الجزء 29
( في القسم )
متوكل : كيف يعني كفالة ما بتطلعو ! ليه اصلو كاتل رقبة هو !
يا عمي محمد اتكلم ، وريهم انحنا بنجيب اللحمة دي من وين ! كلم عم عبدالله يجي يحل الإشكال دا ، انت ليه ساكت ؟
الضابط : اذا هو نفس ساكت من جا ما عايز يتكلم انت حارق دمك ليه ؟
متوكل : يا سعادة الراجل دا ابوي و انا بشتغل معاهو ، طيب ليه طلعتوني انا ؟ انا كمان بشتغل معاهو و لمن شلتو اللحمة انا الكنت موجود وقتها و رفعتوني !
الضابط : مافي اي ادلة ضدك
متوكل : ولافي ادلة ضدو
الضابط : لا في ، عقودات الايجار كل السنوات الفاتت دي ، و الشهود ، و نتيجة التحليل حقت اللحمة ، دي كلها ما ادلة ؟
متوكل : طيب يا سعادة وافق على الكفالة ارجوك لحد ما نشوف حل ..
الضابط : دي ما قضية يقبلو فيها كفالة !
متوكل : دي ما جريمة قتل !
الضابط : كلامي واحد !
( في جانب ام مناهل ومريم )
حسبي الله و نعم الوكيل فيك .... حسبي الله ونعم الوكيل ، ما عافيه ليك حقي ولا حق اولادي ، و حيجي يوم و تشوفو في عيالك اذا ما في نفسك .....
_ قبل ما تحسبني علي مالك ما وعيتي راجلك عشان ما يوصل للمرحلة دي ؟
* راجلي ما بياكل قرش حراااام يا عبدالله ، حرام عليك ياخ يوم عرس بتي حرام عليك الله ، حسبي الله و نعم الوكيل فيك ، الله ينعل الخوة الزي دي .......*قفلت..
في القسم امي كانت برا ، و متوكل براهو جواا ، لمن متوكل جا طالع ،، امي قالت ليهو ؟
_بشر يا متوكل !
*ما عارف ليه معقدنها يا خالتي ، الموضوع دا فيهو حاجة ما مفهومة !
_في شنو فهمني ؟
*تعالي اركبي من الشمس بفهمك جواا العربيه تعالي ...
_في شنو وريني ؟
*الضابط ما داير يتفاهم معاي ولا عايز يديني فرصة ، بيقفل معاي النقاش ، لدرجة حسيتو شوية و ممكن يضربني ، حتى الكفالة رفض يناقشني فيها ،و المشكلة ما هنا ، المشكلة ان عم محمد ساكت ، بس مسهم و ساكت حرف ماقالو ، قدر ما حاولت معاهو مافي فايدة ، زي المصدوم ولا مالو ماقادر افهم ولا استوعب حاجة !
_انا لو شفتو حقدر اعرف بقدر اقننعو. انا لازم اشوفو يا متوكل مافي حاجة اسمها ما بدخل القسم ، لا بدخل ليه ما ادخل ..
*لالا في حل يا خالتي ، في عبدالله ...
_عبدالله دا منو ؟
*عبدالله صاحب الجزارة الاصلي ..
_طيب دا ليهو دور مهم مفروض يمسكو هو ..
*هو مختفي يا خالتي ، بس هو الوحيد البيقدر يحلها ..
_ما عرفتو لكن يلا نمشي ليهو !
*لا انا بمشي بس ارجعك البيت اول ، لاني ما عارف ليهو عنوان ، الا امشي الجزارة التاني اشيل العنوان من هناك ..
_طيب برضو بجي معاك ..
*طيب ..
( متوكل حاول كتير يوصل لعم عبدالله دا ، بس اتوصل للعنوان كان الوقت اتاخر و صعب كان يمشي في وقت زي دا ، عشان كدا رجع امي ، و رجعو ، كان عمي و سماح معانا في الصالون ،، حكو لينا كل حاجة حصلت بالتفصيل ، قلت لمتوكل :
*عايز تعالج حركتكم العملتو الليله دي ، يبقى تسوقوني معاكم بكرة ..
_واختك ؟
*عندها جامعه ..
عمي : عبدالله ! عبدالله ! دقيقه عبدالله دا اخو ابتسام زوجة محمد التانية ؟
امي : شنوووووووووو؟
عمي : انا بعرف ان عندو صحبو مفروض ايمه عبدالله و اخو مرتو و كان كلمني من بدري في بينهم شغل .... اكيد هو ما غيرو ..
امي : استغفرالله العظيم يا رب !
و انتهى اليوم زي عدمو مافي جديد ، كل زرل مشى مكانه ، و متوكل نام في نفس البرش !
اليوم التاني ، الصباح بعد فطرنا ،طلعنا كلنا ، وصلنا يمنة الجامعه في سكتنا ..
و مشينا انا وامي و متوكل ، بنفتش في بيت عبدالله دا ، لحد ما وصلنا !
متوكل نزل ، خبط الباب وانحنا في العربية .. شايفه فتحت ليهو وحدة ، المهم وقفتو مسافة حتى طلع ليهو راجل بي جلابية ، انا من شفتو عرفتو لاني شفتو قاعد مع ابوي يوم مشيت المكتبه مع متوكل ، ايوااا هو زاتو متزكراهو بي وضوح !
طوالي نزلتا انا كمان ، امي لمن شافتني نزلتا جات وراي ... و انا بكل لهفه و عفوية مشيت عليهم ، و قلت ليهو ..
*ازيك يا عمو كيف حالك ؟
قالي : حمدلله ( بطرف لسانه)
*انا رحمو يا عمو بت محمد
قالي : اممممم
متوكل : لازم تجي معاي ضروري ، الناس ديل متمسكين بموقفهم بطريقه غريبة حتى ما خلو لينا مجال للنقاش !
قاليهو : انا مشغول حاليا ، عن ازنك و عايز يدخل و يقفل الباب !
متوكل : لو سمحت في شنو انا خليتك حل مضمون و ما اتوقعت منك ردة فعل زي دي ، الراجل دا صحبك من سنين و اسي هو محتاج ليك رغم اني متامد حيكون عندك خبر من يوم تشميع الجزارة !
جات وحدة ، قالت ليهو بابا في شنو ؟
مع صوتها رفعت راسي ، و ياها اريج الما بتغباني ! انا لمن كشيت و رجعت لي ورا !
قلت لمتومل يلا خلينا نمشي ؟
قالت لي : اهلا اهلا رحمة بحالها هنا ههههههه جات بسرعه يا بابا مش ..
قاليها ادخلي .. قالت ليهو ادخل وين انا ما صدقتااا ههههه اها جاين يبوسو رجولنا و لا جاين يشحدووو من اسيادهم !
متوكل : بتتكلمي كدا ليه انتي ؟ و بعدين بتعرفي رحمة من وين ؟
قالت ليهو : عز المعرفه ولا شنو يا رحوومة !
ابوها قال لمتوكل ،
انا ما عندي حاجة اقدر اسويها خلي يحل رقبتو براهوو ،، ااتفضلو
،، امي واقفه مصدومة بتعاين تحاول تفهم الحاصل ...
قلت ليهم يلااا خلونا نمشي ...
قالت لي طلوع ابوكي حلو في رجلي !
بعد دايرة ارجع اللطشا استحملت و مشيت . ركبت العربيه .. بس من ركبنا امي و متوكل استلموني اسئله ورا بعض..
امي قالت لي فهميني يا رحمة ..قلت ليها يا امي ، البت دي انا ضاربلها كف يوم جيت مناسبه مناهل وهي الغلطت حتى اخواتي دافعو عني ،والعرفت انها بت خالهم و .... *قاطعتني ....
يعني القرف دا كلو حاصلينا بسبب المقرفه المتزوجها ابوكي و دااا اخوهااا ، اصلا ما غريب عليهم اخ و اختو ،واقوليكي حاجة ! ابوكي يستاهل خلي ... اتحرك يا متوكل رجعني البيت ، دايرين تمشو انتو بطريقتكم امشو انا برا !
متوكل قاليها ، روقي ما كدااااا ، انا راسي داير ينفجر ما اكذب عليكم ما اتخيلت عبدالله يطلع بالطريقه دي ، و غير كدا الفترة الاخيرة دي ، قعاد عبدالله مع عمي محمد كان زايد غير العادة ، في حاجة غلط !
و كان ما اخاف الظلم ، الموضوع دا مُدبر !
قلت ليهو اكيد ما مدبر عشان انا رفضت اعتذر ليها لمن طلبو منو ، و متزكرة خالتو ابتسام ( مرة ابوي)
طلبت مني اعتذر ليها و انا رفضتا و قالت لي عشان خاطر ابوكي و برضو رفضتا اعتذر لمن مشيت ، مستحيل يكون دا سبب !
و زي الكانو منتظرين جيتنا دي يا متوكل ما لاحظته من كلامها !
اها مبسوطة بأخواتك و امهم !
شوفي ابوكي وصل وين بسببهم ،. كلو من تحت راسهم ، شابكاني اخواتي اخواتي اسي شوفيهم ،قاعدين في امان الله ! و ما جايبين خبرو ، دي لو ما كانت لعبه بينهم عشان البيت دااا ، لكن يعيشو و يتمنوووو ، هين يا ابتسام انتي و اخوكي !
بقيت مصدومة من الحاصل ، ما هو ما منطق عشان انا ما اعتذرتا يحصل كدا في ابوي بسبب خلاف زي دا ، طيب خالتو ابتسام موقفها شنو ؟ انا متأكدة هي ما عارفة ، و استبعد انهم متفقين على ابوي مستحيل تعمل كدا في عرس بتها ، و عم عبدالله ما عمل كدا الا في عرس ولدو من مناهل اختي ! بس بيتهم كان عادي زي الما فيهو عرس ، الموضوع دا غريب و اكبر من كدا ، بس اريج حاولت تستغل موقفناا بسلطة ابوها !
في حاجة غلط و ما مفهومة !