الجزء 13
قلت ليهو لحظة لو سمحته ( بحسم و شدة ) .. لدرجة انه اتخلع ، وسكت ...
و مشيت اتجاه اسعد !!.....
مع حركتي انا ، لقيتهم اتحركو الاتنين بخطوة وحدة وكدا اسعد زاتو بقى ماديني ضهرو !
حاولتا امشي بسرعه ، بس وقفتا ، اااي وقفتا ، اها و بعد امشي ! حيحصل شنو ؟
حأقوليهو شنو ؟ صراحه ما عندي كلام ، كل الكنت الحابه اعملو اتطمن انه بخير من باب الواجب ، حتى لو هو ما عمل الخطوة دي ، فا دي تربيتي ابوي لي !
طوالي رجعت ل ورااا ، و قلت للزول انا اسفه ، شبهت على زول يعز علي و طلع ما هر ، بعتذر ، ممكن نطلع ؟
قالي اتفضلي ،، و مشينا على الاسانصير ، و طلعنا ، فتح لي الباب ، و قالي دقايف والعشاء يكون عندنا ! قلت ليهو اقيف لحظه !
قالي نعم ، قلت ليهو منو البطلب لي و زابط ليكم المواعيد دي ؟
قالي ما عندي فكرة ، قلت ليهو تمام ، قعدتا في طرف السرير ، بقيت بهز في رجولي !
و م عارفه في شنوو ، للحظة زعلت من نفسي قلت انا مالي شغاله بالموضوع كتير ، اكيد دي وحدة معرفه ولا حاجة ، انا مالي ومالو بس على الاقل يجي يطمن علي !
قاطعني الباب ، خبط ، قلتا بس العشاء جا ، فتحت الباب دايرة امد يدي ، لقيتو أسعد !! واقفه متنحة ، قلت ليهو السلام عليكم ، قالي و عليكم السلام ، ااا انا جيت عسان اقوليكي نص ساعه و نتحرك تكونب اتعشيتي !
م رديت عليهو بس واقفه و بعاين فيهو من تحت النقاب ، قالي ، تمام !
م رديت ، جااا العشاء ، قام اسعد زح ، قاليهو ما جبت ليها مويه لشنو ولا عصير ؟
قاليهو ، بجيبهم اسي ، عاينت لبهو لقيتو راجل كبير ، قلت ليهو اقيف ، ما تجيب حاجة المويه عندي ، بس على مهلك بعدين شيل الصينية ... ابتسم من قلبه و اتحرك ..
اسعد قالي ، اكلي اسي بس السواق يجي بديكي خبر ،، برضو ما رديت ..
دخلت وقفلت الباب مجرد م حرك رجلو ، وقعدت ، تلقائياً رجلي بقت تتهز ، قمتا ، شلتا فرشتي و مشطي وحاجاتي لملمت كل حاجة في الشنطة ،و ختيتا في الارض جمب الباب ، عاينت لصينية الاكل ، بعد دايرة امد يدي ، نفسي مرقت من الاكل ، بقيت حاسه انه في حاجة منتظراني ، لا ما دي الحياة الممكن انتقل ليها ، ما دا التغير ، قلتا اصبر بعد نمشي البيت اكيد التعامل حيكون مختلف ، بس كل القصه انحنا ما متعودين على بعض !
خبط الباب ،نزلت نقابي ، و مشيت فتحته ، قالي جاهزة ؟
قلت ليهو اييواا ، زحيت ليهو من جمب الباب ، عشان يشيل الشنطة ، عينو وقعت على الصينية ، قالي ،مالك ما اتعشيتي ؟
قلت ليهوو م جعانه اتغديت متاخر ، قالي طيب يلااا ، اديني المفتاح ،، مشيت شلتو اديتو ليهو ، قالي معليش ختي في جيب القميص ، لانو شايل شنطتي و شنطتو ،، قلت ليه حأمسكو ليك لحد م ننزل ،، قالي تمام
طلعنااا ، عادي جدا ، لحد ما نزلنا و جات العربيه ، ما حصل اي نقاش بينا ، هو ركب قدام و انا ورا و ولضح في معرفه سطحية بينو وبين السوااق ،، كان مشوار علقة ، لحد ما وصلنا ، كان بيت عادي ، يعني ماشقة ، بيت بسيط من برا و ظاهر عليهو ياداب متشطب ، ياداب سور من برا ، حتى الواطه قايمة و محتاجة موية ،،
المهم نزلتا و مشيت قدامو عند الباب ، لحد ما حاسب و جاب الشنط ، قالي ما الباب دا ، الباب تاني دا لسه مافيهو كيلون ، جيت ، لحد ما وصلتو كان فتح الباب و دخل ، و دخلت وراهو ، ولع نور الحوش ، الحوش حتى تراب مافي بلاط ولا سيراميك !
دخلنا لجواا ، عرفت ان دا باب الزقاق طوالي بتقابلك البرندة الجمب و فيها سريرين ، دي حته منفصله ، و بهناك الحمامات ، يلا الحته الدخلني فيها دي براها ليها مفتاح ،
كان فيها غرفتين و مطبخ ، نظام مفتوح مع الصالة ، و جلسه و تلفزيون و سجاد ، يعني رايق و بسبط و واضح دا الفرش الكانو شغالين فيهو اليومين الفاتو ...
المهم ، قالي ، رايك شنو في البيت ؟
قلت ليهو ، ماشاءالله ظريف ،، قالي انا عارف انه ما على قدر كدا يمكن يكون بالنسبة ليكي ،لكن بس بالنسبه لي احسن من مليون فلة لانو بنيتو بشقاي ..
قلت ليهو بالعكس حلووو ...
قالي تعالي شوفي الغرف ، بعد الفرش انا زاتي اول مرة اشوفهاا ،، قلت ليهو تمام ،،
اول غرفه فتحهاا ، ما كان فيها سراير ، فيها تربيزة سفرة ام اربعه كراسي ، و ستارة في الشباك و سجادة و مساند نجدعه نظام شٍلت في الواطه ، حسيتو اتخلع هو لمن شهق كدااا ..
قلت ليهو حبيتا حلوة !
طوالي قام مشى على الغرفه التانيه ، فتحها فيها غرفه نوم اقل ما يقال عنها خرافية ، سرير دبل كبير و دولاب و كومدينة ، يمكن دي احلا حته في البيت ، بالجد روووعه ..
هو فضل ساااكت ، ما اتكلم نهائي ..
قالي ، دي الغرفه رصي باقي حاجاتك ، و رتبي امورك ، انا ماشي اجيب عشاء ، عايزة حاجة من برا ؟
قلت ليهو دايرة رصيد ، قالي شريحتك شنو ؟ قلت ليهو زين ، قالي تمام ..
و مشى ،، دخلت المطبخ اشرب مويه ، لقيت التلاجة دي ماشاءالله كل حاجة فيها ، طيب عشاء شنو الماشي يجيبو دا !
قلتا بيكون ما شاف التلاجه ، حاولت اطلع احصلو ، بس اتاخرتا و هو طلع ..
بقيت رايحه جاااية ، عاينت لقيت في شاشة ، فتحتهاا ، م عارفه مسكني توتر ، اتخنقتا من النقاب فترة طويلةفي وشي ،عايزة اغير و مما حاسه بي راحه ،خصوصا ان الغرفة مشتركة ، اسوي شنووو !
دخلت الغرفة فتحت وشي ، وطلعت الحاجات من الشنطة ، دخلتها الدولاب ، ورصيت حاجاتي كلهاا ، طلعت تلفوني ، وصلتو في الشاحن ..
و طلعت برا الغرفه ، بقيت سامعه صوتو زي البتكلم مع زول بررااا ، واقفة مسافه سامعه صوتو بس الكلام ما واضح !
يمكن بعد نص ساعه حتى جا داخل ، غطيت وشي ، قالي مالك ما غيرتي ! سكته ما رديت ، قالي طيب ، دا العشاء ، اكلي انتي انا حاقعد في الحوش اخدي راحتك ، قلت ليهو حا اكل براي يعني ؟
قالي انا شبعان ، قلت ليهو تمام ، خليتو طلع ، شلتا لي جلابيه ، دخلت الحمام اخدت حمامي و غيرتاا ، و جيت المطبخ اكلت سندوتش ، و انا طالعه لقيت كرت شحن .20 ، شلتو ، و دخلت الغرفه وقفلتا الباب ، و رقدتا ، مسكت تلفوني ، نزلتا الرصيد ، فعلتا النت ، و بقيت بتصفح لمن التلفون وقع من يدي و نمته ، صحيت عشرة ،،
طلعت بالتوب ، ماكان في زول في البيت ، طول النهار براي ، و بلبل نفس البرنامج ، يطلع الحوش و انا اقعد في التلفزيون لحد م انوم ، وشي ما شافووو ولا فكر حتى بتونس معاي عشرة دقايق ! ..
لحد مافي يوم قلتا لحد متين ، انا مليت ، . اذا في حاجة انا اخير لي امش بيت اهلي ، بقيت ما عارفه اتصرف ،، وصلت لمرحلة اخدت قرار ، انا الاتكلم معاهو !
انتظرتو لحد ما جا من براااا ، و الكلام دا تحديداً عاشر يوم من يوم ما جينا البيت دا ، يعني لينا 13 يوم متزوجين ...
لمن حسيت بيهو جا ،لبست توبي و غطيت وشي ،وبقيت قاعدة في الصالة ، لمن دخل ، سلم ، شال جلابيتو ، دخل استحمى ، و جا المطبخ و انا شايفاهو ،قالي جعان ! بصراحه احترت لان دي اول مرة يقول جعان ،ويمكن اول مرة ف حياتي اشوفو حياكل !
المهم قلت ليهو تعال اقعد ،، و قمتا ،هو طلع وانا دخلتا المطبخ ، قالي اي حاجة خفيفه ، هزيت راسي و ما ريت ، كان في سجك ، طلعتو حمرتو و ختيت جمبو مش ، و طلعت ليهو الصينية ، و دايرة ادخل الغرفة ، قالي ماشه وين ؟
قلت ليهو في حاجة ؟ قالي ااااا اقعدي ،، قلت ليهو انا اكلتا ،قالي ، اقعدي ساي !
صراحه استغربته ، الا كان عندو حمه في راسو ..
قعدتا في طرف الكنبة الجمبو ، و مسكت الريموت ، و عامله فيها بتفرج ،،
كان بياكل و يعاين لي بطرف عينو ، زي العندو كلام داير يقولو و متردد ولا شنو ما عرفته !
استمر الوضع دا قرابة النص ساعه ،قالي :
_ مستغربة !
* ..... ّ
_ عارفك مستغربة ، من تصرفاتي الغريبه ، بس انتي ساكتة عليها ليه ؟
......*
_ طيب ، ما سالتي نفسك لحد متين ؟ رضيتي و اتحملتي من اول لحظة !
* شوف يا اسعد ، في احتمالات كتيرة لكل حاجة في الدنيا دي ! و انا الزواج داا ما عندي فيهو ركايز ، يعني اللهم حياة !
_ بمعنى شنو ؟
* بمعنى دي حياة و بيت ابوي حياة ، و انا عايشه في كلتى الحالتين والحمدلله نعمة .
_ انتي غريبة يا رحمة !
* يمكن ،، لانك ما بتعرفني دي كل القصة و انا نفس الشي ما بعرفك ..
_ رحمة !
* قول الكلام المن قبيل بتحاول تقولو و ما قادر ، و عشان اشجعك كمان ، اياً كان الحتقولو ما خطير بالنسبة لي ..
_ انتي ما شجعتيني انتي حيرتيني !
* اتوكل قول كلامك و لعله خير ..
_ انا لمن اتزوجتك ، اتزوجتك برغبة ابوي ما برغبتي انا ، ارغمت على الزواج دا و ما كنت بقدر ارفض لابوي طلب ، انا اسف اني بقول كلامي دا و ممكن يجرحك ، بس صدقيني ما بيدي ، و عارف دا ظلم ليكي ، بس ،،،، بس والله في وحدة في حياتي و انا بحبها ! ...
_ انا لمن اتزوجتك ، اتزوجتك برغبة ابوي ما برغبتي انا ، ارغمت على الزواج دا و ما كنت بقدر ارفض لابوي طلب ، انا اسف اني بقول كلامي دا و ممكن يجرحك ، بس صدقيني ما بيدي ، و عارف دا ظلم ليكي ، بس ،،،، بس والله في وحدة في حياتي و انا بحبها ! ...
و ....
* طيب انت كراجل مفروض تكون قراراتك محسومة ، بكل احترام تقول رايك ، انت ما بنت عشان تنجبر ، حتى البنات ما اظن ينجبرو على زواج ، و بصراحه انا بستغرب لمن اسمع عن وحدة انجبرت على زواج ، فما بالك راجل حر نفسه ينجبر ، كونك تحترم قرارات عمي حاجة و كونك تخضع ليها و هي ما بتلائمك دي حاجة تانية ، وما بعتقد عمي من النوع الحاد دااا .. الا اذا انت نفسك ما مقتنع بعلاقتك مع الانسانه ديك انها حتستمر معاك لمرحلة زواج و لالا ...
و .. وكمان انا زواجي منك ما كان تحت ضغط او اي تأثير ، لمجرد انك اختيار ابوي م اكتر ، مما عندي حاجة تخليني ارفض ، عادي زي ما في بيت ابوي حياة ، هنا كمان حياة و دي سنة الحياة ، اااي الزواج تقليدي رغم صلة الرحم البينا ، بس ما مسبب لي ضرر شخصي ، و ممكن تشوفني انسانه غريبه ، بس صدقني دي اناا ...
_ فعلاً مافي راجل بينجبر ، بس زي م انتي شفيتني رغبة ابوكي انا كمان شفتك رغبة ابوي ،،
* بس انا ما عندي علاقة حب ، ماا كسرت قلب زول ،نا اذيت زول بزواجي منك ، دا الفرق ، الليله لو انا عندي علاقة حب كنت حادلفع عنها لان الحب ما حرام ولا عيب !
_ .........
* حاجة اخيرة يا اسعد ،مفروض انا نا اقولها ، بس بتمنى زواجنا يفضل كدا لمدة و بعدها ننفصل ، و تحافظ على علاقتك ، و صدقني انا بقول الكلام دا و انا مقتنعه و ما متضررة نفسياً بالعكس ، على اللقل عرفت اسباب تصرفاتك معاي ، و ان السبب ما انا !
لمن اكون انا ما مذنبة بحس بي رااااحه ، و اسي انا بتمنى تعتبر نفسك ما اتزوجتاا ، و حافظ على حبك ، الحب ما بجي مرتبن يا ود عمي !
_ بس دا ظلم ، و حتتحسب عليكي زواج و اهلنا والناس ، الكلام كلو حيكون عنك ..
* اسعد يا ود عمي ، طالما ماشة بما يرضي الله و مستقيم ! ما بيهمني لو ظهر ضلي للناس اعوج ! .... يلا لو خلصتا خليني اشيل الصينية ...
_ اا اا ااااي خلصتا ..
* هنياً ...
شلت الصينية لملمتها ، و ولعت لي فحم ، بخرتا ، وهو قاعد من مكانه ما اتحرك ، لحد المغرب اذن ، مشى صل في الجامع و رجع قعد محلووو ، بتفرج في التلفزيون وبضحك ، حسيت زي الكلامو ما انتهى و في باقي ، و صدقوني انا فعلااا ما فارق معاي بيحب ولا لا ، بالعكس استصغرت تصرفو !
بعدها ماسكة تلفوني و بتفرج اسنابات ، وحاسة عينو معاي ،، عاينت ليهو طوالي قبل !
قلت ليهو في حاجة ؟
قالي ، ايواااا ... انا ...
ما عارف بس انا ما عندي نية اطلقك ، انتي كمان انسانه ، كويسه و ليكي حقوق مفروض تاخديها .. قلت ليهو بس دي رغبتي ..
انت قلبك مع وحدة تانية مستحيل البيت دا تكون فيهو حياة يا اسعد ، بالعكس عادي ، . رايك شنو لو قلت ليك عرفني بيها !
عشان هي زاتا ترتاح من فكرة انك بقيت انسان متزوج ، طالما بتحبو بعض البمنع شنو تكونو مع بعض !
سكت ! قالي بتوافقي اتزوجها عليكي ؟
سكتا من صدمة كلاموووو ، وقفتا قلت ليهوو ، اي انا ملتزمة و بعرف ربنا كويس ، وعارفه الشرع حلل اربعه ، بس ما انا اليتزوجو فيني ، وانا م قصرت معاك ، و قلت ليك علاقتك م بتفرق معاي و حاولت اعمل الانت م قدرت تعملو في انك تحافظ على علاقت ، يبقى بما انك اتزوجتني خارج عن رغبتك وارادتك ، يبقى تستمر معاي على الاساس دا ، و بعد تطلقني تقدر تتزوجها !
قالي تعالي ، لحظة ، قلت ليهو في شنو ؟
قالي ما تزعلي مني والله ما بقصد حاجة انا بس حاولت احافظ عليكي و ...
قلت ليهو منتهي يا اسعد ، اعمل الداير تعملوو بس تطلقني ...
قالي تمام ، طيب خلاص روقي انا اسف !
دخلت الغرفة و قفلت الباب ، طلعت التوب وكشفت وشي ، لسه دايرة اقعد خبط الباب ، قلت ليهو من ورا الباب ..
* ايوااا يا اسعد ..
_ داير حاجة من الدولاب ..
* حاجة اقدر اناولك ليها انا ؟
_ لالا
* طيب دقيقه ...
لبست التوب و غطيت وشي ، و فتخت ليهوو ، دخل كابس في الدولاب ، شال حاجات ، قالي عايزة حاجة ؟ قلت ليهو لالا سلامتك،، وقف زي الداير يقولي حاجة ، قلت ليهو في حاجة ؟
قالي والله في حاجة بس نسيت داير اقول شنو !
قلت ليهو : قول ، ' اللهم رد لي ضالتي ، تلاتة مرات ' .... سكت مسافه ، و مشى .. قلت ليهو اقفل الباب عايز حاجة تاني ؟
قالي لا طالع ...
طوالي قفلت الباب علي ، و جريتا نومه لحد العشاء ، صحيت بخبيط باب الغرفه ، قلت ليهو اسعد ؟ قالي ايوة يلا العشاء !
قلت ليهو اكل انت انا شوية و بجي اكل ، قالي طيب ..
قمته ، مشيت الحمام لقيتو قاعد والاكل قدامو ، بعد طلعته قالي تعالي اقعدي ، قلت ليهو لسه حأصلي المغرب و العشاء ، قالي بستنااكي ، قلت ليهو لا اكل طالما الاكل قدامك ، قالي صلي و ما عليكي ..
شلت مصلايتي و دخلت الغرفه ، صراحه مستغربة في التغير المفاجأ دا ، دي اول مرة حناكل مع بعض ، قلتا م مشكله ، انا واجبي اتعامل حسب اخلاقي وتربيتي ..
صليت و طلعتا ، لقيتو فاتح mbc2 , فيها فلم كرتون البجيبو مع mbc3 , انفعلتا من الفرح قلت ليهو م تغير خلي خلي هههه Rio2 يا سلااااام ياخ دا متين نزل الجزء التاني ، قعدت اتفرج ، قالي الاكل طيب ! قلت ليها يلااا ..
جايب اقاشي وو سلطات و شطة ، عيني في التلفزيون و يدي في الصينية ، بحب الكرتون شديد .. جات الدعايات حتى استعدلتا في قعدتي ، و ياداب عاينتا لقيتو بعاين فيني ، اتربكتا ، قلت ليهو مالك ؟
قالي ولاشي !
قلت ليهو تمام ، انا احتمال بكرة امشي اشوف نتيجتي سامعه بقولو طلعت ، قالي تمام طيب ، حا اديكي رقم عم احمد ، كلمي قبل مشوارك بنص ساعه بوديكي و بجيبك اي مكان .. سكتاا .... قالي في شنو ؟ قلت ليهو مافي حاجة بس بمشي بطريقتي عادي ، قالي تمام ، بس اتزكرت قبيل كنت عايز اقوليكي ، اهلي و اهلك حيجونا و سماح رجعت من السفر حتجي معاهم ، و حيجونا المساء، بعد بكرة ياهو الجمعه ، قلتا اكلمك عشان لو حابه تجهزي نفسك لحاجة ! و عاين ليديني محل الحنه الاتسحقت ، قلت ليهو حبابهم اصلا اشتقت ليهم ...
قالي ، حاجيب الحلويات من برا بس عليكي الشاي ، قلت ليهو تمام ..
قالي فلمك بدا افتحي الصوت ،، فتحت الصوت و بقيت بتفرج ، لحد الساعه 11:30
قمت شلت الصينية ، لاحظت ليهو بينوم على نفسه في الكنبه ، قلت ليهو اسعد صلح رقدتك !
قالي غطيني بس ، قلت ليهو طيب شيل المساند من تحت ضهرك ، لقيتو غمض ،، مسافة دخلتا جبتا ليهو غطا ، حاولتا اطلع المساند من تحتو ، و غطيتووو ، طفيت النور خليت نور واحد خفيف و دخلتا الغرفه ،
قفلت الباب ، مسكت التلفون ، من انستقرام ، فيس لاسناب ،
دخلت ماسينجر لفيت رساله من اسم غريب كدااا، مكتوب ماندو بالانجليزي ، فتحتها ، لقيت الرساله فيها : انا مايكل يا رحمة ، ارجوكي اديني فرصه اوضح ليكي الحصل انا اسف صدقيني ، اسف !
رجع بي لي لحظة انا بتجاوزا و ما بحبها ، طوالي حزفت الرساله ، و سويت حظر ، بس بقيت بفكر اسوي شنو عشان م يحسو ان ف مشكلة ولا حاجه بيني و بين اسعد !
خططتا و رتبتا وضعي تمام ، و جريت غطاي و نمته ...
صحيت ، قبل اقوم اتصلت على شيماء ..
* السلام عليكم شوشو
_ وعليكم السلام هلا بالعروووووس ، عاد العسل من لسانك ظاهر ..
* بطلي امور ، كيفك ؟
_ حمدلله بخير .. وانتي ؟
* حمدلله بخير ..
_ لازم تكوني بخير عاد اسعد السعادة والهنا والروووقه احي يشيلني السيل انا هههه ..
* ياخ اسمعي بطلي عوارة ..
_ قولي ...
* النتيجة قالو طلعت بالجد ؟
_ لالا اشاعه بتطلع التلات ..
* متاكدة ؟
_ دي نتيجه ما امتحان ،ما بيضر يعني ، المهم متأكدة ، بس تطلع برسلا ليكي في تلفونك ..
* م تنسيني ..
_ عيب انسى اختي حبيبتي برضو !
* دا العششم برضو ... يلا ارجعي لي ..
_ طيب
* مع السسلامة ..
، جريت غطاي و رقدتا ، نمتااا ..
صحيت بصوت اسعد بيخبط ، في الباب ،، قلت ليهو لحظة يا اسعد ، قالي لا انا بس داير اصحيكي لمشوار الجامعه الساعه 11:30 ، قالي انتظرتك عشان اوصلك معاي !
قلت ليهو انا ما حأمشي لسه النتيجة ، قالي خلاص كملي نومك مافي داعي تفتحي انا طالع ،ولو عايزة حاجة اديني تلفون !
وانا بين نايمة وصاحية ، قلتا دا مالو دا !
رجعت اتغطيت عشان انوم تاني ما قدرتا ، طوالي قمتا ، على البيت اصلاً نضيف ، زهجة مني ساي حولت شكل رصة المجلس والتلفزيون ، و الزينة المرصوصة ، بعداك طلعت على الحوش رشيتوووو ، و جريت الخرطوش بالشباك ، لفيت توبي و غطيت وشي ، و رشيت حولين السوور كلوو ، و قفلتا شباكي ،اظن مسافة قفلتو الواطه نشفت مع السموم دي ،
دخلتا ، اخدت حمام ظريف كداا ، و طلعتا ، عملت شاي وسندوتش و قعدت للتلفزيون ،،
تلفوني ضرب جوا الغرفة ،دخلتا اجيبوو ، من السرير ، لقيتو بيدي انذار شحن ، فتشت شاحني م لقيتو ، فتحت الادراج ، لقيت واحد ، وانا بطلعو من الدرج ، في ورقه خفيفه صفرا ، وقعت ، عايزة ادنقر اشيلها كدا ، تلفوني اتصل ، من امي ،،
مشيت وصلتا التلفون و والونسة جرت ، بعدها ياهو في التلفزيون ، عاينت للزمن لقيتو الساعه 3 ، فكرت اخت لي حنة ساده ! اترددتا اسعد يجي و اكون مربطة ما حقدر اتحرك ، اسوي شنو !
و امي توصي فيني كمان لو جات لقتني كدا ياهو واطاتي اصبحت ،، بس قمتا لبست عبايتي و نقابي ، وشلت محفظتي ، والمفتاح و طلعتاا ،،
لقيت شفع بلعبوو . بنات عمر 11 ، او اقل ، قلت ليها في حنانة هنا ؟
قالت لي ما بعرف ، والتانيه قالت للتالاه ، هي انتي مش امك بتسوي ، قالت ليها ما بعرف ، قلت ليها ما بترسم حنة ؟
قالت ورح بسوقك بيتنا .. المهم م بعيد حفظت شارع بيتي ، مشيت معاها ، لاقيت امها ، قالت لي كنت بعمل لكن بطلت بتعمل لي حساسية ، لمن حست بي محتارة ، قالت لي طيب بسوي ليكي بس حاجة بسيطة ، قلت ليها م مشكلة اي شكل بس عشلن عروسه ودي اول حنة لي بعد العرس و اهلنا جايني بكرة .. قالت لي الحعملو ليك م بناسب وضعك ولا برضيني اسوي ليك شكل هندسي ولا جداعه ، قلت ليها خلاص انا بشوف لي كوافير ، قالت لي لالا .... اصبري ..
مشت زبطت اكياسها وحاجاتا و جاتني ، قعدنا ياهو نتونس و شغاله لي بمزاج ،انتهينا و بقيت قاعدة للنشفان ، رسلت بنتها البوتيك جابت لي شرابات و جوينتات نسيت حقاتي ،، فعلا جابتن لي و غسلتها و حاسبتها و مشيت منهااا .. هم و انزاح .. وبصراحه عزتني بي رسمة للساق .. م قصرت ..
المهم ، مشيت البيت ، لقيت اسعد حاضن تلفونو دا عديل و حابي في التلفون لمن ما جايب خبر اني جيت !
لمن شافني قام ناطي ، قالي كنتي وين انتي ؟ّ انا قايلك جوا الاوضه !
قلت ليهو لا طلعت مشوار و رجعتا ..
قالي وين يعني ؟
قلت ليهو الخط فاتخ ... و دخلتا الغرفة ..