الجزء 1
'' في جوفي مُتعةُ حرام ، نعم !! أنا تلك العاهرة ''
# لي ..
* قوووووووم مني ، زح ، ززززززززح ..
_ ايوااااااا ، ايواااا ،، ............... ( سكت و مبرق عيونو ) ...... ما عارف ما قادر استوعب ، يعني لينا اربعه شهور و داخلين في الشهر الخامس من ما اتزوجنا ، و عايشين زي الاخوان لا بتخليني اقرب ليكي ولا حتى انوم في نفس الغرفة ! عشان ...........
هاهاههههههههههههههههه ياخ اول مرة احس اني غبي ! انتي عارفه انا كنت فاهم ، و مفسر تصرفاتك دي على اساس انك لسه ما قادرة تحبيني على اساس كنتي رافضاني و رافضة حبي ، و اديتك وقتك ارررربعة شهوور ، ما ظنيت في راجل قبلي سواها ، ما كنت بديكي فرصه تفتحي خشمك تتمني حاجة والا اكون حققتها و جبتها ليكي قبل تنطقيها ، كل يوم عشتو معاكي على امل بس اسمع منك كلمة حلوة ، على امل بس انوم معاكي في نفس الغرفه ما كنت داير اكتر من كدا ، يوم كنتي تبتسمي كنت بحس اني نجحت في اني اخليكي مبسوطة و املي بيكبر في انه يجي يوم و تحبيني فيهو ، او حتى ياخ شوية ريدة بس ، عشان زواجنا دا ما يبقى باهت !
دا كلوووووو طلع استغفال و استصغار منك لي هههه اتخيلي ، قدرتي تديني على قفاي ، اااي استغربتا لمن ابوكي جا و قالي انك موافقه على العرس فرحتا زي الما فرحتا قبل كدا و كان ضوء اخضر بالنسبه لي بس اصلو ما فكرتا فيكي بالشينة ! كان كل همي تبقى لي ، يعني كنتي واثقة و عارفه انك حتلفي حتلفي و وقت ما تجي و تقرري بمهلتك حتلقي الحمار دا ( بقصد نفسو ) انه قاعد و منتظرك ولسه بيحبك !
طيب ليه كنتي لابسه وش ما حقك ! ليه خليتيني اشوفك المحترمة المؤدبة مصافحه ساي ما بتصافحي و ما كنت شايف وحدة تفوقك بي اخلاقها .... ليه
طيب لو دا شغلك كان توريني ياخ ما كان انتظرتك السنين دي كلها ولا حتى كان اتزوجتك و انتظرتك اربعه شهور ، كنت بدفع ليكي زي ما ديك دفعو ليكي ، كان توريني انك وحدة ما عندها شرف ، كان توريني انك رخيصه ، كان توريني انك بتبيعي في شرفك كان توريني انك ما بت اساساً
يعني حتى ما لاقي ليكي عذر اختو ليكي لاني راجل وبقدر اعرف انك ما عملتي كدا مرة ولا اتنين ......
عارفه ، قدر ما حبيتك كرهتك !
و حأدفعك تمن السنين الضيعتها في حبك دا دم اقسسسم بالله و عهداً علي ما حأرحمك ، انا اوريكي الحمار الاستغفلتيهو دا حيعمل فيكي شنو ، قوووومي ( بي كوراك ) قووووووومي اتحركي ، قومي ما تخليني اجرك ، يمين ما يقع الارض ما برحمك ، قوووووومي دايريني اجررررك صح ، يا ***.....
جزئية معلقة لحين عودة
_
'' أنا مُتعبة من الاشياء المُتاحة، لا المرغوبة ''!
_ يا امي عليكي الله ، عليكي الله ياخ ....
_ يُمنة ، كلمتك مليوووووون مرة قلت ليكي ما تدخليني بينك و بين ابوكي ! عندك خشم ، امشي كلميهو برااااك ..
* يا امي ، ياخ انتي عارفه ابوي برااكي حيقول لي لا ..
_ طيب وقت انتي عارفه حيقول ليكي لا بتختيني انا في وش المدفع ليه ؟
* امي انتي بتقدري تقنعيهو ما زي انا عليكي الله حلفتك حلفتك اخر مرة تاني ما بقوليكي قولي ليهو حاجة ، عشااااااااني عليكي الله !
_ طيب طيب ...
* يا سلاااااام ياخ انتي احلا ام في الدنيا ، الله يخليك لي يا رب .
_ ااااااهااااا قلنا شنو !
* اسفه اسفه ، بلاش يخليكي لي ، ربنا يحفظك لي ..
_ ايوة كدااا ..
* طيب يا امي هي ليه ما صح يعني ما قادرة استوعبا صراحه ..
_ و الله يا يمنة انا زاتي ما لاقية ليها فهم توضيحي بس اهلنا زمان كانو بقولو لينا ما تقولي لي زول عزيز الله يخليك لي ! لانها جاية من التخلية يعني الدعوة لو اتعمقتي في معناها حتلقيها معكوسة !
* بس يا امي ربنا بياخد بنية الزول يعني ، انا لمن اقول لزول ربنا يخليك لي ما عشان انا ما دايراهو لا من جواي بكون قاصده م اتحرم منو ... المهم كان عندي طلب تاني !
_ يمنة ، قومي قومي من جمبي ،انا عارفه اصلاً انتي الزول ما يديكي وش كلو كلو ، انجري من قدامي ...
* خلاص خلاص ، براحه بس كنت دايرة ....
_ دايرة قروووووش عارفاكي كويس انا ، ما عارفه قروشك دي بتوديها وين نفسي اعرف ، و ما عندي يلا قومي من هنا ، واقوليكي حاجة ! ابوكي زاتو امشي كلمي براكي !
* لالا عليكي الله لا كل الا دا خلاص قايمة بس كلميهوووو ما عندي مشكله بمش من غير قروش ...
_ حأعد لحدي خمسة و كان ما قمتي من هنا م حأا .....
* خلاص خلاص مشيت مشيت والله مششيت ....
( جيت داخله )
الدوشة شنووووو ! طبعاً استاذة يُمن و نقتها و طلباتها الما بتخلص صح يا امي هههههه ..
يُمن : انتي اسكتي ....
امي : انتي لسة ما اتحركتي من هناا انا قلت شنو يا يمُمنة !
يُمنة : خلاص خلاص ماشة والله ماشة ...
طبعاً انتو قايلني النقناقة الفوق دي ( يُمنة ) صح ؟ هههه لالا ، يُمنة اختي الصغيرة ، يعني ما صغيرة شديد ، عمرها 19 سنة ، طلباتها ما بتخلص و لا ليها اخر ، و كل يوم اجي القى البرنامج دا شغال قدامي ......
جيت جمب امي ، سلمت عليها و قعدت جمبها ،، يمكن المتعارف عليه في اغلب الاسر ان اخر العنقود بيكون ماخد نصيب كبير من الدلع و من الحب ، لكن في اسرتنا كان الوضع مختلف ، كنت انا الماخدة نصيب الاسد من الحب ، في عيلتنا كلها ما من اسرتنا بس ،،
* امي ....
_ قولي ...
* عارفه انا الفترة الجاية دي محتاجة دعواتك شدييييييد ..
_ ياتو يوم كان بيمر علي من غير ما ادعي ليكي انتي و اخوانك ! ..
* لا ما قصدي يا غاليه ، انا عارفه يا امي انك ما بتتوصى بالفطرة ساي بترفعي يدك وتدعي لينا قبل نفسك ، بس يمكن عشان خايفه المرة دي من الامتحانات ، و ما اي امتحانات ..
_ يا بتي انتي بس اعملي العليكي رغم انك بتعملي العليكي والباقي كلو بيعدي و بيتسهل ما تشيلي هم ..
* بأذن الله ... انا قايمة اغير و اصلي و انوم شوية عشان اقوم افطر و اقراااا ...
_ حاضر بس اتغدي اول ، و قبل تغيري هدومك عليك الله يا رحمة شيلي الصحن دا ناوليهو مرة عمك و تعالي ..
* يا امي ......... تئ .. طيب حاضر ..
_ انا بس نفسي اعرف انتي ليه ما بتحبي تمشي ليهم يا رحمة يا بتي !
* يا امي انا ما قلتت حاجة اسي ..
_ انتي ما قلتي لكن وشك قال ..
* خلاص يا امي بمشي بس ما فيها حاجة ، وينو الصحن ؟
_ المغطى داااك ..
* طيب ...
_ ما تتاخري عشان الغداا ..
* امي ، الليله الخميس انا صايمة ..
_ ااااااايك راح من بالي يا بتي والله ، طيب اقعدي خلي يُمنة بتمش ما بديك مشوار تاني ..
* لالا عادي يا امي خلاص انا اصلاً لابسه ..
_ من يوم ولدتك شفت فيكي النورر ، الله يغطي عليكي ....
عشان ما تفتكرو انا عندي سر في بيت ناس عمي و انه سبب رفضي امشي ، وراهو حاجة داساها ، لا ابداً بس عدم قبول رغم اني ما شفت منهم حاجة كعبه ، ياهم الوحيدين من اهلنا ساكنين جيرانا ..
شلتا الصحن ، و طلعتا ، مشيت خبطت عليهم الباب ، مرتين ورا بعض ، فتح لي الباب ..
_ يا هلا رحمة كيف حالك ؟
* و عليكم السلام انور ، الحمدلله انت كيفك ؟
_ معليش قصدي السلام عليكم ،انا كويس ، ادخلي ، امي و سماح جوااا !
* لالا انا جيت بس عشان امي قالت لي ادي الصحن دا لمرة عمو ..
_ خشي ودي ليها ..
* لالا خلاص هاكااا .... شيلو انت ..
_ طيب مُصرة يعني
* ااي والله ياداب راجعه من الجامعه و براك شايف الجو كيف ..
_ يلا ربنا يعين
* اللهم امين ، عن ازنك ..
_ اتفضلي ...
رجعت البيت ، مشيت استحميت و صليت الفاتني ، و انجدعتا في السرييير ، و سامعه صوت تلفوني بيرن في الشنطة ، و ماقادرة انزل رجلي من السرير ، اوووف ، الشنطة ما بتجيني لحد هنا يا ربي .... لسه ما كملتا كلامي ، يُمنة جات داااخلة ، قلت ليها بسسس جيتي والله جاااابك ، عليكي الله ناوليني شنطتي دي تلفوني بيرن من قبيل ... قالت لي بششرط ! قلت ليها :
* يُمنة اقسم بالله نفسي تعملي ليك حاجة كدا لله في لله بس ، ما ممكن لكن ..
_ ياخ ما تديني محاضرة عليكي الله ..
* طيب قولي ..
_ بكرة عرس رضوى صحبتي ..
* رضوى .... رضوى ، اهاااا دي الحلبية القصيرة ديك صح !
_ اااااي ياها
* ماشاءالله وااله واالداير يعرسها منو . !
_ رحمة عليكي الله دا سوال شنو بتاع الخالات دا ، زي المرة الشمشارة ، مالي ومال االداير يعرسها ، كدي خلينا في المهم اسسي ..
* لسانك دا داير قطع والله ، ياخ تلفوني حيطرشق جيبيهو لي بعداك بسوي ليك الدايراهو ياخ ...
_ طيب طيب ، عايزاكي تعملي لي مكياج زااابط كدددداااا ...
* طيب فيها شنو لو قلتي كدا عديل !
_ عشان سمعتك بتقولي لأمي عايزة تقري ، خفتك ترفضي لي ...
* امممم لالا اساساً يدي بتاكلني ، لا وكمان لقيت لي مكياج في الانستقرااام حي انا بس نفسي اطبقو ..
_ لالا تجاربك دي خليها اسي عليكي الله ، اسي بس عايزة حاجة كداااا واو ..
* طيب طيب ، بكرة صح ؟
_ ايوااااا ...
* ابوي وافق ليكي تمشي ؟
_ طالما امي بنفسها حتكلمو يبقى حيوافف ان شاااااااءالله ...
* ما تتعشمي غايتوووو ، و اوع تفكري تدبسيني في المشية عشان انا عارفه ابوي حيقوليكي سوقي اختك معاكي و ما تمشي براااكي ، من اسي كلمتك هاا ...
_ ياخ اكليني ، لالا تعالي ابلعيني ، في شنو انتي برااااحه ، انا اساساً ما سايقاكي معاي دا عرس ما ناقص بوزك تمديهو لي ، و حعرف اقنع ابوي ، كدي امسكي تلفونك دا ، انا ماشه .....
* يُمنة تعالي لحظة !
_ عارفاكي حتقولي شنو يا رحمة
* طيب فكري ، في الموضوع و ما تصديني !
_ رحمة ! دا ما حاجة ربنا فرضها علينا ، و انا عشان اعمل كدا لازم اكون حابة من جواي عشان اقدر اقتنع ، بعدين يا رحمة انا لسه صغيرة ، لسه ما شفت حاجة للدنيا دي ، نفسي اللبس نفسي اتفسح نفسي اسافر نفسي اتعلم ، يا رحمة انا فرقي عنك اني شغوفة ، بحب حياتي ، بحب استمتع ، ما بحب احتكر نفسي في مكان واحد ، عايزة اتمتع ..
* هه محسساني اني بقوليكي كدا عشان اخنقك ،
طيب دا عمرو ما حيمنعك تستمتعي بحياتك ، ابسط مثال عندك انا ، بعششق المكياج و بستمتع بيهو شديد و بطير من الفرح لو جاني قلم كحل ساي هدية ، و بتمكيج و ما حارمة نفسي من حاجة بالعكس ..
_ و بعد تتمكيجي يا رحمة ، اهاا الش
ايفو منو مكياجك دا ! بتمشي تغسلي وشك و تصلي و تنومي !
* فعلاً .... ااااا .. خلاص يا يمنة شوفي كنتي ماشة تعملي شنو ! و اوعدك تاني ما افتح ليكي الموضوع دا !
_ يا ريت يا رحمة ، وخصوصاً قدام امي ..
* جداً يا غالية !! رغم انو اتربينا انا و انتي نحترم رغبات بعض ، فا ما كان مفروض اصر على حاجة انا مقتنعة من جواي انها بتجي من نفس الزول ، ما بيلذو عليها ..