الجزء 6

عواطف جابت صينية القهوه لي محمد الشكلو عينو ماضاقت النوم من امس من وقت الحادثه حقت مكاشفي ومشي المستشفى ولامن خرجوهو بالسلامه ..

راقد في سريرو في نص الحوش وجمبو التربيزه مشغل اذاعة ام درمان بس بالو بعيييببد حتى ماحس بي حركة عواطف الا لامن اتكلمت ابو مكاشفي اشرب قهوه تريحك شويه شكلك تعباااان يااخوي...

الحمدلله على سلامة مكاشفي عواطف ...ربنا يديهم الصحه والعافيه ويخليهم هو واختو ماتعبان ياست البنات بس كنت بفكر اسدد كيف قروش المستشفى لحاج احمد...

اي والله ذكرتني هم الدفعوها وحاسه بي وداد متحسسه كده بي انو مرام السبب وكده ...

عشان كده لازم اسددها ليهم ده قدر لو في اخر الدنيا كان حيصلو وماعندي راسي داير يطق....

سلامة راسك ياسيد الناس دقيقه بس....

🍭🍭🍭🍭🍭🍭🍭🍭🍭

مشت عواطف لي غرفتها جوه وجرت التربيزه وطلعت لي راس الدولاب ونزلت الشنطه وفتحتها وطلعت علب من علب حلاوة الماكنتوش الزماااان وطلعت اربعه غويشات عاينت ليهم وحضنتهم الله يرحمك ياامي قلت ارفعها لي سلافه بس الظروف لازم نسدد دين المستشفى وبرضو مكاشفي الله يدي العافيه ان شاء الله حيكبر ويشتغل وحيجيب لي ولي اختو بأذن الله... شالتهم ورجعت الحاجات فوق وطلعت لي محمد في الحوش وماانتبهت لي سلافه الكانت واقفه خشم الباب وبكت لامن شافت امها وجرت لي مكاشفي توري ولقت معاهو مرام وقعدت حكت ليهم ومكاشفي ذاتو احتار وقال لي سلافه اسكتي ماتبكي انا حشوف امي مالها امشو العبو شويه انتو تمام...

🍡🍡🍡🍡🍡🍡🍡🍡🍡

مرام مرقت منهم ومشت لي امها وحكت ليها انو خالتو عواطف زعلانه ياماما وقاعدة تبكي..

وداد قلبها انقبض ومسكتها وقالت ليها حصل شنو مكاشفي عيان ...

لا لا ماما..طيب في شنو احكي لي بتي خالتك عواطف مالها...

مرام حكت لي امها الحصل كلو وتقريبا وداد فهمت الحاصل ولبست توبها سريع وجرت تلحق محمد قبل مايكون طلع واتصرف في الدهب لقت ابوها في بابا الشارع نازل من عربيتو مع السواق..

وداد مالك جاريه كده بتي في شنو....

الحمدلله جيت ابوي ارح معاي لي عواطف ومحمد نلحقهم عايزين يبيعو الدهب الخلتو ام عواطف للزمن ولي بتها عشان يسددو لينا قروش المستشفى ....

شنو ده كلام شنو لا حول الله ارحكي يابتي ...........

دخلو لي ناس عواطف لقوهم في قعدتهم في الحوش يشربو في القهوه...

حاج محمد قال لي عواطف يابتي جيبي لي كرسي ضهري تاعبني شديد ...

سمح حاج احمد ....

محمد كيفك ...

كويس والله حاج محمد الحمدلله نعمه من ربنا...

الحمدلله ...بس والله زعلان منك انت وعواطف وماخد في خاطري منكم...

عواطف جات وشايله الكرسي في يدها ختتو جنب التربيزه الفيها الراديو وورق جرايد ملفوف شكلو بالغوايش...

من شنو حاج احمد سالتو عواطف انت ابوي في الدنيا دي البزعلك مهما الزعلك اعفي لينا ...

اتناول حاج احمد الملفوف وقال ليهم مرام ابوها خلى لحمه طريه ومشى لميتها زي بتي وشفت ريدتها ليكم وحسيت ربنا عوضه الاخوان بي سلافة ومكاشفي ..ومافي اكتر من انو مكاشفي هو السماها ..

حاج احمد العبره خنقتو وبواصل كلامو ..يااولادي اقول ليكم سر انا رميت طوبة ابوها وحتى حسام ولدي تابع راي مرتو انا الله يعلم لو ماوداد وقعدتها معانا انا وامها كان حيحصل لينا شنو ...

عم احمد..

خليني اختم كلامي يامحمد ياولدي انا ما صدقته لقيتكم انت واولادك بقيتو لي اولاد وليى وداد اخوان واولادك لي مرام اخوانها والله وحياة قعدتي دي انا احلف بعد عشرين سنه ومااظن احضرو بس انتو حتشوفو باذن الله مرام بي اولاد حتحتمي بــ اولادكم و حيبقو ليها ضهر اكتر من ابوها وخالها..معليش وداد بتي ماتبكي ده نصيبك من الدنيا وانا عافي ليك ..بختو اللقى امو وابو وخدمهم ..

محمد قاطع حاج احمد هسي لزوم الكلام ده شنو عم احمد...

لزومو الدايرين تعملو شين ...

عايزين نعمل شنو نحن....حاج احمد اتناول الملفوف وفتحو وقال ليهم عايزين تسدو حق ولدي لي حق الزول الممكن في يوم لو لقى مرام بتي محتاجه حيقيف معاها ويسندها عايزين تدوني حق الجيره عايزين تعملو شنو اكتر من كده ودموعو كرررر نزلو ...

حاج احمد اعفي لينا الله يرضى عنك والله ماقصدنا....

طيب شيلي الدهب ده عواطف ارفعي ويمين بالله تلاته تاني اسمع كلام زي ده منكم الاتنين ماني داخل لكم بيت ولا قاعد في قعده واحده سامعني...

اي والعفو ياعم احمد .....

🎀🎀🎀🎀🎀🎀🎀🎀🎀🎀

الى اللقاء في الحلقة القادمة

🎀🎀🎀🎀🎀🎀🎀🎀🎀🎀