الجزء 24
دخلت اتونست معاهم .. شيماء قالت لي دي سيدة الكلمتك عنها ! قلت ليها جد والله ! و كيفك يا سيدة واخبارك ، و انا اصلا م متزكة كلمتني عنها في شنو !
اتونست معاهم ، و طلعت برساله من متوكل ، بيقولي فيها ، عم محمد جا هنا . ، و انا ماشي البيت ّ ..
فرحتا شديد قلت الحمدلله ، بعد دا انوم بمزاج ،، بس في سواا وقفني ،، ليه ما بيرد على اتصالاتي ، حتى لو ما رد بيرجع لي لمن يفضي ..
سبحان الله دخلت على جهة الاتصال ، قام اتصل هو ،رديت طوالي ...
* ابوي انت كويس ؟ اتصلت بيك كتير مالك ما بترد في شنو ؟
_ وعليكم السلام اول
* اسفه ، السلام عليكم
_ مالك في شنو ؟
* ما بعرف بس عشان ما حصل اتصلت عليك و ما رديت علي ، خفتا بس ..
_ البخوف شنو بس مشغول بي هنا ..
* طيب حمدلله انك بخير ، حترجع ؟
_ بعد الصلاة ان شاءالله ..
* طيب ، اكلم امي ؟
_ لا حأتصل عليها اسي ، يلا
* تمام في امان الله
_ في رعاية الله ...
( في جانب سماح )
_ خير !
* خير !
_ واقفه كدا مالك ، تعالي اقعدي ..
* واقفه بعاين فيك يا اسعد ، بعاين في حالك الغريب دا ، هسي انت مرتاح كدا ؟ دي الحياة البتتمناها ؟
_ سماح انا الاكبر و انتي الاصغر اتزكري الحاجة دي !
* علاقة الكبر و الصغر شنو اسي
_ يعني ما تحاسبيني !
* لا انا ما بحاسبك ، والعمر ابداا ما بياثر ، العمر بالعقل ، وبعدين انا دايرة اعرف دي منو ؟
_ سماح ، انا ما عندي معاكي كلام في الموضوع دا !
* لا ليك كلام ، و على فكرة انا رحمة البتهمني ، و انا جيت عشان ا اكد ليك انك خسرتا خسارة كبيرة ! و اختيارك لو كان صح ما كان وصلت للحالة دي ،ولا دقنك كان قرب يدق صدرك ! انا اختك دايرة مصلحتك ما عدوتك ..
_ ........ سكت ... !
* تصبح على خير يا اخووي ..
بعد رقدتا ، بصلح نومتي ، سمعت اصوات رسايل ورا بعض ، دخلتت لقيتو من القروب ،، شيماء قالت لي بكرة فاضية !
قلت ليها ايوة ، قالت لي خلاص بنجيكي ، قلت ليهم تنوررو ،و ضحكت معاهم شوية و رقدتا نمتا ..
في جانب متوكل )
_ يا زول ارقد نوم
* انوووم كيف يا محمد يا اخوي بس وريني ..
_ يا زول في النهاية كلامك دا كلو مجرد افتراض مافي حاجة واضحه ..
* دي المشكله اني بستخدم عقلي اكتر من الازم ، صدقني انا نفسي افتراضي دا يخيب بتمنى ..
_ يا متوكل حيرتني والله ..
* يا زول خليها على الله ، الفي يد الله دي ما بنهابا ...
_ و نعم بالله !
زبطت المنبه ، و نمت ....
صحيت مع النباه الاول ، مشيت جمب الباب عشان اشوف شبط ابوي ، لو في بعرفو جا ، بس ما كان في الشبط ، فتحت الشباك عاينت للعربية برضو مافي ...
مشيت اتوضيت ، و دخلت صليت في الصالة
عشان لو جا ،، بقيت قاعده مدة طويله ، لممن نمته في مكاني !
فجأة صحيت علي صوت ابوي ، بيصحي فيني ، قالي مالك انتي المنومك هنا شنو ؟
قمتا مخلوعه ، و مسكت رجلو و ختيت راسي و هو قاعد في الكرسي الجمبي و انا تحت في مصلايتي ،،
خت يدو على راسي ، قالي مالك انتي ؟
قلت ليهو ما عارفه ، بس عشان ما متعودة عليك تغيب او ما ترد علي .. قالي دي شنو الحركات دي انا كويس قدامك ، وبعدين عرس اختك اذا ما وقفت انا حيقيف منو ؟
قومي كملي نومك جوا ،و انا حدخل استحمى و اريخ لي ساعه و ارجع تاني ..
قلت ليهو ما عايز تاكل حاجة ؟ قالي لالا ..
قمتا و ياداب بالجد ارتحتا ، دخلت غرفتي كملت نومتي ..
( في جانب تاني مجهول )
_ كل الفترة دي انا ساكت عشانك انتي
* طيب هو عمل ليك شنو ؟
_ بتدافعي عنو لسه ؟وريني هو عمل ليكي شنو ، في النهاية القروش دي اساسها حقتي ..
* انت عارف ان دا ما وقتو اصلو الكلام دا ، و انت حياتك و تعاملك كلو تكبر و تهديد ، طول الفترة الفاتت دي بتهددني ، و انا ساكتة و ما عايزة اظهر ليهو ، لكن انت كل مرة بتتمادى اكتر من القبلها ، اسي دي الداير تعملو اعملو ، انا ما بخاف ! و عارفه راجلي كويس ..
_ دا اخر ما عندك يعني ؟
* بالضبط كدااا ، لانك جبت اسوء ما عندك
_ كويس ، ما تفكري تجي تترجيني بعدين !
* كفاية لحد هنا ، كونك ما قدرت حاجتي ليك اسي و خصوصا دا ما وقت نقاش ..
_ العندي عندك يرجع بكرة دي فاهمه !
* و انت ناسي ورث ابوي الدخلتو ف مشاريعك و قلت لي بالنص ! نسيت نصيبي انا و هدى اختي الله يرحما الاتنازلت لي بيهو !
_ اثبتي ان عندك معاي حاجة ! سلا م
* شنو ؟
_ السمعتيهو .... و اتزكري انك الوصلتيني للمرحله دي ما تلوميني !
!......*
صحيت بخلعه . اتزكرت شيماء والبنات قالو جايني ! قمتا سرعه غيرت نلايات غرفتي و زبطت وروقتا ، و دخلتا المطبخ زبطت لي كيكة زعفران ع السريع ..
و مشيت غيرتا و انتظرتهم ، لحد ما جو قريب المغرب يمكن ...
شيماء و معاها رؤى و مروة و سيدة و ريان ،، ديل بنات دفعتنا .. في نص الونسة ياداب اتزكوت ان شيماء كان قالت لي سيدة دي سافرت حته .. قلت ليها ..
* سيدة انتي مش كنتي مسافرة ؟
مروة : رجعت الغبية
سيدة : يا بت بجهز في اوراقي راجعه تاني
شيماء : يا ريتني زيك اسافر كدا ، اهلك موقفهم شنو يا سيدة ؟ر
سيدة : السودان مافيهو شغل ،
شايلين احلامنا و قاعدين منتظرنها تتحقق في بلد مافيها امل و لا اي امكانية ، عايزين نعيش يا شيماء .. قلت ليها :
* اكيد بحترم كلامك بس يا سيدة الدايرة تحققي برا بتقدري تحققي هنا كمان ،،
سيدة : هههههه عايني يا رحمة حنتكلم بالمنطق ولا ساي ؟ العاطفه ما بتحل يا رحمة ، انتي جربتي تكوني مسئولة ؟
اكيد لا يا رحمة لانو الحمدلله والدك م مقصر لكن انا خلافكم ، انا عندي اخواني الاتنين داخلين جامعه و علاجات امي البسبطة ما قادرة اوفرها ليها ، حتى لو اشتغلت هنا ما حسدد نص الحاجات دي ، علي الاقل العملة تفرق !
ريان : صحي والله ربنا يساعدك يا سوسو ..
شيماء : والله انا كان لقيت طريقه بسافر شوفي لي طريقه ياخ ..
مروة : وانا كمان يا سوسو
سيدة : و انتي يا رحمة ما دايرة كمان تبقى كملت ههههههه حسستوني انها بلد ابوي ههه ..
قلت ليها انا ما بفارق والله ،،، يلااا عندي كيكة لازم تاكلوها مع الشاي ... يلااا
كنت مبسوطة بالونسة والقعده ، كنت بشوف احلامهم قدامهم كيف متلهفين يحققوها ، الا انا ، مالقيت حاجة احققا ، للحظة كل الكنت بتمناهو من ربنا انه يحفظ لي امي وابوي و اختي ...
...✨