الجزء 3

مكاشفي مكاشفي ...

اي امي جيت الدقيقه افرش فرشي كويس.... دي كانت عادة مكاشفي يصلح سريرو ويطبق بطانيتو... بعد يصحى

هههههه التعال نضحكك سلافة اختك عملت شنو تخيل صحت من الصباح ولبست ملابس المدرسه وجاتني عشان اصحيك انت وابوك مخلوعه.... انو الزمن جا والجرس حيفوتها

ههههههه بتك دي طاشه شبكه ياامي ..

وهنا سلافه بتتفرج فيهم من بعيد والدموع اترقرت في عيونها ...

مكاشفي شافه قلبو حنى عليها جا عليها وضماها عليهو وقال ليها سلافتنا الحلوة ماتزعلي ..

هسي لو دي مرام كان حتقولو فيها كده.. ردت ليو سلافه وهي بتعاين ليو

بسم الله سلافه مالك هسي مرامي دخلها شنو هي لبست ولا نست الليله الجمعه..

عواطف حست انو الجو اتوتر ومكاشفي مما الموضوع يلمس مرام خلاص بقلب طوالي ادخلت انتو عارفين انو يوم القيامه ربنا حيعذبنا كلنا حتى انا معاكم واحتمال كبير اخش النار ..

لي امي ..... سلافه اتخلعت وسألت امها.

لأنو اول شي جبنا سيرة زول غائب وبي حاجه ماكويسه يعني كلام ماسمح وانا عذابي اكتر .... انو قاعده بتفرج وساكته يعني عذابي مرتين ....

معليش امي..

معليش امي...

لا لا معليش مالي انا ...نقول كلنا الثلاثه استغفر الله العظيم ..

استغفر ربهم ودخلت عواطف مطبخها تجهز شاي الصباح وبعد ماكبتو في السيرمس لقت الغاز قطع وبقه ليها حار تجرجر ود عمها من الصباح للغاز .... قالت التعمل العدس في الهيتر للفطور وبعدين بعد الصلاة اليجيب ليها الغاز ...ده كان كلام عواطف مع روحها وفعلا ختت الهيتر في المصطبه ووصلتو وختت حلة العدس ومشو يشربو الشاي.....

🍥🍥🍥🍥🍥🍥🍥🍥🍥

مرام صحت من الصباح وصلت مع جدها الصبح وقعدت جمبو لامن نامت تاني في رجليو وهو بسبح ...

صحاها للشاي وطلعو في جنينتهم بره عندهم مظله جميلة مغطيه بي عيدان خيزران جميلة وشجرة عنب البدت تلد عياله ياداب ...شربو الشاي كلهم مرام قالت لي جدها ...بابا جدو اقطع لي عنب

جدها قام جزة ليو كم فصلة حقت عنب واداها ووزعت لي امها وحبوبتها واكلت جدها في خشمو وبقت قاعده في كرسيها الابيض الصغير العملو ليها جدها بنفس طقم الحلوس بتاع الجنينه وبي تربيزه خاصه ودي طبعا شيئ من لا شيئ من مخصصات مرام الكامله..... كانت مرام قاعده في كرسيها و ماسكه الباقي من العنب في يدها وبتهوزز في رجلها زي الرايح ليها كلام ...

جدها قال ليها ماتاكلي يامرام مالك ماسكه في يدك ماعجبك.

لالا حلو بابا جدو بس ممكن اودي لي مكاشفي حبة....

الحبوبة نقنقت يادي مكاشفي .... وداد عايزه تنهر مرام بس وقفه حاج احمد بي اشارة من يدو بعد ماادى حاجه فطين نظره وقال ليها امشي جيبي صحن من جوة املاهو ليك زياده لانو حتودي لي مكاشفي وسلافه وخالتو عواطف وعم محمد ... مش نحن اديتينا كلنا..

اي بابا جدو ... حاضر ... ردت وهي جاريه على المطبخ فرحانه اخيرا حتمشي لي مكاشفي وتلعب معاهو شويه ... جابت الصحن ولقت حاج احمد قطع ليها زياده وملا ليها الصحن وجرت لي مكاشفي.....

لقتهم قاعدين يتونسو في برندتهم مع امهم الاتنين مدت الصحن لي مكاشفي قالت ليو شفت جبته ليك شنو هنا سلافه سكتت ...مكاشفي شال الصحن وعايز يختو في النص في التربيزه قالت ليو مرام دقيقه اجيب صحن تكب ليهم حقهم وتخلي حقي انا وانت برانا وجرت للمطبخ .... هنا عواطف اتذكرت الهيتر بقت تكورك الحقو بت الناس الهيتر في المصطبه الجمب ضلفة الصحان وقبل ماتعدل نعلاتها مكاشفي جرى واخر لحظه بكورك مرامي ... مرام قبلت عليو وبالخلعه جرت سير الهيتر والحلة جات مدفقه على المصطبه مكاشفي لزاها بعيد بس مالحق يزح رجلو سريع واتكشحت في اصابعين رجلو اليمين الشوربه حقت العدس ...

وداد سمعت صراخ بين صوت مرام .مكاشفي ..عواطف وجات جاريه هي وحاج احمد وحاجه فطين لي بيت محمد الصحى مهجوم وجاري للمطبخ...

🎀🎀🎀🎀🎀🎀🎀🎀🎀

الي اللقاء في الحلقة القادمة

🎀🎀🎀🎀🎀🎀🎀🎀🎀