الجزء 52

_رحمة ..

*نعم !

_خليها على الله

*ونعم بالله ..

_يلا اقفلي انا برجع ليكي ..

*تمام ...

( في جانب متوكل )

*الوووو ..... الووووووو ! ايواا الووو ..دي شبكة شنو دي ! الووووو ...*يقفل

تاني التلفون يرجع يتصل ..

*ايوا الوووو

_الووو

*يا مرحب منو معاي ؟

_معجبة

*الله .... شوفي هنا يا بت الناس الدنيا دي براها ضايقه بي ما ناقص امور البنات و القرف حقكم دااا ، *قفل في وشها

ديل شنو ديل ياخ ،تربية مافي معقوله فراغ و قلة حياء للدرجة دي !

و تاني تتصل ...يفصل و يتصل ...

*الو

_انا مريم يا متوكل

*مريم منو ؟

_مريم بت محمد الجزار اخت يمنة و رحمة ،،

*طيب يا مريم انتي شايفه الوضع يسمح بكلام فارغ زي داا ، و هظار زي دا !

_بس انا ما بهظر ، انا شلت الرقم عشان انا نفسي اتعرف عليك ..

*لالا الظاهر انك عندك حمى ولا واقعه على راسك ، انتي ما بتحسي !

ابوكي داخل عمليه اسي ، و مفروض تكوني هنا تحت راسو ، تقولي لي معجبه و كلام فارغ !

_انت معصب فيني كدا ليه انا ذنبي شنو ولا عملت شنو غلط ! وانحنا طالعين و جاين المستشفى و ما بقدر اشوفك قدامي و اكون طبيعيه يا متوكل ..

*عارفه لو ما كنتي بت عمي محمد انا كان اتصرفت معاكي تصرف تاني ، اقفلي و تاني ما تتصلي فاهمة ! ..*قفل ...

( في جانب امي )

مشت بيت عمي ، فتح ليها انور

قالت ليهو ابوك وين ؟ قاليها جوا في الديوان ، قالت ليهو بلغو ان عملية محمد اسي في نفس المستشفى انا كلمت امك امبارح .. قبل تتم كلامها جات مرة عمي لابسه توبها هي و سماح ، قالت لامي بركة الحصلتكم ، يلا يلا ، يلا يا سماح ... امي وقفت متفاجاه ، مرة عمي و سماح حيمشو معاهم المستشفى ! طيب وين الفاضل ! امي م قدرت تسكت ، قالت لمرة عمي بعد ازنك تعالي معاي انا عندي كلام مع الفاضل ، جرتها و دخلو جوا ، قالت ليها نبهي اني هنا منتظراهووو .. و مرة عمي مخلوعه قالت ليها طيب ..

بعدها بشوية عمي جا ، قال لامي اتفضلي اقعدي امي قالت ليهو يحرم علي القاعد في بيتك يا حاج الفاضل قبل اعرف مالك معانا ، غلطنا عليك بشنو ؟ في وحدة من البنات قللة من قيمتك ؟ سفر رحمة ، و لا انا دي عملت حاجة غلط ؟

قاليها ما شفت منكم الا كل خير ... قالت ليهو لا ما تقولي ما شفتا منكم الا كل خير و تصرفات البقت غريبه ليها شهوووور تقنعني انها من غير سبب ! في شنو دا منطق اخوك مدخلنو العمليات وانت قاعد هنا ؟ مرتك الما بتجمعنا بيها صلة قرابة لابسه هي و بتها و ماشين يحضرو العمليه و انت اللي هو اخوه قاعد هنا !

قاليها يا حجة هو في حاجة حاصله و مضايقاني شديد و انتو ماليكم ذنب فيها ، بس اسي الوقت ما مناسب للمناقشه ، ارجوكي امشي احضري عملية راجلك و بعدين نتكلم ... قالت ليهو تمام .. بس عدم جيتك دي عمرها ما حتتنسى مهما كان اسبابك لانو انتو اشقااء و كل شي حصل خلاك تتغير كدا دا ما حيدوم ليك و وسخ دنياا ! عن ازنك

و خلت عمي دا واقف بيستوعب جملة امي الاخيرة دي ، طلعت و مشو معاها سماح و مرة عمي ، لقت ناس يمنة موقفين العربيه منتظرها تجي ... مشت عليهم و ركبو سوا ..

المهم ، مشو المستشفى ، لمن وصلو ابوي كان دخلو قدامهم بساعه الا ربع ،، بقى الممر كلو مقفول بامي و اخواتي و مرة ابوي و مرة عمي و سماح ، و متوكل دا يمشي ويجي ، انا لو ما واثقه ابوي دا ما متزوج غير امي و خالتو ابتسام ، كان شكيت ان متوكل دا ممكن يطلع اخونا ، بس مستحيلة طبعاً ،و مريم كانت بتستغل قرب يمنة من متوكل عشان تحاول تقرب من متوكل بأي شكل ، ومتوكل كدا بقى فاهم مريم ، و طوالي مسك تلفونو و حظر الرقم ، و بقى واقف بعيد ، وانا بجاي قاعدة متغلغلة ، ما عندي حاجة غير اني ادعي ،. مرت ساعه و اتنين ...

و فجأة عمي و اسعد ، جووو المستشفى لقو ناس امي في الممر ، طبعا اسعد و متوكل الشحمة و التار بس المرة دي نظرة اسعد لمتوكل كانت فيها حاجة غيرررر ، كأنه بيتوعد ليهو بحاجة..

يمنة مشت لعمو ، سلمت عليهو و وقفت جمبو ، قاليها نادي لي امك براحه كداا ..

فعلا مشت نادت امي ، و جات معاها ..

قالت ليهو :

*خير يا حاج !

_خير كل خير ، بصراحه كلامك الجابني و انا ندمان على تعاملي معاكم ، بس مريت بفترة صدمة و سافرت البلد و رجعت على حالي ،، الموضوع طويل بس نطمن على محمد و ان شاءالله بنتكلم ، و اعفي لي..

*الدنيا دي مافيها حاجة ، الليله فيها ، بكرة م معروف فيها ولالا .. و الا صلة الارحام ما بقطعوها يا الفاضل ، مافي زول ما بيغلط و انا ما عارفه الغلط الحصل دا هو شنو لكن مهما كان م بقطع صلة رحم الا الموت ..

_صح ، انتي صح و كل شي بيتصلح ..

و في اللحظة دي ابوي طلعوهو ،و كلهم جارين على النقالة ، بس الممرضين بعدوهم ، و طوالي دخلو غرفة الافاقة !

متوكل بقى جاري هو و يمنة و امي يسالو في الدكتور ، قال لمتوكل كل حاجة بخير بس منتظرنو يفوق و نعمل تحاليل اخيرة و بنطمنكم والعمليه ناجحه حمدلله ..

كلهم قعدو يقولو الحمدلله ، و يسلمو لبعض .. الا اسعد دا واقف بعيد ، و بعداك

تاداا يمنة اختي شال منها رقمي !

بي جاي انا اتصلت على متوكل ..

*متوكل اربعه ساعات يا متوكل

_رحمة والله داير اتصل بس كنت بتكلم مع الدكتور ما ناسيكي ..

*نفسك قايم ! مالك

_في السلم جاري ، داير اطلع برا ..

*في شنو ابوي كويس ؟

_حمدلله ، يا رحمة العمليه نجحت كنت خايف ،و اسي في الافاقه م معروف حيفوق متين ، نازل اجيب حلاوة اوزعا على المستشفى كلهااا ..

* .... (قعدت ابكي) و قفلت السكة و بقيت بقول حمدلله يا ربي حمدلله ، حمدلله و سجدت ببكي ....

رجع لي تاني متوكل ما رديت عليهوو ،، لمن نفسي اتقطع من البكى .. حسيت اني ممتنة لمريم رغم الموقف السخيف العملتو معاي ،، اتصلت على ناس امي ، حمدت ليهم السلامة ادتني عمي اتكلمت معاهو من غير اي لوم ولا تفاصيل ...

و كنت سامعه صوت متوكل بتكلم و بيضحك ، امي قالت لي هاك متوكل بوزع ف الحلاوة يا حليلو ، عايزة اقوليها كلمتو م لحقتا اقول ، ادتني ليهوو .. ( شال التلفون بعيد )

_قبيل قفلتي مالك ؟

*امم خنقتني العبرة بس حمدلله

(مريم شافتو واقف م انتبهت انه بتكلم تلفون و جات عليهو ، طوالي قالت ليهو : )

متوكل ارجوك فك الحظر لازم نتكلم و تدي فرصة لعلاقتنا و ...*انا سمعت الكلام دا .. و من غير ما اشعر ، قلت ليهو :

*مريم ! وقفلت السكة

_دا شنو يا مريم ما شايفاني بتكلم في التلفون !ودا كلام شنو البتقوليهو دااا !

مريم : ما انتبهت انا اسفه .. و مشت ..

و هنا انا مصدوومة ، في علاقة متوكل و مريم اختي! معقولة يا متوكل ! طيب و انا ؟ خلاص اتجاوزتني و سفري فعلا شكل حاجز بينا و كل شي انتهي ..

بالجد انهرت و عمري م اتخيلت حاجة زي دي ممكن تحصل و لا اني اتأثر ..

قفلت تلفوني بغضب ، ما فتحتو ..

جو البنات ،، سلمو علي بي برود و لا سالوني وصلت كيف ، قلت يمكن الزول داا كلمتا ، سكتا و م اتكلمت ابداا ،،

مريم قالت لي جايبين برياني تعالي اكلي معانا ، قلت ليها لالا شبعانه ، و قايمة اغسل

قالت لي ممكن تغسلي لي معاك !

استغربت لان هنا كل زول بخدم نفسو ، قلت ليها الصابون حقي علي قدري ، و شلت حاجاتي و طلعتا ..

دخلتهم الغسالة و جيت راجعه و اصلا ضايقه بي و اخلاقي في نخرتي ، قامت مريم قالت لي ..

_رحمة بصراحه انا في ورطة !

*خير ورطة شنو ؟

_اعطيتك الفلوس و الحين محتاجاهم و الا بدخل السجن عندي ايصالات باسمي ..

*كيف يعني !(بحاول استوعب).

_يعني رجعي لي جزء من الفلوس و بعد اسبوع الباقي !