الجزء 26
المهم ، وصلت الجزارة ، المنظر كان غريب ..
كل ما اقرب حيلي بيبرد من المنظر الشايفاه و بقرب اكتر عشان اتأكد دي حقيقه ولا انا بتخيل !
بقيت واقفه قصاد المحل ، و شايفة طشاش صورتي معكوسة علي المشمع !
بقيت بهبش و بزح المشمع لكن مافي فايدة لان المخل مقفل و متشمع و عاملين عليهو اكروس بالاحمر !
و مافي غير شوية شفع بتفرجو و الماشي والجاي بيعاين و يهز في راسو !
دموعي دي لمن بلت النقاب ، ما فاهمة حاجة ، وبقيت بسال نفسي الحاصل شنو ،
فكرت اتصل بمتوكل و ابوي ولا وحدة من اخواتي عشان اعرف ابوي وين ! بس تلفوني في البيت ..
جريت جري على البيت ، لقيت الباب فاتح ، و عمي و اسعد قاعدين في الصالون و امي لابسه توبها و واقفه ..
جردكيت دخلت جواا ، حتى سلام ما سلمتا على عمي ، دخلت الغرفة و شلت تلفوني من السرير .. و عايزة اتصل
جاتني يمنة ، قالت لي تعالي ، قلت ليها دقيقه يا يمنة عليكي الله !
قالت لي رحمة الموضوع متعلق بي ابوي !
قلت ليها قلتي شنو ! ابوي
بس زحيتا و جريت على الصالون ، وقف في النص قلت ليهم ابوي وينو انا دايراهو ، يمنة قالت لي في حاجة بخصوص ابوي ..
امي قالت لعمي ، انحنا ما عندنا قعاد لحظة وحدة لازم نمشي ليهو ..
اسعد قاليها مع احترامي ليكي يا خاله بس ما عندنا حريم يدخلو القسم ، و انحنا رجال قدامك لو ما سدينا تعالي لومينا ..
انا سمعت سيرة القسم دا حالي اتقلب ، لا و انا عايزة امشي اشوفو اسعد ! اسعد البيقول الكلام دا !
قلت لامي قسم !
عاين لعمي قلت ليهو فهمني يا عمي قسم شنو ؟ اسعد قالي رحمة اقعدي ، انا قبيل ناديتك عشان اكلمكم بس انتي مشيتي و ما رديتي علي ..
قلت لعمي اشرح لي يا عمي ، ابوي مالو وقسم شنو ، انا مشيت المحل لقيتو متشمع ممكن تشرح لي ؟
قالي يا رحمة دا موضوع انا متأكد انه سوء تفاهم وغلطة ، قلت ليهو سوء تفاهم وغلطة ! اكيد غلطة ، دا الحاج محمد ليهو سنين ماسك الجزارة دي ، انا ما بقدر اقعد اتفرج يلا يا امي ...
اسعد قالي ، رحمة انحنا ما مالين عينك ، اقيفي لو سمحتي .. وقفت عاينت ليهو ، قلت ليهو انت بتتكلم عن يانو رجال ! عمي ! عمي ما زول صغير عشان يتجارى في الاقسام ، و تاني ما شايفه لي راجل هنا غيرو ،، ااي ابوي الله ما كرمو بأولاد ، لكن بنانو بسدو عين الشمس ... يلا يا امي !
عمي قالي داكلام شنو يا رحمة ! قلت ليهو دا كلام الحق يا عمي مع احترامي ليك ، انتو قاعدين هنا بتتناقشو والله اعلم حاصل شنو مع ابوي ! فا انا بستأذنك اني لازم امشي اشوف ابوي و لو امي و يمنة ما دايرين يخشو القسم ، انا بشرفني ادخل القسم عشان ابوي ، ..
اسعد قالي رحمة ، لو سمحتي م تدخلي مشاكلني في وضع زي دا !
قلت ليهو نعم ! مشاكلنا ، نون الجمع دي جبتها من وين و ياتو مشاكل دي البيني وبينك ، كل البيني و بينك هو عمي الفاضل و سلطة الرحم زي م كنت دايماً ، و ما متزكرة ان في حاجة تانية !
امي قالت لي يا رحمة كفايه ، كدااا ، الواحد ما ناقص و انتي بتزيدي باسلوبك وكلامك دا ، عيب عليكي احترمي عمك القاعد قدامك دا ! من متين انا ربيتك على الصوت العالي دا ، و بعدين انتي كان مشيتي حتعملي شنو يعني !
قلت ليها يا امي انا قارية حقوق و من حقي افهم سبب وجود ابوي في القسم شنو ، عشان لو في حاجة في يدنا نسويها ،نسويها يا امي ..
قالت لي عمك و ود عمك كانو هناك و حيرجعو تاني !
عاينت لعمي قلت ليهو ، ابوي في القسم ليه ؟
قالي ما ورونا حاجة ، حتى ابوكي ما شفناهو ، مفروض نطلع بعد ربع ساعه ..
اسعد طلع براا ، و يمنة طلعت وراهو !...
بقيت قاعده و مربطة ، بتصل على متوكل اكيد هو كمان في القسم ، بس ما بيرد علي ، مر الوقت ، و عمو و اسعد مشووو ..
توتري و قلقي زاد ... !
بعدها بتلاتة ساعات ،، بابنا خبط ، نزلت نقابي و جريت فتحت لقيت عمي و اسعد !
فضلتهم والباب فاتح ، و امي جات و يمنة ، لسه ما قعدو كويس ، شفت يد بتخبط في ا
الباب ، و انا اصلاً واقفه .. قلتا اتفضل .. لقيتو متوكل داخل ..
حيلي برد !
قلت ليهو متوكل ! امي قالت ليهو اتفضل يا ولدي ، و متوكل من شاف اسعد وشو قلب اكتر ، سلم على عمي و اسعد ، امي قالت ليهو اقعد يا ولدي كيف حالك ، قالها بخير ، قالت ليهو فهمنا الحاصل شنو !
اسعد دخل في النص ، قاليها لحوم فاسدة !
امي اتخلعت لمن شهقت ! عاينت لمتوكل قلت ليهو حصل شنو يا متوكل ، وانت طلعت كيف ؟ قالي ، انا ما كنت فاهم حاجة او بمعنى ادق انا ما المقصود يا رحمة ، اصلا لحمة كانت مافي زي ما كلمتك ، و كالعادة لمن جابوها لينا علقتا و قطعتا و بديت شغلي عادي ، فجاة نجدة و بوليس ! ّ
و خبط و رزع في المحل ، و شمعوه و رفعوني ، و انا ما فاهم حاجة ، لمن وصلنا القسم حجزوني ، و تاني لمن جابوني مكتب التحقيق لقيت عم محمد قاعد ، و انحنا مافاهمين حاجة ،،
فجاة ضابط التحقيق وجه الكلام لعم محمد و قاليهو انت طول الفترة دي بتاكل الناس لحوم فاسدة ما بتخاف الله !
انا اتكلمتا قلت ليهو يا سعادة انحنا بنسلخ و نق
طع اللحوم دي تحت يدنا ، الا لمن يكون في ضغط بنجيبا جاهزة من السلخانه التانية و ...... قالي اسكت انت !
قلت ليهو اسكت ليه يا سعادة دا سوء تفاهم او بلاغ غلط انا الكنت واقف ... و لمن بديت اتكلم و ادافع عن عم محمد ، شالوني رجعوني الحجز ،و عم محمد كان ساكت و ما اتكلم و ما دافع عن نفسو ، دا الحيرني !
اسعد اتدخل ، قاليهو تقصد شنو ب عمي ما دافع عن نفسو ولا اتكلم !
بتلمح لشنو انت ؟ قصدك ان عمي عامل العملة دي ؟
متوكل قاليهو انت القلت كدا في قرارة نفسك انا عارف انا بقول في شنو كوييس !
اسعد قاليهو انت ما حاسي بكلامك بتلمح لشنو ؟
متوكل قاليهو ، الوضع ما ناقصك لو سمحته احفظ لسانك عني !
اسعد قاليهو ، دي ما امور رجال تقول الكلام و تنكرووو ..
متوكل قاليهو ، استغفرالله العظيم يا رب .. اسكت مني يا زول ، امور الرجالة ما بتوريني ليها انت !
اسعد : يا زول انت شكلك عايز اليربيك ... و الدنيا جاطت ،كلمة من متوكل و كلمة من اسعد ..
( في جانب اسماء )
* ههههههههههههههههه ، يستاهلو ، سيرتهم في الحلة كلها ..
وحدة من بنات الحلة : انتي بتضحكي كدا مالك ، دي اكتر اسرة محترمة و عم محمد دا كلنا بنشتري منو ،و اكيد في غلط في الموضوع ...
* هههههه غلط انتي مسكينة ساي ، يا بت لحمتو دي زفرة انا زمان بقول لامي ما كانت بتصدقني ، اهووو الحق ظهر ، شكلو كنا بناكل في لحم حمير كل الفترة دي هههههه ..
_ ما تشمتي يا اسماء ، انتي ما تضمني مصيبتك بكرة تكون كيف ..
* انتي بتتمني لي الشر مالك انا عملت شنو اسي ، و بعدين تستاهل رحمة ..
_ اسي دخل رحمة شنو ؟
* بتو هههههههههههههههههههههههههه