الجزء 4

فكيت تلفوني من الشاحن ، واتصلت علي ابوي ......

جرس كامل لحد م بيفصل و ما بيرد علي ... جات يُمنة داخلة ، قالت لي :

_ مالك رايحة جاذة كدا زي الديدبان !

* بتصل علي ابوي ما بيرد

_ اكيد يعني ما حيكون فاضي ليكي ..

* هو برا الشارع !

_ ما بعرف ما شفتو، مالك في شنو ؟ّ

* مافي حاجة

_ طيب اسمعي ، البنات بيسألو منك ، و سماح قالت عايزاكي ، و صحي تعالي اسألك مالك انتي زي البايرة الغيرانة من عرس وحدة ، مالك م بتقعدي مع الناس ، الناس ديل من جو عندنا و انتي ضاربه البوز دااا ...

* حسني اسلوبك شنو البايرة و الغيرة والكلام الفاضي دا يا يُمن ! حأكون مالي يعني ، ما عارفه اقرا زي الناس ، الدوشه جاية من كل حتة و بكرة عندي امتحان ، انا ما عارفه الناس دي لمن بتغني و تلعلع كدا بتستفيد شنو !

_ لااااااااا ، انتي جنيتي رسمي اقسم بالله ما طبيعبه يا رحمة ، ياخ ليكي شهور بتقري ، عايزة تفهميني انك ما مجهزة للامتحانات دي !

* ما معقول انتي وامي نفس الكلام ، دا بدل تدعموني و تشجعوني !

_ نشجعك لمن تكوني فعلاً ما قارية ولا م عندنا ظروف ، خليها على الله ، عيب دي بت عمنا و متربية معانا يعني اختنا ، عيييب يا رحمة ، وري الناس وشك و فكي البوز داا ، اللبسي نقابك و اطلعي لو سمحتي .. و *.. مشت ..

* يا الله ..... اسوي شنو انا ، حأطلع وامري على الله ... يُمنة دقيقه يااااا بت ، تعالي وريني سماح وين قاعده .... اخخخ مشت .. !

انا والله ما كعبة ولا البت الما بتخدم ، بس يمكن من خلال كلامي عرفتو قدر شنو انا بحب قرايتي و ملتزمة ، بس زي ما امي و يُمنة قالو ،ظروف و لازم اساعد ،خجلانة من نفسي اوريهم وشي حتى ....

مشيت ، جمب المراية ، لميت شعري و لفيت طرحتي و لبست النقاب و طلعتا ، عامتاً بلبس جوينتات ، بس ما لبستهم المرة دي بحكم اني حأكون موجودة جوا البيت ..

طلعتا ، سلمتا على عماتي و بناتهن و الاهل و البنات ، طبعاً عيلتنا لا تعد ما شاءالله ، ياهو بقيت داخله و مارقه و اشيل من هنا و اساعد هنا و مع النقاب خلاص اتكتمتا بقيت ما قادرة اخد نفسي ، قلتا انسحب جوا الغرفة شوية .. جاتني ريان بت عمتي مسكتني من جمب الباب ، قالت لي العروسة عايزاكي ، قلت ليها يُمنة كلمتني قبيل بس ما ورتني وين هي ! قالت لي امشي ليها في بيتهم في غرفتهااا .. قلت ليها تمام ...

مشيت المغسلة ، غسلت وشي و نزلت النقاب و مشيت ، بس وصلت جمب باب الشارع ما عارفه لكن قلبي اككلني لمن . تلقائياً لقيت نفسي وقفتا مسافة ، و سامعه صوت رجال شكلهم محل صيوان السونكاب ..

‏( ملحوظة يا جماعه للناس الما بعرفو السونكاب .. السونكاب دي عادة سودانية معروفة عند القليل ، هو فال بس و بتعمل بحفلة ، المهم عندنا في قبيلتنا ، طبعاً دا بتعملو قبايل معينة ما ح احدد اسم القبيلة لكن القليل منكم بعرفوها ، و في ناس بعملوهو ك تجديد في مناسبة الاعراس بس ما بتكون من عاداتهم وتقاليدهم ، لكن ما عادة متبعة .. فاا السونكاب بيكون العصر في الصيوان براا ، مفروض ان يتعمل جمب بيت العريس ، فاا ما كنت عارفه الفهم هنا شنو ... الخ ‏)

فتحتا الباب ، و دنقرت راسي و عديت من كمية رجال اغلبيتهم اهلنا ، و الباقي ما بعرفهم ، المهم دخلت البيت ، كان في حريم في الحوش راصين السعف دا و السكسك والودع و الحلويات والبلح ، بيربطو ، و معاهم ولدين ...

المهم ، دخلت الغرفه ، لقيتا قاعدة براهااا ، من جيت داخله قالت لي والله انا ما عارفه انتي طينتك دي شنو يا رحمة ، قلت ليها انا عارفة انتي زعلانة مني ، بس انا البي الله بعلم بيهم ، عايني تحت عيوني بقى اسود كيف ‏( فتحت وشي ‏) ..

_ انا ما اي زول يا رحمة لكن !

* انتي اختي يا سموحة ياخ ما تزعلي عليكي الله ..

_ ما زعلانة ، اسي وريني !..

* شنو ؟

_ شنو ، شنو مكياجي يا رحمة منو حيمكيجني غيرك !

* يا بت هوي انتي جنيتي ولا شنو ! اااي انا بمكيج لكن ما لدرجة مكياج العروسه ، يعني مكياجك دا مفروض يكون حاجة فخمة كدا ..

_ ياخ حق العرس حجزتا عند هند حسين ..... ‏( اسم وهمي ‏) ..

* اها قصدك حق الحنة !

_ ايوااا

* ابشري ، بس لازم حاجة خفيفة عشان بعدين تظهري !

_ اي اسي كنت حأقوليك كدااا ..

* اسمعي ، انتي العريس هنا ؟

_ اكيد ما شفتوو لكن ، ريان قالت لي جااا

* السونكاب دا لشنو هنا ؟

_ ما بعرف والله بس المهم نتفرج

* وانتي ماشة وين يختي لمن تتفرجي كمان !!

_ ياخ دا توبي ، حأتلتم ، اصلا كل البنات و الحريم حيكونو كدا !

* ما تطلعي ياخ خلي البنات يصورو ليكي ..

_ لالا اصلاً مافي زول حيعرفني ..

* طيب تمام

_ هاكي دااا ...

* اسوي بيهو شنو ؟

_ احضري بيهو السونكاب

* سماح جنيتي انتي !

_ اكيد م حتحضري كداا ، العادات بنلبس الفوط السادة دي و اتلتمي فيها شنو !

* ما بقدر ما بقدررررر صعبه ..

_ ياخ اساسا بنقيف بعيد بطلي مساخة ..

* طيب بشوف كداااا ... و الله بالي مشغول ، نفسي تقدر اقراااا ...

_ ياخ خليها على الله يا رحمة و بعدين ماشاءالله انتي شاطرة ...

* ونعم بالله ... طيب حاجيب شنطة المكياج واجي

..

_ ليه ؟

* عش

ان امكيجك !

_ رحمة والله حرام عليكي ياخ انا حنتي بكرة ما الليلة ، معقوووول !

* اعذريني عليكي الله ، بس الحمدلله ..

_ ما مشكله انا كلمتك بس عشان تعملي حسابي لانو عارفه البنات ما حيخلوكي ، كل وحدة حتكون منمرة عليكي ، قلتا احجز قبلهم هههههه ...

* بسوي ليكم كلكم ، بس والله ياريت لو عرسك دا صادف بعد امتحاناتي ، معنوياتي كانت حتكون الف ههه

_ معليش اسوي شنو ، حظك جااا كداا ...

* يلا المهم السترة و ربنا يتمم على خير ..

_ امين . ّ. وانتي ما مفكرة تتزوجي !

* بررررري ما اسي ، لسسسسسه ...

_ وين لسه عمي ما حيخليكي .. وانا عارفه سوقك ناااار ..

* عيب حسني الفاظك ما كداا ..

_ وااي يا رحمة الدنيا دي كلها حتتغير وانتي حتفضلي زي ما انتي ، يا بت عيشي عمرك ياخ ، دا شنوو داااا ..

* ااااااه نفس الاسطوانة ، سموحة انا اخير استأذن بعد دااا ..... يلا

_ دقيقه انتي زعلتي ولا شنوو ! يا بت

* اسي البزعلني شنو اناا ، ما تبقى حساسة ساي ، المهم ، بكرة بخلص امتحاني الساعه 1 ونص 2 كدا ان شاءالرحمن ، و اريح شويه و اجي عليكي ، تمام !

_ بكرة عندي اخر بروفة ، ما بعرف بنتهي منها كم ، لانو الليله المرة البتعلمني ما حينفع نعمل حاجة ، فا بكرة حار حار و ياهو حيرقصوني مع الحنة ، فااا بطلي امور وتعالي احضري ، و ارجعي شيخه بعد عرسي لو سمحتي يعني !

* اسي الرقيص دا لازمتو شنو عليكي الله ، غايتو بس الله يتم ليك على خير ..

_ ياخ دي فرحة انا ما حعرس كل يوم يا رحمة ، المهم لازم تحضرررري عشان اهلو لمن يشوفوني و يسألوني من المكياخ ااشر ليهم عليكي ههه ..

* بتعرفي لي كويس هههه يلا انا ماشه اساعد ..

_ اسمعي ، خمي لي حلاوة عليكي الله لساني مُر مُر ياخ

* اجي ! اخمها من قدام الحريم البرا ديل نعلا !

_ ااااي مش للعروس ، يبقى عادي ،، جيبي لي من الكراميل ..

* الشكية لي الله ، من يومك خشمك مُر تموتي في السكر ...

_ ايييييييك من رحمة وكلامها الما بيخلص اسي كان جبتيها و جيتي ...

* طيب ..... ** طلعتا

بعد فتحت الباب و جريتو وراي و طلعتا ، سمعت سماح بتقولي يا بت ...... و ما سمعتها قلت اكيد في نفس موضوع الحلاوة .. دايرة اتحرك كدااا ، لقيت زول طالع من البرندة محل بجهزو السونكاب ، و شايلهم كمية و طالع على باب الشارع ، شافني وقف تنح و بطأ في مشيهو ، و انا بعاين فيهو من قلب ، ما بعرف لقيت نفسي انا كمان واقفة متسمرة قبلي !

فجأة لقيتو بيرفع يدو و بيأشر على وشو بالطول و هز راسو هزتين ..

حسيت بالفضول ، صراحة ما كنت عارفه شنو المتحكم فيني اللحظة دي ، ما فهمتو و اديتو نظرة الاستغراب ديييك !

فجاأة في ولدين لابسين جلاليب جااين داخلين من الباب ، واحد ولد عمي التاني ، والتاني ما بعرفو ،، فجأة لقيت الزول دا وقف قداااامي ، '' ضاراني ..'' منهم ..

و وشي في ضهرو ، قالي بصوت '' خافت ''

غطي وشك !!.....

والله ما عارف اقول شنو للزول دا ...

الاسم وكل شيء ناسخه بالتفصيل ، لا اقسم بالله محتار اشاكلك اكتب عنه كلام كعب ماعارف بس لما القناه عاجباك اعمل زيها بس ماتنسخ وتلصق ياخ وتشتهر او تنشر باسمي ... الخ الخ

بخلي مسؤوليتي من اي قناه بالاسم دا غير القناه دي

القروب ماتبع القناه ✖️✖️✖️ وغير مسؤول من اي تصرف يحصل في القروب داك سواء شالو رقمك وراسلوك خاص لو اتصلوا عليك ✖️ للمره الثانيه والثالثه دا مانا المنشي القروب دا و ماعندي نيه اعمل قروب واتس او تلي كفاني القناه وبس...

واي زول داخل القروب او قابلته القناه دي رجاء يعمل تبليغ لانو تشويه لسمعتي والقناه..

M. Black

روايات سودانية 🇸🇩 pinned «والله ما عارف اقول شنو للزول دا ... الاسم وكل شيء ناسخه بالتفصيل ، لا اقسم بالله محتار اشاكلك اكتب عنه كلام كعب ماعارف بس لما القناه عاجباك اعمل زيها بس ماتنسخ وتلصق ياخ وتشتهر او تنشر باسمي ... الخ الخ بخلي مسؤوليتي من اي قناه بالاسم دا غير القناه دي...»