الجزء 53

اعطيتك الفلوس و الحين محتاجاهم و الا بدخل السجن عندي ايصالات باسمي ..

*كيف يعني !(بحاول استوعب).

_يعني رجعي لي جزء من الفلوس و بعد اسبوع الباقي !

*مريم ! انتي عارفه وضعي ، و كلمتك اني ح اسدد ليكي مع الوقت و انتي وافقتي ، انتي شايفه وضعي انا لو عندي مبلغ زي دا ، اكيد م كنت حأتسلف منك يا مريم !

_والله اسفه حبيبتي بس انا في حوجة ليهم حاولي تدبري امورك ..

*مريم مستحيل كيف يعني ! و دا ما كان اتفاقنا ، لو ككلمتيني ما كان اتسلفت منك والله ..

_دا بدل تشكريني ، تقولي ما كنتي راح تتسلفي مني !

*ايوة م كنت حاتسلف منك انا ما بقدر اسدد ليكي حالياً ولا بوعدك ..

_يبقى ندخل الشرطة بينا !

*مريم عيب انحنا ماكلين عيش و ملح مع بعض شرطة شنو في تعامل بيني و بينك ، انتي شايفه وضعي ، مستحيل اقدر اسدد ..

_اشتغلي شغل ثاني ..

*انتي شايفه ان مافي وقت كيف اشتغل ..مريم ارجوكي شوفي زول تاني يسلفك و سددي ليهو لمن انا اديكي !

_اسفة انا ما بتسلف من زول ، دبري راسك .. موضوع منتهي !

* .......

الدنيا مش ضاقت بي ، الدنيا ختتني في اختبار صعب شديد ، كل طاقتي راحت هم ، بقى ما عندي حيل و لا قدرة للجدل !

سكتا على كدا و وكلتا امري ل رب العالمين هو يدبر امري !

قمت خلصت غسيلي ، و بعد ساعه طبقتو و رصيتو في شنطتي ..

كنت برا في الحوش ، فجأة مريم نادتني ، قالت لي المدام قالت بتتصل عليكي و تلفونك مغلق ! م رديت عليها ، دخلت شلت تلفوني فتحتو ، و طلعت اتصلت عليها ..

*السلام عليكم .. مدام كيف حالك ؟

_خير ليش جوالك مغلق ؟

*في الشاحن ..

_رحمة ، بتعرفي شخص اسمه مؤيد !

*لا ابداااً

_ اااا اوكي

*لالا عفواً ... ايوا بعرفو ، خير !

_قال هو صديق ليكي و عايز يتطمن عليكي

و قالي اكلمك ترجعي تكلميه ..

*اوكي ، شكرااا

_عفواً ... بكرة نتفابل عايزاكي في موضوع

*ان شاءالله ...*قفلت

لاحظت ل مريم دايما بتحاول تعرف علاقتي بالمدام ماشه كيف و بتتصنت دايماً و بتعمل فيها مشغوله جمبي !

و انا ماسكة تلفوني اتصلت علي سيدة ..

*الو

_عارفاكي زعلانه مني لكن والله غصب عني

*اممممممم

_عملتي شنو ؟ّ

*هو الما عملتو شنو يا سيدة حمدلله بس ..

_ابوكي كويس ؟

*ايوا كويس حمدلله . وعمل العمليه ..ّ

_السلفك منو ؟

*سيدة الكلام كدا ما بينفع لازم نتقابل ..

_طيب فاضيه اسي ؟

*تعالي منتظراكي

_طيب حاخد تاكسي واجي

*تمام ... و في اللحظة دي متوكل كان بحاول يدخل لي بمكالمة و بيديهو انتظار !

و بعد قفلتا ، دخلت على رقمو و اديتو حظر ..

( في جانب متوكل )

_مالك يا ولدي ؟

*مافي حاجة ، شويه داير امشي المستشفى

_مش قالو ليك لو في جديد بيكلموك ، اقعد ارتاح يا ولدي ..

*ماقادر اقعد يا امي غالبني ..

_حاصل شنو ؟

*ما عارف اقوليكي شنو يا امي ، بس في سوء تفاهم مع رحمة ، و عايز افهما حظرتني و قبله ما بترد على مكالماتي !

_بسم الله ، كيف الكلام دا ..ّ

*والله يا امي ما بعرف ربنا بلاني بي وحدة ، ما وحدة دي مريم اخت رحمة من ابوها ، ياهو مرازياني و ما بتخجل يا امي ، و شالت رقمي و بتتصل ، و حذرتها و اتكلمت معاها و اخر شي حظرتها من عندي ..

_هي ما عارفاك خاطب رحمة !

*مافي زول بيعرف غير اسرة رحمة

_و سوء تفاهم في شنو ؟

*كنت بتكلم مع رحمة بعد العمليه قبال انتو تجو ، جات مريم جدعت ليها كلمتين و رحمة سمعتها ، و افتكرت اني عامل علاقه مع مريم و قفلت السكة و من وقتها ما بترد واخر شي حظرتني ...

_لاحول ولاقوة الا بالله ،، شوف يا ولدي ، انت اعمل العليك ، البت دي انت قلت حتجي بعد شهر بعد الزيارة تنتهي ، انت اجتهد يا ولدي سوي ليها حاجة اربطها بيها ..

و القطعه الفي البلد امشي بيعها و اشتري لينا هنا في الخرطوم و ابني لينا و ليك .. ما تتكلم كتير ، افعل بس ..

*كدا حتقطعو علاقتكم بالبلد لكن و يمكن اخواني عندهم نيه يرجعو ..

_ما بنقطعا بيت جدك قاعد ف اي وقت بنمشي ننزل فيهو واخوانك حابين هنااا. ّ

*طيب يا امي بسعى في الموضوع دا

_ربنا يسهل ليك يا ولدي ..

في جانبي جاتني سيدة .. فتحت ليها ، قايله حنطلع ، لكن جاتني هي و شايله اكياسها .. قلت ليها ادخلي الغرفة ، قالت لي لا هنا بس ، جيبي فرشة ولا حاجة ..

دخلت جواا ، جبت ملايتين .. فرشناهم فوق بعض و قعدنا في الارض (سيراميك نضيف م تخافو) ..

فتحت الاكياس ، جايبة عشاء ، ياها براته محشيه و مشوي ( قلت ليكم البلد دي احلا حاجة فيها الاكل) .. قالت لي انا واقعه جوع ناكل و نتفاهم بعدين افتحي العصير دا جربي رهيب ..

و انا زاتي كنت جعانه ، وقعت معاها في الاكل ،، جات مريم طالعه ، عاينت لينا عين كدا و دخلت الحمام و رجعت دخلت سلام ساي ما سلمت على سيدة .. سيدة قالت لي دي مالها دي !

قلت ليها اكلي بحكي ليكي بعد ناكل .. و. انا لمن اكون متضايقة بتحول لتمساح باكل اي شي ... خلصنا و بقينا قاعدين ، قالت لي مالك ؟

*محتاجة شغل اضافي يا سيدة

_ليه مالك ؟

*المغربيةالاسي شفتيها دي ، دي السلفتني قروش العمليه ،

واتفقت معاها اسدد على راحتي وهي وافقت ، و اسي جات طالبتني بالقروش لا و بتهددني بالشرطة اتخيلي ..

_خليها تثبت انك شلتي منها قرش ، مضتك على حاجة ؟ّ

*لا ابدااا

_انكريها حذب عشان طعين في الضهر ما حبابو ..

*ربنا موجود يا سيدة و بعدين البنك بيثبت ، عشان كدا لازم حل متورطة ..

_عايزاها متين قالت ؟

*عايزاها اسي في اقرب وقت

_عايزة كم ؟ّ

*5الف درهم ..

_(شهقت من الخلعه) لا مستحيل ما جادة طبعا ، انتي عارفه ال5دي تعال كم بالسوداني ؟

*عارفه انها كتيرة اسي اسوي شنو

_اها شغل شنو دا العندك ليهو وقت يا رحمة بتبالغي ياخ ..

*الحصل حصل يا سيدة

_عايزة الصراحه !

*قولي ...

_ما عندك غير شغله وحدة ،و معظم البنات الهنا شغالنها و اكون معاكي صريحه انا كمان بشتغل ، لان مافي حل تاني !

*الشنو دي انا بشتغل ما عندي مشكله

_.......

*مالك ساكتة قولي !

_ما عارفه اقولها ليك كيف يا رحمة ، جيبي تلفونك بكتبها ليكي في النوته ... افتحي البسورد ..

*طيب ..... هاكي

_ ( ....) ، اعفي لي والله بس انا صريحه معاكي ، و ما تفتكري انا بجرك للسكة دي عشان م اشيل ذنبك ، انا بوريكي الحاصل و الممكن شنو !

*ما جادة صح !

_لا جادة

*اعوذ بالله ، اللهم احفظنا ، سيدة يا ريتني ما استشرتك والله ، البتتكلمي فيهو دا مستحيل ، و بعدين انا بنت كيف بتقولي كدا !

_وريتك ، تاني ما بتجيكي قروش لو اشتغلتي في بنك ، م بتحصلي مبلغ زي دا في ايام ...

*فعلاً ما عارفه اشتغل شنو ، انا ما عندي وقت ، يومي كلو في الكوافير دا و اجي احط راسي وانوم ! بس كلامك دا مستحيل !

_غبيه ! ركزي معاي حتفهمي يا رحمة ..

انتي خطيبك مش خليتيهو بتقولي ؟

*ايوا ....

_و كنتي متزوجة قبل كدا ومتطلقه ؟

*ايواااا

_مشكلتك فهمتي و لا مافهمتي !

*.....!! سيدة ، ربنا بيفرجهااا بتترتب خلينا نقفل السيرة دي..

_تمام ...