الجزء 20
اتصلت علي ليندا( دي صديقه عزيزه جدا وهي الساعدتني بعد الله عزو وجل ) وانا في المكتب رديت عليها....وبعد السلام بشرتني بهابي سبرايس ...مفاجئه سعيده ... ضحكت وقلت ليها عزومة بيتزا برضو انا بالجد شويه كده حأكون من العمالقه .... ضحكت ليندا وقالت لي لا مرام بعربي ركيك جدا ...ضحكت في سري على العربي التعبان معاها ده وانا لي سنتين ونص بعلم فيها ...
اوكي ليندا قولي ....
انا أرفت إنوان اهلك في الكرتوم....
.......لي لحظه حسيت اني سمعت غلط تاني قلت ليها عيدي كلامك وبي نفس العربي الركيك كررت كلامها .... قلت ليها اسكتي اقصد استني فايف مينتس وحاكون معاك ....
جريت بي كل شوق بحملو في قلبي لي امي خالي حبوبه فطين وامل ووو..متاكده انو وهم اني القاهو حي بس يارب تحصل معجزه والقاهو حي بابا جدو ...عصرني الالم اللحظه دي وانا بتذكر اللحظه
الحظه المأساويه دي النفسي تتمسح من الوجود ورجعته اضحك وانا بصفر يييس اخيرا مكاشفي انا جايا ياربي حيكون متذكرني ولا نساني ..
......وصلنا السفارة الالمانيه بالسودان ودخلوني في مكتب ...اتصلت على ليندا طمنتها اني وصلت بالسلام ومستنيه اهلي يجوني .....كنت خايفه مترقبه مشتاقه كل مره اعاين للمرايه اصلح طرحتي ومكياجي كل صحباتي في كينيا اي كينيا دي تفاصيل حتعرفوها لي قدام... وحتى في المانيا كانو بقولو علي جميله جدا ...بس هسي ماواثقه....كنت بتمنى اول زول اشوفو مكاشفي بس تبددت الامنيه دي سرييع لامن دخل علي راجل مع الضابط الاستقبلني في مكتبو واشر على انو ده احد الاسماء المذكوره في مزكرة التفتيش ....... ركزت في ملامحو لاحظت انو في شيب طويل ضعيف بشبهو والله بشبهو حتى علامة الصلاة قلدتو من رقبتو خايفه مخنوقه دسني خالو حسام انا مشتاقه ليكم ااااه خالي ااااه
.......خالو كان ببكي وبقول لي اعفي لي مرام بس والله فتشت والله فتشنا كلنا انتي كويسه اااه حبيبتي وحبيبة جدك وامك واهلك ...
.......رجعنا البيت كنت بعاين في الشارع ... اخيرا انا في السودان وفي شوارعو وده شارع النيل خالو حسام داير يعرف اي شي كنت وين قضيت الفترة دي مع منو وضغط فرامل بسرعه وسالني جا معاك .... قلت ليو خالو انا معاكم هسي خليني افرح بيكم اول وحأحكي ليكم اي شي حصل معاي بالتفصيل.... واطمن سمير سليمان تاني ماحيقدر يهبشني ولا حتى يجي علي....
🌸🌸🌸🌸🌸🌸🌸🌸🌸
وصلنا البيت جيت نازله جاني صوت حبوبه فطين وهي بتشاكلني يابت ماتلعبي في الشارع ...عاينت لي بيت ناس مكاشفي لقيتو مختلف وقفت جريت خالو مخلوعه خايفه تاني ابدى دورة تفتيش ...خالو حسام مكاشفي ناس خالتو عواطف..
طمني وهو بيضحك قاعدين هههههه لسه هههههه الاثنين مجانين قاعدييين بس اعملي حسابك ده بقي راجل ماشويفع زمان داك وانتي برضو ماشاء الله مرام ....اطراء خالو حسام اداني دفعه قويه خشيت عاينت للعنبه وكميه ناس في البيت بعاين بفتش مافاهمه شي لكن لكن ده ده مكاشفي مكاااااشفي حضنتو بكورك ليه اتاخرتي ...لكن جيت انا يامكاشفي جيت بعد فتره مسك وشي زي المامصدق ههههههه داعب العنبه بي يدو وسألتو امي وين دخلني ليها جوووه...
احييي يمه اه امي ماما حبيبتي مامصدقه وداد احمد مشتاقه ليك جيبي يدك ابوسه جيبي رجلك جيبي طرف توبك جيبي التراب البتمشي عليو امي حبيبتي....
لفيت نفسي معاها براي ...
فقداك يامرام...
وانا برضو ياحبيبة مرام وروحها...
اتعذبتي.؟....
وهسي ارتحت...
اااه يابتي....
عندي كتييير كلام ياامي بس هسي احضنيني عوضيني املي كل احتياج حسيت بيهو السنين الفاتت دي ....
حسيت نفسي زي النعسانه وامي بتعمل لي حركه 8 سنين مافي زول عمله ليه عارفنها شنو بتمسد لي في شعري بعد مافكت ضفيرتي ...
حسيت بي مكاشفي دخل خجلت تخيلو خجلت من مكاشفي وانا قبل شويه كنت في حضنو وبسمع دقات قلبو وشميت ريحتو قلبي عمل شححح صلحت الطرحه مع انو الشعر لسه نازل تحت الطرحه...حمد لي السلامه ورديت ليهو الله يسلمك كنت دايره اشغل عيوني بي اي شي غير اني اتمعن فيو لقيت صورتو قلبي تاني وجعني قوتي كلها خارت مات قدامي وماقدرت اساعدو كان بدافع عني تفاصيل مافارقت راسي مما مشيت من هنا حسيت نفسي دخت فجاءه وتاني لقيت نفسي في حضنو كنت محتاجه ليهو سرحت المجال لي عيوني بكيت بكيت بي طووووول روحي وعذابي بي طووول غيابي بي طووول شوقي....
🎀🎀🎀🎀🎀🎀🎀🎀🎀🎀
الي اللقاء في الحلقة القادمة
🎀🎀🎀🎀🎀🎀🎀🎀🎀