الجزء 4
طلع الدكتور من غرفة الحوادث بطمن في حاج احمد واهل مكاشفي انو الولد كويس الان والحمدلله ماوصل اذى للاعصاب رغم كبر الحريق..... بس للأسف ممكن تكون في اثار مع الزمن اي نعم حتقل بس حتخلي اثار وراها ...... وهنا حاج احمد وقف على حيلو واتقدم نحو الدكتور وعينونو ملانه خوف عليك الله دكتور اعمل كل البتقدر عليو من عمليات تجميل ده ولد لسه صغير ماحيستحمل احساس تشويه في جسمو .....
ياريت ياحاج ده امر لابد منه .... وطلب من محمد انو يدخل هو وعواطف يشوفو ...
🐚🐚🐚🐚🐚🐚🐚🐚🐚
عواطف كانت واقفه جمب وداد ماقادرة تشيل حيلة الا وداد سندتها ودخلو لي مكاشفي كان نايم من اثر المسكن الادوهو ليو بس لامن عواطف مسكت طرف يدو وبتبكي مكاشفي صحى واول كلمه قال امي مرامي كيف...
هنا وداد و عواطف و محمد الغرفه كلها دمعت ... عواطف مسكت يدو وقبلته ليو وقالت ربنا يحفظك ويحفظها هي كويسه بس بتبكي في البيت خليناهم هي وسلافه خايفين عليك....
انا كويس ارحكي نرجع البيت .
🐚🐚🐚🐚🐚🐚🐚🐚🐚
الدكتور جا على مكاشفي وتبطب على كتفو لا يابطل انت زهجت مننا ولا شنو انت حتقعد بس لي بكرة عشان نطمئن على الجرح ...
طيب جيبو لي مرامي ...وكان مكاشفي مصر اصرار ماطبيعي ..واضطرو يرضخو للأمر واتصلو على حسام خال مرام انو يمشي يجيبها هي وسلافه...
🐚🐚🐚🐚🐚🐚🐚🐚🐚
مرام مسكت حبوبتها وبقت تبكي ... حاجه فطين...تنقنق قطيعه في بنات الزمن والمسلسلات العلمتكن جنس ده يابت الجنى كويس بطلي بكى .
حبوبه ماشفتي كان بكورك و رجلو اتحرقت وبقت حمراء لون الدم بس...
ادعي الله ..مش علموكم الصلاة قومي صلي وادعي ...
🐚🐚🐚🐚🐚🐚🐚🐚🐚
سلافه قاعده تبكي في طرف الكرسي وعينها على الباب لامن شافت حسام جا لامن نططت عيونها قالت ليو ناس ابوي وين ومكاشفي.
حسام دخل الهول سلم على امو وشال سلافه ختاها في رجلو وقال ليها هو كويس وهسي قال يجيبوك انتي ومرام ...
لالا مرام ماتمشي هي الحرقتو انا بكرهها
🐚🐚🐚🐚🐚🐚🐚🐚🐚
حسام عاين لي حاجه فطين واشر ليها بي يدو انها ماتتكلم وقال وينها مرام ... وقبل مايتم كلامو جات مرام كاره توب امها والمصلايه حسام قرب يضحك ده شنو يامرام
دايره اصلي خالو وادعي لي مكاشفي ...
وطوالي ركعت ودعت بصوت عالي يارب مكاشفي يبقي كويس ورجلو تمشي تاني والله يارب تاني مابلعب ومابخش مطبخ ناس مكاشفي وبسمع كلام ماما حتى كلام حبوبه فطين بسمعو يارب اسمع كلامي وخلي مكاشفي كويس....
🐚🐚🐚🐚🐚🐚🐚🐚🐚
حاجه فطين ختت ايده في عيونها تقش دموعها قبل زول يلاحظ وقالت مخير الله .. الله يقومو بالسلامه ....
🐚🐚🐚🐚🐚🐚🐚🐚🐚
دخلو غرفة مكاشفي سلافة مما دخلت جرت لي مكاشفي حضنتو وبتسلم عليو وهو بسلم وعينو على البت الواقفه جنب الباب ولابسه بنطلون اسود مع تيشيرت بدون اكمام بمبي ومسرحه ضنب حصان ...مالك مرامي انتي كويسه...
انت زعلان مني لالا ...مخلوع وبي انزعاج قال ليها منو القال كده مافي زول قال بس انا دفقت الحلة الحاره فيك تاني ماحتلعب معاي صح ..
مرامي ده كلام شنو حألعب معاك وانتي ذاتك مادفقتي شي انا الجريت السلك .... وانا كويس تعالي شوفي..
جات عليو لمست رجلو ودنقرت على السرير وبقت تدعي يارب يبقى كويس هو صحبي واخوي انا ماعندي اخو تاني يلعب معاي...
مكاشفي زي الضربو ماس لامن مرام لمست رجلينو ولامن بقت تدعي ليو داير يكورك ويصرخ ويقول ليها مرام انا كويس انا كنت حاموت بالجد لو حصل ليك شي ....
🐚🐚🐚🐚🐚🐚🐚🐚🐚
وداد بعد تحانيس حتي رضن البتين يرجعو البيت ورجعت معاهم وخلت محمد وعواطف مع مكاشفي لي بكره لامن يخرجو ....
🎀🎀🎀🎀🎀🎀🎀🎀🎀🎀
الي اللقاء في الحلقه القادمة
🎀🎀🎀🎀🎀🎀🎀🎀🎀🎀