الجزء 18

قلت ليهو ابوي ، بسم الله مافي حاجة ، جيتك بس عندي مشوار وما بقدر امشي براي لكن اسي بخلي لبكرة .. قالي لحد وين ؟

قلت ليهو مكتبة وجدان ..

قالي كويس جيتي ،،، و بس ناداا لي متوكل

لمن خلعني .... ما بعرف لكن الزول دا بيشقلب حالي من اشوفو و ثابت في ذاكرتي ، يمكن عشان الموقف المخجل داك يوم سونكاب سماح ،،

جا قالي سلام عليكم بتوتر ،، قلت وعليكم السلام .. ابوي قاليهو ، هاك ‏( مفتاح العربية ‏) دي رحمة بتي ، شوفها ماشة وين وصلها و رجعها معاك على هنا ، ما على البيت ، . قاليهو والشغل ؟ ابوي قاليهو انا موجود و زي الوقت دا مافي زباين كتار ، وديها بس و ما تتاخر ..

قال لابوي اغسل بس واللبس واجي ، وجرى ،، بعد مشى ، قلت لأبوي انا مشواري ما مهم عادي بتاجل وقت تفضى توديني، اسي مافي لزوم تكلف على الولز في ساعات عملو انا كنت ماشه ابدل كتب الروايات واجيب جداد ، قالي خلاص امشي هو بيوصلج ويرجعك ، لازم تجي هنا عشان حشيلك لحمة للبيت ،، قلت ليهو حاضررر .. ّ

طلع 200 ج اداني ليهم ،و مشى قعد مع الراجل ، وتاني شدو في النقاش و كلام حساباات وكدا ..

جا متوكل ،، قالي اتفضلي ،، طوالي مشيت ركبتا ورا ،، سالني وين قلت ليهو مكتبة وجدان ،،، سكت ..

كنت شايله معاي 10 كتاب حقاتي ، قلت ابدلهم ، المهم عايزة اجيب كمية ،طلعتهم من الكيس ،و عاينت قدام في العربية ، في قلم قاعد ، قلت ليهو معليش ناولني القلم دا !

طوالي مد يدو واداني ليهو .. فتحت كل روايه ، كتبت فيها رسالة للحيقراها بعدي ،

‏( ما تخلي هم واحد ينسيك ألف نعمة ‏)

و كتبت التاريخ ،، وكتبت تحت ، ‏( خلي رسالة هنا للبعدك ‏) ...

لسه ما خلصتا ، لقيت متوكل بيقولي ، المكتبة دي صح ؟ رفعت راسي ، قلت ليهو ايوة ياخا بس دقيقه ، فضلو لي كتابين ، انا ماعارفه ليه مافكرت في البيت اكتبهم ..

قام نزل و وقف برا ، و قرب من الشباك كان بيعاين في الروايات ، لحد ما خلصتا ، رجعتهم في الكيس ، وفتحت الباب ، دايرة انزل ، بعد نزلتا ، لقيتو بيقولي معليش اذا بتدخل ، بس ديل روايات صح ؟

قلت ليهو ايوة ، قالي طيب زي الشفت واحد غلافو اصفر ، دي رواية الناجي الاخير ؟

قلت ليهو ايوة ياها ! قام ضحك ، كدا قالي ممكن اخدو اقراها و ارجعا ليكي و لو عايزة بديل ليهاا ممكن ، قلت ليهو اكيد ممكن ، طيب لحظة !

مشيت في العربيه من ورا ، ختيت كيس الروايات ، و بطلع ليهو واحد واحد ، و شلت القال دايرها ، قلت ليهو شوف من ديل في حاجة تاني حابي تقراها ، وعلى فكرة ديل ما كلهم ، غرفتي مليانه بس ماقدرت اشيلهم كلهم فا كل فترة بجي ابدل جزء ..

بالله الزول دااا سرررح بيعاين ، زي الزول الواقع في غرام حاجة ولقاها ،، شال رواية الناجي الاخير ،، و الباقي قالي تصدقي قريتهم كلهم بس بعاين فيهم زي اللقيت اصحاب لي وانا مطول منهم ..

طبعاً عجبني وصف احساسه بالطريقه دي ، حسسني قدر شنو ان في حاجات بسيطة بتبسطنا ..

قالي انا شلت دااا حالياً و متشوق اقراهو ، و حأديكي بديل ليهو من العندي في البيت ،، قلت ليهو يمكن اكون قريتو اسمه شنو ؟ قالي حاسس انك ما حتكوني قريتيها، بس لمن تجيكي شوفيهااا ، قلت ليهو تمام ، قلت ليهو تدخل معاي ؟

قالي طوالي يلا ، وشال مني الكيس ،، قلت ليهو خلي المعاك دي في العربيه ، فعلا ختاها ، ودخلنا ، اديتهم التسعه ، و بقيت بفتش في تسعه جداد علي ، انا في حته و هو في حته ، قدر شنو العالم دا جميل ، و بياخدك بالجد لعوالم تانية حلوة وحزينة وسعيدة ..

شلت 8 جاا وشايل واحد قالي دا التاسع اتمنى تعجبك ، قلت ليهو انت قريتا قبل كدا دي ؟ قالي ايوة ، قلت ليهو طيب الروايه القلت ليها حتديني اقراها ، يمكن تكون شلتها ضمن ديل ،، ضحك قالي لالا ...

من جواي اتمنيت احصل على الكتاب العنده دا ، المهم طلعناا ،،

و اتحركنا ، صمت و سكوووت ، كدا لمن وصلنا الجزارة ، نزلتا لقيت ابوي قاعد برا ،، مشيت عليهو سلمتا ، قالي اها جبتي الدايراه ، قلت ليهو ايووة ، قالي طيب ادي القروش دي ل يُمنة ،، ‏( ابوي ما بيفرق بينا كل شي بدينا زي بعض ، لو جنيه ، بيدي كل واحزة فينا جنيه ، اسي اداني 200 لانه قبيل اداني 200 ‏) ..

قالي الكيس دا م تقيل ، قلت ليهووو لالا م تقيل ، قالي لسه حأديكي كيس اللحمة ، بس جات زيبونة داخله ، متوكل جوا بتكلم معاها ، و اقطع لي من دي اديني من دي شابكاهو، انا قلت لابوي يلا انا حأمشي ، قالي طيب كلمي امك انا حتأخر في الرجعه ما تقلق ، قلت ليهو طيب . ، و انا ماشه ، متوكل كان بعايت لي وبيقطع ، قام شال يدو بالسكين ، و اسمع الجوطة والكوراك وراي ، انا كمان من غير ما احس ، جريت على الجزارة تاني ، و بقيت واقفه ورا لانه ابوي جا جاري و ماسك ليهو يدو ، و قعدو ،

طبيعي ان ابوي عندو صندق اسعافات للحاجات دي لانه الجروح دي طبيعبه ، بس الدم النزل من متوكل دا والله زي القطع عرق ولا حاجة ، جد اتخلعتاا لمن خفتاا ..

ابوي لف ليهو يدو ، و قعد يشاكلو ، رككز و خلي بالك وفي شنو انت وبالك وين وكلام زي دا .. قام ابو

ي قطع للزبونة ،،

ابوي قالي امشي البيت يلا ،، قلت ليهو بعد مشيت رجعت المرة خلعتني لمن صرخت ،،

قالي مافي حاجة بسيطة اتوكلي ..

رجعت البيت ، و انا داخلة ، كان اسعد مارق من بيتهم ، ما قصدي م اسلم بس م ركزت كتير ، مبسوووطة بي رواياتي الجديدة ،

قالي السلام !! رجعت لورا بعد كنت حأدخل البيت ، قالت ليهاا يلا اسعد و عليكم السلام ،،كيفك ؟ قالي حمدلله ، قلت ليهو يستاهل الحمد ، و عن ازنك ... و دخلتا وقفلت الباب وراي ...

دخلتا كالعادة امي و يُمنة مدورين ليهم نقاش ، دايرة قروووش ،، قلت ليها واليديكي قروش يا يمنة ، قالت لي انت اسسس . ما بتديني . ، قلت ليها طيب كنت حأديكي و اكتر من القروش العايزاها ،، قالت لي ههه لالا حعمل فيها مصدقاكي .. قلت ليها تمام ! معنى كدا ال 200 حقتك المعاي ، حأرجعا لابوي ،، جاتني قالت لي عليك الله ابوي اداكي قروش لي ،قلت ليها زي الما اداني حاجة عشان قلتي انا كذااابة ، قالت لي رحمة بطلي ياخ انا ماقلت ليكي كذااابه عيب ، . قلت ليها هاااك قروشك بس بطلي ززززن ،،،

ضحكت و بقت تنطط ،، فجأة امي قالت لي خلصتي !

قلت ليها خلصتا شنو ؟ قالت لي كلام مع يمنة ،، قلت ليها ايوة ، قالت لي كنتي وين انتي ؟

قلت ليها مشيت المكتبه ، و مشيت لابوي يوديني ، لقيتو مشغول ، خلى الولد الشغال معاهو وداني ورجعني ، قالت لي يعني ابوك عارف انك طلعتي وسكت ليكي ؟

قلت ليها :

* انا عملت حاجة غلط ؟

_ غلط اكبر و اكتر من كدا داذرة تسوي شنو يا رحمة !

* امي كل القصه انا زهجته و كل الروايات العندي قريتهم، مشيت بدلتا بس ..

_ دي الحالة انك ست الدين و العلم ، نسيتي يا هانم انك مطلقة !

* اهااااا ، انوقعت اي شي في الدنيا يا امي الا اسطوانة المطلقه والسمعه و ما تطلع وم تجي وكلام الناس الما بناخد منووو غير وجع القلب صح !

_ لا يا رحمة ما صح ، الصح انك متطلقة ، والمطلقة ليها عدة ، ما بتطلع برا البيت الا بعد تتمها ، دااا اذا ما عارفه اعرفي و اذا ناسبه هدا زكرتك ، وابوكي صلاي الجوامع مالو لمن شافك ما اتكلم معاكي ورجعك البيت ، ولا الدلع المدلعك ليهو دا مخلي يتجاوز اغلاطك كلهاااا ، بس ما توصل لكلام ربنا !

... سكتا بقيت ما عارفه اقول شنو ، فعلاً راحت من بالي ، بس انا اتعاملت بفكرة في راسي و طبقتها من غير ما احس .. اسي انا اقول لأمي شنو !

اقوليها لاء ما اتحبس لانه اصلاً ما دخل بي ولا حصلت بيناتنا اي علاقة !

الدين بيقول ان المرة المتزوجة و اتطلقت وراجلها ما دخل بيها يبقى ما ليها عدة ولا مدة حبس !

اسي انا اسوي شنوووو ،، * قاطعت تفكيري امي ، قالت لي ،،،

_ ردي على انا بتكلم معاااااكي ..

* نسيت يا

أمي الموضوع داا ، تاني ما حأطلع لحد ما اخلص مدتي ... شلت كتبي و دخلت جوااا ، وقفلت الباب علي ..

ما عارفه بس اول مرة من حصلت القصه دي كلها انا العبرة تخنقني كدا واحس اني حأبكي ، حسيت بالظلم في اللحظة دي و كرهت اسعد دا من جوااا قلبي ...