الجزء 12
وصلنا القسم ودخلنا طوالي مكتب المتحري وبعد ماقعدنا شويه اعتذر عن الانباء الحينقلها لينا ...انا حيلي لامن برد خير ياجنابو مرام حصل ليها حاجه...
لالا مرام حسب اخر اخبار جاتنا انو هي كويسه وحتكون كويسه لانو سمير من مصلحتو مرام مايصيبه سوء ...
افندم ..رديت وانا خلاص على الاخر زهجت من شغل القطارة ده .. بس وقفني محمد لامن عصر يدي واداني نظره بس تشبه نظرة ابوي الله يرحمو وطلب من الضابط يكمل ...
وهنا الضابط سرد لينا ابتداء من العرفو ابوي الله يرحمو كلو وسبب مشيتو لي بيت ناس سمير وفي نفس الوقت سمير في ناس من الحلة قالو ليهو في ناس سالو منك ولامن اتصل بالبلد عرف انو حاج احمد برضو اتصل بيهم ومن هنا عرف منو المتابعو وبقت الرؤيا واضحه لي حاج احمد الله يرحمو سبب جية سمير وبما انو لسه الوصايا عند وداد وفضل ليها سنة وتتنقل ليو خاف انكم تحولو الاموال او تجمدوها او اي شي ماعارف فكرو المريض مشى لي وين وهنا الحل الوحيد الكان شايفو يخطف مرام وللأسف صادف دخول ابوك البيت ومرام بتصرخ عايزه ماما وبابا جدو ..ولامن شافت ابوك الله يرحمو جرت عليهو وحضنها ودساها ورى ضهرو ده حسب رواية الشاهده الوحيده هدى ....
هنا انا ماقدرت استحمل وهجت شاهده دي سبب المشاكل ابتداء من طلاق اختي ولي قتل ابوي...
معليش ياسيد حسام بس ماعندها دافع وبالمناسبه هي ساعدتنا كتير وممكن عن طريقها نصل لي مكان سمير اذا اتعاونت معانا وعشان كده انا عايزكم تتكلمو معاها بي هدوء ومن غير عدوانيه مهما كانت الاحاسيس الجواكم لازم تتحكمو فيها عشان نقدر نحن وانتو نحقق العداله ونصل للمجرم ده ونرجع مرام ودي بذات حتكون بي حالة نفسية سيئه جدا لانو شافت جدها مات قدامها ووقعت داخت في وقفتها دي ورفعها سمير كده وطلع بيها جري ده طبعا حسب كلام هدى ...كده اتهيأ لي بقيتو فاهمين الحاصل....
🍂🍂🍂🍂🍂🍂🍂🍂🍂
انا دنقرت في الواطه وسرحت بعيد بين ابوي وشجاعتو ومسدس مصوب عليو ومرام وطفولتها الانتهكت لامن يموت قدام عيونها ابوها الرباها وجدها ...والله مااخليك ياسمير ياكلب نطقت بي كده من غير مااحس بي روحي ...
الضابط نبهني بي كلامو ياسيد حسام الانفعال هنا مابنفع لازم نتحكم في انفسنا شويه ياسيد حسام ..
🍀🍀🍀🍀🍀🍀🍀🍀🍀
نادو هدى وجات وبي صراحة بعد الله ويامين مسكت لجام غضبي منها وخليت محمد وهاشم بس يتكلمو معاها ويمكن هي حست بي كده لانو في نص كلامها وبي كل بجاحه بتقول لي الوالد الله يرحمو ....
قربت انفعل واكورك فيها الله لايرحمك انت لا قبيلتك كلها بس محمد لحقني وضغط على كتفي وقال حسبي الله ونعم الوكيل في الكان السبب .....
🐾🐾🐾🐾🐾🐾🐾🐾🐾
طلعنا وشكلو حيطلعوها هي ورانا وبقي خيطنا الوحيد هدى ومتابعة سير سمير بس الكلام ده اوصلو لي اختي وداد كيف ياربي ساعدني الله يرحمك ياابوي والله كنت راجل صنديد وثابت في كل المواقف ...
🐾🐾🐾🐾🐾🐾🐾🐾🐾
وصلنا البيت واول زول لاقانا مصنقر في المصطبه بره وخااتي ايدو على خدو مكاشفي حبيب مرام وصديق عمرها انا ماقدرت انزل بس بقيت اعاين ليو واتذكر يوم الحادث بتاعو وبكى مرام سبحان الله زي كان جرس بنبهنا للحيحصل ده اللحظه دي ندمت شديد لقعادي بعيد من ابوي وسبيت للنسوان ومتابعتن وقررت من اليوم ده اتبع اسلوب تاني خالص مع شذى وياترضى ياتمشي هو الغالي مشى تاني في شنو ...صحيت من شردتي على جر مكاشفي لي يدي وبيسألني مرام لقيتوها ولالا ...ومحمد ابو واقف بعاين لينا والدمعه في عينو وجا حضن مكاشفي ومسكو من كتفو وهزاهو والله العظيم حنلقاها وحاجيب ليك يامكاشفي ...
مكاشفي اول مره يبتسم من يوم الحصل ..ضحكت على روحي ياريت لو بقيت زيك يامكاشفي ...
دخلنا جوه وقعدت جنب اخواتي الاتتين ومسكت يد وداد وبديت اطمنها بي كلام انا ذاتي مامقتنع بيهو بس لازم اعمل كده لانو كده حأفقدها هي برضو الحمدلله شويه جية اسلام ساعدتني وكانت ضهر هي وعواطف لي وداد ..وشذى ماشاء الله ماسكه البيت زي الطلقه سبحان الله مغير الاحوال ان شاء الله خير .....
🎀🎀🎀🎀🎀🎀🎀🎀🎀🎀
الي اللقاء في الحلقة القادمة
🎀🎀🎀🎀🎀🎀🎀🎀🎀🎀