الجزء 10

رقدتا كدا ، مع رقدتي التلفون عمل هزاز ..

‏( في جانب تاني ‏)

* يا ابوي انا ما قادر استوعب انت عملت كل دا و ما جبتو لي سيرة !

_ كلمتك بي رغبتي وانت وافقتا ..

* يا ابوي ما قصة وافقتا ، بس على الاقل تديني خبر انك مشيت اتكلمتا مع عمي ،ما معقول فجاة تقولي بكرة نمشي ، طيب انت خليت لي شنو كدا ،انت مشيت و اتفقت و قلت كلمتك ، انا زاتو مشيتي ما ليها لزوم ..

_ قصدك شنو ؟ كنت داير تمش براك !

* يا ابوي انا ما قلت كدا و مالي غنى عنك ، بس على الاقل اكون عارف انك اخدت خطوة ،اجهز معنوياتي على الاقل ..

_ اسي جهز معنوياتك دي مافات شي ،و كلمتك انا اديت محمد اخوي كلمة ، بكرة بنسوق امك و بنمش ..

* التشوفو يا ابوي ..

_ لالا تعال هنا ، شنو التشوفو يا ابوي ، مالها بت اخوي عيبها شنو ممكن تفهمني ! شنو صاري لي وشك كدا ، دي بت كان لفيت الخرطوم دي كلها ما بتلقى زيهاا ، احمد ربنا ان الله رزقك بي بت مستورة و محتشمة زيها ..

* يا ابوي استهدى بالله انا ما قلت حاجة حاشاها ، بت مستورة وانا اشهد ..

_ طيب ، اعقل ........

* حاضر يا ابوي ...

شلت تلفوني بي بطئ كدا لمن زهجت من نفسي رغم اني منتظرة الاتصال دا .. ، رديت عليهو ..

* عليكم السلام ..

_ يا هلااا

* ااااا * قاطعني

_ معليش اتاخرت عليكي ، لحد ما وديت اهلي البيت بعد خلصنا صلاة ..

* اهلك ! اهااااا ،،، طيب تقبل الله

_ شكراا ..

* صراحه انت غريب

_ ليه

* ولا شي ، كنت عايزني في شنو ؟

_ طيب وريني غريب في شنو ؟

* ما قصدي ، بس ردودك و كلامك ، في شي كدا ما قادرة افهمو صراحة ..

_ حتعرفي و تفهمي كل حاجة في وقتها !!!!

* ان شاءالله ..

_ طلبي يا ست رحمة ، انو تلاقيني لمدة عشرة دقايق ،عندك هدية عندي لازم تاخديها ..

* هدية شنو دي ؟

_ لمن تشوفيها حتعرفيها

* يمكن ما اقدر اشوفها ، بس حابة اعرف عبارة عن شنو و بمناسبة شنو ؟

_ بمناسبة نجاحك مقدماً ..

* مش يمكن ما انجح ؟

_ في الحالة دي يبقى انا لي هدية عندك

ههههههه كلام والله ..

_ بكرة الساعه ..4

* ما حقدر ، اسفه والله

_ صدقيني حتقدري ..

* لا ما بقدر ، و غير كدا هدية وكلام و غير كدا ما ليها مناسبة ..

_ وريتك المناسبة يا رحمة ، ارجوكي ما تكسري بخاطري ..

* ختيتني في حتة ضيقه صراحه ..

_ معليش ، متمنى توصلك لانها حتعجبك واثق صدقيني يا رحمة ...

* طيب ، انا ما عرفت اسمك لحد اسي !

_ اني بتناديني مضطر اقفل ،بكرة مواعيدنا اربعه م تنسي .. باي *... قفل ..

بصراحه حتى حيرةبيني و بين نفسي غلبني احتار ، ما عايزة افكر عشان عارفه ، عقلي حيمنعني من احساس جديد علي ، قررت ااتعامل بدون ما استخدم عقلي ،و ما افكر كتير .....

قمتا مبسووووطة ، و مشيت ل يمنة ،قلت ليها خلي صحبتك تجي ، بسوي ليهااا ..

طبعا الكلام السمعتني ليهو في غنى عن اني اقولو ليكم .. المهم حتجي !...

‏( في جانب تاني ‏)

_ ان شاءالله عافية يا ولدي ؟

* والله يا عم محمد ما عارف اقوليك شنو ، لكن بقولو جرثومة معدة والله اعلم ، و انت عارف العمر دا ما بيتحمل اقل حاجة ،عشان كدا انا لازم اسافر الدويم ..

_ لالا ياخ ، ربنا يواليها بالعافيه ان شاءالله ،شوف يا متوكل ، شيل عشرة يوم يا ولدي ، اقعد جمب امك لحد ما تطمن عليها و تريح قلبك ، انا بدبر اموري في الفترة دي ..

* انا ما بخليك كدا ، عشان كدا دبرت ليك واحد صحبي بمسك مكاني لحد ما اجي ..

_ لالا انت اتوكل انا بدبرهاا ..

* زول ثقة يا عمي اتطمن !

_ عارف ما بيجي منك الا الخير يا متوكل، بس عندي زول في راسي ، كان ما اتوفقتا فيهو ، بضرب ليك ..

* خلاص اتفقناااا

_ اها حتقوم متين ؟

* في باقي يومي دااا ...

_ هاك دي ،خليها زيادة مصاريف معاك اكيد حتحتاج للوالدة ..

* لالالا والله مستورة والحمدلله يا عمي ..

_ انا ما بسالك عندك ولالا ، انا بديك ، شيلها طوالي و عشان اريحك دي للوالدة زاتا ما ليك ، يلا قوم اتكل على الله ..

* الله يحفظك يا عمي ،تسلم تسسلم ..

_ انت ولدي الما جبتو خلي بالك من نفسك ..

* وانت زي ابوي يعلم الله ..

_ يلا اتحرك عشان ما تتقلب لدموع اسي ههه ..

* الله ما يجيب الا الدموع الفرح

_ امييييين ....

انا مبسوووووطة للاخر ، لمن لاحظت لنفسي بدندن ،نعلت الشيطان و استغفرتااا من متين انا بغني ، يارب تسامحني ..

جهزت كل حاجة للمرايا لمعتها ، لحد ما جات البت صحبة يمنة و معاها بت تانيه !

يُمنة ضيفتهم ، و قعدو شويه ، حتى جاتني

قالت لي انا سألت يمنة بي كم ما ورتني عسان صحبتي عارفاها ، لكن وريني انتي !

قلت ليها والله انا ما حصل عملتا بي قروش ما عندي فكرة ، وبعدين خليها يعني انتي زي يمنة واحد ، قالت لي لالا اصلو ما بخليها والله انا شفت شغلك في يمنة و عجبني شديد ، عشان كدا وريني كم قبل نبدا والا ما حخليكي تعملي لي جادة والله ، وبعدين نسرين دي بت خالتي ، النوع الذوقو صعب داك ، قالت لو عجبها بتعملي ليها ، عشان نكون متفقين ،، قلت ليها والله كان مصرة خلاص التجيبيهو بس ، قالت لي طيب انتي ما اقل من الكوافيرات البرا ، انا بعزك بس اعملي لي حاجة بسبطة وناعمة كداا ،، قلت ليها و ما تقولي كمان حافتتح بيكي مجموعتي الجديدة حاجة روعه ، قالت لي شايفه قسمة الشمس الفي وشي دي ، بس عليكي الله حاولي توحدي لي اللون ، قلت ليها دي حاجة اكيدة ..

يلا بسم الله ، ارفعي راسك شوية .....

بس قعدت اشتغل ليهم بي مزاااااج ، لحد ما خلصتهم الاتنين اخدت زي ساعتين ولا تلاته ، ادوني 350 ، وحدة 200 والتانية ,150

خلصتهم و طلعووو مننا ،

قعدت الملم في حاجاتي و دخلتهم الدولاب ، جاتني يمنة طايرة ...

* خير مالك واقفه لي كدااا ..

_ بالنص !

* الشنو ؟

_ القروش يا رحمو مش انا جبتهم ليكي

* هههههههه شيليهم كلهم انا عندي كم يُمنة ، مش نفسك تشتري جزمة كان قلتي ، جيبيهاا ..

_ هوي !

* شنو ؟

_ جادة انتي ؟

* اكيد ..

_ بس انا بشغلااا ليكي يا رحمة ..

* وانا جادة يا قلب رحمة ، اول مرة اجتهدت في قرش ، يعني ما عارفه احساس حلووو كدا ، و نفسي طوالي كدااا اجيب دخل ، ما عشان نفسي ، عشان احقق ليكم البتتمنوهو رغم ان ابوي ما مقصر معانا ،، و عارفه كمان بتمنى شنو ؟

نفسي كل ما ربنا يديني شغله زي دي اجيب لزول فيكم حاجة ، يعني انتي تجيبي جزمتك الدايراها ، و امي المرة الجاية و كان كفت ابوي معاها ....

_ وانتي ؟

* انا ما دايرة حاجة غير اشوف فرحتكم ، عليكي الله عندي شنو ، ياها عبايه و نقاب وكلهم لونهم اسود ، كان جبت جديد منو حيلاحظ هههه ..

صحي زكرتيني ، عارفه في خمار بيتلف كدا شفتا صورتو في النت اسمو خمار ماليزي راقي شديد ، نفسي تجربي منو الكبدي والكحلي حيطلع فيكي سمح ، غيري من الاسود ..

* اتعودتا ما بقدر ..

_ ياخ بتقدري ..

* طيب بفكر فيهو ، رسلي لي الصورة واتس ..

_ طيب ، يلااا ..

* دقيقه ماشه وين .. هاكي قروشك حلالك

_ اممممممم شكرااااً ‏( باستني ‏) *:

* ههههههه مجنونة ههه ...

قمتا صليت ،و فقدتا ابوي اتأخر ، دي ما عوايدو ، سالت امي ، قالت لي قاليها حيتأخر .. ارتحتا و مشيت غرفتي ، و بديت رحلتي مع رواية جديدة ...

فجأة صحيت ! نمت متين ما عارفه , و معقول نمت كل دا !

يعني دا تاني يوم جااا !

قمتا طلعت برااا القالة ، لقيت امي مولعه ليها بخور ، و يمنة بتحضر في التلفزيون !

قالو لي مالك ‏( بحس واحد ‏) ..

قلت ليهم انا نمت وصحيت متين ما عارفه ، بسم الله ،، امي قالت لي طيب ناس عمك ديل الليلة بجوناا ،و بيحددو كل حاجة ، المهم اعملي حسابك اكيد اسعد حيطلب النظرة الشرعية ودا من حقوو ، بس عشان تكوني عارفه و ما تتعاوري و تتحرجي ..

وقفت كدااااااا ، ما عارفه هل بستوعب ولافي شنو ما كنت قادرة افسر صراحه .. قلت ليها طيب .. قالت لي اتمكيجي وزبطي نفسك ، قلت ليها المرة دي بالزات ما حينفع اتمكيج ، نظرة شرعيه من حقو يشوفني على طبيعتي ، قالت لي بطلي عوارة ، حاجات بسيطة كداا .. قلت ليها امي خليني براحتي الله يرضى عليكي ، قالت لي راحتك ..

مشيت الحمام ، اخدت حمام وطلعت شربت الشاي ،كان بعد الظهر الكلام دا .. و دخلت غرفتي بقيت اقرا في الروااااية ، و سرحتا فيهاا، رفعت راسي منها مع اذان العصر ، قمت صليت و رجعت كملت قراية ،

لمن باب الغرفه خبط ، امي قالت لي تعالي ساعديني ، قلت ليخا اساعدك في شنو ؟

قالت لي عاملة حلو ، و حاجات زي دي رتبي معاي ، قلت ليها محسساني انهم ضيوف ، ديل لو مدو راسهم ساي ، حيصل جواا بيتنا .. قالت لي انتي هبله ؟

اسي الوضع بختلف ، دا مفروض انتي تهتمي اكتر مني بتقولي كلامك دا !

قلت ليها معلييش ، كنت بقرا في رواية عالقه في ذهني و نفسي اخلصااا ما قادرة ..

قالت لي دا وقتها ، خاته تلجة في قلبك ، الناس ديل بجو علينا بعد صلاة العشاء ، قلت ليها حبابهم ‏( المغرب اذن ‏)

جهزت معاها ، و دخلت غرفتي ، مسكت روايتي العشاء اذن ، جاتني يمنة ، قالت لي لسه قاعده انتي ؟

قلت ليها اسوي شنو امش اقعد جمب خشم الباب انتظرهم يعني !

قالت لي رحمة ، في شنو انتي مالك ؟

قلت ليها بالجد محتارة اسوي شنو يعني ، عبايتي هدي ليها في الشماعه و نقابي جمبها م عندي حاجة !

قالت لي يا لطيف انتي جادة !

قومي سوي ليك حاجة في وشك دااا ، بتبالغي ، بتجلبطي البنات كلهم لمن جا دورك ما حتعملي ! حتطلعي كدا !

قلت ليهل نظرة شرعيه ، دقيقه و حانزل نقابي ، احسن يشوفني كدا من اسي ، قالت لي شويه مكياج ما بيضر ، قلت ليها لا و ما تحاولي معاي ‏( اكرر انا ما حلوة ، بس بالمكياج ما بديك الدرب ، لاني بعرف البجي مع ملامحي شنو ‏) ..

قالت لي رحمة حبيبتي، وشك شاحب زي العيانه من السهر ، و بالجد محتاجة حاجة كدا ما حينفع والهالات التحت عيونك دا كمان ! قلت ليها انا حابة كوني كداا يا يمنة وعارفه اني ما حلوة و يا الله بالمكياج بصل لجملة الجمال ، و وشي دا كدا من الله خلقني يعني الهالات وانه شاحب دي ما حاجة جديدة ،، احترمي رغبتي يا يمنة ارجوكي ، و ادعي لي الفيهو خير الله يجيبووو ..

_ ربنا يسعد قلبك ، انا طالعه اساعد امي ، اللبسي عشان العشاء خلص ..

* تمام ...

بعد طلعت ، قمتا غسلتا وشي ، ورجعت بعاين لنفسي في المراية ، طلعت فير مسحتو و كحل و مرطب ، و لبست عبايتي و طرحتي ، و مشيت قعدت ختيت نقابي جمبي ، و مسكت روايتي ، و دخلت عالمي ..

و كالعادة ما رفعت راسي الا على يمنة واقفه في الباب بتقولي بنادوكي ..

كفيت الكتاب على وشو ، و لبست نقابي حتى من غير مراية ، و طلعتا ، قلت ليها يلااا .. قالت لي اخير من العدم برضوو ... سكتا ما رديت ..

يا جماعه صدقوني ما حاسه بحاجة ، ولا حتى خوف ولا خجل ولا احساس اني عروس مفروض اكون ب ابهى حُلة .. عادي جداً ..

يمنة دخلت قدامي ، و دخلت وراهاا ، سلمت على مرة عمي ، وكانت في اختها و بنتها ، و عمي و اسعد ، صافحت عمي و فطيت اسعد ، قلت عليكم السلام ، رد

و مشيت قعدتاا .. قعدو يتونسو شويه الونسه الماليها داعي دذ ، و اسعد ما اتكلم نهائي ولا حتى عاين فيني بالغلط ، عينو في الارض ،، قام عمي قال لابوي ، انحنا جاهزين لو قلت نعقد اسي دي بنعقد ، ابوي قاليهو وانا اديتكم ليها يا الفاضل ، قامت مرة عمي ، قالا يا جماعه بس مش مفروض اسعد يشوف رحمة ، يعني دا شرع ربناااا ..

امي قالت ليها اكيد ، عاينت لابوي ، قاليها اكيد حقوووو ...

اسعد قاليهم ، ماليهو لازمة ، خلوها على راحتها .. امه قالت ليهو يا اسعد كيف *.... قاطعا ، قاليها امي ! ... سكتت طوالي ، رفع راسو وقال لابوي ، بعد كلام ابوي ماعندي رااي ، الدايرهو بتكم انا حاضر ، ابوي قاليهو والله بتي دي ما ظنيت تقبل بي الحفلات والكلام دا ، و طلبت تمش عمرة بدل العرس .. عمي قاليهو فعلااا .. ابوي كمل قاليهم بعد اسبوعين كيف

عمي قاليهو الجمعه الجاية يعني بعد اربعه يوم ليه التاخير و ما حيعملو مناسبه ، الضبيحه والغدا و بارك الله لهما ولا شنووو ..

امي قالت ليهم سجمي ،و ما اجهز بتي ؟

عمي قاليها بتك بتناا ، خير البر عاجله مافي داعي للتاخير ولاشنو يا بنية ؟

سكتاااااا ،،،،،،، وقلت ليهم الشورة شورتكم ، وكنت بعاين لاسعد نهائي مافي ردة فعل ، ماقال اي حاجة ، كان محيرني ، اول مرة كنت اشوف اسد انسان جادي و اركز في ملامحو كداا زي الاول مرة اشوفوووو ، قلت في سري ليه رفض يشوفني !

المهم مع كل سرحة و التانية لقيتهم اتوصلو ليوم الجمعه و انتهت الجلسه على كدااااا ، كيف ما عارفه !

وبرضو احاسيسي كانت ما مفهومة ، اتهيلو بعد طلعو ،مشيت طلعت عبايتي و شلت الروايه و قعدت في المطبخ اكل و اشرب بارد ، يمنة اكتر زول كانت ملاحظة لتصرفاتي الباردة والغريبه و انا كنت شايفاها عادي !

المهم ، و انا داخله غرفتي ، اتزكرت ان كان في مواعيد بينا انا و ال ‏( ما بعرف اسمو ‏) ..

مشيت افتش في تلفوني ، اخر شي لقيتو واقع في طرف السرير و طافي شحن ،، جريت وصلتووو وخليتو لمن يفتح ، قلت حيكون اتصل علي لمن روحو مرقت !

و مسكت الكتاب ونسيت امر التلفون ، ما انتبهت الا الساعه 12:30 بليل !

بعد خلصت الرواية .. المهم فتحت التلفون ، لقيت 17 مكالمة ! رجعت تلاته مرات ما رد علي ، بالي بقى مشغول من انو يكون زعل مني ... اتضايقت شديد و بقيت قاعدة دايرة اطق ، حتى كتب الروايات العندي كلها قريتهاا ، خلاص يأست ..

ختيت التلفون وغمضتاااا ، لقيت التلفون بيرن اتصل علي ... رديت .

* السلام عليكم ...

_ ‏( شال نفس ‏) هلاااااا ..

* دي زعلة صح

_ ابداً وحزعل ليه ؟

* اني نسيت المواعيد ..

_ في فرق بين النسيان و التطنيش ، و بصراحه الحاجة دي بتختلف حسب اهتمامات الشخص و اولوياته !

* اسفة ، بس جد لو عرفت وضعي ما حتزعل مني ..

_ اساسا ما زعلان ، عادي ..

* طيب ، الله ما يجيب زعل ..

_ امين ، اهااا حتعوضيني متين ؟ * والله انا عندي ظروف جدت و *.... قاطعني

_ تمام ، عن ازنك ..

* انت زعلتا صح ؟

_ لا ابدا بس اكيد م احجبرك تفضي نفسك عشرة دقايق تاخد الهدية الجبتها ليكي ..

* ما كدا ..... ااا ، طيب بكرة فاضي ؟

_ بفضى ليكي ..

* طيب شفت الشارع الكان

سوقتني منو ؟

_ ااي

* قصادو في دخلة شارعنا الكنت واقفة قصادو ، حتعرفو من المزيرة في اولو ، دا تخلي ، خش في طرف الشارع القبلو ، بتلقاني منتظراك ، الساعه 2 ..

_ تمام ، بتصل عليكي قبل اتحرك ..

* اتفقناا ، اها عملت شنو مع خطيبتك ؟ _ ما بتنفع معاي تاني صدقيني و *... قاطعو صوت جمبه ، بيقول يا مايك *....... المكالمة اتقطعت !

قلتا بتكون امه ولا اخته ، بس شنو يا مايك ... اسمو منو هو يا ربي !

رجعتا رقدتا ،و تاني رجع لي ، قالي :

_ اسف قفلتا فيكي ،دي اختي كانت عايزة حاجة ..

* اي عرفته سمعت صوتها فعلاً ..

_ صوتها عالي طبيعي ههههه

* ممكن اعرف انت اسمك منو ؟

_ ضروري يعني ؟

* اكيد ، حتى ما عارفه اسجلك بشنوو ههه

_ طيب بكرة تعرفي ... يلا نومي بعد دااا

* اوكي ، مع السلامة ..

_ الله يسلمك ...

قفلت منو و بقيت بفكر انا وعدتو الاقيهو و انا اصلاً ما واثقه اذا ح اقدر انزل ولالا ، اكيد و ما اظن امي حتخليني و عمري ما كذبت عليهم ... يا الله احلها كيف دي ....

بقيت بين تفكير والتاني لحد ما نمته ..