الجزء 47
عاينت للسواق زول تلتينات ، و شكلو اماراتي بالقطرة والجلابيه ،، سلم علي قالي ازيك يا عسل... افتحي وشك دا خلبنا نشوف الجمال السوداني !
سيدة طوالي قالت ليهو ، روووق ، دي ما كداا .. طبعا انا استغربت واخدتها على اساس انها هظار ، بس ابداّ ما ارتحت ليهو ، قلت ليها انحنا ماشين وين ؟
قال لي ، حأخطفك ، صوتك يجنن امانة افتحي وشك .. قلت لسيدة انا عايزة انزل بكرة عندي دوام بدري ،،قالت ليهو ما تهظر معاها كدا و غمزت ليهو ، قالي اسف خلاص ، و كمل كلامو لسيدة ، قاليها ننزل ابو ظبي والله خاطري في عشاء فاخر .. قالت ليهو لالا مشوار بعيد ، وبعدين رحمة بتصحى بدري للدوام ، قالت لي جيبي تلفونك ، مدت لي يدها .. اديتو ليها ،،،
قالت ليهو تكفى سويلها نت، الخط جديد قاليها ابشري الحين بسويلها بس بنزل اجيب كرت اول ،، قالت ليهو تمام ..ّ
وقف العربيه و نزل ،، قلت ليها دا منو ؟
قالت لي صديق عادي ،، قلت ليها صديق ! قالت لي ايوة ! ما تركزي شديد بكرة جاياكي المحل بفهمك كل حاجة ، قلت ليها طيب .. جا طالع طوالي غيرنا الموضوع ،،شال تلفوني منها و نزل الرصيد و هبش مسافه ، و اداني ليهو قالي بعد ساعه ولا اتنين بيشتغل ، خليكي فاتحه الداتا ، قلت ليهو شكراا ...
و سالنا نتعشى شنووو ، سيدة قالت لي زي امس ،، قاليها و انا كمان يعجبني بطاطسهم
... و بعدها نزل ،،، و جا راجع شايل شكلاتات و شيبسهات و بسكوتات ، ختاهم لي جمبي ، انا قلت اكيد دي شايله البيت معاهو و ما دققتا ...
بعد شويه السندوتشات طلعت ، جابهم و جااا ، حرك بالعربيه و قفنا في حتة و قعدنا ناكل ، قالي حتاكلي بالغطوة بعد ؟
سيدة : خليها على راحتها ، عشان م تنزل من السيارة دي ما زينا ...
سكت وانا خلاص وصلت حدي ، و قام غمز ليها ، وهزت ليها راسها مرتين ، وانا بعاين ، للحظة حسيت الدنيا دي كلها ضدي !
بس استحملتا لانو خياري ...
ما كان في حاجة تزكر لحد ما رجعنا البيت ، بس وانا نازله ، قالي شيلي الاغراض دي معاكي انا جبتها ليكم ، سيدة قالت ليهو غرفتي مليانة، شيليهم يا رحمة ، قلت ليها لا شكرررا م دايرة ، المهم كدا كدا ، شيلوني الحاجات ، رجعت لقيت السكن مافيهو غير الباكستانيات الجمبنا . غرفتنا فاضية ، دخلت استحميت و رقدتا ...
قلت اتصل اتطمن علي ابوي ،، دخلت hello card، فضل لي زي 15 دقيقه فيهو .. اتصلتا
..
*سلام عليكم ... ااا يمنة !
_وعليكم السلام رحمة كيف حالك
*انا كويسه بس مالك بتردي انتي ؟ امي وين؟
_انحنا في المستشفي من قبيل ، مع ابوي ، و امي و متوكل بيتكلمو مع الدكتور
*خير في حاجة حاصله لابوي ؟
_ما عارفه بس مافي حاجة ، بس بكلمهم بخصوص اخر تحليل وبعدو بيحددو العمليه و يورنا لازم نعمل شنو !
*طيب ، بس ترجعو كلميني انا بتصل ..
_طيب ...
قفلت معاها على كدااا ...
( في بيت عمي )
_ الفاضل ، انت في شنو حاصل ! سافرت فجاة من غير ما تكلمنا ، و بعد رجعت ما طبيعي حاصل شنو ؟
*مافي حاجة ..
_كيف مافي حاجة ! حتى ما علقتا على سفر رحمة ولا مشيت ليهم تطمن عليهم ولا حته بتزور محمد اخوك .. دا كلو ومافي حاجة ؟
*انتي مصممة تناقشيني. عليكي الله خليني انتي زوله صاحبة مرض ما تخليني اعصب فيكي ساي ..
_انا دايرة افهم يا الفاضل ، الحاصل دا ما طبيعي ابدااا ...
*طيب عايزة تعرفي ! يبقى على شرط ما تتغيري من اولاد اخوي لات م ليهم ذنب ..
_قبل اعرف حاصل شنو ، اذا هما ماليهم ذنب زي ما بتقول انت اتغيرت منهم ليه طيب ؟
*يبقى ما ح اتكلم !
_لا اتكلم ، و انا زوله حقانية غلطة زول ما بتخليني اتعمى لدرجة اخرب وش مع الباقين !
*قبل سفري ، كان لاقيت واحد من بلدنا زاتا،، و طلع بيعرف عيلتنا و كم نفر من ناسنا القدام الله يرحمهم ، وجات السيرة و حكى لي عن قطعتين ارض حقات ابوي الله يرحمهم ، شالتهم الحكومة على وضعيات ، المشكلة م هنا ، المشكلة انه لمن ورث ابوي اتوزع محمد و احمد اخواني قالو دا كل الورث الباقي والبلد ماعندنا فيها حاجة ، و حسب كلام الراجل دا انه محمد اخوي رجع القطعتين ديل بمبلغ رمزي و اجرهم و وحدة حالياً بانين فيها فرن و بياخد الايجار شهرياً ، انا ما صدقتا و سافرت البلد و اتصدمت لمن لقيت الكلام دا صح !
_الفاضل ، معقول تصدق كلام زي دا عن محمد اخوك ؟ معقوله الراجل الفاضل دا البيصلي بالناس و عارف حق ربنا ، ممكن يعمل عملة زي دي ؟. قبل ما يكون محمد اخوك ، في عشرة يا الفاضل. ,و انا متأكدة في غلطة !
*نفس الفكرت فيهو ، لمن وسواسي زاد و تفكيري زاد مشيت اتاكدتا بنفسي ولقيت الكلام دا صح !
_في غلطة يا الفاضل ، وعيب لمن تقاطع بيت اخوك بالطريقه دي ، شالو نفسهم براهم و ما مدو يدهم لي زول يا الفاضل ، انحنا بجنيه ما ساعدناهم ، معقوله ! وين حبك للبنات يا الفاضل وين حبك لاخوك ، حتى لو هو عمل كدا الدم عمرو ما يبقى موية !
*كلامك عين العقل ، انا فترة وبرجع ان شاءالله ... و سماح دي وضعها شنو كل ما اسألها ما بتحكي و منشفه راسهاا ، دايرة الطلاق !
_
اولادي ديل انا ما عارفه حصل عليهم شنو طلاق وجوطة ، ما عارفه فجاة كدا كل حاجة جاطت الحمدلله بس ، حمدلله ...
في جانبي ، رجعت اتصلت على امي !
*الووو
_رحمة كيفك
*حمدلله يا امي ، رجعتو ؟
_اي لسه ماغيرنا زاتو
*ابوي كويس ؟
_كويس ! بس .....
*في شنو مالو ؟
_قالو ، جاتو قرحة سريري ، رقد فترة و انتظر كتير ، ولازم عمليه في اسرع وقت ، غير كدا ظهر ليهو سكر في الدم ، و الوضع ما مطمن يا بتي ، و ياهو متوقفين على قروش العمليه !