الجزء 37
قالي مسافرة وين يا رحمة هو و امو بصوت واحد !
عاينت لمرة عمي ، و قلت ليها الامارات باذن الله ! رد لي هو ، قالي الامارات ! انتي جنيتي ولا شنو ؟
مرة عمي سكتت .. و اسماء ، بتقول لاسعد انت مالك ومالها ، اقعد واقف ليه ، عارفين النقة البراحه ديك والصوت المزعج دااك ( الباعوضة ) بس ياها اسماء !
طبععاً ما رديت عليهو ، امي قالت ليهو والله كلنا رافضين بس ربنا كرمها بي شغل و انحنا محتاجين ليهو و ابوها محتاج ليهو ، حتى انا حأدبر لي اي شغل منزلي اساعد ، لو ما الظروف ضغطت والله ما بوافق و على عيني ! قلت ليها امي ، هو سفر !
ما حاجة كعبه وانا ماشه بي قراري و رضاي و انا السعيت وراهو لمن ربنا كرمني !
المهم يا خالتي بقيتي احسن حمدلله ؟ قالت لي احسن حمدلله ...
اسعد لسه واقف ، قالي رحمة عايز اتكلم معاكي دقيقتين لو سمحتي ، قلت ليهو اتفضل سامعاك ، قالي ما هنا ، قلت ليهو م عندي حاجة ادسها ، اتفضل اتكلم !
اسماء بتقوليهو اسعد داير بيها شنو انت ؟ مرة عمي قالت ليها كيف يعني داير بيها شنو ، دي كانت قبلك رغم ان مافي مقارنة اصلااا ، قالت لاسعد شايف ، شايف امك بتكلمني كيف !
قلت لامي يلااا انا عندي حاجات ما خلصتا ، و يا مرة عمي لمن عمي يجي اديني خبر بالحيطة ان شاءالله ... قالت لي امشي انتي انا حاقعد شوية و اجي !
قلت ليها تمام ، شلت مفتاحي و طلعت ...
اسعد جا لاحقني ،، قالي رحمو دقيقه اسمعيني ! قلت ليهو خير ؟ قالي ما تسافري و براكي يا رحمة ما صح و غلط ارجووكي ، قلت ليهو طيب تمام ، و مشيت ، قالي ما تمشيني ارجوكي ، ما تسافريز، رحمة انا بحبك والله العظيم بحبك و بقيتي كل املي من يوم طلقتك ، رحمة انا ماري بأسواء الحالات والله العظيم ، و مستحمل نتيجة اغلاطي ، ارجوكي كوني لي مرة تانية !
قلت ليهو ، نعم ! و مرتك ! ولا خلاص اتزوجتها زهجت و بتفتش في غيرها و بكرة تزهج و تشوف التالته ...
قالي رحمة انا ما كدا والله ، اديني فرصه و الغي موضوع السفر دا خالص !
قلت ليهو اسفه ... و فتحت الباب طلعتااا .. مع طلعتي سمعته جوطتهم هو و اسماء جمب الباب ....
طلعت و انا من جواي كنت بتمنى لو متوكل فيهو حبة ذرة تمسك بي ، زي ما اسعد متمسك بي ... ما عارفه ليه بقارن بس ما بنكر كلمة بحبك دي ما اتوقعتها و هزتني شديد ، حتى متوكل العارفه انه بيحبني ما قالها لي !
رجعت البيت ،، اتكلمت مع شيماء شوية و قعدت اصلي و ادعي لابري انه ينتظرني لحد ما الم قروش وارسلها ، و اني ما اتخذل و ما يصيبو اذى ولا مكرووه ، دا كان كان املي ،،
جا اليوم التاني مشيت لابوي زيارة طويلة ، و حنستهم يدخلوني لان الظروف ما معروفه ، و فعلا لبسوني بالتعقيم و دخلتاااا ...
سبحان الله ، قدامي عبارة عن جسد بس ، و دا الزاد قوتي و اصراري وكل مرة بكون واثقه من قراري داا اكتر..
لحد ما رسلت لي الفيزة ، ومشيت طبعتها و استلمت التزاكر ،.و كانو قاطعين لي علي يوم التلات اصلي ما بنسى اليوم داا ، و طيارتي كانت 1:30، بعد الظهر ..
في اليوم القبل السفر كنت محتاجة احول القروش المعاي كم دولار .. و عارفه ما بتسوى شي ، بس م عندي غيرها والبلقي خليتو لامي ..
م عرفت احول من وين و ضاقت بي شديد لمن رجعت البيت ، و اديت امي القروش قلت ليها كلمي متوكل يحولهم ... فعلاا كلمتو و جا جابهم ليها من الباب و طلع ، زعلو كان واضح و انا قسيت لدرجة حتى ما اهتميت بي زعلو ، كنت بقول هو المفروض يدعمني في وضع زي داااا ....
( في جانب اسعد )
_انت سويت كدا ليه
*اسكتي مني يا اسماء
_لا ما بسكت يا متوكل
*طيب ابقي قدر البجيك
_بتهددني اانت ؟
*لا انا ما بهدد ، انا بسوي طوالي ، و عشان اثبت ليك ، انا زاتي مليت و قرفت منك و من اسلوبك ، و انتي طالق !
المهم ، جا يوم السفر ، صحية من الصباح رغم اني جاهزة ، بس اعاين لامي و لاختي ، و اتزكر ابوي كنت مصممة امشي اودعو ، امي قالت لي الوقت ما حيكفي و كلام زي دا ،و انا اصريت .. قالت لي طيب اللبسي بالمرة وانحنا طالعين المطار ، نمشي المستشفى اول .. قلت ليها حاطلع الشارع اشوف امجاد اتفق معاهو ، قالت لي ليه امجاد وعربية ابوكي قاعدة ؟ قلت ليها عربيه ابوي حيسوقها منو ؟
قالت لي انا كلمت متوكل !
قلت ليها ليه يا امي تكلميهو يا الله .... قالت لي حاصل شنو بينكم ؟ قلت ليها هو رافض السفر و انا مصممة بس ..
قالت لي ما تسافري و زول زعلان منك ،، قلت ليها انا الزعلانة من عمي معقول ما كلموهو بسفري ، المهم الوضع جااط معاي شديد ، و متوكل جا فعلا ،، شال شنطتي ختاها في العربيه و امي و يمنة ديل ببكو عديل ،، مشيت بيت عمي من الباب ودعتهم و برضو عمي مافي ... حتى سماح في بيت راجلها ما شفتهاا ..
المهم ،، ركبنا العربية ، كلنا انا ورا جمب يمنة و امي جمب متوكل ،، عينو ما رفعا فيني و صاري وشو وزعلان لمن عيونو حمر ،،
وصلنا المستشفى ، نزلنا كلنااا .. ما كان وقت زيارة لكن متوكل حاول معاهم .. دخلونا لحظات ،،، ولمن شفت ابوي جاتني
قوة اكترر و اكبررررر ...ودعتو و طلعنا و في بالي اخواتي الما وعدتهم بس وصيت يمنة. ..
وصلنا المطار و يمنة دي ماسكة فيني و امي توصي فيني خلي بالك من نفسك لو لقيتي الوضع كعب ارجعي م تججبري نفسك ، ما تعملي ما تسوي ،،
متوكل نزل لي شنطتي ، و دخلو معاي قريب الميزان و بعد كدا مفروض يرجعوو ،، متوكل طوالي رجع ما عاين لي زاتو الحته دي حرقتني جواا قلبي ،، امي و يمنة حضنوني و يبكو معاي ، المطار ككلو يعاين فينااا ...
و انا داخلة على اخر باب وجارة شنطتي جاا متوكل جاررري علي .....
*في الحلقة الجاية *
*اااي اول مرة
_ان شاء تنبسطي
*يا رب ، بس كنت عايزة شريحة اطمن اهلي
_اوكي بس نوصل
*لسة بعيد ؟
_لا، خلاص وصلنا هذي كلعا اسمها بني ياس و كلها متقسمة
*ايوة ، كيف متقسمة ؟
_يعني بني ياس شرق و بني ياس غرب و ثمترقمة بعد ، يعني الحين المحل في بني ياس #شرق8 و السكن كمان ..
*شرق8 !!
*ملحوظة : اسي عرفتو معنى شرق8 ؟