يصل البيت ابوي حيحميني الطلعه من الغرفه حتى انت عارف كدة صح

بقينا نعاين ليهم وهم بتناقشو بعدها شالت منو التلفون وعملت مكالمه وبقت تتكلم وتبكي

طلعنا خليناهم في القسم مهند قال عندو شغل ماشي بكل برود بدون م يقول ليّۓ هترجعي كيف ولا اي شي، صخر قال لي يلا نمشي، صخر وداني المستشفى لقينا ابوي معاهو عمو اسماعيل اصواتهم كانت واصله اخر الممر ضحك وونسه،

في جانب تاني..

ايوة انا عارفه نفسي غلطانه واوعدك تاني م حيتكرر الغلط دة اوعدك والله

اسكتي ي يسرا في اللحظه دي م تفتحي خشمك احسن تمام؟

خليني اشوف البحصل كدة

الوو ي سعد كيفك ياخي عايزك في موضوع تمام

❖

اليوم التاني كان عندي جامعه ومحاضرات مهمة لازم احضرها، مشيت الجامعه وانا في طريق الرجعه جاتني مكالمه ..

الو ابوي كيفك؟

انا امك ي بت م ابوك

ايوة ي امي كيف تمام؟

تمام الحمدلله وين انتِ في البيت؟

لالا طلعت من الجامعه جايه عليكم

لالا م تجي، اسمعي كلامي امشي البيت ارتاحي انا هسي مع ابوك بجي بعدين وبخلي معاهو مهند اصلاً بكرة قالو بخرجوه امشي ارتاحي في البيت،

ي امي خلاص انا بجي ونرجع مع بعض بس،

لالا م تجي قلت ليك خسارة قروش ساي م انتِ الصباح كنتِ معاهو كفايه امشي البيت اسمعي الكلام قلت ليك ي بت،

الو، الو، ي بت، الو،

ي بت سامعاني

الو ي امي م سامعاك

الو، قفلته الخط

شهد انتِ بتاعه حركات والله

تخيلي م عايزاني امشي اشوف ابوي امي بتاعه الحركات والله م انا

خلاص ي شهد انا بنزل معاك المستشفى اسلم على ابوك واطلع بيتنا اصلاً م بعيد

طيب حلو ارح على طول لاقياك وين انا تنورينا

شهد قبل م ندخل عليهم في مصلى هنا ولا استراحه نصلي فيها المغرب؟

فجر وقفتني وقالت لي كدة..

قلته ليها ايوة في..

فجر: خلاص ارح نصلي علشان المغرب م يفوت علينا وبعدها نطلع عليهم

طيب تمام يلا ارح

كانت معي صحبتي الوحيدة فجر، لما وصلنا المستشفى كان وقت اذان المغرب، م مشينا على ناس ابوي على طول، دخلنا مصلى المستشفى صلينا وغيم ظبطت نفسها حتى طلعنا الطابق الهم موجودين فيهو، في صاله الإستقبال فجأة عيني وقعت على مهند وهو واقف مع واحد، الولد كان بتكلم مع مهند وخاتي يدو في كتفو، فجأة واحدة من الفي الإستقبال أشرت عليهم على طول الولد خلى مهند ومشى عليها مدت ليهو ورقه وبقى يتكلم معاها مسافه دخل يدو في جيبو طلع حاجه مداها ليها،

فجر: مالك ي بت وقفتي؟

قلته ليها ماف شي

مهند اتفاجأ لما شافني واقفه وبعاين ليهو وبعاين للولد لأني عارفه مهند والأشكال البعرفهم وبصاحبهم ومألوفين عندي ودة ابداً م النوع البعرفو مهند،

الغريبه انو من دون الأيام سلم علي بحرارة كدة، قلته لي فجر دة مهند اخوي، وسلم على فجر بطريقه حلوة وقال لينا اتفضلو، اتفضلو، بقيت اعاين ليه بإستغراب مالو ي ربي م طبيعي مبسوط كدة، وصلنا غرفه ابوي اتفاجأ بالولد الكان في القسم واختو الضربت ابوي في الغرفه ومعاهم واحد تالت

امي لما شافتني اتخلعت وبقت تعاين لي، وابوي برضو شويه اتهجم و بقى يعاين لي بإستغراب، بقيت بعاين ليهم ورجعت اتلفت لقيت ابوي بعاين لي،

امي قالت لي بصوت متردد "اهلاً جيتي ان شاءالله م تعبتي في المواصلات"

ابوي قال لي اهلاً ي بتي امسيتي كيف

سكتت مسافه حتى قلته ليهم بنبرة حادة والله انا تمام انتو كيفكم؟

سكتو،

امي قالت لي م بتسلمي للضيوف؟