الجزء 25

بعد طلعو مني ، قمت لملمت الكبايات و غسلتها ،، مشيت عشان اقعد مع امي ، لقيتها مافيشه ، سالت يمنة ، قالت لي مرة عمك دي عيانة ليهت كم يوم و ما عندنا خبر ، الا بالصدفة ، اسي امي عندهم ..

قلت ليها لا حول ولا قوة الا بالله ، بالجد ما عندنا خبر والله ربنا يواليها بالعافيه ، وانتي ماشة وين ؟

قالت لي ماشة ليهم طبعا م صح .. قلت ليها انتظريني اللبس اجي معاكي ، قالت لي حصليني ، قلت ليها لا طبعا اصبري بجي معاكي ...

لبست سرعه سرعه ، و طلعنا ..

الباب مردود طبيعي ،بس خبطنا و دخلنا ، برا مافي زول في الحوش ، دخلنا الصاله جوااا ، لقينا سماح و حماتها و اسماء ، و امي ، و مرة قاعدة و معاها بتها برضو سايقه ليها شافع .. المهم دخلنا سلمنا ، سماح حضنتني كداااا و سلام حنين شديد ..

سلمت عليهم كلهم في يدهم حتى اسماء عادي جدا ، لكن هي سحبت يدها قبل تسلم لي كويس ، قلت خير ، و مشيت على مرة عمي ‏( راقدة في السرير ‏)

سلمت عليهاااا ، بعد دايرة امشي اقعد ،قالت لي تعالي يا رحمة ، زحت رجولها و قعدتني ..

قلت ليها حأضايقك كدا !

قالت لي لالا بالعكس كان نفسي اشوفك ، انتي كويسه ؟

قلت ليها انا بخير بس انتي ابقي لينا كويسه تاني مافي عوجة ، قالت لي العافيه زيها مافي يا بتي والله ، بس ما نقول الا حمدلله ..

سماح قالت لي والله ما اتونست الا اسي يا رحمة من شافتك ،، قلت ليها حمدلله كان كدا ،، سماح قالت لي اقعدي معانا ياخ ..

اسماء حمرت ليهااا .. و اسعد جا شتيل لبن و زبادي و عيش ، بيقول ل سماح تعالي شيلي ، يمنة مشت اتناولت منو ،،

من شافني وقف ، و سماح كملت كلانتا ، قالت لي عليكي الله بيتي معانا والله امي فرحت بشوفتك يا رحوم !

قلت ليها انا جمبكم ما بعيدة ، لو ناديتي بالحيطة ساي بجي .. عاين ل مرة عمي قلت ليها عاملة كيكة اجيب ليكي تاكليها مع الحليب ؟ هزت لي راسها ،،

سماح قالت لي سكر كتير لا يا رحمة ، قلت ليها لالا سكر بسيط ، حأجيب ليها واجي .. قمتا و شلت من يمنة المفتاح .. و اسماء دي عايزة تاكلني ‏( اسعد مافي في اللحطة دي ‏) .. طلعتا على البيت ، جبت ليها صحن و جيت داخلة ..

ياهو قعدنا لمن الوقت اتاخر ، طلعنا وناس اسماء لسة قاعدين !

رجعنا البيت ، اتعشينا و كل زول مشى شاف شغلتو .. انا مشيت لتلفوني ،لقيت خمسة مكالمات فائتة من متوكل ، رجعت ليهو قفل و اتصل هو . .

* السلام عليكم ..

_ وعليكم السلام .. وينك ؟

* ما كنت جمب التلفون لقيتك متصل كتير ..

كل دا وين ما سمعتي مكالماتي ؟

* مشيت بيت عمي

_ نعم ! عمك ياتو يا رحمة ؟

* عمي الفاضل الجمبنا

_ ابو زوجك ؟

* الكان زوجي يا متوكل

_ عندك شنو هناك ؟

* زوجة عمي عيانة مشينا ليها زيارة ..

_ سلامتهاا !

* مالك انت ؟

_ مافي حاجة يا رحمة

* كيف مافي حاجة ما شايف نفسك قلبت كيف ؟

_ هو كان موجود ؟

* ايوااااه يا متوكل

_ .......

* متوكل ، بالعقل هو لمن كنت على ذمتو و في بيت واحد ما عمل معاي حاجة ، كلام ساي م كان بتكلمو معاي ، يجي اسي يسوي الحاجات دي ؟ عليك الله انا ما شغاله بيهو انت حاول ما تركز ..

_ انا ما بقدر اتحكم في غيرتي يا رحمةو ..

* ما مشكلة ، بس الموضوع عادي عشان م تزعج نفسك ساي ..

_ طيب ،، طيب ...... المهم يا رحمة ، انا لحد اسي ما عارف وضعنا شنو ، عايز احكي لاهلي عنك بس انتي ما اديتيني كلمة ّ!

* الكلام مع ابوي يا متوكل .. وهو اكيد حيفاتحك بعد العرس ..

_ انتي موافقه ؟

* متوكل !

_ ما متوكل يا رحمة انا داير اسمعا منك ..

* الشورة ، شورة ابوي ..

_ طيب يا رحمة ، المهم انا ساعي لي في بيت الايام دي ادعي لي تتيسر ..

* بيت لشنو

_ ما تتخلعي ساي ، دا لاهلي عايز اجيب امي واخواني الخرطوم هنا يكونو قدام عيني ، تعبت من السفر كل قترة ..

* هما وين ؟

_ في البلد ..

* طيب اخوانك ديل وضعهم الدراسي شنو جيتهم الخرطوم ما حتأثر عليهم ؟

_ لالا ، برتبا ان شاء الله بس القا البيت اول ..

* ان شاءالله تلقاهو .. اها مشيت لابوي الليله ؟

_ والله قالي م اجي ، و من الصباح في المحل و لحمة مافي ..

* كيف يعني مافي ؟

_ ما عارف ، بس مفروض يجيبو لحمة السلخانه البنتعامل معاها و ما جابو ،،،

* غريبة !

_ ماعلينا ، يلاااا بعد دا عندي رواية داير اقراها ..

* اسمهاا شنو ؟

_ عشق اسود

* ما جذاابة

_ ما عندي غيري

عايزة امشي المكتبه والله

_ مافي مشي يا رحمة ، جيبي الكتب انا ببدلهم

* ليه يعني ، انا عايزة اختار

_ طيب حيوديكي منو ؟

* براي

_ عايزة تمشي الله و رقبتك ؟

* انا ما بحب امشي براي و يمنة ما بتمشي ..

_ طيب اختاري الزايراهم من النت و انا بجيبهم ليكي ، اسمعي الكلام ..

* حاضر ، اتفقنا

_ ياخ ب .....

* شنوووو !

_ وو وو ولاشي ، يلا مع السلامة

* الله يسلمك ..

تاني يوم ..

في جانب اسعد و اسماء ‏)

* اكيد ما جايباني عشان تعايني فيني !

_ لارانا عايزاك تتكلم انت !

* انا ما قلت عايز اقابلك عشان اتكلم انا

_ سبحان الله ، وشي زاتو ما طايق تشوفو يا اسعد ..

* انا ما قلت كدا براكي الفهمتي كدا !

_ براي ! عاين يا اسعد ،

الوضع بينا بقى متأزم و انا ما عارفه المشكله وين ، اسعد انت اتغيرت معاي ، تلفون ما بتتصل علي ، اذا انا اتصلت انت ما بترد ، حاسه اني فارضه نفسي عليك ، لكن اقوليك حاجة !

انت شخصيتك ضعيفه ، ما بتقدر تواجهه من يوم يومك ..

* اسماء احترمي نفسك ...

_ لا ما بحترم نفسي ، لمن اقول الحقيقه دي تبقى عدم احترام ! و انا ما غبيه ، امبارح من شفت رحمة بقيت واقف متنح فيها و كل الناس لاحظت ليك ، انت خليك واضح قول انك بتحبها ،،، و ابقى راجل رجع لي شرفي الشلتو مني !!

* انتي عايزة الكلام الكعب صح ؟ يلا اسمعي ‏( قام وقف على حيلو و قاليها ‏)

مافي وحدة متربية و بتحترم شيب امها و ابوها ، بتدي شرفعا بالهين كدااا ، و الحب عمرو ما كان مبررر ! عن ازنك .. و مشى ..

_ يا كلب يا اسعد ..... اسعد ، يا اسسسسسعد ، والله ما اخليك .....

قمتا ، خلصت نضافة البيت ، قاعدين انا و يمنة في التلفزيون و بنتونس .. امي جات قالت لينا .. تاكلو شنو ؟

قلت ليها ، اي حاجة ، امي قالت نفسي في كبدة والله بس ابوكي مافي .. يمنة قالت ليها و انا كمان والله بس عليكي الله يا امي ما تسوي فيها طماطم ..

امي قالت ليها هي وينا الكبدة لمن اسوي فيها طماطم ولالا ..

الاتنين عاينو لي ، قلت ليهن في شنو تعاينو لي ؟ ‏( كنت فاهماهم بس بستهبل ‏) قلت لامي بس ما تقولي لي امشي ليكم الجزارة !

يمنة قالت لي عليكي الله ، بعدين بمشي معاكي المكتبه يلا يا رحوووومة ...

امي قالت لي يلاااا ... اترردتا كدا ، و قلت ليهم تمام .. مشيت الغرفة ، اتصلت على متوكل ما بيرد ، يمكن 6 مرات ما بيرد علي ، لبست عبايتي و نقابي ، و طلعتا ..

و انا طالعه جمبي الباب ، لاقيت اسعد ، زي الكان داير يخبط بابنا و متردد ، عاينت ليهو ومشيت ، قالي رحمة ، رحمة دقيقه ... مشيت و طنشتا ، و ما اتلفت اصلاً

ما عندي معاهو حاجة كعبه بس حسيت اني ما عايزة اسمعوو ...

المهم ، وصلت الجزارة ، المنظر كان غريب ..

كل ما اقرب حيلي بيبرد من المنظر الشايفاه و بقرب اكتر عشان اتأكد دي حقيقه ولا انا بتخيل !