الجزء 13
حسام هسي نحن تمينا شهر ومافي خبر من مرام بتي ....
غلبني ارد لي وداد بي شنو سمير شكلو في ناس ساعدو من حراس الحدود وبقينا في البلمنا فيهو في مصر اتصلت بي كل الناس البعرفهم وبالسفاره هناك في مصر بس برضو مافي شي زي البنفتش ابرة في كومة قش ......
طمنت وداد وقلت ليها الدايرو ربنا بيحصل وطلعت على امي قعدت معاها شويه اطمن عليها بذات صحتها ماعاجباني والزاد قلقي كلامها الحكتو ده ...
ده كلام شنو ياامي...
ده الحاساهو ياحسام ياولدي انا مابقعد كتير خلي بالك من اخواتك وبذات وداد امانة في رقبتك لاتهينها لاتذلها انت كان مرتك ومرام لو ربنا جمع بيها ابقي عشره عليها ياكا ابوهم ووليهم بعد احمد الله يرحمو...
امي الله يرضى عنك ماتقولي كده والله محتاج ليك ياكي سندي بعد ابوي وكبيرتنا...
ابتسمت امي وقالت لي حتقدر عليها ولد احمد التجاني ماهين راجل من ضهر راجل امسك في محمد الامين وابعد هاشم من حق اسلام احفظو ليها لليوم الاسود وشذى مرتك بت ناس ماتبقى قاسي عليها هي بس تابعت كلام امها في البدايه بس والله البنيه ماقصرت حن عليها شويه ...
امي...غلبني اكمل الدموع والعبرة خنقت صوتي قمت من جمبها ومشيت طوالي لي محمد الامين لقيتو قاعد مع عواطف قلقانين وواقفين على حيلهم ....
في شنو مالكم ياجماعه...
مكاشفي ياحسام من الصباح مالاقنو...
شنو ..كيف يعني....
والله ده الحصل قال لي سلافه ماشي افتش مرامي ابوي وعم حسام مادايرين يجيبوها....
لاحول الله ارحكي معاي القسم
🐾🐾🐾🐾🐾🐾🐾🐾🐾
اتحركنا على القسم انا ومحمد وبلغنا بالفقدان وقالو ماحيقدرو يفتحو بلاغ رسمي الا بعد 24 ساعه ونصحونا نصبر لي بكره لو ماظهر حيستلمو الموضوع هم .....
طلعنا منهم وانا سابي للشرطه والخدمات البقولو عليها للشعب وهي كلها اهمال ...بس ده ماوقتو محمد حالتو صعبه وقلت ليهو كدي نمشي البيت ممكن يفقد الامل يجي راجع ...وفعلا قبل مانصل البيت اتصلت علينا عواطف بي انو مكاشفي جا مع الضابط المتحري بتاع الصافيه ....تخيلو الولد ده سبحان الله...
وصلنا البيت لقينا الضابط سلمنا عليهو وحكى لينا انو مكاشفي جاهو في القسم واتخلع لامن شافو ولما سالو انت منو والجابك شنو ...عرفو انو ولدنا وماحبي يتعبنا قام جابو لينا وبالمره يطمن على حالنا ...وطلب مننا نهتم بالطفل ونفسياتو لانو شكلو متعلق بالبت شديد وسلم علينا واعتذر من المقيله وطلع...
دخلنا نشوف مكاشفي لقيناهو ماسك صورة لي مرام وببكي ....
مكاشفي انت راجل في راجل ببكي...
وهي بت ومعاها مجرم حيقتلها لو مامشينا لحقناها ....
حضنتو شدييد بحاول استمد من شجاعتو دي وبدعي ربنا يصبرنا على الجاي....
😭😭😭😭😭😭😭😭😭
بعد اربعة شهور اتوفت امي سبحان الله كانت حاسه بي انها حتلحق ابوي وفعلا لحقتو في غمضة عين ....
سنة كانت صعبة علينا من كل النواحي وداد كانت تعبانه شديد ولقيت الحل الوحيد نمشي الحج كلنا وفعلا مشينا وحجينا لي امي وابوي الله يرحمهم ....وداد الحمدلله بقت احسن كتيييير واحتسبت امرها لله ...
بعد الحج اسلام وهاشم طوالي رجعوا كندا وصيت هاشم عليها وفهمتو انو اخواتي الاتنين بقو عيوني لو واحده بس دمعت ساااي قبل ماتشكي بحس بيها والبزعلها زعلني ...وهاشم اصلو بخاف مني كانت بتدعمو زمان امي وهسي ماعندو زول حيضطر يحترم نفسو....رجعنا انا ووداد وشذى والاولاد البيت الكبير واول شي عملتو اقنعت محمد يقدم للمعاش الاختياري ويشتغل معاي وبي قروش المعاش صلح بيتو وبناهو طابق والحمدلله الامور كلها راقت الا موضوع مرام كل زول فينا جواهو الف سؤال عنها بس مافي اي رد سافرت مصر بي نفسي كم مره وكل مره برجع بي خفي حنين ....
🎀🎀🎀🎀🎀🎀🎀🎀🎀🎀
الي اللقاء في الحلقة القادمة
🎀🎀🎀🎀🎀🎀🎀🎀🎀🎀