الفصل الثالث
بسم الله الرحمن الرحيم
قبل نبدأ في قراءة الرواية حابة اقول انه الرواية دي قيد الكتابة .. يعني ان شاء الله اول ما الكاتبة تنزل بارت انا بانزل ..
قراءة ممتعة
اليوم التاني رجعنا البيت واصلي م قاعدة اتكلم مع زول لا امي لا ابوي رغم انهم بحاولو بس م قاعدة اتكلم معاهم والأكل الا بالغصب ابوي لما يجي وقت الاكل بقول لي انا م حأكل لو م جيتي اكلتي بشيل صينيتو وبجي بياكل معي في الغرفه، واحياناً بجي داخل علي في الغرفه بشيل شيتي وبعمل نفسي بقرا بشيل مِڼّي الشيت وبقول لي عصري لي رجولي وسمعي الكنتِ بتقري فيهو دة سريع دة كلو علشان يخلق معي موضوع
بس انا اتماديت عديل في تصرفاتي بقيت بس زول بجي داخل البيت بنوم وبطلع الجامعه، ومقفوله في غرفتي بس م بتخطى حدودها،
ابوي يوم وانا طالعه الجامعه قال لي الشاي تعالي اشربي، قلته ليه م عايزة،
قال لي من متين بتطلعي الجامعه من غير م تشربي الشاي؟ سكتت عايزة امشي، امي قالت لي اقيفي هنا م تتحركي من مكانك دة "نبرتها كانت حادة "
وقفت، قالت لي انتِ يعملو ليك شنو يعني اكتر من كدة؟
ابوي قال ليها يااا..
قالت ليهو انت اسكت ماف شي خارب طبعها ومخليها قليله ادب كدة غير دلعك ليها دة،
قله ادب؟ يعني انا قليله ادب؟
كملت كلامها ب "يعني شنو لو اخوك ضربك م انتِ كمان م قصرتي منو قدام الناس العملتيهو دة في واحدة عاقله وواعيه بتعملو لي اخوها قدام الناس؟ دي ياها تربيتك الربيناك ليها ودة ياهو تعبنا في تعليمك ودي اخرة جزانا؟
كنت واقفه مصدمه بعاين في امي كلامها كان كأنها بتحاسبني، دموعي جات جاريه
ابوي قال ليها بي نهرة "خلاص م تكتري كلام في البت وانتِ كمان هاك امسكي القروش دي وامشي جامعتك "
قلته ليهم اساساً انتو م حاسبني واحدة من البيت دة ولا حاسبني بتكم عشان كدة كنتو عايزين تتفقو اتفاقكم انتو والناس وولدكم وانا عايزني ارجع البيت عشان رأي م مهم اساساً يلا علشان كدة انا بقعد في البيت دة زي زي اي حيطه ولا جك م بسألكم م̷ِْن شي ولا بتدخل في مواضيعكم وم تحسبوني قاعدة معاكم اساسا، قلتً الكلام دة وطلعته مشيت وانا ببكي،
شايفه؟ انتِ وولدك كدة مرتاحين؟ يعني فوق م ولدك غلطان وضاربها جايه تغلطيها انتِ برضو؟ شوفي ي مرة هوووووي 1+1=2 دايرة تعملي لي زي امور ولدك دي انتو الاتنين تتفضلو تتطلعو لي من البيت دة، لو بالغلط ساااي شفتك بتفضلي ولدك على البت دي زي م بيعملو اخواتك واهلك م تلومي الا نفسك، امور الفرز البعملوها ليها اهلك دي اوعى تعمليها ليها عشان م تخليني اتصرف معاك زيهم، وهو ولدك شن فايدتو و نفعو هو كمان لمن بتدافعي ليهو كدة خلي يبقى راجل مع الرجال اول الهوان
اليوم كلو عديتو بكى في الجامعه، لما فتحت التلفون لقيت مكالمات كتيرة من ابوي م رجعت ليهو
كنا في محاضرة اول م الدكتور طلع فجأة في ولد جا داخل شال المايك وقال شباب لو سمحتو في واحدة هنا اسمها شهد؟
بقو اتلفتو،
شهد الصادق ي شباب في هنا؟
تاني كرر ليهم السؤال قال ليهم موجودة شهد الصادق، بقيت اعاين ليهو، فجر قالت لي الزول دة قاصدك انت اظن ماف شهد غيرك ِ، بعدها قالت ليهو ااايوة ياها شهد،
قال لي انت؟ هزيت ليهو راسي بإستغراب كدة، قال لي طيب تعالي اذا ممكن،
بقيت اعاين ليه وانا ساكته، فجر قالت ليهو في شنووو؟
قال ليها في زول منتظرها برة بالساعات ي ريت تطلع عليه،
فجر قالت لي منوو؟منتظرة زول انتِ؟
قلته ليها لا ابداً
قالت ليّۓ يبقى منو يكون ود جيرانكم الضابط داك جاك زيارة وبعلي حتلاقي بخلقتك دي
قلته ليها بنفاذ صبر م عارفه ي فجر م عارفه و شلت شنطتي وطلعته ورا الولد وفجر وراي، طلعته برة كانت المفاجأة انو الكان منتظر ابوي
قلته ليهو بحيرة ابوي؟؟ مشيت عليهو بسرعه و كان باين عليهو التعب،
الولد قال ليهو دي هي ي عمي؟
ابوي قال ليهو اي ي ولدي شكراً ليك الله يديك الصحه والعافيه،
قال ليهو العفووو ي عمي دة الواجب وقفتك في الشمس دي كلها نحن الصغار ديل م بنقدر نستحملها والله ي عمي يااخي ادارة الجامعه زاتها مصعبه موضوع الدخول دة شديد،
م مشكله ي ولدي حصل خير
ابوي؟ جيت متين انت ولشنوووو؟
قال لي م بتقولي لي اتفضل؟
فجر: عمو كيفك؟
اهلاً ي بتي كيفك
فجر: تمام بشوفتك دي والله
قال ليها امها م تسمعك بس
فجر وابوي بقو يضحكو وبعدها فجر قالت ليهو م تخاف بعمل حسابي قدامها
قلته ليهو تعال ي ابوي نقعد هنا، قعدنا فجر قالت لي دقايق ي شهد وجايه،
بعد مشت ابوي قال لي المبروكه الفنجريه الزعلانهه!!
عاينت لييهه م̷ِْن سكات
قال لي انا كم مرة قلته ليك امك واخوك ديل م تشتغلي بيهم وبكلامهم بالذات اخوك دة اصلاً م محسوب مع الواعين، وم محسوب زول زاتو
سكتت وشبكت صوابعي ببعض
قال لي اسي كلامك القبيل قلتيهو دة صح؟ كان تعايني لي انا دة بس خليهم هم
قلته ليهو ابوي انت جاي من البيت للجامعه عشان تقول لي كلامك دة؟
قال لي اها اسوي شنو لي زول بقول انتو م حاسبني بتكم وببكي وبطلع؟
بقيت اعاين ليهو قلته ليهو برضو م سبب يخليك تتعب نفسك وتجي المسافه دي كلها انت براك عارف نفسك، كان تنتظرني لمن اجي ي ابوي،
قال لي وطلعتك بدون قروش دي شنو تتتصرفي كيف وترجعي كيف؟
فجر جات شايله مويه وعصير وقالت ليهو اتفضل ي عمو...
يعني رغم معاناتو ومرضو خلى كل شي على جنب وجا عشاني، علشان يراضيني وم يخليني زعلانه، حقيقي صدق القال "كل فتاة بأبيها مُغرمه"لأني فعلاً كدة
قضينا احلى يوم معاه مسك بينا زمن وحكى لينا قصص وطلعنا مشينا السوق المركزي لناس الخضار البتعامل معاهم ورجعنا البيت مع بعض وانا رضيانهه ومبسوطهه حتى امي استغربت لما جينا داخلين عليها بنضحك وبنتونس قالت لينا الجن ولا النفسيات، ابوي عاين ليّۓ وعمل ليّۓ حركه بي بي وشو نظام م تشتغلي بيها، دخلت الغرفه لقيت حاجات في سريري، رفعتهم لقيتهم جلباب وبجامه وشبشب بيت وطرحتين ومعاهم هيد بان حق شعر، شلتهم وطلعته لقيتها بتسوي ليّۓ ابوي في الجبنه، قلته ليها امي ديل حقات منوووو؟
ادتني ضهرها وقالت ليّۓ بنبرة جادة "في لمه الجبنه جات الدلاليه شايلاهم وشلتهم ليك منها اها في شنو تاني؟ابوي ضحك، مسكتها وبقيت ببوس فيها وبقول ليها بحبك يعسل، بحبك يعسل، وهي بتقول لي ي بت بطلي جنك دة، خلاص كفايه، ي بت، الصادق امسك بتك دي
❖
يوم وانا جايه داخله من الجامعه سمعت امي بتقول: تراضي اختك ولو م راضيتها انا زاتي م عافيه ليك زي ابوك م قال ليك، تعبنا من قله ادبك واساليبك لو م هي والله نحن نشقى في الدنيا دي بقت لينا البت والولد وانت قاعد لينا زي الإبريق،
مهند: انا زاتي ماف شي مكرهني ومعكسها علي في الدنيا دي غيركم، يوم متين عملت ليكم شي عجبكم؟ دايماً شهد فعلت، شهد تركت، طيب طالما شايفنها باقيه ليكم بت وولد مُعزبني معاكم مالكم خلوها تبقى ليكم الولد الانتو دايرنو وخلوني انا في قرفي دة، انتو اهل ياااخي انتو اهل
الكلام كان واقع على مسامعي زي الصاقعه، مهند كان بتكلم مع امي بأعلى صوت وبكل قلة الادب الفي الدنيا م اظن في زول واعي بتكلم مع امو كدة،
لو دخلت كنت عارفه اني هعقد الموضوع اكتر خصوصاً انو مهند مشكلتو معي انا اكتر زي م واضح في كلامو، رجعت الشارع لاقيت صخر داخل على بيتهم،
سلمته عليه جا قال لي معليش اليومين دي شويه انقطعت منكم عمي كيف؟ قلته ليهو الحمدلله
قال لي وانتِ كيفك؟
قلته ليهو انا تمام الحمدلله
قال لي عِن.̷̷̸̷̐ديّ كم يوم عايز اتصل عليك بس كل مرة بقول لنفسي م ازعجك وكدة،
قلته ليهو بنبرة استغراب خير في حاجه؟
عاين لي كأنو مخلوع وقال ليّ لٱ بس قلت اسأل واشوفكم كيف وكدة
م عرفت اقول ليهو شنو وم حابه احرجو لانو انا تلفوني دة م قاعد يتصل اساسا، قلتهً ليهو بصوت متردد ومبحوح اتصل عادي مافي ازعاج العفوو
قال لي بجد يعني م بسبب ليك مشكله؟
بقيت اتمتم قلته ليهو ايوة بجد عُاَدّيَيّ،
فجأة بابنا فتح ومهند جا طالع ملامحو م بتتفسر، صخر قال ليهو مهند،
مهند جا سلم عليهو وانا طوالي دخلت البيت،
بعد مرور اسبوعين..
ي ابوي انا جاتني فكرة ظريفه
اها شنووو؟
اتفقت مع صحباتي اعمل ليهم فطائر بيتي واقاشي وشاورما وحاجات زي دي اوديها ليهم معي الجامعه لأنو قالو اكل الجامعه م ظابط معاهم
هي لكن ي بتي الحاجه دي م محرجه ليك مع زملاءك؟ انت ماشه تقري ولا ماشه تشتغلي شغله زي دي، انتِ لو محتاجه قروش كلميني الحمدلله شغل الخدار دة ماشي كويس واللحمه برضو بقت تتشال كلها والامور طيبه ي بتي الحمدلله م محتاجه تشتغلي
ي ابوي انا عارفه انو م محتاجه اشتغل وم محتاجه قروش بس تتذكر الفطائر البقيت اعملها لنفسي واشيلها معي هم حبوها وقالو لي اعملي لينا كل يوم حاجه ونحن بندفع ليك وزيادة الخير خيرين
لكن تقدري تشتغليهم وتلحقي للجامعه ي بتي، كدي شوفي امك كان بتساعدك
اي كلمتها قالت بتساعدني وانت يوم نقول عايزين اقاشي تزبطو معي وحتى امي وريتها الحاجات العايزاهم قالت حتجيبهم لي، كنت عايزة اسألك ي ابوي؟؟
اها قولي؟!
هسي لو سألتو من الكشك بتاعه والحصل ليهه حيفتكرني عايزاه يرجع يشتغل تاني في شارع النيل وكدة
قلته ليهو خلاص ماف شي ي ابوي، ان شاءالله تتسهل
على سيرهه الكشك..
الكشك بتاع ابوي دة مخفف عليهو كتير من مصاريف البيت ومصاريفي، بقروش شغل الكشك دة بدفع لي رسوم الجامعه ومنها بديني مصاريف اليوم لما الشغل يكون كويس، ابوي م̷ِْن شغل الكشك دة بدخل صرفات صندوق علشان يدفع ليّ بيهم رسوم الجامعه، اما بخصوص شغلو بتاع الخضار والجزارة قدام البيت ديل مخليهم مصاريف للبيت وبشتري منها علاجاتو وكدة، ف وقوف شغل الكشك معناها الضغط حيزيد على ابوي وانا عارفه عاادي ممكن يبطل يشتري علاجو ويوقف مقابلاتو مع الدكاترة علشان بس يدبر مصروفي واحتياجاتي، علشان كدة فكرت اشتغل فطاير اوديها الجامعه لصحباتي وألم القروش اصلح ليهو بيها الكشك واشتغل فيييهه انا، وابوي في مكانو دة علاقاتو حلوة وعندو زباين حلوين يعني تغير المكان معناها زي الكأنو نحن نبدأ من اول
في يوم بعد رجعت البيت لقيت مكالمات كتيرة م̷ِْن فجر،
رجعته ليها وانا قلقانه اول م ردت قلته ليها خير ي بتي مالك في شنوووو كل المكالمات دي؟
قالت لي في شارع النيل وم شايفه كشك عمو، في واحد تاني مكانو كنت عايزة اسألك إذا عمو خلا المكان وكدة،
قلته ليها لٱ م خلاهو بتكوني ملخبطه بس انتِ الكشك بتاعه في مكانه لسه م جاب زول صانو ليهو،
قالت ليّ ي بت مش انتِ قلت مكان عمو جمب ال..في شارع النيل؟اها انا جمبو والله مافي كشك مكسور واقول ليك في مكانو في زي نظام الأكشاك بتاعه "الفود ترك دي"تشبه الكونتينر،
قلته ليها فجر انتي ملخبطه قلته ليك،
قالت ليّ دقيقه انتظريني واتسب،
بعد دقيقه جاتني رساله منِْها، فتحتها لقيتها صورة، اتفاجأت بإنو موقع الصورة ياهو موقع ابوي، والمحلات الجمبو ياها كلها نفسها بس الكشك كان مختلف، كان كشك كدة زي م قالت فجر يشبه الكونتينر م عندو علاقه بكشك ابوي الصغير واقل م̷ِْن عُاَدّيَيّ داك، لونو اسود وشكلو فخم كدة،
قالت ليّ اها؟قلت ليها بس دة م كشك ابوي دة منو الجاب الكشك دة في محل ابوي
قالت لي صدقتي؟
قلته ليها اسألي كدة الناس الجمبو
قالت لي حاولت بس ماف زول اتفاهم معي،
دمي فار طبعاً زول يعمل حركه زي دي معناها حقارة خصوصاً انا عارفه انو ابوي م عايز يمشي عشان الدكتور قال ليهو الشهر دة م ترهق نفسك وارتاح
اليوم التاني خلصنا محاضرات و طلعنا من الجامعه انا وفجر ومشينا شارع النيل، شوفتي للمكان وهو مختلف عن مكان ابوي وجعت قلبي شديد،
عمو عبدو كيفك تمام؟
اهلاً ي بتي الحمدلله وانتِ كيفك وابوك ان شاءالله بقى عافيه؟
الحمدلله في احسن حال ي عمو،
الحمدلله ي بتي الحمدلله
الكشك الجديد دة حق منو والحاصل شنو بالضبط؟
والله ي بتي م عندي علم لكن شوفي ناس... لانو الناس الجابت الكشك دة كانو واقفين معاهم وكدة
طيب تمام شكراً ي عمو
تعالي ي فجر!!
السلام عليكم،
وعليكم السلام
اممممم انا بت صاحب الكشك اللي دخلت فيهو عربيه قبل شهر وشويه هنا وللأسف علشان الكشك اتكسر م قدرنا نرجع ونشوف الحاصل شنو بس هسي اتفاجأنا بي دة قاعد هنا وحابين نعرف الحاصل والكشك دة تابع لمنوو،
والله انا م عندي علم لكن دقيقه اشوف ليك المدير،
طيب تكون م قصرت
فجر: غايتو في البلد دي الواحد نهاااائي م يصفق
قلته ليها كدة استني نشوف حيقولو شنو عشان نعرف نتصرف،
شويه كدة جانا واحد
السلام عليكم
وعليكم السلام اهلين
انتِ بت حاج الصادق؟
ايوة انا
ماشاءالله والله ياااخي م كنا عارفين انو عندو امورة كدة
فجر: وهسي عرفته
مسكت فجر من يدها وقرصتها
قلته ليهو شكرا، ً كنا عايزين نستفسر من الكشك الجديد دة حق منو وكدة؟
والله ي بتي م عارف انا يعني ابوك م عندو علم بالحاجه دي؟
انا وفجر بقينا نعاين لبعض وهزيت ليهو راسي ب "لا
قال لي غريبه كنت فاكر ابوك عارف لأنو فجأة جينا لقينا الكشك داك مافي وتاني يوم جو ناس نزلو دة، سألناهم قالو لينا متفقين مع صاحب الكشك وكدة،
ولما سألتهم وقلته ليهم كيف متفقين وكدة قالو لي لو في اي حاجه اتصل في الرقم دة بس،
قلته لنفسي يعني ابوي عارف، طيب معناها باع ليهم حقو ولا كيف ؟؟
فجر: طيب ممكن تدينا الرقم؟
عاينت ليها وقلته ليها هنعمل بالرقم شنووو؟
قالت لي نستفسر بس ونفهم
قلته ليها م سامعه قالو متفقين مع ابوي؟
قالت ليهو كم الرقم لو سمحت؟
قال ليها دقيقه بس اطلعو ليك
طلع الرقم ادانا ليهو،
قالت لي دقيقه اتصل، قلته ليها استني انا اشوف ابوي الأول واتأكد منو لانو تصرفهم تصرف ناس واثقين قبل م يعملو الخطوة دي..
الووو، ابوي كيفك، اي جايه في الطريق بس زحمه، اي والله، عايزة اسألك ي ابوي انت الكشك بتاعك في شارع النيل رفعوه؟ علشان هسي اتصلت علي فجر وقالت لي مشيت شارع النيل وم شايفه الكشك
اهاا يعني قاعد م اترفع، طيب ي ابوي انت متأكد انو قاعد وكدة، ايوة فجر م عارفه مكانك بالضبط بس وصفت لي ياهو نفس مكانك قالت لي م شايفاه، اي صح بتكون م مركزة او ملخبطه وكدة، طيب ي ابوي، لالا م بتأخر مع السلامه،
فجر: زي م اتوقعت صح؟
م فاهمة ي فجر انا، طيب الشال الكشك منووو وودوه وين حتى ولو عايزين يشتغلو في مكان ابوي م من حقهم ياخدو الكشك
خليني اتصل واشوف، لا دقيقه جيبي انا بتصل،
اديني الرقم،
هاك دة الرقم، طيب
داخل؟
م برد
حاولي تاني،
كمان م برد،
ارجعي اتصلي كدة
داخل
يعني بالجد حراميه وعينهم قوة كمان سرقه عينك ي تاجر
الووو؟
دي م حرمنه دي حرمنه وقله ادب كمان
الووووو؟منو معي؟الووو
م تسكتو ليهم نهااائي ي شهد وم تخلو عمو يسكت ليهم لأنهم بالجد وقحين شديد
الوووو؟؟
اسكت ليهم منو ي بت والله لو ابوي سكت انا م بسكت كمان المرة دي خلي مهند يضربني
وااااااي الخط فاااتح كان شكلو الزول رد وقفل،
انتِ جادة؟ ارجعي اتصلي كدة
دقيقة متصله،
الووو؟
السلام عليكم؟
وعليكم السلام منو معي؟
انا المتصله اسأل السؤال دة منو انت؟وبأي حق بتشيل كشك قاعد في محل زول وبتخت محلو كشك تاني بدون اذن او حتى من غير م ترجع لصاحب المحل نفسو؟
انتِ منو ي بت الناس؟
انت المنو؟ والكشك بتاعنا وين لو سمحت؟ يعني حراميه وعينكم قويه بالباب كدة؟
قفل الخط في وشي تخيلي؟
ارجعي اتصلي
فصل المكالمه،
تاني ارجعي اتصلي عذبيهو بالمكالمات
رقمو م بدخل شكلو عمل لي حظر مكالمات الوسخ
انتِ جادة؟ دقيقه نتصل عليهو من تلفوني،
داخل،
الووو؟
ي حرامي ي وسخ انت لو عندك شخصيه كدة م بتقفل الخط ولا بتحظر رقم انت..
قفل الخط
اتصلي على عمو كلميهو يمشي يفتح بلاغ قبل حقو م يضيع،
دقيقه، م بكلم ابوي، حأكلم صخر احسن ابوي م يعرف بالموضوع دة هسي،
طيب عندك رقم صخر؟
اي عندي،
طيب يلا اتصلي
اي متصله بس هو يرفع،
الووو صخر؟ كيفك تمام مساء الخير،
الحمدلله تمام وانت؟
امممممم معليش ي صخر عارفه نفسي كترتها عليك وخجلانه اللجأ ليك تاني بس عندي موضوع عايزاك تساعدني فيه ضروري والله اذا ممكن طبعا، ً
تسسلم ي صخر م بتقصر، امممم احكي ليك الموضوع طبعاً انت عارف بموضوع الحادث و...الخ
ايوة عايزة افتح فيهم بلاغ سرقه لأنهم اخدو الكشك بدون اذن واتصلنا عليهم عشان نفهم الحاصل بقو يقفلو في وشنا الخط وحظرني مكالمات،
انا هسي في شارع النيل، طيب حتجي علينا يعني، ايوة اليوم اذا ممكن لانو هم شكلهم عايزين يفتحو محلهم حتى، طيب تمام منتظرنك، ممكن طلب تاني؟ ي ريت م تكلم ابوي ولا زول من ناس بيتنا بالموضوع دة لغايه م نشوف نهايتو ولا حتى مهند، طيب تمام، تسسلم ي صخر، تمام مستنياك!!
قال ليك شنووو؟ قال حيجي علي نمشي مع بعض القسم نفتح بلاغ،
احيااااا انا من صخر زولي زولي ايوة دة الصح ياخ،
قلته ليها حتمشي معي ولا حترجعي الداخليه؟
ي بت داخليه شنو حمشي معاك طبعاً متحمسه اول مرة امشي القسم الاحساس دة عايزة اجربو حماس الف
متخلفهه
عدينا ساعه حتى صخر جا علينا، سلم علينا وبالفعل شاف الكشك وكدة قال لينا يلا نمشي،
قلته ليهو اممممم حيجيبوهم صح؟
قال لي كيييف ي زوله اكييييد يعني لو كانو خلو الكشك على جنب ساااي اخف قدراً لكن ديل شالوه عديل بدون م يرجعو ليكم م عندهم حق و دي تعتبر سرقه بالباب
فجر: وحتى بعد رجعنا ليهم نستفسر بكل قوة عين قفل الخط في وشوشنا وعمل لينا حظر مكالمات
بسسس خلاص كلامكم دة قولوه في القسم وكافي جدا، ً
طيب تمام
مشينا القسم فتحنا البلاغ ضد مجهول واديناهم الرقم والتفاصيل وكل شي، بعد طلعنا صخر قال لينا حننتظر منهم مكالمه، ع حسب انهم معارف صخر واصحابو وكدة حيتصلو عليه، بعدها صخر وصل فجر ورجعني البيت،
وانا نازله قال لي رقمك دة فيهو واتس ي شهد؟
قلته ليهو ااايوة فيه
قال لي طيب بيناتنا الشبكه
قلته ليهو طيب تمام واسفهه بجد ي..
قال ليّۓ والله لو كملتي هزعل منك ي شهد عيب، انتِ بس اهدي وروقي وركزي في دراستك واذا احتجتيني تحت اي لحظه انا موجود تمام؟
قلته ليه طيب شكراً
نزلت اول م دخلت البيت لقيت ابوي طالع قال لي هسي كنت ماشي افتشك، تفتشني وين ي ابوي؟
اي مكان ان شاءالله اقيف ليك في الشارع مالك اتأخرتي كدة ي بت؟
زحمه مواصلات مش قلته ليك كدة؟
خلاص ادخلي كدة قلقتي بي قلت حصلت ليها مصيبة البت، مصيبة شنو ي ابوي ياخ،
ظروف الشارع م معروفه ي بتي
امييي انا جيت، جبتي الحاجات القلتها ليك للفطاير؟
قال ي بتي الشغل طاير ارتاحي واخدي نفس شويه كدة،
اي هرتاح بس عايزة اتأكد اول ي ابوي
اي جابتهم وطلعت اها كدة ارتحتي، يلا ادخلي ارتاحي انا جهزت الأكل ومنتظرك
م اتغديت؟
كنت شبعان
ابوي والله بتبالغ عاين عيونك دي واقعه كيف انا مهما اتأخرت بجي باكل م معقول تنتظرني كدة، خلاص تعال ناكل يلا،
ضحك قال لي خلاص ي المبروكه كدة بدلي ملابسك وتعالي، قلت ليهو هئه باكل بيهم كدة يلا ارح
❖
في جانب تاني:
شهد، ي شهد يعني معقوله يكون غالبني حتى الكلام معاك، وم لاقي طريقه ادخل ليك بيها، م ممكن تكوني قريبه مني كدة وبعيدة في نفس الوقت، اخ بس لو اقدر اقرب من غير تخوف من ردة فعلك تجاه الحأقولو اخخخ بس، قوي سُلطه وضعيف في نفس الوقت قدامك
❖
تاني يوم كنا داخلين على محاضره، ودكتورة المادة دي النوع اللي لو دخلت بعدها بدقيقه م حتدخلك،
نحن اتلاقينا في باب القاعه، هي عارضتنا ودخلت بتعمد منها لما جينا ندخل
قالت لينا وين وين ي شباب؟
فجر قالت ليها ي دكتورة نحن دخلنا مع بعض!!
قالت ليها دخلنا مع بعض؟ يعني انا وانتو واحد وعايزين تواسو نفسكم بي؟ في مثل بقول "اذا تساوت الكتوف قل المعروف"والمثل دة م بتماشى معي انا تمام؟
فجر: العفو ي دكتورة انت فهمتي غلط يعني انا قصدي انو..
شنو هو الفهمتو غلط؟قصدك يعني انا م بفهم؟ وبعدين انت ك طالب مفروض تكون داخل القاعه قبل 5 دقايق من بدء المحاضر وحضور المعيد علشان تهيء نفسك تماماً مش تجي داخلين معي زي البهايم كدة
انا مع كلمه البهايم دي قلته : استغفر الله
ولسؤ حظي وقعت على مسامعها، قالت دي منو القالت استغفر الله دي؟ منو بسرعه
كلهم سكتو انا قلته ليها انا ي دكتورة
قالت لي انتِ قلت استغفر الله؟
قلته ليها ايوة
قالت لي الما عاجبك شنو لما بتستغفري؟
قلته ليها بإستغراب عفواً ي دكتورة بس هل الزول عايز سبب علشان يستغفر؟
قالت لي ايوة م تستغفري وانا بتناقش
قلته ليها استغفر الله العظيم
قالت لي اديني اسمك واتفضلي اطلعي برة،
قلته ليها استغفر الله العظيم وم اديتها اسمي ومشيت،
قالت للواقفين في زول عايز يستغفر عشان يلحقها؟
فجر طوالي جات وراي والباقين برضو اتحركو م وقفو
قالت لي واااي جلطتني،
جا واحد اسمو معاذ قال لينا الحمدلله الواحد كدة ضامن مادة شايلها م حيتعب يقراها لأنو في الحالتين م حنباصي
قلته ليهو مستفزة دي مالها دي؟
يلا حلال علينا الملحق شباب
اصلاً هي معاطهه وم فاهمين منها شي طايرة ليها في راسها دة حبابو الملحق
انا جعانه ارح ناكل،
زولتي زولتي والله ي شهد ريحتينا من معطه ساعتين ابو الشباب جيب ليك سجارة ي مان
كل زول من الشباب كان بقول حاجه براه كأنهم كانو عايزين سبب وخلاص
فتحت تلفوني لقيت مكالمات من صخر، رجعته ليهو
ايوة ي صخر، تمام الحمدلله معليش م سمعت صوت التلفون، ايوة في الجامعه، لا خلصت م عندي شي في شنووو؟ تمام يعني هم هسي هناك ولا لسسه م وصلو اساسا؟ً طيب جايه جايه على بال م يصلو انا كمان حأكون وصلته، تمام يلا،
فجر، الناس الفتحنا فيهم بلاغ الكشك امس قالو جاين على القسم انا ماشه لانو صخر قال لي تعالي مستنيك هناك
فجر: كذابهه بالسرعه دي، خلاص انتظري ماشه معاك حتمشي تخليني يعني والردحه المجهزاها من امس دي اوديها وين؟
قلته ليها خلاص ارح طيب،
يلا اصلاً هو يوم الردح العالمي شكلو الواحد يتفشى ويطلع الكبت الجواهو انتظري وشوفي عاااد الليله اوريهو يعني شنو يسرق حق الناس ويقفل الخط في وشوشهم
بالجد دي اكتر حاجه وقحه وتغيظ
ارح ارح استعجلي
طلعنا مشينا القسم، لما وصلنا اتصلت على صخر قال لي جاي عليك، وقفت انتظرتو لما جااا ملامحو كانت متغيرة حسيت بكدة
سلم علينا، قلت ليهو وصلو؟
قال لي اي قاعدين
قلت ليهو طيب قالو شنوووو؟
قال لي والله ي شهد م عارف اقول ليك شنو وحك راسو بي يدو،
قلته ليهو في شنوووو؟
قال لي تعالو كدة
دخلنا القسم لما وصلنا المكتب كانت الصدمة، لقيت نفسي بقول:
انت؟ دة بيعمل شنو هنا كمان؟
بقيت اعاين لصخر بي حيره واستفهام؟!
صخر هزز لي راسو بمعنى م عارف !!
كان الولد نفسو الاختو دخلت بالعربيه في محل ابوي!!!
قلته ليهو صخر؟ ؟؟
قال لي شويهه صبر ي شهد
طلع تلفونو واتصل "الووو؟ وين انت وين؟يعني وصلته، طيب تمام تعال منتظرنك نحن
الولد اخو البت جاتو مكالمة شال تليفونو وطلع
قلته بزعل والله دي قوة عين دي، اسي دة شنو؟؟ تتسمي وقاحه قله ادب ولا وقاحه ولا شنووو بالضبط؟؟
كلهم بعاينو ليّۓ وسكاتين واثناء م انا في الحاله دي
فجأة اشوف مهند جا داخل، اتصمغت في مكاني وانا بقول مهند؟؟
بقينا نعاين لبعض انا وهو وصخر وفجر بخلعه،
بعد مسااافه قلته ليهو مهند؟؟؟ بتعمل في شنو انت هنا؟
صخر؟؟؟
قال لي شهد روقي شويه،
الضابط قال ليهو انت مهند؟
مهند قال ليهو ااايوة انا مهند
الولد اخو البت جا داخل، مهند قام سلم عليهو الا بالاحضان كمان
وصخر عيونو بقت ماشه يمين وشمال، والضابط الفي الكرسي ابتسم او ضحك عديل وانا شويه وحيطق لي عرق،
مهند قال للولد اعفي لينا ي مان سؤ تفاهم بسيط بس والله م عارف حاصل كدة
فجر قالت لي اجي دة شنوووو؟
نظراتي بقت نظرات استفهام ليهم كلهم
الضابط قال ليهو في بلاغ من اختك ضد مجهول بخصوص... الخ، نحن جبنا الزول دة واستجوبناهو قال انو هو تعويضاً للكشك حق الوالد الاتكسر بسبب حادث اختو جاب الكشك دة ختاهو في المكان وانت على علم بالحاجه دي هل فعلاً الكلام دة صح؟ وهو واضح انو الكلام دة صح بس برضو منتظرين توضيحك
لما سمعت الكلام دة حرفياً كأنو وقعت فيني صاقعه
صخر بقى يحك في راسو
وفجر قالت بصوت عالي خبر الشوم راحت الهيبهه والردحهه
مهند سكت مسااافه وقال ليهو ايوة صح دة الحاصل ي سعادة
الضابط قال ليهو يعني انت كان عندك علم؟
مهند قال ليهو ايوة عندي علم
الضابط بقى يعاين لي
بعدها قال ليهو وطيب وناس البيت وضعهم شنوو عندهم علم؟
مهند قال ليهو لا، عشان ابوي لسه م بقى كويس ولو عرف حينزل الشغل طوالي عشان كدة حبيت اخليهو ياخد فترة نقاهتو حتى اكلمو،
طبعاً راسي لفه وركبي ساحو وانا بسمع في كلام مهند ورجولي بقت م شايلاني بقيت داخله في ضفوري،
الضابط قال ليهو طيب كان على الاقل تكلم امك واخواتك لانو سؤ التفاهم دة كلو حاصل بسبب انك م اتكلمت ي حبيب، واختك دي جات وفتحت بلاغ في الزول دة بجهل من الحاصل بينكم وضيعت زمن كل القاعدين هنا ديل سااااي وبطلت اشغالهم ولا شنووو ي ناس؟
مهند عاين لي وهو ساكت بعدها قال ليهو معليش ي سعادة حقك علينا وعلى الناس ديل سؤ تفاهم بسيط والله ي جماعه
بعد مسااااافه قلته ليهو طيب انا م فتحت بلاغ بخصوص الكشك الجديد، انا بتكلم عن كشك ابوي وين مكانهه حاليا؟ً م عندك حق تاخدو مالم تراجع ابوي هو حيأذن ليك اذا ممكن تتصرف فيه او لا،
حصلت لحظه صمت اخدت دقيقتين بعدها الضابط قال لي يعني مشكلتك الكشك التاني هسي وضحك وصخر برضو ضحك
قلته ليهو ايوة
الضابط قال لي جداً وعاين للولد وقال ليهو وين مكان الكشك التاني؟
الولد قال ليهو بأخر نفس م عندي علم والله ي سعادتك تقدر تسأل اخوها برضو من الحاجه دي، لأنو هو لما نزلو الكشك الجديد طلب من عمال العربيه يرفعو ليهو الكشك القديم ولا م كدة ي باشا خلينا نخلص من القصه دي؟قال الكلام دة لي مهند
مهند في اللحظه دي اتوتر
الضابط قال ليهو صح الكلام دة؟ يعني انت اخدته الكشك القديم برضو؟
مهند قال ليهو بتردد م م م هو مكسر حنخليه في المحل لشنووو؟
الضابط قال ليهو طيب وديتو وين يعني قاعد في مكان ووين المكان؟
مهند سكت
الضابط : بسأل فيك انا ي حبيب
بقيت اعاين في مهند
مهند قال ليهو م في مكان اتصرفته فيهو انا
الضابط: اتصرفته فيهو كيف اديتو زول ولا بعتو ولا شنووو؟
مهند قال ليهو اي بعتو ي سعادتك، بعتو، حق ابوي وبعتو!!!
الضابط قال ليهو نحن م عندنا مشكله في حق ابوك تبيعو ولا تخليه بس م ممكن نحن بسببك نمسك بنفسنا زمن في الوقت الممكن نشتغل فيهو الف بلاغ، وم ممكن بسببك نسبب ازعاج عام لناس م عندها ذنب على الاقل لما تعمل حاجه خت ناس البيت في الصورة عشان يكونو على بينه
شكلنا انا وصخر ونحن داخلين في ضفورنا كان مقزز بس انا كنت قرفانه من نفسي علشان ختيت صخر في موقف زي دة
طلعت وانا جواي كل الزعل والغُبن الفي الدنيا حتى كلام م قادرة اتكلم، احرجت مع صحبتي، مع صخر، مع الضابط والولد، حرفياً انا بقيت قدر السمسمه بسبب مهند حتى صخر م اتكلمت معاه وفضلت ساكته بدون م ابدي اي ردة فعل لغااايه م وصلت البيت،
نفسي افهم مهند كيف قادر يكون كدة، قلبي كان واجعني شديد، حكيت لي ابوي وامي بالحاصل وانا ببكي واني قدر شنو متضايقه لأنو أُحرجت مع الناس، ابوي قال لي م بتغير ي بتي م بتغير نهااائي
اثناء م نحن بنتغدأ، بابنا دق، ابوي مشى فتح سمعنا صوت السلام بعدها ابوي جا قال لينا دة الولد جا مع مهند، على طول جريت دخلت الغرفه وقفلتها، كنت محرجه حأقابلو بأي وش؟فضلت محبوسه في غرفتي، وبسمع في كلامهم بعد م طلعو طلعت لقيت حاجات كميه امي بتنقل فيها في المطبخ،
قلته ليها دة شنوو؟
قالت لي صلاة النبي الولد جايبهم معاهو عاااد ي شهد ي بتي غااايتو بس الله يسامحك بعد دة كلو الولد م اخد في خاطرو وجا يطمئن على ابوك
قلته ليها الله يسامحتي انا ولا ولدك؟
قالت لي بس خلاص اقفلي الموضوع،
قلته ليها تمام وطلعته،
بعد اسبوع طلعو لينا قرار دفع رسوم السمستر، وانا عارفه ابوي م عندو لأنو الشغل م على قدر كدة والخضار زاتو سعرو زاد وبقى بشتري بالغالي وم بجيب كل الخضار البشتروه الناس عشان كدة الناس مرات بتشتري ومرات بتجيب م̷ِْن الاسواق وع حسب وضعو الصحي زمان كان بشتغل طول اليوم هسي بقى ساعات معينه بس ومهند م بسد ليهو فرقهه ابداً يعني لو بمسك ليهو المحل الشغل بمشي بسسسس
وانا شغلي بتاع الفطاير دة بظبط منو مصاريفي والبفضل م كتير لما يلحق رسوم سمستر، وم بقدر اطلب او اشيل من زول ولا حتى فجر،
الموضوع بقى شاغلني شديد خصوصاً انو بدو يدخلو الناس بالإيصالات والبطاقات الجديدة وغير كدة راحت علي المحاضرات، وفكرة كل يوم اشيل إيصال وبطاقه واحدة دي محرجه شديد وتلفوني دة ياهو بقرا بيهو المحاضرات Pdf لانو الشيتات غاليه ومكلفه وعايزة ليها حسابات انا م قدرها حرفياً لقيت نفسي في حوجه وضغط مادي وم قادرة اواجه ناس البيت لاني عارفه البير وغطاه، قلت لنفسي ماف حل ي شهد غير انو تشغلي الكشك بتاع شارع النيل دة وتجمعي منو قروش السمستر اليومين ديل،
بس من غير م اكلم ابوي لأنو م حيرضى مهما عملت مستحيل، يعني اشغلو ايوة بس من سكات،
بتفكري في شنووو؟
جاني صوت فجر وانا سرحانه
شهد، يا بت
ايوة،
بتفكري في شنوووو؟
بفكر في الكشك ي فجر عايزة اشتغل فيهو
جد ولا بتهظري ههخخخخ؟
جد والله دي م حاجه بهظرو فيها فجر انا وضعي م زي وضعك انتِ عارفه كدة صح، ف مستعدة اشتغل اي شغل وخلاص
عارفه ي شهد وم قصدي شي بس عمو حيوافق اكيد لا ي شهد!!
عارفه انو لا م حيوافق علشان كدة م حأوريهو اني اشتغلت فيهو
قالت ليّۓ كيف يعني؟
قلته ليها عديل كدة
قالت ليّۓ هو في كل الاحوال حيعرف ي شهد
قلته ليها لما يعرف يحلها الشربكها انا بتكلم عن هسي ي فجر محتاجه قروش السمستر دة وانتِ عارفه الفترة الاخيرة والحصل فيها،
قالت لي طيب انتِ قولي لي عايزة كم ي شهد وانا بظبطها وبتتجازف
عاينت ليها وانا ساكته
قالت ليّ عارفه م حترضي م عارفه ليه بتكبري المواضيع كدة يعني انا لْۆ في يوم احتجت م اطلب منك؟
قلته ليها م كدة بس م حأكون مرتاحه، وبعدين لْۆ اشتغلت بتتسهل والموضوع بظبط
قالت طيب حتشتغلي كيف، وحتقولي ليهو شنو، راس المال وكدة،
طيب اسمعي، انا حأبدأ بحاجات بسيطه، فطاير، وكدة
وشاورما واقاشي؟
لا ديل م عندي ليهم قروش ي بت ها،
طيب عايني وبدون اعتراض علشان قسماً بالله ازعل، ليك علي حق الافتتاح علي، لحمه الاقاشي والفراخ انا بجيبهم انتِ جيبي باقي الحاجات
قلته ليها ي بت؟ ؟؟!
قالت ليّۓ م يا بت بدون نقاش والا هزعل انتِ اختاري، قبل م ارد عليها قالت ليّۓ خلاص منتهي، بتتجازف ي زوله حتى ولو ظبط ممكن ترجعيها بعدين عادي، اتفقنا ي نفيسهه؟
قلته ليها ظابط
حتبدي متين؟
خلينا نكتب الاحتياجات اول ونمشي نشوف الكشك محتاج شنو،
طيب حلووو، حماس الف
متحمسه لشنوو انا الحأشتغل
وانا كمان حأشتغل معاك يعسل لانو اصلاً الداخليه بعد الجامعه م فيها موضوع
ي بت اهلك لو عرفو
اهلي في وادي وانا في وادي م جايبين خبري بعدين يلا خليني اجرب احساس اني مدروشهه كدة
هههههه قال ليك دي حاجه سمحهه
المهم عايزة اجرب
طيب استحملي بس م تتجرسي
فجر هي اسم على مسمى فجر لكل لحظه يأس، لكل فقدان طاقه، لكل شي صعب ممكن يعدي عليك فجر بكون ليها طابعها الخاص عليك وفعلاً "الصُحاب طاقات امان"
جهزنا لستتنا واشترينا احتياجتنا وخليناهم مع فجر في غرفتها في الداخليه
جات مرحله اني اكلم ابوي اني حتأخر برة البيت الفترة دي او كيف ممكن اظبط الموضوع دة ..
فكرة اني اقنع ابوي براااي في حاجه زي دي كانت مستحيله علشان كدة كان لازم اللجأة لي امي في الموضوع دة، رجعت البيت والحمدلله ابوي كان ماف وامي بتجهز في الغداء، اول م حست بحركتي قالت لي جيتي؟
قلته ليها ااايوة،
قالت لي العصير في التلاجه اشربي،
قلته ليها م نفسي بس عايزاك في موضوع؟
قالت لي خير ان شاءالله قولي
انا عايزة اشتغل في الكشك بتاع ابوي
شنوووووو؟ اظنك جنيتي ي بت هوووووي؟
لييييهه ي امي جنيت م انا عادي بمشي بساعدو وعادي ببيع معاه الخضار هنا في الحله
ي بت لا إله الا الله، انك تساعديه حاجه وانك تشتغلي حاجه
ي امي
ي بت هووووي م تقتلي لي حيلك م ناقصه مشاكل مع ابوك عارفه راي ابوك شنو انتِ
عايني ي امي انا حأشتغل فترة مؤقته بس يعني فترة شهر كدة او اقل يعني بعدها حأحكي ليهو
ولشنوو بس كدة قولي لي لشنووو ي بت هووووي؟
امي انتِ عارفه انا دخلت كيف، وعارفه اني بقرا بنص المبلغ بسبب واسطه عمو اسماعيل ابو صخر وعارفه انو ابوي قروش الكشك اساساً بلمها لقروش الجامعه، وعارفه الدكتور قال لينا شنو قبل م يخرجو، شغل الخضار قدام البيت خفيف عليهو وم بتعبو وانتِ بتساعديه، م زي لما يركب مواصلات ويقوم ويقعد ويشيل ويخت، ومهند براك عارفاهو لا بجدع لا بجيب الحجار انتِ فاهماني ي امي صح؟
امي بقت تعاين لي بي حسره وضيق بعدها قالت لي ي بتي انا داخله الصندوق مع حاجه الزينه بكلمها تديني الصرفه حقت الشهر الجاي،
ي امي الله يرضى عليك خليني اعمل البقولو ليك دة اظبط امور السمستر دة والسمستر ااجاي بتتسهل وانا اصلاً م حأكذب على ابوي بس م حأوريهو،
طيب اها حتقولي ليهو شنو م هو اكيد حيقول ماشي يشوف مكانو ويشتغل الاسبوع الفات كان ماشي،
عايني انا حأقول ليهو انو الولد اخو البت قال انو في تشطيبات في الكشك حتخلص خلال شهر هم بس جابوه علشان يكملو عليه شغل في المكان وكدة، تاني حاجه حأوريك خطه قعدتي مع فجر تمام؟
اها قولي كدة
قلته ليها كويس بس خليني امشي اغير ملابسي واجي،
❖
كل شي م̷ِْن الخطه كان جاهز بس كان فاضل التنفيذ وم بين ممكن الموضوع يظبط وممكن لأ
الوووو ابوي، ابوي م شفت الحصل
بسم الله ي بت في شنو مالك؟ في شنو ي بت الو؟ ؟؟؟
ابوي فجر ي ابوي، فجر ضربتها عربيه
لا حول ولا قوة الا بالله، كيف يعني، وين انتو اسي؟ الحصل عليها شنووو؟
نحن هسي في المستشفى
اي مستشفى جاي عليكم،
طالعين ماشين الداخليه
معاكم منو والبت كيف اسي؟
كويسه ي ابوي بس فصل في الرجل ورضوخ وجسمها كلو اتجرح
لا حول ولا قوة الا بالله متين الكلام الكلام دة وليييه م اتصلتي من قبيل اديني عنوان الداخليه جاي عليكم هسي،
كويس داخليتها في "..."
خلاص كويس جاي عليكم هسي
صدق؟
ايوة صدق، بس قلبي وااااجعني شديد م سمعتي نبرة الخوف البتكلم بيها، ابوي حبيبي مافي احن واطيب منو، زعلانه من نفسي اني بكذب عليهو
فعلاً هي حاجه بتزعل بس انتِ عارفه انك بتعملي كدة علشانو صح، يعني نيتك م سيئة ابداً ولا عايزة تعملي حاجه غلط، بس هو يتحسن ويبقى عافيه شويه وتحكي ليهو عملتي كدة ليه ي شهد، تعالي احضنك اريتك بتي انتي
هههههه انتِ حتعملي فيها امي فجأة
اصلاُ انتِ بتي ي صغنن انت
صغنن في عينك م بحب الكلمه دي انا يلا اتجهزي للدراما ابوي حيجي هسي،
تعالي لفي معي الضاغط دة سريع،
مفروض اديك بنيه ولا كف عشان وشك يورم صح
شهد انتِ حيوانه صح؟
خلاص ابكي، لازم وشك يكون متورم وكدة،
ابكي كيف؟ ابكي بدون سبب؟
اتذكري ليك اي سبب محزن، اي سبب ببكي اي موقف، اي حاجه ي بت، ابكي المهم
احكي ليك عن حبي للإكس الباطل ومواقفو معي؟
همووووت
تعالي احكي ليك اصلاً عندي إكسات كتار بس دة كنت بحبو شديد وطلع حيوان ساي
احكي طيب
طبعاً اتعرفت عليهو في...الخ
بعد مرور نص ساعه..
شهد تلفونك بضرب، شهد قومي خلي البكى، انا ست الحق م بكيت عليهو كدة
دة، دة، دة ابوي،
الوو؟ ايوة ي ابوي، وصلته؟طيب نازله عليك خليك مكانك،
فجر ارقدي ارقدي بسرعه، واتغطي بالمفرش كويس م تطلعي غير وشك يديك تحت تمام؟
طيب يلا، طلعي حبوب المسكن والمويه وفي حبوب في الدرج دة برضو طلعيها ختيها،
يلا انا نازله،
دموعي كانت لسه جاريه ووشي مورم من قصه فجر مع الاكس ومواقفو معاها وشدة تحملها ليهو، الفكرة كانت انو هي تبكي بس تلقائياً لقيت نفسي ببكي معاها،
نزلت لي ابوي، لقيتو جاي مع امي، سلم علي وحضنتو وانا ببكي، قال لي الف الحمدلله على سلامتها امي بتعاين لي وبتتبسم،
دخلنا، الاستقبال وقفتنا مشرفه، اتكلمت معاهم وفهمتهم انو استأذنا من المشرفه التانيه علشان حاصل كذا وكذا،
ابوي قال ليها م بنتأخر بتنا واهلها بعيدين عايزين نطمئن عليها بس
قالت ليهم طيب اتفضلو،
دخلنا وامي تقرص فيني قالت لي ابوك كان عرف بكسر رقبتك،
اتقدمت دخلت الغرفه قبليهم لقيت فجر رابطه راسها بقطعه وعامله روحها نايمه،
قلته ليهم ادخلو،
ابوي دق الباب قلته ليهو شبه نايمه ادخل،
دخلو، قلته ليها فجر، فجر حبيبي،
حركت راسها وقالت اخخخخ،
ابوي قال لي خليها كان نايمه ي بتي،
فتحت عيونها برااحه،
ابوي قال ليها الف الحمدلله على سلامتك ي بتي، الف الحمدلله اجر وعافيه ان شاءالله،
قالت ليهو بصوت خاافض، تسلم ي عمو،
امي قالت ليها كيف بقيتي هسي؟ والحادث دة حصل كيف ي بتي
قالت كلامها دة بخبث
فجر قالت ليها الحمدلله ي خالتو والله هو الغلط غلطي انا المفروض انتظر العربيه تعدي بس...الخ
ابوي قال ليها وان شاءالله وقف بس؟
قالت ليهو اي وقف م قصر ووصلني المستشفى وعمل اللازم
الحمدلله طيب ي بتي، ماف كسر ولا اي حاجه صح؟
لا ي عمو شويه رضوخ وفصل في الرجل قال الدكتور
الف سلامه ي بتي لكن الطريق دة الزول بعمل فيهو حساااابو عشان السواقين زاتهم بقو م مضمونين دراويش ساااي وسايقين عربات،
امي قالت ليها اها كلمتي اهلك؟
فجر بقت تعاين لي وانا بعاين لي امي وابوي وبرجع بعاين ليها،
قلته ليها ي امي عمو ابو فجر عامل عمليه قلب قبل كم اسبوع ف قالت م عايزة تحكي لناس بيتهم علشان يقلقو عليها هي كمان لانو امها لو سمعت حتنزل السودان وماف زول حيخلي بالو من ابوها زي امها هناك وهي علشان حادثها خفيف وكدة م بحتاج
ابوي قال ليها عين العقل ي بتي والف الحمدلله على سلامه الوالد ان شاءالله هو بخير؟
فجر قالت ليهو الحمدلله بخير ي عمي واتحسن كتييير
امي قالت ليها خلاص تعالي اقعدي معانا نحن زاتنا اهلك انا في مقام امك وعمك دة زي ابوك وبنخلي بالنا منك ي بتي
امي حاسه بشنو وبتقول في شنو؟ بتدي ابوي في افكار كمان
عاينته ليها بغيظ وانا بعض في شفايفي
عاينت ليّۓ وقالت لي ابوي ولا م كدة ي ابو شهد؟
قال ليها بتنا وتشرفنا لمن تبلغ الصحه كمان طوالي والله حبابها الف نشيلها فوق اكتافنا،
فجر: شكراً ي عمتو بالجد وانتو اكيد بالنسبه لي زي امي وابوي بس المشكله لو عديت 48 ساعه برة الداخليه ادارة الداخليه حتبلغ اهلي اياً كان السبب والمبرر، يعني حتبلغهم وانا م عايزة اهلي يعرفو علشان كدة افضل اكون قاعدة هنا وانا عارفه انكم م بتقصرو تسلمو بالجد
امي: خلاص خليني انا بتكلم مع ادارة الجامعه وبقول ليهم انا خالتها
امي، امي، امي قاعدة تعرقل لينا الموضوع عن قصد الجو بينا بقى مشحون
قلته ليها حيطلبو منك اثبات شخصيه ي امي، اثبات شخصيه
ابوي قال ليها كان كدي ي بتي خلاص م مشكله خليك قاعدة وخلي صحبتك تقعد معاك اليومين دي لغااايه م تبقي عافيه ان شاءالله ولو احتجتو اي شي نحن في الخدمه ان شاءالله
yes,yes,yes
من جواي بقيت اقول كدة واعاين لي امي بي ابتسامه خبيثه،
فجر قالت ليهو تسسسلم ي عمو م بتقصر والله الله يديك العافيه بس م عايزة اقيد شهد
عاينته ليها وقلته ليها بغيظ قولي والله؟
رفعت ليّ حواجبها
ابوي قال ليها ماف تقيد ي بتي استغفر الله الصحبه والخوة دي هي كيف كمان؟
يلا نحن نستأذن عشان ترتاحي ي بتي،
شكراً ي عمو،
امي: اها ي بتي الله ي يديك العافيه،
تسلمي ي عمتو
بعد طلعنا امي قالت لي اها حتجي متين ي ام راس زي حله البريستو؟
قلته ليها امي بتبالغي يعني اكيد
حأنتظرها تبقى كويسه م عندها زول غيري ولا شنو ي ابوي،
ابوي سكت م رد، سكت لانو م راضي بس مجبور،
قال لي بس م تتأخري اول م تتحسن تعالي البيت،
قلته ليهو حاضر، حتفقدني صح عارفاك حتفقدني خلاص م تبكي، ملابسك كلهن نضاف ومكويات بس البونسك منووو كل يوم بتصل عليك
ضحك وحك راسو قال لي الخدمه بتاعه المكالمات دي بسوها كيفن؟ حضنتو وقلته ليهو انا بتصل عليك كل يوم م تخاف ي ابوي، او كل ساعه وثانيه كمان لم̷ِْن تقول ليّۓ اقطعي وشك اها قصرت معاك
قال لي خلاص كويس بس ابقو عافيه واعملي حسابك م تطلعي شارع الزلط دة السواقين ديل عمايا حرم عمايا ساااكت
قلته ليهو حاضر وانت كمان خلي بالك م̷ِْن نفسك وم تشتغل كتير، وأشرب مويه م تنسى
جيت لي امي حضنتها، قالت لي اها ي الكذابه ي حركات، قلته ليها لن ننسى من وضع لنا العراقيل ي حجه لن ننسى
ضحكت قالت لي سمح
رجعت الداخليه اول م دخلت فجر بقت بتزغرد وشغلت غنيه بتقول "التقيل ضرااي جبلي وما بزح بقيف قبلي، حامي حماي انا"
وبقينا نرقص عليها
بعد خلصنا الحاله الهستيريه النحن فيها ورقصنا ع كل الاغاني
يلا ي بطه خلينا نمشي نشوف الكشك والبيهو والعليهو
قالت ليّۓ ارح، ارح، ارح،
طلعنا مشينا نشوف الكشك دة زاتو الناقصو شنو، طبعاً شايله معي المفتاح من دولاب ابوي، لانو ابوي بعد عرف بالحصل جاط في مهند و شال منو المفتاح واداني ليه اختو في الدولاب،
وصلنا شارع النيل، فتحنا الكشك وكانت المفاجأة انو الكشك جاهز بمجاميعو زي المطبخ الجاهز بالضبط كدة ي جماعه زي م بقول ليكم كدة وهو مساحتو متوسطه م صغير وم كبير، لَگِنْ من جوة حاجه كدة فخمه بس مطبخ مركب جاهز كل شي فيهو حتى الادوات الممكن نحتاجها للشغل فيهو
ولقينا فيه صاج تحمير وصاج للقراصه وغاز وبوتجاز بالجمبه التانيه، وسكاكين وعلب تفريق وكدة،
بقينا واقفين بنعاين لبعض،
فجر قالت لي الزول العمل البتاع دة قديم في الشغله وفاهم الرصه كلها، كشك على خلفيه "فود ترك"
عايني خاتي ليكم كبابي وحاجات تلبسوها بفوق لملابسكم بالاسود كمان بلون الكشك يعني بس ي شهد مصدومهه بجد ومش بنطق ولا قادره ارد، شايفه كل شي بحصل لخير يعني لو م الحادث دة م كان جا العوض دة كشك الف مين يمتناه وبكلف يعني بكلف بجد م تكلفهه ساي
لساني بقى تقيل وانا بعاين ليها،
قالت لي كر علي ي شهد هزأنا الراجل ومسحنا بكرامتو الارض وهو كتر خيرو م قصر ي حليلو
سكتت مسافه حتي قلته ليها م اختو م قصرت كمان م ننسى كانت شالت روح
قالت لي المهم هو ذوق بجد وم تنسي لْۆ زول غيرو لْۆ تكسرو رقبتكم م حيعمل ليكم حاجه زي دي كان عُاَدّيَيّ ممكن يكتفي بي انو يصلح ليكم قزاز الكشك الاتكسر وخلاص، لَگِنْ دة جاب كشك مجهز بمجاميعو وختاهو ليكم ي شهد خلينا نبقى حقانين شويهه والحمدلله الكشك جاهز ومرتب نحن بس ننفض الغبار الفيهو وكدة علشان بكرة نجي جاهزين، وخلينا نشيل بتاعات التفريغ ديل علشان نعمل فيهم المخلل والمايونيز، طريقهه تقديمنا حتكون غير ي شهد علشان الشكل بجذب الزباين اكتر شي، حنجيب الورق البشبه ورق الجرايد بس مشكل دة وحنجيب كمان...الخ
كلامها أثر علي بقيت اسأل روحي معقوله مهند إستقل الزول وطلب منو كشك جديد؟ م بعيد علّۓ مهند اخوي جبان شديد بعملها
بالفعل رجعنا جهزنا المخلل، والصباح بدري عملنا المايونيز والتوميه، م كترنا الحاجات علشان م نتسيك،
حوالي الساعه 3 كدة طلعنا مشينا فتحنا الكشك ورتبنا حاجاتنا وابتدينا نعمل الفطيرة، والاقاشي كنا مجهزنو من الداخليه،
لما وصلنا ولعنا النار وختيناه على جنب،
لغااايه م المغرب اذن حتى جات ناس طلبت، والشغل من اول يوم كان الحمدلله يعني م كويس شديد بس لا بأس به،