الجزء 9

احمد حسام خالص ماكان بطيق مكاشفي ودايما في حالة شكل معاهو حتى في المدرسه والمدرسين لاحظو الكلام ده وفرقوهم من بعض في الفصول وبذات نتيجه احمد مش ولابد في الفصل الاول ...هو كتر خير الدروس الخصوصيه النجحتو ..ده كان رد حسام لي شذى ام احمد ...

اي انت اقعد حطم لي في معنويات الولد مش كفايه ابوك...

هووووي شذى ابوي هسي سوى شنو كن مادخلتي اهلي ديل مابترتاحي.....

ده ما تصلبط مش اولادك ديل هم الوحيدين الشايلين اسم العيله واسم ابوك وهو خالص مامديهم اهتمامو الماخلو فيو شي الاميرة مرام والجيران العزاز انا مرات بقول محمد ولد حاج احمد مش انت......

ماتنسي انتي البعدتيني منهم وابيتي تسكني في البيت وده غلطي انا السمحت ليك من البدايه كده وهسي سكاتي ده بس عشان المعنويات البتقوليها دي فأكفي الشر يابت الناس وخلي الطابق مستوور...

وهنا شذى جرت واطي برااااااحه وقالت ليو.....انا ماابيت سااي ياحسام انت عارف انا بحبهم قدر شنو بس انا بخاف المشاكل ومادايره اخسرهم حبيبي...

وهسي اعملي حسابك ماتخسريني انا كمان اوكي...

🐾🐾🐾🐾🐾🐾🐾🐾🐾

مرام اليوم تمت الـــ 8 وبدت في الـــــ 9 وانا داير بتي تدوني ليها باللين احسن .....

بتك ..اتذكرتها هسي وين زمان وانا بربي فيها مع ابوي واهلي انت ابو انت وبي خشم مليان تقول بتي...

انا السكتني شي واحد ياوداد عشان اقدر اجي هنا واقول بي خشم مليان ادوني بتي انا سبتها ليك الفترة الفات دي كلها ومااتكلمته...

ده بعدك ياسمير...وداد خلاص فقدت اعصابها ووقف على حيله وتبع سمير وهو بهدد فيها

وداد احسن ليك انا بس بحترم الراجل القاعد بينا...هنا حاج احمد رده وين احترامكم ولا ابوتكم وامومتكم ..انتو اثبتو لي قدر شنو انتو انانين ومامراعين لي بتكم انتي وداد مافارقه معاك احساس البت والممكن يحصل ليها لو اتجرجرت في المحاكم وانت ياسمير بس همك مكايدة وداد ومما جيت ماسألت عن بتك ذاتها عشان تسلم عليها دي ابوتك حتبداها كده وحتراعيها كيف ...استهدو بالله الاتنين واقعدو عشان نلقى حل مرام محتاجاكم الاتنين ووجود كل واحد منكم مهم بالنسبه ليها ماتكسرو بي يد البت دي ....

استغفر الله استغفر الله ردد سمير ومن وراهو وداد وقعدو للاتفاق.. اخيرا قعدتو اول شي وداد يابتي مرام كان ابيتي كان رضيتي سمير ابوها ومحتاجاهو زي مامحتاجاك وسمير رغم عدم اهتمامو بيها بس هي بتو ومن حقو يطالب بيها في اي وقت ...وانت ياسمير ياولدي الله يهديك انت عارف بالقانون ممكن انا بي اشارة اوقف اي شي واقوم محامين البلد دي كلها لانو مرام بتي انا مابت وداد بس لكن انا براعي لنفسية الاب جواك واحتياجة البت لي ابوها في الجاي عشان كده لو بترضو بي حكمي انا من راي انو تنظم جدول ياسمير وتحاول تتقرب لمرام وتحدد مواعيد ان شاء الله تبيت معاك بشرط مايتأثر مع قرايتها وكده حتكونو ضمنتو وجود البت بي نفسيه كويسه ..

وافقت وداد على مضض وسمير لسبب ما وافق بدون اي اعتراض...

في اللحظه دي جات الحبشيه وقالت بابا الغدا جاهز ....

حاج احمد وقف على حيلو وقال لي سمير انت ماغريب يلا اتفضل الغدا وهنا مرام جات داخله البيت بعد ماتمت ونستها مع مكاشفي ومما دخلت جرت لي حبيب قلبها وابوها الرباها بابا جدو حضنها وسلم عليها وقال ليها جدو انا مش قلت تاني مانتأخر كده عند الجيران عيب...

ردت بي خجل وهي مدنقره راسها في جزمتها وهي بتهوزز في كراعه وجدها خاتيها على رجليو ..اي قلت معليش تاني والله مابعمل كده ...

هههههه عارفك شاطره سلم على بابا سمير .

ازيك بابا سمير...

سمير اتردد وحسم ترددو لامن لاحظ كل الوجوه منتبه معاهو ....فمسك بتو وحضنها ...

وبعد كده قعدو في الصفره واول سؤال سألو حاج احمد لي سمير ياخي حاج سليمان كيف ...

سمير زي الضربتو كهربا وقرب يتخنق الا وداد ناولتو مويه على مضض وهي بتعاين ليو بإزدراء واضح ...ابوي اقصد الله يرحمو انت ماسمعته ولا شنو..

إنا لله وإنا اليه راجعون والله ماسمعته انت وقاطع اخبارك فعلا لو حي ماكان خلاك تقطع كده 6سنين ياسمير ياولدي ....اكيد عرست وعملت اولاد..

سمير برد وهو بعاين لي وداد اي وعندي ولد وبت ...

وداد بي استهتار هي ذاتها صح هدى بت خالك...

سمير رفض يرفع راسو.....

حاج احمد اخد تنهيده وقال ربنا يكتب الفيو الخير مرام برضو لازم تعرف اخواتها وهم يعرفوها ...

اي اي عم احمد ده قصدي والله العظيم...

حاج احمد عاين ليو كده وقال خير ياولدي.....

🎀🎀🎀🎀🎀🎀🎀🎀🎀🎀

الى اللقاء في الحلقة القادمة

🎀🎀🎀🎀🎀🎀🎀🎀🎀🎀