الجزء 16

قعدت في الغرفة ، ونفس البرود المتملكتي من اول لحظة دخل فيها اسعد حياتي ، م كان عندي احساس تجاه اي تصرف او موقف انا اتختيت فيهوو ،،

ابداً ما زعلانه ولا مقهورة ، دا نصيبي انا كدا ، الله عايز كدا ، واكيد لخير والله اعلم ..

بس ما جهزت اي حاجة لانو الفي الدولاب دا كلو ما من حقي ، ولا حتى دهبي ، و دبلتي دي ما لبستها الا اول امبارح لمن اهلنا جوو ،،

بس عبايتي ونقابي وحاجاتي الانتو عارفنهاا ..

‏( في جانب تاني ‏)

* والله في نعمة يا عمي محمد اشكر اااه عليها ، والله ربنا مغرقني بخيرو علي .. حمدلله ..

_ يا متوكل يا ولدي ، والله حيرتني ، انت بتجي عليك ايام معليش يعني بتحرم نفسك من الاكل عشان ترسل لأهلك ، ورغم كل دا شايفو خير ..

* اكيد خير يا عمي محمد ، كوني في صحة وعافيه حمدلله دا خير من الله ، يا عمي محمد الانسان لازم يعاين للاقل منه ، العافيه دي زيها مافي و صدقني كان بقدر كان اديت امي دي عافيتي ، و ااالفقر و عدم القروش عمري ما اعتبرتو حاجة ما كويسه ، بالعكس لخييييير ربنا خاتيهو لي ، كله نعمة حمدلله ،،

_ يا الله ، والله يا متوكل انا كنت متمني يكون عندي ولد ، ياخ اتمنيت لو عندي ولد بي نص ضكرنتك دي ... راااجل والله ..

* يا عمي محمد ،ربنا اداك نعم ، البنان ديل حنينات و زيهم مافي ، لكن الرجال ديل للجري و للشارع . ديل شيالات حموول ، سبحان الله ..

_ اي والله ،، اها ما وريتني مأمون قاليك شنو في السلخانة !

* والله اتوعد لي بي كلام غريب كداا ، زي الشايلا معاك تقيلة ، ما عارف لبه ..

_ ربنا يهديهو ياخ ، الرزق دا بيد الله انحنا ما بنجر الناس نجيبهم عندنا ، ربنا يفتحا عليهم ويشغلهم عننا ، يا رب العالمين ..

* اللهم امين ، يارب .. اي شغل فيهو مشاكل

نحتسب امرنا ل رب العالمين بس ..

_ الحمدلله ..

* تلفونك دا بيضرب يا عم محمد ّ ..

_ اااي ، دقيقه .. الووووووو وعليكم السلام اسعد ، كيف حالك ........ الخ

اما انا ، عملت مكياج ، و شعري و فتحت سناب و بقيت بتصور ‏( اي بتصور ، المنقبات ما كاتمات على نفسهم ، عادي دي حاجة لي وفي تلفوني ‏) !

اتصورتا لمن قلتا بس ، وقعدت اتونس مع شيماء و شمارات البنات ، و القروب الدخلتني فيهو ، ما خلينا شي ...

لحد ما اسعد رجع البيت ،، كالعادة توبي و جيت عليهو ... قلت ليهو اللبس ؟

قالي اتصلت بعمي ، قال صعب لانو عندو ظروف في الشغل ما بيقدر يخلي المحل براهو

نفختا واستغفرتا و دخلت الغرفة وقفلت الباب ،، و فات اليوم دا كمان بنفس الروتين الممل ،، اليوم التاني نفس البرنامج ، منتظرة اسعد ، وجااا ، قالي ،، يلااااا

شلت شنطة يدي فيها شاحني وحاجاتي ، قالي وين شنطة ملابسك ‏( بي فرح، قايلني حا ارجع ‏) ، قلت ليهووو دي ما بتلزمني ولا حقتي ، شيلة جهزة ، عشان م تخسر مرتين ! قالي دي حقتك انتي ،و دا دهبك لو سمحتي شيلي حاجتك لو سمحتي دا من حقك ، يكفي الوصلتك ليهووو ، اقسم بالله حأتشقا من الندم ،،، قلت ليهو اسفة م ح اشيل حاجة ، قالي دهبك لو سمحتي ،، شيليهو ، بعد جدال عقيم من ناحيتي ، شلت دهبي ، فعلا من حقي ...

بس ، طلعنا ،،، جايب امجاد ، ركبناا ، توووووش لحد البيت !

انا دخلت بيتنا ، وهو دخل بيتهم ، سلمت على امي ، و يمنة و ابوي كان مافي ، سالت امي عن ابوي ، قالت لي في الشغل ، مضغوط اليومين ديل مضغوط وعنده خلافات ف الشغل وكلام زي دااا !

المهم ، ناديت امي قلت ليها عايزة اتكلم معاكي ، اتوترت اصلو قلب الام دا مافي زيو ، المهم ، قلت ليها شوفي يا امي ، انتي ربيتيني احسن تربية وكذالك ابوي ، و انا يا امي اخلاقي بتقولي ان زواجي من اسعد حدو هنا ، قالت لي رحمة دا كلام شنو يا بت تفي من خشمك يادبك عروس عرفتي شنو للزواج انتي الشر برا وبعيد يا بتي ، لو ما عارفه عقلك انا قلت اكيد جنيتي ، حدو هنا شنو ، شهر ما تميتي ! الناس يقولو علينا شنو ؟

قلت ليها يا امي ، الناس في كل الاحوال هما ما ساكتين و الحلة دي كلها تشهد بأخلاقي يا امي ، بس انا ليه اعيش حياة ما حقتي ومافيها راحتي في حين اني ممكن اعيش في نصكم معززة مكرمة يا امي ،، قالت لي روقي في نقاش حصل خلاك تقولي كدا انا متأكدة يا رحمة ، بس يا بتي الحياة الزوجية دي كلها عقباات ، لازم تمر بيكي حاجات زي دي ما كل مشكلة احصل طوالي تفكري في الانفصال ، يا بتي اسعد راجل وقبل دا هو ود عمك يعني مستحيل البتفكري فيهو دا ، اقعدي مع راجلك وحلو مشاكلكم وامسكي بيتك ..

قلت ليها فعلاً الدنيا دي غريبة يا امي ، طوالي انا الشلت مسئولية الخلاف ، وانا الاتحمل وانا الامشي ، من غير حتى ما تعرفي هو عمل معايّ شنو يا امي انتي انصفتيهو طوالي ، للاسف دي حقايق في مجتمعنا التافهه دا ، مبدأ كلكم ماشين بيهو ، المرة هي التتغاضى عن اغلاط زوجهت و هي التتحمل و هي التمشي و هي التبادر و هي التعتذر وهي التمسك بيتها كل شي المرة ، المرة ، بس لمجرد انه راجل مافي زول بيفكر هو عمل شنو غلط ، حتى انتي يا امي زي المجتمع وكلام الناس واحد عندك نفس نظرتهم

ونفس افكارهم الوهمية عن حياة الناس كل زول بحكم و بيتكلم بطريقتو ،،،

و انا يا امي طول ما رقبة ابوي شامة هوااء في الدنيا دي ، انا حأعيش تحت رحمة زول ولا مجبرة اتحمل وضع لمجرد انه انفرض علي ، و مع احترامي الشديد ليكي ، مبدأك الانتي مشيتي بيهو مع ابوي ، انا ما حأمشي بيهو ، مافي حاجة في الدنيا دذ بتقديني طالما انا اتولدت حُرة

قالت لي رحمة ، دا كلام شنو ، في شنو حصل مخليكي تقولي كلام زي دا ، قلت ليها اسي سألتيني عن الحصل بيني و بين اسعد ،عشان حسيتي بيهو ان شي ما ساهل في حين انه من البداية كان ممكن تعرفي ،من غير ما تقولي لي كلام عامة الشعب دا !

وانا ما حأتكلم ، ابوي لمن يجي هو الحيحكي ليكي كل حاجة دا لو اسعد بقى راجل و اتجرأ وحكى ليهووو ... انا ماشة غرفتي !!

فعلاً اتضايقت لان ما اتوقعت امي تسمعني نفس الكلام البتقال دا ، انا ما مجبرة اتحمل حاجة فوق طاقتي ، و انا الوحيدة ضحية الزواج داااا ..

المهم ، جا المغرب ،، ابوي جاا البيت ، صلّ في البيت واكل ، و مشى الصالون ، بعدها امي جات خبطت لي الباب قالت لي اسعد برا ، ‏( بي وش زعل ‏)

قلت ليها حيخلصو كلام وابوي حيناديني ، المهم اخدو قعدتهم ، وطلعو صلو العشاء و رجعو تاني يتكلمو ،، بس بعداك ابوي ناداني ، مشيت لقيت عمي قاعد كمان و كان زعلان لدرجة انه وشو احمر ، و ما رفع راسو فيني ، سلمت عليهو ، و امي جات ،،

ابوي قالي ، ما عاش اليزعلك ، حتى لو ود اخوي الجمبي دا كلام وانا بقولو وما بزعل ، دخلنا بالمعروف ، ننتهي بالمعروف و بتي في بيتا معززة مكرمة !

امي اتخلعت قالت ليهو دا كلام شنو يا محمد بدل تعقل البت .. قاليها اششششش !!

قلت لابوي دا عشمي فيك اصلو ما خاب يا ابوي ، و كنت عارفه ان وراي راجل ،، عمي قالي انا ما عارف اسعد عمل ليكي شنو لدرجة تصممي على الطلاق في اول ايام مفروض تكونو فيها في حالة افضل من كدا !

بس انا ما عايز الطلاق يا بتي فكري ، دا ابغض الحلال عن الله وانتي زولة علم ودين ، ولا شنو يا محمد انت بدل تنصحا بتشجعا !

قاليهو لاني عارف بتي كويس ،، قاليهوو لا يا محمد دا دلع ، البتعمل فيهو دا دلع وكلنا عارفين يعني شنو رحمة في بناتك ديل كلهم ، حتى من مرتك التانية ‏( اااي ابوي عنده مرة تانية، بس اسي ما وقتها ‏) مافي وحدة ماخدة مساحة رحمة جواااك ، دا اسمو دلع ، وانت ما عارف عواقب الطلاق دا بالنسبة ل رحمة !

قلت ليهو ، مع احترامي وحبي ليك عمي ، مفروض النقاش دا اصلاً ما يدور بينك انت وابوي ، و مفروض ان اسعد لمن دق صدرو وجا اتكلم معاكم في رغبتي ، كان كمان يسترجل و يحكي سبب ، طلبي للطلاق داا ، عشان ما تحصل مشكلة بينكم انتو كأخوان ، البعمل غلط بقول انا عملتا يا عمي ، ما يقعد كدا و يدنقر راسو ، و انا متأكدة ما عندو جراءة تخليهو يحكي ليكم سبب المشكلة المستحيل تتحلا ، وانا ما عندي صلاحية اتكلم فيها ، بس عندي صلاحية اتكلم في الجزء البيخصني ، اللي هو : انه يا عمي ، اسعد اتزوجني مرغم ، خضع لرغبتك و ما حب يكسر كلمتك ، و انت الاخترتني اسعد ما اختارني ولا كنت رغبتو في يوم من الايام !

واظن دا سبب كااافي لحد الان و ما خفي اعظم يا عمي و يا ابوي !

أبوي عاين لعمي و عمي عاين ل اسعد و انا عاينت لأمي !

ابوي داير يتكلم مع عمي الفاضل ، قلت ليهو ابوي ، الحصل حصل لان ربنا اراد كدا ، وعمي الفاضل من حبه فيني وفيك و اب اب بيتمنى لابنه الافضل من خلال وجهة نظرو ودا بالضبط العملو عمي الفاضل ، فااااا ارجوكم ، خلو كل حاجة تنتهي بهدوء من غير ما دا يسبب تغير في علاقتكم كأخوان ، ارجوك يا عمي و ارجوك يا ابوي .. انا بترجاكم عشان ما احس بالذنب طول حياتي اني كنت سبب لفجوة بينكم !