الجزء 30
الموضوع دا غريب و اكبر من كدا ، بس اريج حاولت تستغل موقفناا بسلطة ابوها !
في حاجة غلط و ما مفهومة !
قلت لمتوكل امشو انتو البيت انا عندي مشوار .. قالي مشوار وين يعني !
امي قالت ليهو خليها تمشي ، بتكون ماشه لنبع الحنان و بناتها ..
قلت ليهو نزلني ، قالي رحمة انا بتكلم معاكي ، انا بوصلك محل ماشه ، قلت ليهو لا بمشي براي ، رجع امي البيت لو سمحته ..
فتحت الباب و نزلتا ، نزل وراي و ينادي فيني ، قلت ليها متوكل لو سمحته انا حأخلص مشواري و ارجع البيت ما تعقدا اكتر من كداا !
قالي لا ما حتمشي مكان براككي ..
عاينت ليهو و اديتو ضهري و مشيت ! ..
لمن قنع مني و شافني راكبة راس ، ركب العربيه و مشى ، حصلني قالي اركبي .. قلت ليهو متوكل كلامي دا ما عربي ؟
امي قالت لي ماشة وين يا رحمة ؟( عشان تشوفو قلب الام دا كيف ، مهما تزعل و تنفعل بيكون من ورا قلبها و بتتصنع القسوة ، والله الام عمرها ما تقسى و مهما تعملي غيرها زول بيسندك مافي ، حتى لو كبرتي و بقيتي بي بيتك و اولادك ، حتلقيها لسه شايله همك و قلبها عليكي ، و الوحيدة الما بتزلك و لا بتمسك ليكي اغلاطك ..ربنا يحفظ كل ام ) ..
قلت ليها ماشة بيت ابوي يا امي محتاجة اعرف حاجات من مرة ابوي ، و هي الوحيدة الفي يدها الحل بعد رب العالمين !
متوكل قالي اركبي بنمشي كلنا ..قلت ليهو لا ، امي و مرة ابوي ما حيتلمو والمشكلة حتكبر ، انا محتاجة اتكلم معاها و افهم كل حاجة يا متوكل ، و هي كويسه معاي متاكدة ما حتدس عني حاجة ..
قالي بوصلك بس لا انا لا امك مافي زول فينا حينزل ! عاينت لامي قلت ليهو شكلك ما بتعرف امي يا متوكل ، وخصوصا اسي القلوب شالت اكتر ، انا ما عايزة مشاكل زيادة ، .. عاينت لي وسكتت عارفه هي انو كلامي صح ،، قالت لي اركبي ما حأنزل !
بس ما تستغل عقلك فاهمة، مع انو ابوكي يستاهل ، ديل البداهم علي .. قلت ليها يا امي ابوي دا ما اتزوجها من الليله و لا امبارح ، اتجاوزي الموضوع دا ارجوكي حاليا ما تهري في نفسك زيادة ! ..
المهم ، ركبتااا و راسي دا داير يطرشق من الصداع و النتح ..
( في بيت عبدالله ابو اريج )
_ انا ما قادر افهم يا ابوي الحاصل
*ولا حتفهم و انت تفكيرك كلو في مناهل
_من حقي افهم ، قبل عرسي بي يوم العرس يفشكل يوم العقد يا ابوي ليه ،. لا و كلامك دا زب الانا متزوجها من غير رضاك ولا غريبه ، ياها بت اختك ، قبل انا احبها كانت اختيارك ، اسي وقت اتعلقت بيها بقيت واقف ضدي ! يا امي اتكلمي قولي حاجة !
اريج : غبي خلاص ، اسي عاجبك فيها شنو المعصعصه دي ، صحباتي بي رقبتا ، اشر على اي وحدة و نخطب ليك ست ستها !
_اريج لمي لسانك و كلميني بي ادب و اتكلمي عن مناهل بي ادب ، ولمن اتكلم مع ابوي انتي ما تدخلي فاهمه !
اريج : كان عرستها تعال قابلني يا العاشق الولهان !
*اريج !
اريج : سكتا يا ابوي !
*في خلاف بيني و بين عمتك ابتسام ، و هي عاندت معاي و انا كمان عاندتا و حصل الحصل !
_طيب انحنا ذنبنا شنو يا ابوي ! اسي الناس يقولو عليها شنو لمن عرسها يفشكل يوم العقد يا ابوي ، الكلام دا غلط و ما صح و انا باقي على مناهل و ما داير غيرها، واي خلاف بينك انت و عمتي حلو بعيد عننا لو سمحتتا ..
*عرس مافي يا حسام ، موضوع منتهي !
_اديني سبب مقنع يا ابوي
*من غير اسباب ، دا قراري ، زي ما قررتا انك تعرسا ، اسي قررت انك ما تعرسهاا ..
_ و انا ما الرجال اليرجع في كلمتو ولا الراجل الاخليها تبكي وراي و لا الراجل الاصغر راسها قدام الناس ... مع احترامي ليك يا ابوي ، خلافك دا ما بيشملنا ، و انا حأكمل عرسي دا على اكمل وجه ، ما بخزل ولا حأخزل مناهل ..
*انا في وانت في يا حسام ..
_ولا انا الراجل البقيف في وش ابوه ، لكن انت ربيتني على المنطق ، اديني عيب ولا سبب يمنعني اتزوج مناهل ، و انا تحت امرك يا ابوي ، غير كدا انحنا ما شفع ولا عرس لعب لعب ، انا حاجز و عازم و دافع قروش والاكبر من دا مناهل ، روحي فيها و بيها لو اموت مل بقدر اخليها ..
امه : حسام ما تجيب لنفسك الكلام يا ولدي
_انا ما بت يا امي عشان انجبر ، انا راجل و الراجل كلمتو بتحكمو .. هو نفسو ما عنده سبب مقنع ... عن ازنكم ....
اريج : هئ والله لكن ، نعيش و نشوف ، حسام كمان بقى يتكلم و يقرر ، بالله يا ابوي يقيف قدامك بكل بجاحه و يقول حأعرسها ، دا كلام ...
امها : اريج ياخ انتي شنو ؟ جايبه الحقد دا كلو من وين ، ليه بتهيجي و تقومي النيران بالطريقة دي ؟
اريج ؛ انا بقول الحق
*حق في راسك ياخ ، بدل فصاحتك و قلة ادبك دي امشي شوفي ليك قراية تنفعك ، بدل حارفه روحي و كل سنه بتاخديها في سنتين ...
اريج : اللهم يطولك يا روووووح !
( في جانبي )
وصلتا بيت ابوي ،ما عايزة اقوليكم ان البيت زي الما فيهو ررح ، لدرجة الصيوان لسه مربوط و مفكوك كدااا ، و شريط الزينة جزو متركب و جزو واقع !
قلت لامي ، قبل انزل يا امي ، الوضع ظاهر من برا ، ان الزواج دا فشكل ، ارجوكي وضعهم اكيد ما
يسمح ، فا ارجيني لمن اجي ولو اتاخرتا مسكلي لي بس ارجوكي ما تعمليها يا امي ... !
قالت لي انزلي انزلي ..... نزلتا ،، مشيت على الباب لصلا فاتح ، ( باب حديد ضلفتين كبار لونو لبني ) ..
خبطتا خبطاين و دخلتا ... مافي حس و مافي زول .. بقيت بنادي في مريم ،، جاتني طالعه عيونها دي حمرااا ، وقفت لي في باب البرندة و قالت بصوت مبحوح ' دي رحمة' !
دخلتا لقيت ابتسام حاضنة مناهل ، و قاعدين في السرير ..
خالتو ابتسام قالت لي تعالي اقعدي يا رحمة ، مشيت على مناهل و قعدت جمبها و شالت راسها من صدر امها و حضنتني و بقت تبكي ، انا حسيت بالذنب ..
قلت ليها : حقك علي انا السبب .!
رفعت راسها قالت لي السبب في شنو ؟
قلت ليها لو كنت سمعت كلام خالتو ابتسام و اعتزرتا ل اريج يمكن م كان حصل كل داا .. رجعت راسها قالت لي بو كنتي اعتزرتي ليها كنت ضبحتك ،. خالتو ابتسام قالت لي انت ما سبب ولا حاجة يا رحمة ، هو اخوي حسبي الله ونعم الوكيل فيهو !
قلت ليها يعني انتي عارفه ؟
قالت لي ايوة ، كان بيهددني قبلها بفترة اللي هو اي خلاف يحصل يقولي انتو ماكلين و شاربين من خيري ، و راجلك دا انا مشغلو عندي و ممكن اطردو في اي لحظة ، في اي خلاف حتى لو تافه كان لازم يسمعني الكلام دا ..
قلت ليها طيب انا عايزة افهم ، هو استفاد شنو اسي ، طيب مناهل وضعها شنو ؟
قالت لي وضعها زي ما انتي شايفه كل خاجة اتلغت بسبب خلاف بيني و بينو ، و اختار يوم العقد عشان عارف مناهل م عندها وكيل غير ابوها ، يا رحمة اليوم دا كان اسوء يوم في حياتنا زي الكابوس كل ما اتزكرو دمي بيغلي يا رحمة ..... ( قعدت تبكي و بناتها معاها ) ...
قلت ليها انا ما قصدي اتضايكم ، بس ابوي وضعو حرج و لحد اسي ما قادرين نفهم حاجة ، و كل السنين دي انحنا ما عارفين انه الجزارة دي حقت اخوكي عبدالله ، كل الزمن دا قايلنها حقت واحد صحبو زي ما بيقول ،، و لا حتي ما كنا بنعرف عبدالله دا اخوكي الا بالصدفة و احنا بنفتش لسيد الجزارة عشان يشهد و يتكلم عن ابوي و نقدر نطلعو ، بس للاسف طلع اخوكي وانا متأكدة دا فعل مقصود يا خالتو لانو رفض اي مساعدة. و اتعامل معانا بطريقه بشعه !
اتخلعت قالت لي انتو وداكم ليهو شنو ؟
قلت ليها الحوجة يا خالتو. حنعمل شنو كل الطرق مقفله في وشنا و ابوي هناك رافض يتكلم ولا يدافع عن نفسو حتى !
بس الباب خبطت في اللحطة دي ، انا اترعبتا قلتا 100% دي حتكون امي ....
مصيبة و حتحصل !