الجزء 3

طلعتا ، جري .. هي الجزارة ما جمبنا طوالي ، يعني لو اخدت ركشة خمسة دقايق بوصل ، و مشي زي 12 دقيقه كداا تقريباً ..

المهم ، بقيت ماسكة دربي دغري لمن وصلتا ، كان في راجلين واقغين منتظرين طلبهم ،و ما شايفه ابوي ، شايفة لي يدين بتقطع اللحمة من برا بالقزاز ، و الفخذه المعلقة مغطية وشو ، بس دا ما ابوي ، انتظرتهم لمن طلعو .. و قفت جمب الباب ، و عاينت ياخ ، بالجد '' سبحان من زين وجوه الرجال باللحي '' اطلت النظر فيهو من تحت النقاب ، و انا عارفة ان " النظرة الاولى عليك ، و الثانية عليك " فاا ربنا يسامحني ، و كان شاب اواخر عشرينات .. قلت ليهو :

* السلام عليكم ..

_ سكت ورد بعد مدة ، و عليكم السلام ‏( بما اني منقبة فا التزم برد التحية كاملة ... و رحمة الله و بركاته ‏) ..

* ابوي وينو ؟

"_ ضحك " ابوكي ضايع عندنا يعني ؟

* حاج محمد عبد المنان !

_ اااا اااسف اسف والله ، مم ما . ...

* لالا عادي ، هو وينو ؟

_ مشى واجب عزاء ، بس عفواً انتي جيتي عشان الكبدة صح ؟

* اايوة !

_ لحظة ....

.......*

_ اتفضلي ..

* عليك الله دبل لي الكيس داا ..

_ جداً ...... كدا تمام ؟

* ايوة ،شكرااااً ... بس معليش على السوال ، انا ما عرفتك صراحه ، جديد هنا ؟

_ ما جديد شديد لكن شكلك انتي الطولتي ما جيتي ..

* هه فعلاً ... يلا عن ازنك ..

_ غريبة !

* نعم ! قلت حاجة !!

_ لالا لالا ابداً

* كأنك قلت غريبة !

_ صص صرااحة ، جاتني وحدة قبلك و برضو قالت بت الحاج ، و اديتا الكبدة و اسي .. انتي كمان بتقولي بتو و .......

* اهااا ، ايواااا لالا عادي !

!!!...._

* مع السلامة ...

_ الله يسلمك !!...

مشيت البيت ،،بعد وصلتا ، اتصلت على امي وريتا اني شلته الكبدة و ما لقيت ابوي و كدا ، و بعدها ، دخلنا في موضوع مكياج يُمنة ، طبعاً يلا يمكن من التناقض تشوفو اني وحدة ملتزمة ، صيام و نقاب وصلاة و .. الخ

و بحب المكياج ، اااي بحبو وحلمي امتلك افخم الخامات و جميع الانواع واشتغل في المجال دااا ، لان اقنعت نفسي من ناحية الدين و الحرام ، انو : انا علي اسوي المكياج انما الاستخدام دا عليها والزنوب عليهااا ، انا كل البعملو اني حأمارس حاجة بحبها شديد ، و دا طبعاً بيظل مجرد حلم ، عشان كدا قعد احاول احققو في بنات اهلي و بنات جيرانا و يُمنة زي ما شايفين ... الخ ، و الفهم السائد للكوافيرة بيعاملوها كأنها وحدة ما بت ناس، او ما عندها اهل يلموها ، ما عارفه لكن دي فكرة مجتمعنا العايشنو دا ،امنيتي ابقى ميكب ارتست ....

و عارفه انه مستحيل ...

‏( في جانب تاني ‏)

* والله يا محمد ما عارف ، يمكن يكون تفكيري دا متخلف ولا رجعي ، يعني ما تفكير شاب في عمري ، بس صدقني دي رغبتي ..

_ ابوها بديك !

* ما بعرف ، ما بعرف ...

_ طيب انت عندك حاجة اسي ، ما عندك يا متوكل غير شهادتك القاعدة في الدولاب ..

* يا محمد عليك الله براها مقفلة ياخ ، ما تقفلا علي زيادة ، و بعدين ياخ فيها شنو ببني ليها فوق ..

_ ما بقفلا بس لسه بدري على الموضوع دا . و بعدين انت وحدة ما شفتها كيف بتفكر فيها كدا !

* دا احساس انت ما حتعرفو ، و على كل حال انا ما مستعجل لسة ....

اتزكرتا شيماء المنتظراني ، اتصلت عليها تلاته مرات في التالته ردت ...

_ لسه بدري ، كان تكلميني انك حتتسحري و تكلميني ..

* شوشو ، روقي ياخ والله انشغلتا ..

_ طوااالي في الحالة دي ، متين بس وريني كنتي فاضية ، من يومين بتغسلي و قبلو بتكوي و اسي مشغولة ..

* يا الله ، شوشو عليكي الله بطلي نقتك دي حلفتك ياخ ..

_ اصلاً كلامي دا مُر و ما بيتبلع ..

* الليلة ووووب اناااا ،كدي وريني قريتي ؟ بقتلك لو ضيعتي اليوم دا ساي ..

_ قريت عندي شنو غير القراية الله يخارجنا بس ..

* هانت خلاص ، الصبررر ... تعالي هنا ! المزهجك كدا شنو ؟ خطيبك طبعاً !

_ هو في غيرو ، سجم الرماد نجضني نجاض ياخ ..

* اها هههههههه حصل شنوووو

_ بتضحكي ، هااا صحي اليدو في الموية ما زي اليدو في النار ...

* ما قصدي والله ، بس مشاكلكم زي مشاكل الشفع ما عارفه لكن نهائي ما عاقلين ، و بعدين اناي عارفه راي في موضوع الخطوبة والحب دا ، دي فترة من عمرك حقتك براكي ، تقري و تتثقفي و تتعلمي و تستفيدي تمهدي لمستقبلك ياخ ، العلاقات دي بتعجز بالزول ، بتخلي محور حياتك كلها شخص ، ياخ جربي حياتك دي هي زاتا تكون المحور ، ياااخ في حاجات احلا من الكلام الفارغ داا ...

_ اااااااففف عندما تتحدث الشيخة ، اها ما نفسك تجيبي لي حديث و تحللي لي و تحرمي لي زي ما بتعملي كل مرة ، ياخ انا مصاحباكي ليه ، يااااا ربي الحمدلله غايتو واحد مطلع عيني و صحبة جايبة لي الضغط المصبرني عليكم شنو انا ، لا والمصيبة بحبكم ، ياخ طيري ، اديني يُمنة ، دي الزوله الفلة ...

* كووووويس يا شوشووو اصبري ، و يُمنة زاتا مافيشة ههه

_ كذابة ، مشت وين ؟

* عرس وحدة صحبتااااا

_ اححي اها شوفي جنس دااا ، شافعه قدر يُمنة عرسوها و انحنا قاعدين لمبرووك و اميين ..

* ههههههههه والله انك سطحية و تفكيرك محدود ، و بعدين انتي مخطوبة

بدور العرس يختي حكون دايرة شنووووو مثلاً ، اجاخد في سبيل الله !

* ههههههههه والله لكن ، دا كلااام ...

_ ما اديتك الشمار !

* قولي

_ تتزكر سيدة !

* سيدة منو ؟

_ ياخ بت جيرانا الدفعه القدامنا !

* ما عرفتها والله !

_ ياخ باعرفيها ، رقيقة كدا و بتلبس نضاراتك كعب كباية مدورة !

* اها ايوااا عرفتهاا ، دي جبتيها من وين زمن ما شفتهاا ههه ...

_ بس ، اتخيلي ،سافرت دبي ..

* استغفر الله ، ياخ انا اسي قايلة عندك موضوع والله ، طيب مبروووك عليها ..

_ دا الموضوع زاتو بقوليكي سافرت دبي !

* طيب حلووووو اها والمشكلة وين !

_ مافي مشكلة ياخ ، اقفلي عليك الله . استاهل اناااا البتصل بيكي ..

* انا المتصلة على فكرة هه ...

_ ما تستفزيني يا رحمة ، سلااااام، قفلت

* لحظة يا مجنووونة ما تقغلي ياخ ... الووو هههه الوو ، قفلت هههه صحي مجنونة ...

بأختصار شديد دي ايامي ، انضغت شديد في القراية يعني مكرسة حياتي كلها عشان اقرا و ابقى محامية ناجحة و افتح مكتبي الخاص و اترافع عن قضايا مختلفة ،

كان حلمي اجيب حاجة في البيت من مالي الخاص رغم انه ابوي والله ما محوجنا لحاجة والحمدلله ، و وضعنا ميسور ، بقليلا و بي كتيرها ماشة ، و زي ما بقولو .. من حمدو زادوو ،، فا الحمدلله ...

‏( في جانب عمو الفاضل ‏)

_ محمد دا اخوي يا اسعد

* يا ابوي عارف انه اخوك ما قلتا حاجة ، بس البتطلبو مني دا صعب شديد يا ابوي ..

_ يا ولدي ما تقولي فلانة و علانة ، رحمة بتنا و اتربت قدام عيونا و بت نلتزمة وانت براك عارف كدا ، انا شايف انها انسب وحدة ليك يا اسعد و انا ابوك يا ولدي ما بدور ليك الحاجة الكعبة ...

* ابوي و تاج راسي و انا كلي تحت رجولك و تحت شورتك ، بس انا عندي اسبابي التمنعني عن الزواج دا ..

_ اسبابك ! وريني رغم اني ما شايف اي سبب يخليك ترفض بنت عمك ، اذا على البيت جاهز ، و اذا على شغلك ، الحمدلله على احسن ما يكون !

* ما كدااا يا ابووووي ، لكن ال ....... قاطعو

_ يبقى نتوكل يا اسعد الله يرضى عليك ، البنت دي ما يستاهلها واحد غريب ..

* يا ابوي صعب والله .....

_ جرب يا اسعد يا ولدي ، ...

* بعدين يا ابوي البت دي انا ما شفتها من وعينا على الدنيا دي و هي بالنقاب لمن مرات بحس انها اتولدت بيهو ، لو ما من صوتها ما بعرفها ...

_ في حاجة في الشرع اسمها الشوفة الشرعية ..

* ‏( قال في سره ، الظاهر ما عندي مهرب من الموضوع دا ، اااااخ بس يا ابوي لو تفهمني ، بس لو تفهمني ‏) ..

_ سكتا مالك ؟

* لالا مافي حاجة ، الفيهو خير ربنا يعدلو ..

_ امين يا رب ..

المهم ، مشت الايام ما بين ضغط نفسي ، و ارهاق جسدي ، كنت بحاول قدر الامكان اني اجتهد عشان انجح في آخر امتحان لي ، و ما عايزة اي نجاح وخلاص ، لالا ، عايزة حاجة تخليني ارفع راس امي و ابوي .. و فعلاً جات علي ايام ، ناس امي ديل ما كنت بتلاقى معاهم الا في صينية الاكل و شيتي بكون في يدي ..

يلا فجأة حسيت الدنيا جاطت عندي ، و صادفت الامتحانات ، مع زواج سماح بت عمي الفاضل ، ياهم جيرانا ، و طبعاً بقو البيتين مفتوحين على بعض ، بيت عمي و بيتنا ، كان فضل لي ، زي امتحانين واحد مصادف بكرة و باهو حنة سماح ، و الامتحان الاخير ، كان بعد العرس بي يوم ..

لقيت الوضع ما بيتحمل ظروفي ، طوالي قررتا امشي بيت خالتي ، فعلاً لميت حاجاتي و فتشت امي فتيش من نص النساوين ، جبتها غرفتي وجيت ...

_ بسم الله في شنو يا رحمة ؟

* عايني يا امي بصراحة انا ما قادرة اتحمل !

_ في شنووو ! و بعدين مالك لابسه عبايتك ماشة وين ؟

* ماشة بيت خالتي نجوى ، والله يا امي ما قادرة اقرا هنا ولا الكذب بينفع و انتي عارفه انا امتحاناتي دي مهمة بالنسبة لي قدر شنو !

_ جنيتي انتي ! عيانة انتي ولا شنو ! اول حاجة خالتك نجوى دي انا بحنسك حنيس عشان تمشي ليها زيارة ساي ما كنتي بتقبلي ، لا و كمان عايزة تخلي مناسبة بت عمك اللي هي في بيتك و تمشي ! دا كلام شنو ؟

* كيف يا امي كلام شنو ، اقرا كيف انا ولا وين بس وريني ، بي هنا ونسة و زغاريت ودق ريحة و جوطة شفع ، و بي هنا اغاني ، و بي هنا ما عارفه شنو ، اسوي شنو طيب دليني يا امي ..

_ انا قافلة عليكي غرفتك دي عشان مافي زول يدخل و يمرق عليكي اسوي شنو اكتر من كدا !

* امي هي غرفتي دي في بيت تاني ؟ ما ياها في نفس البيت لو زول عطس ساي بتجيني جمب اضاني !

_ رحمة ، انا ما فاضية للكلام دا ، الحريم مستنني ، طلوع برا مافي ، عييييييب ، و بعدين ليكي شهور بتقري اكيد ما حتمشي تمتحني يد ورا ويد قدااام ، بدل كلامك دا تعالي ساعدينا وري الناس وشك !

* دا كلام شنو يا امي ، بدل تشجعيني بتقولي كدا ! و بعدين انا القعده برا م بتنفع معاي و الباب و الشبابيك فاتحة و اكيد في رجال يا امي داخله طالعه ، اقعد كاتمة نفسي بالنقاب !

_ رحمة ! انا فترتا منك ، كدااا ووووب و كداا وبين ، انا طالعه ، و دااااك ابوكي امشي كلمي ..

* يا امي لحظة بس ..

_ ما ناقصه انا عليكي الله يا رحمة ..

يا الله يا امي ، يا الله ، اسوي شنو انا اسي ، و ابوي مستحيل يرضى امشي

عند

خالتي ، ياااا لطييييييف ، مستحيل اقرا كيف بس يا الله ، اااااااه ....

فكيت تلفوني من الشاحن ، واتصلت علي ابوي ......