الجزء 2

جداً يا غالية !! رغم انو اتربينا انا و انتي نحترم رغبات بعض ، فا ما كان مفروض اصر على حاجة انا مقتنعة من جواي انها بتجي من نفس الزول ، ما بيلذو عليها ..

_ مشكلتك يا رحمة في كل مرة تفتحي معاي الموضوع دا ،انا قاعدة احس اني بعصي ربنا لمن اقوليكي لا انا ما حابة ، انا ما رغبتي اسوي الحاجة دي ، ما عارفة بجد يا رحمة ، بس انا ما نفسي ، حاولي تفهميني ،ااي انتي اختي البحبها ووبحترمها و نفسك تشوفيني احسن وحدة ، بس دا ما معناتو ابقى شبهك و اعيش كآبت ........

* كملي ، كلامك .... قوليها ...

_ انا اسفة يا رحمة ، بس كل واحد فينا شايف الحياة دي بمنظوور مختلف و ابعاد مختلفه ، و وريتك رغبتي و زي ما انتي كنتي بتتمنيني كنت اكون بشبهك ، انا كمان كنت بتمنى انك كنتي تكوني شبهي ، و ما اربط حياتي بصحباتي و احسهم بفهموني اكتر منك ،ما قصدي اقارن بينكم بس دي الحقيقة ،مرات كتيرة بتمنى لو كان عندنا اخت تالته و ... ..

* انا يا يمنة ما كنت بعيدة منك بالعكس كنت جمبك و بحاول اشاركك بس يمكن عشان فرق العمر بينا مخلي كل وحدة تفكيرها مختلف ، بس انا بتوجع لمن بتقولي انك م شايفه فيني الاخت المثالية وكلامك دا ، بس انتي ما حصل لجأتي لي في حاجة و ما لقيتيني معاكي يا يمنة ، انتي حياتك مع صحباتك ، حصل مرة قلتي لي ارح معاي وانا رفضتا ؟

_ عشان عارفه و متأكدة يا رحمة انه ما جوك و متاكدة انك كنتي حترفضي و براكي قبل شوية قلتي لي ما تفكري تدبسيني !

* انتي عارفة اعراااس و حفلات و اغاني لا ، لكن مشوار و طلعة ، انا قداااام ..

_ طيب ، دا الانا عارفاهووو

.......* انا ما معقدة يا يُمنة ، انا عادية بس انا قمتا لقيت روحي كدا !

_ اعفي لي انفعلت و قلت كلام يجرحك ياخ حقك علي ‏( باست على راسي ، و حضنتها ‏) ..

* ما بزعل منك انا انتي روحي .... يلا وريني حتلبسي شنو عشان اسوي ليكي مكياج ، العرس كلووو يتكلم بيهوووو ...

_ هههههه واثقة ، البنات حيتهبلو عليهو ااااح متحمسسة ..... انا مااااشه اشوف اخر الاخبار من امي .......

* طيب ههههههه ..

بعد يُمنة طلعت من عندي ، امي جاتني قالت لي ، بكرة الجمعة ، لمة العيلة ، الجمعتين الفاتو ما مشيتي معانا ، بكرة حاولي تجي معانا ، قلت ليها دي الحالة انك عارفاني ممتحنة الفترة الجاية يا امي ، انا ما بتعذر لكن جد صعبه ، بس اخلص امتحاناتي اطلبي مني الدايراهوووو ... قالت لي ما حسبتها ، كدا بس كمان عشان يُمنة ما حتمشي معاي عشان عرس صحبتها داا ، و انتي ككلامك صح ، كل دا ملحوووق و ربنا يوفقك ، يلا قومي المغرب فضل ليهو عشر دقايق و يأذن ، كله جاهز بس سخني ، و التمر مغطى في الكورية البرتقالية جوا التلاجة ، قلت ليها مافي عجوة اسويها بالسمنة والسمسم ؟ قالت لي ما عارفه كانت في بس سمنة مافي ، قلت ليها ما مشكله يلا انا قايمة ....

فعلاً قمته ، مسافة جهزتا اكلي ، و دخلته اتوضيت ، الاذان اذن ، شلته تمرة حللته صيامي ، سمعته صوت الباب فتح ، قلتا حمدلله ... مشيت على الباب ، قلته ليهو حمدلله انك جيت يا ابوي ، و مشيت حبيت على راسوو ، و فضلتو ، قالي :

_ مالك كنتي منتظراني اجي ولا شنو ؟

* اااي يا ابوي والله زي ما عارف الليلة الخميس و صراحه شهيتي مقفولة ، امي و يُمنة اتغدو قبيل و مافي زول حياكل معاي فا ما صدقته سمعت صوت مفاتيحك ههههه ..

_ قبيل اتصلته على امك كلمتها اني متغدي مع الفاضل اخوي لكن كان كداا ما بودر اجر الصايم ، قومي سرعه سرعه عشان احصل الصلاة ...

* لالا يا ابوي انا اصلاً سميت وحللته انت امشي بمهلتك على الجامع بعد الصلاة ان شاءالله ناكل اصلاً ما جعانة ...

_ حرام انتي من الصباح صايمة ..

* يا ابوي يلا بنتظرك ، انا زاتي مسافة اصلي ..

_ الله يبارك فيك يا رحمة اسم على مسمى ..

* الله يسعدك يا ابوي و يديمك لينا يا غالي ، يلاا ما تنسانا من صالح الدعوات ..

مشيت من جمب ابوي بعد سمعته صوت تلفوني بيرن ، و خليتو جمب خشم الباب طالع على الجامع .. رديت ....

_ ضاربه ليك كم مرة انا ؟

* شوشو ، اسمعي انا صايمة هااا اصلي و افطر و ارجع ليكي ..

_ هااا كذااابه ولا حترجعي يا رحمة ياخ مالك انتي بقيتي كدااا ..

* اسفة و غلطانة والله حقك علي م تزعلي و الله برجع ليكي ..

_ خلاص طالما حلفتي مصدقاكي ...

* يلاااااا

_ تمام ...

بعدها قمت صليت ، و سخنت الاكل تاني ، و بقيت قاعدة منتظرة ابوي يجي ، جا قريب صلاة العشاء و وشو نهائي ما كان مبشر بالخير كان في حاجة غلط ، رغم انه كان بينفي و انه مجرد صداع ، الغريبة لمن شافني قاعده بصينية الاكل قدامي ، قالي عشاكم بدري ، امك وين و يُمن !!

قلت ليهو :

* ابوي قول بسم الله ، دا فطوري انا منتظراك ترجع عشان تاكل معاي زي ما اتفقنا !

_ يا الله ، نسيت يا بتي والله ، اعفي لي ياخ ، كان تاكلي لمن لقيتيني اتأخرتا .... قربي الصينية دي جااي تعالي .....

* ولا يهمك يا ابوي ، اسي ما فات شي ، الاكل معاك زاتو فيهو بركة ...

_ ربنا يتقبل ... اها امك وين م كلمتني !

* ياهو مع مرة عمي بي غاد

ي معاها يُمنة ، قالت لي بس تجي اناديها ...

_ لالا خليها تفرق ، انا زاتي بصلي العشاء وارقد انوم عشان مصدع .. و صاحي بدري ..

* عندي بندول يا ابوي ، اديك ؟

_ لالا ... عللجي نوم بس

* قدامك العافيه يا ابوي ، اكل اكل ! مالك وقفتا !

_ والله اتمليت فل حمدلله والشكر لله ، ربي يديمها علينا نعمة ، اكلي انتي الجعانه من الصباح دي ...

* يا ابوي ياخ كنت متقلني عليك الله مد يدك اكل تاني شويه بس ...

_ حاااااااضرررررر

__ دا ابوي ، حاج محمد عبدالمنان الجزولي ، بحبو لدرجة لا توصف ، يمكن انا خالفت قاعدة اني احب امي اكتر ، ما عارفه بس بميل لأبوي بزيادة كدا ، لانه حنين ، رغم ال ***............................

في مواضيع ما بحب افتحها ، بفضل اني اسكت عنها لانو يكفي اني عايشاها ، فا انتو حتعرفو كل حاجة مع الاحداث الجاية .. و

بصراحة ما عارفه ، اذا من الضروري اعرفكم بنفسي ولالا ، بس انتو اسي عرفتو حاجات كتيرة عن حياتي ، فا حأوقول ليكم المعتاد ،، طبعاً اسمي رحمة زي ما عارفين ،، رحمة محمد عبد المنان الجزولي ، اساساً من كسلا بس ياهو استوطنا هنا ، و قرينا هنا انا واختذ ،و كسلا دي اخر مرة مشيناها في عيد الضحية الفات ، المهم بقرا # حقوق اخر سنة ، و ما كانت عندي رغبة معينة ، بس كانت رغبة ابوي لشئ في نفسه و انا حبيت تخصصي بعد درستو والحمدلله ... فا ...

اكيد كتار منكم مستغربين انا ليه سميت قصتي # شرق 8 ! اسم مبهم !! حقيقة هو ما مبهم ، هو النواة ، اللُب ، نواة قصتي ...

يعني حخلي الاحداث تتكفل انها توريكم كل حاجة ، وعلى فكرة انا ما بحكي ليكم عشان تنصفوني ،لالالا لا !!..

انا رحمة محمد عبد المنان الجزولي ، اتولدتا في ديسمبر يوم 10 سنة 1991 ، انا خالفت قاعدة اني اكتب قصتي لاني مظلومة او فقيرة ، او عشت قصة حب فاشلة او اتزوجت بالغصب و زواجي ما نجح ، .... الخ

لا انا رحمة و بكل قوااي العقلية ،بقوليكم انا ما مظلومة ! انا # ظالمة ، مبتزلة ، بائسسة ، حقيرة ، و مزلولة ، و متهانة ، ......... الخ # تابعوني ...

تاني يوم ، بقول لأمي :

* امي بتنتظريني ؟

_ وين ماشة ؟

* ماشة معاكي اللمة !

_ يا بت انتي مش قلتي عندك امتحانات جاية ! و اتكلمنا و اتفقنا !

* انا كنت مساهرة لحد الصباح يا امي ، زهجته والله !

_ اول مرة تشتكي من القراية ..

‏( جات يُمنة ‏) ..

يمنة : لا كدي دقيقه يا رحمة ، ماشة وين انتي ؟

* اوووووووف ، نسسسيتك والله ، انتي ابوي خلاص اداكي الموافقة ؟

_ قاليها عشرة طق تكون جواا البيت ..

يمنة : اها امي ورتك ..

* طيب خلاص يا امي ، امشي انتي انا حأقعد عشان اسوي ليها مكياج ، انا وعدتهاا . ، و بعداك بقعد اقرااا ..

_ طيب ، بعدين م تنسى تربسي الباب كويس و ما تفتحي لأي زول ، و انتي يا استاذة ما تجيبي لي الكلام مع ابوكي ، عشرة دي تجي ، طق تكوني جوا البيت دا ! فاهمة ؟

يمنة : حاضر ...

* حااضر ..

_ يلا مشيت ..

* مع السلااامة ...

قعدت شوية الملم في البيت و اروق ، لحد الساعه 2 جات ، امي اتصلت علي ..

* السلام عليكم امي ..

_ و عليكم السلام ، اسمعيني يا رحمة

* قولي يمة !

_ تخلي اي حاجة في يدك بتسويها ، و تلبسي عليكي الله تجري جري لأبوكي في الجزارة ، شيلي منو الكبدة و ختيها لي في الفريزة جوا ..

* هي ، لكن يا امي كدا كدا ابوي بجي ، طيب خلي يجيبها معاهو !

_ ماشي عزاء ، قبيل كلمني و انا طلعت ونسيت ، اسي حصليهو ، انتي عارفه كان اخرناهو حيزعل ..

* حي يا امي ، طيب طيب ، مسافة اللبس بس ..

_ سرعه عليكي الله ..

* خلاص يا امي مسافة اللبس بس .

_ طيب يلااا ....

انا ابوي بشتغل في جزارة ، هي ما حقتو بس بيشتغل فيها من زمان شديد و كبرت مع الزمن و هو الماسكا زي الحقتوو ...

المهم لبست عبايتي و نقابي ، و شبشبي و جريت جري ... مالكم !! هه اااي انا منتقبة والحمدلله من عمري 16 سنة ، %80 من شباب عيلتنا ما بيعرفو شكلي عامل كيف .