الجزء 14
قلت ليهو الخط فاتح و دخلتا و قفلتا الباب ..
حسيت مكان الرسم بياكلني كلوو ، طلعت العبايه و الشرابات والجوينتات لقيت مكان الرسم دا احمر احمر ،، جريت جبت فازلين من التسريحة ،، عاينت قلتا دا محتاج مضاد حيوي شان م يلتهب ، فتشت مرهم ، و بقيت بمسح ، و فتحت المكيف و بقيت واقفه قصادووو ، حتى الحكة وقفت ، و اللون هداا شويه .. شويه شوية بدا يروق ، خفتا قلبي دا يطبر مني ....
تلاته ساعات على اعصابي ، حقت العرس ما عملت لي كدااا ... رقتا و اخدت نفسي و اتاكدت ان كلو تمام ..
مشيت على الدولاب كدا عايزة اقعد ليهو اسعد خبط ،، قالي تعالي ثواني !
قلت ليهو في حاجة مهمة ؟ قالي للاكل بس ، قلت ليهو اكل انت انا باكل بعدين ، قالي تمام .. قعدت ، كان في حاجات انا مشترياها و ما لبستها بحكم النقاب ما حاجات تبع الشيلة ، زي قفطان مغربي ، عندي سكري في دهبي ، و واحد لون زينب مطرز ، بفكر اللبس ياتو فيهم ... اخر شي علقتهم الاتنين في الشماعه ،، و ذلعت شنطة مكياجي البحبها ، و ختيتا برا ، م خليت حاجة ،،، للشبشب طلعتوو ،
و مسحت مرهم تاني و رقدتاااا ..
لمن جعتا شديد ، اتخمخمتا للشراريب لبستها تاني ، طلعتاا ، لقيتو لسه بيتكلم و يوشوش في التلفون ، بس من يشوفني يجدع التلفون و يتربك ، كان قاعد بيقيف و كان واقف بيقعد ،و كان راقد بيقوم ،، رغم اني م شغاله بيهو ، بس اتغظت انه م استفقد وجودي قبيل ، وحتى رصة المجلس م علق عليهاا ..
طوالي ، دخلت المطبخ توووووش ، قالي في كفته مغطية ،عاينن ليهو و سكتاا ، قلت ليهو اذا م بتتفرج و م عندك حاجة ،ممكن تطلع الحوش ! عايزة اشتغل في المطبخ و كدا م ح اعرف ، عايزة اخد راحتي !
قالي انا راجلك على فكرة ! قلت في سري دا عندو انفصام ولا حاصل شنو ! . . قلت ليهوو لو سمحته حينفع تطلع ولا م حينفع . كمان تاخد راحتك اكتر ( بعد قلت ليهو الجملة دي قلت انا غبية كدا حيفتكر اني متغاظه ، احسن شي اكلمو عادي عشان م يفهمني غلط ) .. قلت ليهو مسافة تخلص تلفون اكون خلصتا اكل ممكن تجي تاكل ،، قالي ممم ن ممم معندي اي تلفون ، سسس ساي بس ( بتمتمة ) انتي عايزة تاكلي شنو ؟
قلت ليهو عايزة . اعمل بيتزا !
قالي م تتعبي نفسك ،انا ح امشي اجيبا ليكي جاهزة ! قلت ليهو شكراا انا بحب حقت البيت و ظريفه .. قالي تمام ، طالع ، وقفتو وقلت ليهو ، بس بالنسبة لبكرة كيف ؟
قلت ليهو انت قلت لي علي الشاي و تاني شنو ؟
سكت مساااافة و فهمت قصدو انه يقصدني اذا ح احكي ليهم ولا لا !...
قام من غير م يتكلم ، و طلع وقفل الباب وراهو ،، طوالي طلعتا توبي، حاجاتي ،و بمزاج زبطتا العجين و الحاجات ، ساعه ونص ، خلصت منها ،، ختيتا و عملت عصير ، اتصلت على اسعد عشان يجي ياكل ، اداني انتطار طبعاً ..
مرة واتنين ، لسه انتطار ، عدت نص ساعه انتطرتو ما رجع ..
ما كترتا ، ختيت اكلي قدامي و قعدت اكل واتفرج ، و شربت عصيري ، وغطيت ليهو في المسطبة حقو ، اتوضيت صليت ، و دخلتا غرفتي ،،، ما طلعت منها الا على صلاة العشاء ، و برضو كان مافي ، قلت احتمال في الحوش ، انا توبي في يدي على الضمان ..
مشيت اتوضيت ،و انا بصلي في الصالة برا سمعت صوت الباب ، شكلو كان شايل حاجة .
خلصت صلاتي ، و سلمتاا ، لقيتو بيفضي اكياس في التلاجة ، اصلي م اتكلمت نعاهو غطيت وشي و قمتا من السجادة ، بطبق فيها ، قالي جبت فواكه ، رايك شنو في سلطة فواكه عمي بيحبها صح !
بغض النظر عن كلامه ، طناشو لمكالماتي حرقني وعمل فيها اهبل ..
قلت ليهو ، دايرة قشطة و لبن بدرة ، قالي لبن في ، القشطه دايرة كم علبة الصباح لمن تقومي حتلقيها !
قلت ليهو تلاته او اربعه ،، قالي تمام ، بس عايزاهم ليه ؟
قلت ليهو لسلطة الفواكه ، قالي سلطة الفواكه قشطة ولبن ! قلت ليهووو ايوة ..
اختصرتو ودخلت الغرفه ، دايرة اقفل الباب ، قالي عايز حاجات من الغرفة ، م رديت ، بس طلعت من الغرفه وقعدت برااا ..
شايفاهو بفتش في حاجة ، في الادراج ، لمن قنع فتح ضلفتو شال جلابيهه و طقم خما كداا ، و طلع ، قالي خلصتت .. بس سوال : انتي ليه لابسه الجوينتات والشرابات في البيت ما للدرجة دي تضايقي نفسك انتي في البيت يعني ، و الغريبه م كنتي بتلبسيهم الايام الفاتت !
قلت ليهو اممممم ، عايز حاجة تاني من الاوضه ؟ قالي لا ...
دخلت وقفلت الباب ... و مكالمتو دورت ، شالتني نومة ، صحيت قبل صلاة الصبح بساعه الا ربع ، و ما جاني نوم ، قلت حرام انوم والصلاة قربت ، قمتا صحصحتا قعدت شويه في السرير ، قلت سلطة الفواكه كتير ، اقوم اقطع منها اسي لحد الاذان ، اشغل نفسي ..
طلعتا لقيت النور مولع وهو مافي ، فتحت باب الصالة البيفتح على الحوش . ، لقيتو نايم ، طوالي قفلت باب الصالة ، و جبت حاجاتي و قعدت اقطع ، ابيت افكها الا خلصتها كلها مع الاقامة ، دخلتها التلاجة وخليتا على التحلية بس بكرة عشان ما تبقى موية وكمان القشطة لسسه ما جابا لي ..
المهم ، صليت ،و بقيت بين دايرة اصحي للصلاة ،وبين لا خلي ينوم انا مالي ، تاني قلت حرام انا على ذمتو مفروض اخد الاجر منه ،،
اتلثمتا ، و طلعتا ، وقفتا من بعيد و بنادي فيهو ، اسعد اسعد ، نومو تقيل ، قربت شويه وعليت صوتي ، قلت ليهو اسعد ، قام مخلوع ،قالي حبيبتي !... لمن شافني انا اتخلع ، و دعك عيونو قالي ، في حاجة !
قلت ليهو الصلاة ، وكمل نومك بعداك ،، طوالي مشيت دخلتااا ...
صدقوني المواقف دي ما بتاثر فيني ولا بتحرك فيني ساكن كون راجلي عنده حبيبه بيحبها ، لان اصلاًم شايفه فيهو راجلي لا قبل الزواج ولا بعد ، لعل الله يحدث بعد ذلك امراً
ما بعرفو قام ولالا بس كان في صوت كركبة ، انا رجعت كملت نومي ...
صحيت الظهر ،، قمتا خلصتا من برامجي الشخصية كلها ، دخلت لقيت القشطة في التلاجة ،، جبت المكنسه الكهربائية جريت الصالة و خليت معطر الجو لحد قريب المساء ببخر ..
لمعتا ، فرشتااا ،، قعدت اكلتا ، كانت الساعه 2 جات،، قمتا طلعتا طقم الكبايات و الحاجات ، و طمعت السلطه و رفعتها الفريزة ..
حسيت بصوت الباب ،جريت الغرفه .. سامعه صوت اسعد بتكلم تلفون ،و بيقولي ليها والله مالاقيهو ، ما بعرف شكلو اتغسل في جيب البنطلون ، سكت مسافه و بعداك قال ، يعني ما بتدخلي من غيرو !
طيب مش بيظهر في السستم انك سددتي الرسوم ! طيب بكرة بجيكي نحلها !!
سكتاا ساي ،حسيت بعدم احترام لي انه بتكلم عادي زي القاعد براهو ما راعى لي ..
اصلو ما طلعتااا ،،
جا جمب الباب قالي رحمة محتاجة حاجة من برا ؟ سكتا ، قالي رحمة !
قلت ليهو نعم ! قالي قلت ليكي عايزة حاجة من برا اجيبها ؟ قلت ليهو لا خلاف الحلو القلت حتجيبو ، قالي دا جبتو اسي خلاص ، قلت ليهو تمام و سكته ، حسيت بيه وقف مسافة وبعدااك مشى وهو بيقولي انه طالع مشوار ..
طلعتا من الغرفه ، كملت باقي شغلي رصيت و رتبت كل حاجة ، و ضاريتا عشان مطبخي مفتوح ،،
كان في كبده لقيتا ، شلت منها ، زبطتها حمرتها وقعدت اتغديت ، قريب المغربيات رشيت الحوش البرا شارع والجوا ،، و ولعت بخور عادي ، ودخلت استحميت ، و دخلتا غرفتي ، حسيت ان دي مرحلتي انا بعد كدا ، راحتي النفسية بتبدأ في المكياج !
طلعت القفطان السكري بالدهبي والشبشب المسمار ...
طلعت استشواري والفير ، و قعدت قدام تسريحتي عملت شعري و لفيتو ، وفتحت المكيف ، و بديت مكياجي بي مزااااج ،على راحتي شغااله ، ابسط واجمل ما عندي عملتو لروحي ، لبست فستاني ( القفطان ) ، و مسكت شعري ، عملت تسريحه على مزاااجي ، و لبست دهبي الجابوهو لي ، انا اعجبت بنفسي ، والريحه دي احلا حاجة عندي ،، و الطرحه ختيتا في الكرسي ، لحد ما تلفوني رنّ، رديت لقيتا يمنة ، سلمت عليها تمام ، قالت لي قربنا منك ، قلت ليها في رجال ؟ قالت لي لا بجو بعد الصلاة . سامعه اصوات جمبها ، وحدة قالت ليها اسأليها اسعد في ؟
سمعته وطنشتا وقفلت الخط قلتا اكيد سماح ،، مشيت ولعت بخور تاني وبخرتاا ..
و بقيت لافة اشوف الما مرتب شنو والمافي في محلو شنو !
مشيت الغرفة التانية لقيت ملابس اسعد مردومة ، دي كانت حتبقى مشكلة لو زول كان شاف المنظر دا ،
بس جريت ضاريتا في الغسالة ، لحد م يمشو و بغداك تتغسل ، بعد دخلتهم الغسالة وقفلتا ،ررجعت فتحت الغطى حق الغسالة ، شلت قنيص و بنطلون ، و جلابية ، و قفلت على الباقي ، و جريت غرفة النوم ، علقتهم في الشماعة جمب حاجاتي ،،
بس سمعت صوت اكتر من عربية ، لبست طرحتي ، و مشيت على باب الشارع ، ختيت الطرحه كدا ف وشي عشان قصاد الباب ، مع خبطتهم فتحت الباب ، جد خلعوني ، ما خلو زغروتة ، اظن الجيران كان حيطلعو ، يشوفو الحاصل ،،
بقيت في مرحلة السلام ، امي و اتنين من خالاتي و بت خالتي ، و مرة عمي و اختها ، و سماح ، و اسماء اخت راجل سماح بت عمي ، بصراحه حسيتهم كمية جد ، اكتر وحدة حضنتني سماح ، بالجد حضن من قلبها ،، و يمنة م دايرة تفكني ،، دخلتهم ،، الصالة الصغيرة جمب غرفة النوم ،، و تاني بقينا نسلم ، ياهو كيف تمام والاخبار واسعد و كلام زي داا ، قعدنااا ، ياهو في التشغيلات ، تقريبا اخت مرة عمي اول مرة تشوفني و م ة عمي زاتهاا م حصل شافتني بمكياج كدا ، و اسماء تعاين فيني من فوق لي تحت ، و خالتي تقولي ماشاء الله شكلك مرة مرة ، حنة ودهب و قشرات وحركات ، بس انا اتبسم ،ما بقدر ارد على كلام زي داا ،،
سالت امي الجا معاهم منو ، قالت عمي و ابوي و قصي لانه جا مع خالتي ،و انور ود عمي و راجل سماح ، في الجامع ،،
قلت ليها تمام ، خلاص انا دقايق و برجع ، ناديت يُمنة ، مشيت المطبخ قلت ليها كل حاجة جاهزة بس ساعديني قبل الرجال يجو ما بقدر اعدي بعدين ، قالت لي اصلا بكونو طلعو الصلاة خلصت ، قلت ليها طيب سرعه سرعه ..
جاتنا اسماء ، وقفت في المدخل ، واقفة ساكته ، قلت ليها محتاجة حاجة ؟
قالت لي مشتاقة ليك بس والله ،و اصريت اجي معاهم ، انتي اخبارك شنو و نتيجتك كيف ، قلت ليها والله لسه ما طلعت ..
قامت مرة عمي جاتنا ، قالت لي اقعدي انتي عروس مفروض نحن نخدمك !
قلت ليها وين عروس خلاص يا عمتي انتو ضيوفي واهلي اخدمكم بنور عيوني انا ، قالت لي تسلمي لينا احلا واجمل عروس والله ربنا يغطي عليكي ،،
و جات طوالي بتشيل وتخت معانا ، قالت لي :
_ في شنو تاني حتعمليهو ؟
* ولاشي امشي اقعدي بس
_ لالا الرجال ديل جو نقدم ليهم وبعدين انحنا براحتنا ..
* ما سمعت صوت الباب متين جو ؟
_ لمن جيتكم المطبخ ، انتي في موية بهناك ؟
* اااي ختيتا قبل اجي عشان م بقدر اقدم كداا عارفة انتي ..
_ اي اي ، و اسي دا ننادي اسعد يجي يقدم ..
* اسعد لسه م جا ..
_ لالا جا مع الرجال الظاهر اتلاقو برا ..
* طيب تمام ..
بس هي قامت طلعت ، و طلعت وراها اسماء ، و قلت ل يمنة شيلي دا ، قدمي انتي .. قامت جات مرة عمي داخله ، قالت لي اسعد جاي .. انا هنا م عرفت اقبل وين م حقدر اغطي وشي ، والطرحه في كتفي مجدوعه ، اي حركة حأسويها حتظهر ان في حاجة غلط بيني انا واسعد ، اسوي شنو يا الله ! وحاة الله لمن بقيت برجف ، مشاعر متضاربة جواااي ، بس من حسيت ان في صوت رجول جاي على المطبخ ، كنت مدنقره في الصينية انا خاته تربيزة في نص المطبخ و فيها الصينية ، طوووالي رفعت ضهري و قبلتا اديت ضهري للباب ..
بس حسيت ان الزول دا جا ، و فعلاً طلع اسعد ، قاليها اها يا امي اشيل شنو !!
انا جسمي تلج ، و مادياهم ضهري ، بقيت بقول يارب يشيلها و يمشي سريع ، يارب ، يارب ،،
بس مرة عمي قالت ليهو دقيقة انتو كم ؟
قاليها اممممممم عمي وابوي و اناااااممممممم خمسة ، و جا معاي محمد صحبي امم كدا ستة بي !
قالت لي ، رحمة ديل خمسة كواري سلطة ، جيبي وحدة تانية و معلقة ..
احححححي يا مرة عمي ، يعني كان لازم تسألي ، اظن هو كان واقف مخلوع ، و كنت متوقعه %100 يتحجج و يطلع من المطبخ عشان ما يحرجني و ارتبك ،، انتظرت لحظات على امل اسمع صوت مشيهو ، بس مرة عمي ، قالت لي رحمة ، بتعايني في دولاب العدة ليكي ساعه مالك ،خلصي سرعه جيبي كوريه فاضية ومعلقة !
م رديت عايزة البغل يتحرك !
بس قلتا خلاص يا رحمة البقت بقت اتوكل ، بس رجلي ما دايرة تتحرك زاتو ! يا الله تساعدني يا الله ، كيف يشوفني ! مرة عمي قالت لي السلطة انتهت ولا شنو ؟ وريتي عشان اتصرف عايني لي بتكلم معاكي !
بس رفعت الطرحه بطريقه سريعه ختيتا في راسي و فتخت الدولاب شلت الكورية ، و مسكت الطرحه في وشي و اتلفتا و بقيت بتكلم كلام خارم بارم من غير ما اواجهو واعاين ليهو ، وهو واقف جمب امه !
وحاة الله بعد قلتا اتحليت ، يلا المصيبة ما هنا !!
المصيبة ان ....
# استكككانة ...🙊
روايات سودانية 🇸🇩 pinned «⎙ فهـرس روايــــــات القنـــــــاه ⎙ ♥️ɑ᎗̤ɹ᎗̇ɹȊↄg᎗ɹɹɹ Ȋ᎗̈ɹȊ᎗̤ɹȊgȷ •°- ســـــــودانى وخليڪ ســـــــودانى👳🏽♂♥️ ◄ -1 أغرمــــت بــــه ⚆ - شهد عبــــدالله -----------❊♚❊----------------------------------- ◄ -2 بروفيســــري ⚆ - شهد عبــــدالله...»