الجزء 35

المهم... اتصل علي متوكل ، اتونسنا شويه و نمت ليهو في السماعه ،تاني ما عارفه حصل شنو ، لقيت الواطه اصبحت !

قمتا نضفتا و رتبت البيت ، و بخرتا ، و عملت ويكة ياها الموجودة ، اتصلت علي وحدة حجزت ليوم بكرة ! اديتها مواعيد و بقيت قاعدة كل شوية ارفع يدي و ادعي لي ربناا .. لحد ناس شيماء جوووو ...

قعدنا ونسة و غدا و جبنة و ضحك

بعداك دخلنا غرفتي انا وشوشو ، و امها مع امي برااا ..

مع قعدتي كدا ، متوكل اتصل ، طبعا شوشو شافت الاسم و جمبو قلب .. قالت لي دا منو ؟ قلت ليها خطيبي حسب العادات والتقاليد ههه ، قالت لي كذابة والله ... و بديت احكي ليها عن متوكل ، بعد رجعت ليهو برسالة اني مشغولة ..

*عارفه من نشرتي رقمي الشغل جا لكن ما شديد ، بس حمدلله اتصرفت في البيت بي قروشو ، والله يا شوشو نفسي اعالج ابوي ماعندو زول يعمل عشانو حاجة في الدنيا دي !

_حتعملي شنو يا رحمة ، دي الوحيدة الفي يدك تسويهاااا ..

*ياريت لو القى شغل احسن و دايم ..

_شغل في البلد دي مافي والله ، حتى الحتشتغلي ما بجيب حق تعبك ، حمدلله بس

، الواحد كان لقى طريقه بيطفش منها والله ..

*والله ياريت يا شوشو بس ما باليد حيلة ..

_انتي ما زرلة سفرك طموحاتك حدها البلد دي ..

*ياريت القاه محتاجة ليهو والله يعلم والله ..

_اسمعي ، بالمناسبه دي سيدة سافرت ههه ..

*جد ؟ يا بختها والله ..

_بختها ساي ، الله اداها

*هي سافرت كيف ؟

_والله حسب كلانها بي برنامج وظائف

* ما فهمتا

_يعني برنامج في النت فيهو وظائف بتقدمي فيها ..

*انتي جادة ! ما ظنيت في حاجة زي دي

_لالا في حسب كلامها

*طيب دا ساهل كان كدا ، بس وريني الطريقه !

_انا ما بعرف والله دا حسب كلامها هي ..

*ممكن تتصلي بيها نسألها ؟

_الا ايمو ،، دقيقه

*طيب ...

اتصلت بيها شوشو ، ردت بعد تعب ..

_الوووو سوسو كيفك

*حمدلله بخير ، انتي كيفك ؟

_الحمدلله ، كيف ابوها ل رحمة ؟

*كويس حمدلله.. اسمعيني دايرة اسالك

_قولي ..

*البرنامج السافرتي بيهو اسمو شنو +

_هما اتنين واحد مرجان و التاني الوسيط ( برامج حقيفية ) !

*و ديل نظامهم شنو ؟

_بتختاري البلد و تقدمي في الوظائف الفيها .بس ليه بتسالي اكيد م حتسافري انتي ..

*فعلا بس بستفسر كنتا !

_طيب حبي يلا عشان مشغوله اسي !

*طيب شكرا ليكي..

بعد قفلت منها ، قلت ليها دا مستحيل ياخ كلام فاضي ساي !

_قالت لي جربي حتخسري شنو انتي ، لو فاضي ما كان سافرت بيهو ..

*طيب .. اها عملتي شنو مع خطيبك ما حددتو العرس ؟

_ياخ دا ابله ساي والله بس الحب المصبرني عليهو ، اكيد عارفه يعني شنو حب و اخيرا الله وقعك في متوكل !

*متوكل ! منو القاليك انا بحب متوكل ؟

_حسيت كدا ، و بعدين بتقولي هو حابيكي

*ااي لكن انا ما قادرة احدد مشاعري تجاهو

_براكي بتقولي هو انسان كويس و يكفي السندة السندكم ليها دي

*ما بحب اتعامل بالجمايل يا شوشو ، يعني نظام سلف ودين و المردودات دا نا بحبو الحياة ما بتنفع فيها المجامله ..

_اسمعي الونسة حلوة والله لكن اتاخرنا بس اصل البيت اتصل عليكي حاقوم اشوف دي لقت الونسه الظاهر م انتبهت للوقت !

*ياخ كان تبيتو عديل الليله معانا

_هههههه بتهظري صح ، مرة تانيه يا رحمة

*كل مرة بتقولي كدا لكن ما مشكله يا زوله ..

و الونسة انتهت و مشوووو ، و البال انشغل تاني ، عندي عدة غسلتهاا ، و صليت العشاء ، و دخلت غرفتي ، شلت تلفوني ، و بحثت عن البرنامج القالتو لي دااا ،، نزلتو ،، و دخلت فيهوو .... لقيت كل الوظائف محتاجة C.V ,

طلعت منوو...

و اتكلمت مع متوكل و نمته ...

صحيت الصباح ،، فطرتا ونزلتا ، مشيت اقرب مكتبه ، عملت الC.V حقي ، اصلا م عندي اي خبرة بس قلتا م حخسر حاج ، و مشيت السوق اشتريت خضار و حاجات باخر قروش فضلت معاي ، و رجعت البيت ..

دخلت البيت ، لقيت مرة عمي كمان جايانا بالغدا ، قلت في سري حاصل شنووو ، و معاها سماح ، ياهو قعدت معاهم ، لمن خلصنا و مشووو ..

دخلت صليت ، و قعدت في غرفتي و بقيت ارسل لكل وظيفه اشوفها مناسبه

طبعا كلهم طنشوني بشوفو رسالتي و ما بيردوو ،، استمر الوضع دا فترة ..

قلت ارسل لسيدة يمكن دا ما هو البرنامج ،، فعلا دخلت الواتساب من االقروب طلعت رقمها ..

*السلام عليكم سيدة ...

مسافة حتى ردت علي

_رحوم حبيبي ازيك

*الحمدلله بخير

_عمو كيف بقى احسن ؟

*اي الحمدلله ، اسمعيني ، انا لي كم يوم برسل من البرنامج دا مافي زول بيعبرني.. ( رسلت ليها سكرين )

_لالا مرجان احسن دا شكلو ( رسلت لي صورة) و غير كدا انتي شوفي في الكوافيرات احسن و من هناك جازفي وظيفه بشهادتك ..

*ليه يعني ؟

_لانو ما بيلزموكي بخبرة و اوراق ، و اصلا عندك خبرة انتي ..

*طيب بجرب

_طولي بالك اصلا بطنشو لانو كمية بيرسلو وبختارو الاحسن ..

*ان شاءالله ...

طوالي بعد قفلت منها نزلتو ، و بقيت برسل من طرف ، لمن زهجت ،،، و مشيت قعدت مع امي .. قلت ليها امي :

_خير !

*كان جاتني سفرة برا بتقبلي اسافر ؟

_هههه اي بقبل

بتضحكي مالك طيب

_حتجيكي من وين يعني يا رحمة بقيتي تخرفي انتي !

*العند الله ما بعيدة يا امي

_طيب لمن تجيكي نتفاهم

*لا عشان ما ترفضي لي ، عليك الله يا امي جد كدا بتخليني ؟

_اكيد لا يا رحمة

*جادة؟ لا ليه عايني وضعنا بعد شوية حنشحت يا امي ، دا غير ابوي محتاج. للعمليه و ما عندنا ، لا والله يا امي اعفي لي لكن كان الله راد ما بضيع فرصه زي دي ..

_انتي بت براكي تسافري الناس يقولو علينا شنو ؟

*الناس الناس يا امي اخدنا شنو من الناس احنا ؟ م اخدنا حاجة في كل الاحوال الناس بتتكلم ، و انا بت و زي الاف البنات بسافرو براهم ،ما بتجيهم حاجة !

_كدي لمن يجي سفرك دا م نتناقش ف حاجة ف علم الغيب ..

*ربنا يجيبو يا امي ، و ان شاءالله ترضي ..

خلصت كلام معاها ، و رجعت ارسل تاني ، واتسابي اتملا ارقام ...

كل يوم علي امل زول يرد علي ، لكن مافي ،، رجعت عملت صفحه في الفيس بشغلي عشان قطعنا مصاريف ،، بجوني وحدة او اتنين في الاسبوع ، بنمشي بيهم حالنا ..

و جات علينا مصاريف يمنة حقت الجامعه ، امي مشت لخالاتي كل وحدة اتعزرت و اتحججت ليها ، كمان هما محمولين برضوو بي باولادهم ....

نسيت فكرة البرنامج دا نهائي و حذفتو من عندي ، من شدة الزعل .. ورجعت لحياتي اني افتش ان شاءالله اقيف ابيع في دكان دي زاتا مافي ...

في يوم ،، متوكل اتصل علي ، قالي حأجيكم في االبيت عايزك في موضوع وانتي مؤجلاني ليهو فترة ، رايك شنو وكدا ؟

قلت ليهو تعال قاعدين .. قالي حنجي انا و اختي ،، قلت ليهو تشرفوووو ...

قفلت منو ومشيت كلمت امي و رجعت مسكت تلفوني ، لقيت رسالة من رقم غريب .. دخلت لقيت رقم انا مرسلة ليهووو ، كاتبه لي .. الفيزا والتزاكر علينا و الايجار علينا ، و المرتب الاساسي 2000 ، بعد خصم الايجار يصبح 1500 ريال اماراتي ! و اذا شغلج عجبنا و اتفقنا بنعمل ليكي اقامة و مرتبك يزيد .....

انا هنا بقيت ما واعية ، من الفرح قعدت ابكي دي فرصه حقيقيه بالجد كل شويه ارجع اقرا الرسايل بقيت زي المجنونة و انا ماسكة التلفون قالت لي رسلي فيديو لشغلك ، قلت ليها م عندي فيديو حاليا بس بكرة بصور وارسل ليكي و انا موافقه ...

قالت لي خلاص بعد الفيديو رسلي صورة الجواز حقك !

قلت ليها بكرة برسل ليكي الفيديو بس الجواز دا لسه حأطلعو ما عندي ، قالت لي تمام ..

بقيت راحه جاية زي المهترشة ، قروش للجواز ما عندي ! اسوي شنوووو !!

بس بعد شوية يمنة قالت لي متوكل في الصالون ، قلت ليها تمام تمام ، جا في وقتو زاتووو ..

لبست حاجاتي و طلعت و كنت حاسه نفسي هبله من شدة الفرح .. قعدتا بقينا نتونس شوية ،و قال لاختو و يمنة ممكن تخلونا براناا ،، مشو بعد تشغيلات ..

قالي :

_ياخ عذبتيني كل دا عشان اتكلم معاكي !

*ههههههه انا كمان عايزاك في موضوع ما حتصدق مبسوطة انا ..

_قالي واضح لمن يدينك برجفووو ، بس موضوعي الاول

*لا انا الاول

_لا يا رحمة انا اول هههه زي الشفع

*طيب قول انت اول

_ياخ موضوعي بس انو انا والله الحال دا ما عاجبني ، شوفي يا رحمة رايك شنو نعقد عشان اقدر اجيكم ياخ ، وزاتو احساس انك علي ذمتي دا بديني قوة ..

*نعقد !

_ايواا

*ابوي البعقد لي يا متوكل

_عارف وانا داير كدا بس الظروف جبارة يا رحمة ..

*متوكل انا كمان عندي موصوع و سبب يخليني ارفض العقد دا

_خير ؟

*اهلي محتاجين لي يا متوكل ، م حقدر اسي ارتبط بعرس ، عشان كدا انا حأسافر اشتغل

_ اهلك انا بشيلهم زي اهلي ، لو ما قدرتت بعدين قولي كلامك داا ، والحمدلله شغلي اتحسن يا رحمة ..وبعدين تسافري كيف يعني !

*لا ما حنبقى عالة عليك طول العمر و ابوي مجدوع هناك ليهو كم شهر محتاج لعملية و مكتفين بسبب القروش ،،

_طيب نساعد بعض مالو نلمها سوا ..

*موافقه بس انا حاسافر الامارات و ربنا كرمني بشغل من نفس خبرتي لمن ربنا يفرجا ..

_ما جادة صح يا رحمة ، بتهظري انتي ؟

*لا ما بهظر انا جادة

_لا والشغل هنا مالو في بلدك نص اهلك ؟

*القروش بتختلف يا متوكل

_رحمة فكري تاني ارجوكي قرارك دا متهور

*لا ما محتاجة افكر ، فرصه من الله ما بضيعهااا من يدي ...

_بس انا ما موافق يا رحمة ..السفر غلط و ما خيار ، ممكن نقعد هنا ونعمل لينا مشروع بدخلب

* مع احترامي ليك ، بس انا #حأسافر !

_رحمة ، فكري بهدوء فكري في وجهة نظري لو سمحتي ، انتي بنت !

*انتي بنت ! ياخ كل حاجة لا وغلط وحرام وعيب عشان انا بنت ، ليه ياخ البنت دي ما بني آدم برضو ! شوووف ، شوف يا متوكل ، انا بحوجة للسفر داا ، و انا اااسفة لان حأخلي حبي ورا ضهري !

_عندك الحل يا رحمة بس انتي اخترتي الطريق الاصعب ! فا انا اسف اني حأخيرك رغم اني مفروض ما اخيرك بعد جملتك الاخيرة القلتيها دي !

يا انا ،، يا السفر ؟

*السسسفر يا متوكل ✋..